Los, Mloog Ib tug Yaj Saub lub Suab
Thaum peb ua tib zoo xyaum kom mloog thiab ua raws li cov yaj saub uas tseem muaj txoj sia nyob lub suab, peb yuav tau cov koob hmoov uas nyob mus ib txhis.
Tus Tswv hais li no rau tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, hais tias:
“Thiab ntxiv, tej dej num ntawm tus Thawj Tswj Hwm los ntawm lub luag hauj lwm ntawm lub Pov Thawj Hwj Hlob yog los tswj hwm tag nrho lub koom txoos, thiab ua zoo li Mauxes—
“… Muaj tseeb tiag, los ua ib tug pom tau, ib tug txais kev tshwm sim, ib tug txhais lus, thiab ib tug yaj saub, muaj tag nrho Vajtswv tej txiaj ntsim uas nws foom pub rau tus thawj ntawm lub koom txoos” (Lus Qhuab Qhia thiab Kev Khi Lus 107:91–92; ntxiv qhov uas ntawv qaij).
Kuv twb tau koob hmoov vim kuv tau pom Vajtswv tej txiaj ntsim uas Nws foom pub rau Nws cov yaj saub. Kuv xav qhia txog ib lub sij hawm dawb ceev rau nej. Ua ntej kuv ua txoj hauj lwm no, kuv tau pab nrhiav thiab taw qhia txog tej qhov chaw ua lub tuam tsev rau yav tom ntej. Tom qab lub Cuaj Hlis Ntuj 11, 2001, yeej nyuaj hla tej ciaj ciam ntawm lub teb chaws Amelikas. Yog li ntawd, muaj cov mej zeej ntau nyob hauv Vancouver, Canada, uas yuav tsum siv ob peb teev hla ciaj ciam mus rau lub Tuam Tsev Seattle Washington. Thawj Tswj Hwm Gordon B. Hinckley, tus Thawj Tswj Hwm ntawm lub Koom Txoos thaum ntawd, qhia tias tej zaum ib lub tuam tsev nyob hauv Vancouver yuav ua rau cov mej zeej ntawm lub Koom Txoos coob heev tau koob hmoov. Peb txais kev tso cai nrhiav ib qhov chaw, thiab tom qab peb tshuaj xyuas ib qhov chaw uas lub Koom Txoos twb yuav lawm, peb twb saib lwm qhov chaw uas lub Koom Txoos tsis tau yuav.
Peb twb nrhiav ib qho chaw zoo nkauj uas twb tso cai siv rau kev teev ntuj nyob ze Txoj Kev Loj Trans-Canadian lawm. Qhov chaw no yooj yim mus mus los los, muaj ntoo thuv ntau uas zoo nkauj kawg, thiab yog ib qho chaw yooj yim pom ua rau cov neeg tsav tsheb coob pom tau.
Peb twb tso duab thiab daim qhia kev rau Pawg Xaiv Qhov Chaw Ua Tuam Tsev saib hauv lawv txoj kev sib ntsib. Thawj Tswj Hwm Hinckley tso cai rau peb kom ua ntaub ntawv pov thawj thiab ua kev tshawb fawb uas yuav tsum ua. Thaum lub Kaum Ob Hlis Ntuj xyoo ntawd, peb twb rov qab qhia pawg saib xyuas tias tau ua kev tshawb fawb lawm, thiab peb xav tau kev tso cai yuav thaj av no. Tom qab nws hnov peb tej lus qhia, Thawj Tswj Hwm Hinckley hais tias, “Kuv xav tias kuv yuav tsum saib qhov chaw no.”
Lub hli ntawd, ob hnub tom qab Hnub Christmas, peb twb mus rau Vancouver nrog Thawj Tswj Hwm Hinckley; Thawj Tswj Hwm Thomas S. Monson; thiab Bill Williams, ib tug kws ua daim qauv rau lub tuam tsev. Paul Christensen, ceg txheem ntseeg tus thawj tswj hwm, ntsib peb thiab thauj peb mus rau qhov chaw ntawd. Hnub ntawd twb los nag thiab pos huab me ntsis, tiam sis Thawj Tswj Hwm Hinckley tawm lub tsheb thiab pib mus mus los los hauv qhov chaw ntawd.
