1 Thiab tau muaj tias Enauj hais nws cov lus mus ntxiv, hais tias: Saib seb, peb txiv Adas qhia txog tej yam no, thiab coob leej tau ntseeg thiab tau hloov los ua Vajtswv cov tub, thiab coob leej tsis ntseeg, thiab tau piam sij thaum lawv tseem muaj kev txhaum, thiab ntsia nrog txoj kev ntshai, raug kev tsim txom, tos Vajtswv txoj kev npau taws uas chim siab heev nchuav los rau lawv.

2 Thiab txij lub sij hawm ntawd mus Enauj pib qhia tej yuav muaj los yav tom ntej, hais rau cov neeg tias: Thaum kuv tab tom taug kev, thiab thaum kuv nyob saum qhov chaw Mahuzas, thiab thov tus Tswv, tau muaj ib lub suab saum ntuj los, hais tias—Koj cia li tig, thiab koj mus lawm saum lub rooj Xime-oos.

3 Thiab tau muaj tias kuv tau tig thiab nce mus saum lub roob; thiab thaum kuv nyob saum lub roob, kuv pom lub rooj ntug qhib, thiab lub yeeb koob los roos kuv;

4 Ces kuv pom tus Tswv; thiab nws sawv ntawm kuv xub ntiag, thiab nws tham nrog kuv, ib yam li ib tug neeg tham nrog lwm tus, tim ntsej tim muag; thiab nws hais rau kuv tias: Ntsia saib, thiab kuv yuav muab lub ntiaj teb ntau tiam neeg rau koj saib.

5 Thiab tau muaj tias kuv pom nyob lub vos hav Sumas, thiab xyuas seb, ib co neeg coob coob nyob hauv tej tsev pheeb suab ntaub, uas yog Sumas cov neeg.

6 Thiab ntxiv tus Tswv hais rau kuv tias: Ntsia saib; ces kuv txawm ntsia mus rau sab qaum teb, thiab kuv pom cov neeg Kana-as, uas nyob hauv cov tsev pheeb suab ntaub.

7 Thiab tus Tswv hais rau kuv tias: Cia li qhia tej yuav muaj los yav tom ntej; ces kuv tau qhia tej yuav muaj los yav tom ntej, hais tias: Ntsia cov neeg Kana-as, uas coob heev, yuav hnav khaub ncaws ua rog mus tawm tsam cov neeg Sumas, thiab yuav tua lawv kom lawv yuav puas tsuaj huv tib si; thiab cov neeg Kana-as yuav faib lawv tus kheej nyob hauv thaj av, thiab thaj av yuav qhuav thiab tsis txi txiv, thiab tsis muaj lwm cov neeg yuav nyob hauv tsuas yog cov neeg Kana-as xwb;

8 Vim saib seb, tus Tswv yuav foom tsis zoo rau thaj av kom kub kub, thiab txoj kev qhuav ntawd yuav nyob mus ib txhis; thiab tau muaj ib qho dub tawv los rau Kana-as tej xeeb leej xeeb ntxwv, kom txhua haiv neeg ntxub lawv.

9 Thiab tau muaj tias tus Tswv hais rau kuv tias: Ntsia saib; ces kuv txawm ntsia, thiab kuv pom thaj av Saloos, thiab thaj av Enauj, thiab thaj av Oonaws, thiab thaj av Hinais, thiab thaj av Xees, thiab thaj av Haneles, thiab thaj av Hananihas, thiab tag nrho tej neeg nyob hauv;

10 Thiab tus Tswv hais rau kuv tias: Mus rau cov neeg no, thiab hais rau lawv tias—Hloov siab lees txim, tsam kuv tuaj thiab foom tsis zoo rau lawv, thiab lawv tuag.

11 Thiab nws muab ib lo lus txib rau kuv kom kuv muab neeg ua kev cai raus dej los ntawm Leej Txiv, thiab ntawm Leej Tub, uas muaj txoj kev tshav ntuj thiab kev tseeb nplua mias, thiab ntawm tus Vaj Ntsuj Plig Dawb Huv lub npe, uas ua pov thawj txog Leej Txiv thiab Leej Tub.

12 Thiab tau muaj tias Enauj hais ntxiv kom cov neeg hloov siab lees txim, tsuas tshuav cov neeg Kana-as xwb.

13 Enaj txoj kev ntseeg muaj zog kawg nkaus nws thiaj li coj Vajtswv cov neeg mus, thiab lawv cov yeeb ncuab tuaj tawm tsam lawv; ces nws hais tus Tswv txoj lus, thiab tej av au deeg daws, thiab tej roob cia li pawv, twb raws li nws lo lus txib; thiab tej dej twb lem ntawm txoj kev uas dej ntws; thiab tau hnov lub suab tsov ntxhuav nyooj tom hav zoov tuaj; thiab txhua lub teb chaws ntshai heev, vim Enauj txoj lus muaj hwj chim heev, thiab lub hwj chim ntawm cov lus uas Vajtswv tau muab rau nws hais muaj zog heev.

14 Kuj tau muaj ib thaj av tawm puag hauv dej hiav txwv tuaj, thiab cov yeeb ncuab rau Vajtswv cov neeg ntshai heev kawg nkaus, lawv thiaj khiav thiab mus sawv deb deb thiab mus rau hauv thaj av uas tawm puag hauv hiav txwv tuaj.

15 Thiab cov neeg loj loj ntawm thaj av, kuj sawv deb deb; thiab muaj ib txoj kev foom tsis zoo mus rau txhua haiv neeg uas tawm tsam Vajtswv;

16 Thiab txij lub sij hawm ntawd mus tau muaj kev ua rog thiab nqaij ntuag ntshav nrog nyob hauv lawv; tiam sis tus Tswv los thiab nyob nrog nws cov neeg, thiab lawv nyob raws li kev ncaj ncees.

17 Txhua haiv neeg hwm tus Tswv, vim tus Tswv lub yeeb koob ntau kawg nkaus, uas nyob rau ntawm nws cov neeg. Thiab tus Tswv foom koob hmoov rau thaj av, thiab nws cov neeg tau koob hmoov nyob saum tej roob, thiab saum tej chaw siab, thiab tau vam meej.

18 Thiab tus Tswv muab nws cov neeg hu ua Xi-oos, vim lawv koom siab koom ntsws, thiab nyob raws li kev ncaj ncees; thiab tsis muaj cov pluag nyob hauv lawv.

19 Thiab Enauj tshaj tawm mus ntxiv ntawm kev ncaj ncees mus rau Vajtswv cov neeg. Thiab tau muaj tias nyob hauv nws lub neej, nws tsa ib lub nroog uas hu ua lub Nroog Dawb Huv, uas yog Xi-oos.

20 Thiab tau muaj tias Enauj nrog tus Tswv tham; thiab nws hais rau tus Tswv tias: Xi-oos yuav muaj kev nyab xeeb tiag tiag mus ib txhis li. Tiam sis tus Tswv hais rau Enauj tias: Kuv tau foom koob hmoov rau Xi-oos, tiam sis kuv tau foom tsis zoo rau cov neeg uas tshuav.

21 Thiab tau muaj tias tus Tswv muab tag nrho tej neeg nyob hauv lub ntiaj teb ua rau Enauj saib; thiab nws pom, thiab xyuas seb, Xi-oos, muaj ib hnub, tus Tswv coj Xi-oos mus saum ntuj ceeb tsheej lawm. Thiab tus Tswv hais rau Enauj tias: Saib kuv qhov chaw nyob mus ib txhis li.

22 Thiab Enauj kuj pom cov neeg seem tshuav uas yog Adas cov tub; thiab lawv yog tag nrho Adas cov tub ki sib xyaws tsuas tshuav Kayees cov tub ki xwb, vim Kayees cov tub ki dub, thiab tsis muaj feem nyob nrog lawv.

23 Thiab tom qab ntawd tus Tswv coj Xi-oos mus dua saum ntuj ceeb tsheej lawm, Enauj pom, thiab xyuas seb, txhua haiv neeg ntiaj teb nws twb pom ntawm nws xub ntiag;

24 Thiab tau muaj ib tiam neeg los dhau ib tiam; thiab Enauj nyob ib qho chaw siab thiab nyob puag saud, twb nyob ntawm Leej Txiv, thiab Neeg Leej Tub xub ntiag; thiab saib seb, Dab Ntxwg Nyoog lub hwj chim twb los rau txhua qhov chaw hauv lub ntiaj teb.

25 Thiab nws pom tej tim tswv nqis saum ntuj los; thiab nws hnov ib lub suab nrov nrov hais tias: Kev txom nyem, kev txom nyem los raug cov neeg hauv lub ntiaj teb.