Tom qab nws siv sij hawm rau ntawm qhov chaw no, kuv nug Thawj Tswj Hwm Hinckley seb yog tias nws puas xav saib lwm qhov chaw uas peb tau xav txog. Nws hais tias, nws yeej yuav nyiam ua li ntawd. Kuv xav tias, yog peb saib lwm qhov chaw, ces peb yuav muab txhua yam zoo sib piv.
Peb twb tsav tsheb ib ncig Vancouver saib lwm qhov chaw, thaum kawg peb twb rov los txog qhov chaw thib ib. Thawj Tswj Hwm Hinckley hais tias, “Nov yeej yog ib qho chaw zoo nkauj.” Ces nws nug hais tias, “Peb mus rau lub tsev sib ntsib ntawm lub Koom Txoos deb li ib feem plaub mais [0.4 km] puas tau?”
Peb teb hais tias, “Tau kawg os, Thawj Tswj Hwm.”
Peb tau rov qab mus nce tsheb thiab tsav mus rau lub tsev sib ntsib. Thaum txog lub tsev teev ntuj ntawd, Thawj Tswj Hwm Hinckley hais tias, “Lem sab laug ntawm no.” Peb twb lem thiab taug txoj kev raws li nws qhia. Txoj kev ntawd nce toj me ntsis.
Thaum lub tsheb txog rau saum lub toj, Thawj Tswj Hwm Hinckley hais tias, “Nres tsheb, nres tsheb os.” Ces nws taw tes rau sab xis rau ib thooj av thiab hais tias, “Qhov chaw no nev? Lub tuam tsev yuav nyob no. Nov yog qhov chaw uas tus Tswv xav ua lub tuam tsev. Yuav puas tau? Yuav puas tau?”
Peb twb tsis tau saib qhov chaw no. Qhov chaw no tsis nyob ze txoj kev loj, thiab tsis muaj dab tsi qhia tias luag xav muab muag. Thaum peb teb hais tias peb tsis paub, Thawj Tswj Hwm Hinckley taw tes rau qhov chaw ntawd thiab rov qab hais dua tias, “Nov yog qhov chaw uas yuav tsum ua lub tuam tsev.” Peb twb nyob ob peb feeb ntxiv, ces peb tau mus rau tshav nyab hoom kom rov qab mus tsev.
Hnub tom qab ntawd, Thawj Tswj Hwm Hinckley hu Tij Laug Williams thiab kuv wb mus rau nws hoob kas. Nws twb tau kos duab txog txhua yam rau ib daim ntawv: tej txoj kev, lub tsev teev ntuj, lem sab laug qhov twg, X rau qhov chaw uas yuav ua lub tuam tsev. Nws nug wb seb wb tau kawm dab tsi. Wb qhia nws tias tsis muaj ib qho chaw uas yuav nyuaj dua li qhov chaw no. Muaj peb tug neeg uas tau yuav qhov chaw no: ib tug los ntawm Canada, ib tug los ntawm India, thiab ib tug los ntawm Suav Teb! Thiab peb tsis tau muaj kev tso cai rau kev teev ntuj.
Nws hais tias, “Ces ua li nej ua tau.”
Tom qab ntawd twb muaj tej txuj ci tseem ceeb. Ob peb hlis tom qab ntawd peb twb yuav thaj av ntawd, thiab tom qab ntawd lub nroog Langley, British Columbia tau tso cai ua ib lub tuam tsev.
Thaum kuv xav txog lub sij hawm no, ua rau kuv txo hwj chim vim kuv paub tias txawm Tij Laug Williams thiab kuv wb tau kawm ntaub kawm ntawv thiab ua hauj lwm ntau xyoo muag av thiab ua tej lub tuam tsev, Thawj Tswj Hwm Hinckley tsis tau kawm li no, tiam sis nws muaj ib yam tseem ceeb tshaj plaws—uas yog lub txiaj ntsim pom tau li ib tug yaj saub. Nws yeej pom tau Vajtswv lub tuam tsev yuav tsum nyob qhov twg.
Thaum tus Tswv txib Tsoom Haiv Neeg Ntseeg hauv lub caij nyoog no kom ua ib lub tuam tsev, Nws tshaj tawm tias:
“Tiam sis cia li txhim tsa ib lub tsev los rau kuv lub npe raws li tus qauv uas kuv yuav qhia rau lawv.
“Thiab yog hais tias kuv cov neeg tsis txhim tsa lub tsev raws li tus qauv uas kuv yuav qhia … , kuv yuav tsis txais yuav lub tsev no los ntawm lawv txhais tes” (Lus Qhuab Qhia thiab Kev Khi Lus 115:14–15).
Zoo ib yam li Tsoom Haiv Neeg Ntseeg thaum yav tas los, hnub no peb yeej zoo ib yam: tus Tswv twb tau qhia thiab tseem qhia ntxiv rau tus Thawj Tswj Hwm ntawm lub Koom Txoos txog tej txheej txheem uas yuav tsum ua hauv Vajtswv lub nceeg vaj nyob hauv peb lub caij nyoog. Thiab, rau txhua tus neeg, nws qhia kom peb txhua tus paub coj peb lub neej, kom tus Tswv yuav txaus siab rau peb txoj kev coj yam ntxwv.
Thaum lub Plaub Hlis Ntuj xyoo 2013 kuv tau hais txog tej hauj lwm uas yuav tsum ua kom npaj ib lub hauv paus ntawm txhua lub tuam tsev kom thiaj li muaj zog txaus tiv tau huab cua phem thiab tej kev puas tsuaj uas lub tuam tsev yuav raug. Tiam sis lub hauv paus yeej yog qhov chiv thawj xwb. Peb siv cov pob zeb ntau ua tau ib lub tuam tsev, uas muab tso ua ke raws li tus yam ntxwv uas tau npaj ua ntej. Yog peb yuav coj peb lub neej zoo ib yam li lub tuam tsev raws li tus Tswv tau qhia peb (saib 1 Kauleethaus 3:16–17), peb yuav tsum nug peb tus kheej hais tias, “Peb yuav tsum tso cov pob zeb twg raws li tus txheej txheem kom peb lub neej yuav zoo nkauj, muaj yeeb koob, thiab tiv tau huab cua phem ntawm lub ntiaj teb?”
Peb nrhiav tau lus teb rau lus nug no nyob hauv Phau Ntawv Maumoos. Tus Yaj Saub Yauxej Xamiv tau hais txog Phau Ntawv Maumoos tias, “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv” (zaj lus piav txog Phau Ntawv Maumoos). Nyob hauv zaj lus piav rau Phau Ntawv Maumoos, peb kawm hais tias cov uas txais tus Vaj Ntsuj Plig Dawb Huv txoj kev ua tim khawv [tias Phau Ntawv Maumoos yog Vajtswv txoj lus] yeej yuav paub los ntawm tib lub hwj chim hais tias Yexus Khetos yog tus Cawm Seej ntawm lub ntiaj teb, Yauxej Xamiv yog Nws tus txais kev tshwm sim [thiab tus yaj saub ntawm txoj Kev Muab txoj Moo Zoo Txum Tim Rov Qab Los], thiab Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus Tswv lub nceeg vaj uas twb tau rov qab txhim tsa hauv lub ntiaj teb lawm.
Tej no yog tej yam tseem ceeb uas yog lub hauv paus ntawm peb txoj kev ntseeg thiab zaj lus tim khawv:
-
Yexus Khetos yog tus Cawm Seej ntawm lub ntiaj teb.
-
Phau Ntawv Maumoos yog Vajtswv txoj lus.
-
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Vajtswv lub nceeg vaj nyob hauv lub ntiaj teb.
-
Yauxej Xamiv yog ib tug yaj saub, thiab peb muaj cov yaj saub hauv lub ntiaj teb hnub no.
Ob peb hlis tas los, kuv twb mloog txhua zaj hauv lub tuam rooj sab laj uas Thawj Tswj Hwm Nelson tau hais txij thaum lawv hu nws ua ib tug Thwj Tim los. Ua li no los twb hloov kuv lub neej lawm. Thaum kuv tau kawm thiab xav txog 34 xyoos uas Thawj Tswj Hwm Nelson tau qhia txog nws laj lim tswv yim, ua rau kuv pom tau tej lub ntsiab meej uas nws yeej ib txwm hais lawm. Txhua lub ntsiab no hais txog tej lub pob zeb uas kuv nyuam qhuav hais txog los sis yog ib lub pob zeb tseem ceeb rau lub tuam tsev ntawm peb lub neej. Tej no yog kev ntseeg tus Tswv Yexus Khetos, kev hloov siab lees txim, kev cai raus dej rau kev zam txim rau peb tej kev txhaum, lub txiaj ntsim Vaj Ntsuj Plig Dawb Huv, kev txhiv cov neeg dim thiab tej hauj lwm hauv lub tuam tsev, kev hwm Hnub Caiv kom dawb ceev, xav txog qhov kawg thaum yus pib ua tej yam, ua raws nraim li yus tej kev khi lus. Thawj Tswj Hwm Nelson tau hais txog tag nrho tej yam no nrog kev hlub thiab kev mob siab.
Yexus Khetos yog tus ncej zeb thiab lub hauv paus ntawm lub Koom Txoos thiab peb lub neej. Nov yog Nws lub Koom Txoos. Thawj Tswj Hwm Nelson yog Nws tus yaj saub. Thawj Tswj Hwm Nelson tej lus qhia ua tim khawv txog Yexus Khetos lub neej thiab tej cwj pwm kom pab peb. Nws hais lus nrog kev hlub thiab kev txawj ntse txog tus Cawm Seej txoj kev thiab tus Cawm Seej lub luag hauj lwm. Nws kuj tau ua tim khawv ntau zaus txog qhov uas Vajtswv hu cov yaj saub ua—cov Thawj Tswj Hwm ntawm lub Koom Txoos—uas nws tau ua hauj lwm rau.
Nim no, hnub no, peb muaj cib fim txhawb nqa nws los ua tus Tswv tus yaj saub uas nyob hauv lub ntiaj teb. Peb yeej ib txwm txhawb nqa peb cov thawj coj ntawm lub Koom Txoos raws li tus txheej txheem tsa tes ua ib ceg kaum kom qhia tias peb lees txais thiab txhawb nqa lawv. Peb twb ua li no ob peb feeb tas los lawm. Tiam sis kev txhawb nqa tsis yog ua li no xwb. Zoo li nqe nyob hauv phau Lus Qhuab Qhia thiab Kev Khi Lus 107:22, peb yuav tsum “txhawb nqa [Thawj Pawg Thawj Tswj Hwm] los ntawm txoj kev tso siab, kev ntseeg, thiab kev thov Vajtswv ntawm cov ntseeg.” Peb txhawb nqa tus yaj saub tiag tiag thaum peb coj yam ntxwv ntseeg nws tej lus, muaj kev ntseeg ua li nws hais, thiab thov kom tus Tswv foom koob hmoov rau nws tas mus li.
Thaum kuv xav txog Thawj Tswj Hwm Russell M. Nelson, kuv txais kev nplij siab los ntawm tus Cawm Seej tej lus no hais tias, “Thiab yog hais tias kuv cov neeg yuav mloog kuv lub suab, thiab lub suab ntawm kuv cov tub qhe uas kuv tau tsa los coj kuv cov neeg, saib seb, kuv hais tseeb rau nej tias, lawv yuav tsis raug muab tshem tawm ntawm lawv qhov chaw mus” (Lus Qhuab Qhia thiab Kev Khi Lus 124:45).
Qhov uas peb mloog thiab ua raws li cov yaj saub uas tseem muaj txoj sia nyob tej lus yuav ua rau peb lub neej hloov loj heev. Peb yuav txais dag zog. Peb yuav txais kev nplij siab thiab ntseeg tus Tswv. Peb yuav mloog tus Tswv txoj lus. Peb yuav paub txog Vajtswv txoj kev hlub. Peb yuav paub ua neej raws li Vajtswv lub hom phiaj.
Kuv hlub thiab txhawb nqa Thawj Tswj Hwm Russell M. Nelson thiab lwm tus uas Vajtswv hu ua cov yaj saub, cov pom tau, thiab cov txais kev tshwm sim. Kuv ua tim khawv tias nws muaj tag nrho tej txiaj ntsim uas tus Tswv tau tso rau Nws, thiab kuv ua tim khawv tias thaum peb ua tib zoo xyaum kom mloog thiab ua raws li cov yaj saub uas tseem muaj txoj sia nyob lub suab, peb yuav ua peb lub neej raws li tus Tswv tus yam ntxwv, thiab peb yuav tau cov koob hmoov uas nyob mus ib txhis. Tus Tswv caw txhua tus ua li no. Los, mloog ib tug yaj saub lub suab; muaj tseeb tiag, los cuag Khetos thiaj muaj txoj sia. Los ntawm Yexus Khetos lub npe, amees.