26 Thiab nws pom Dab Ntxwg Nyoog; thiab Dab Ntxwg Nyoog muaj ib txoj saw hlau loj loj ntawm nws tes, thiab txoj saw ua rau kev tsaus ntuj npog tag nrho lub ntiaj teb; thiab Dab Ntxwg Nyoog tsa muag ntsia thiab luag, thiab nws cov tim tswv xyiv fab.

27 Thiab Enauj pom cov tim tswv nqis saum ntuj los, tau ua tim khawv txog Leej Txiv thiab Leej Tub; thiab tus Vaj Ntsuj Plig Dawb Huv los nyob hauv ntau tus neeg, thiab lub hwj chim ceeb tsheej tau coj lawv mus rau hauv Xi-oos lawm.

28 Thiab tau muaj tias tus Vajtswv ceeb tsheej ntsia cov neeg seem tshuav, thiab nws quaj; thiab Enauj ua pov thawj txog qhov no, hais tias: Ceeb tsheej ho quaj taus li cas, thiab poob lawv tej kua muag zoo li tej nag los rau saum tej roob?

29 Thiab Enauj hais rau tus Tswv tias: Koj ho quaj taus li cas, thaum pom tias koj twb dawb huv, thiab nyob tag nrho ib txhiab mus tag nrho ib txhis?

30 Thiab yog hais tias neeg muaj peev xwm suav tas tej yam me me uas muaj nyob hauv lub ntiaj teb, muaj tseeb tiag, ntau plhom lub ntiaj teb zoo li lub no, twb tsis npaum li qhov pib ntawm tag nrho tej uas koj tau tsim; thiab koj tej ntaub thaiv los tseem nrhab tawm; thiab txawm li ntawd los koj yeej tseem nyob ntawd, thiab koj lub xub ntiag twb nyob ntawd; thiab koj ncaj ncees thiab; koj muaj siab hlub tshua thiab siab zoo mus ib txhis.

31 Thiab koj tau coj Xi-oos mus nyob ntawm koj xub ntiag, tawm ntawm tag nrho tej uas koj tau tsim, nyob tag nrho ib txhiab mus tag nrho ib txhis; thiab tsis muaj dab tsi tsuas yog muaj kev kaj siab, kev txim lij, thiab qhov tseeb yog koj lub rooj theej kiab chaw nyob; thiab txoj kev hlub tshua yuav ua koj ntej thiab tsis muaj qhov kawg; yog li koj ho quaj taus li cas?

32 Tus Tswv hais rau Enauj tias: Ntsia koj cov kwv tij cov muam; lawv yog kuv txhais tes kiag tsim, thiab kuv muab lawv tej kev txawj ntse rau lawv, thaum kuv tsim lawv; thiab nyob hauv lub Vaj Edees, kuv twb muab neeg txoj kev ywj siab xaiv rau lawv.

33 Thiab rau koj cov kwv tij cov muam kuv tau hais, thiab kuj tau muab lus txib, hais tias kom lawv ib leeg hlub ib leeg, thiab kom lawv xaiv kuv, uas yog lawv Txiv; tiam sis saib seb, lawv tsis muaj siab hlub, thiab lawv ntxub lawv roj ntshav;

34 Thiab cov hluav taws ntawm kuv txoj kev chim siab yeej npau tawm tsam lawv; thiab los ntawm kuv txoj kev meem txom kub lug kuv yuav xa dej nyab los rau lawv, vim kuv txoj kev npau taws heev twb npau tawm tsam lawv lawm.

35 Saib seb, kuv yog Vajtswv; Neeg Dawb Huv yog kuv lub npe; Neeg Ntuas yog kuv lub npe; thiab Tsis Muaj Qhov Kawg thiab Nyob Mus Ib Txhis yog kuv lub npe thiab.

36 Yog li ntawd, kuv muaj peev xwm xyab kuv ob sab tes thiab tuav tau tag nrho tej uas kuv tau tsim; thiab kuv lub qhov muag muaj peev xwm pom tshab tej ntawd thiab; thiab nyob hauv tag nrho tej kuv txhais tes tau tsim twb tsis muaj kev phem ntau npaum li uas muaj nyob hauv koj cov kwv tij cov muam.

37 Tiam sis saib seb, lawv tej kev txhaum yuav nyob rau saum lawv txiv taub hau; Dab Ntxwg Nyoog yuav ua lawv txiv; thiab lawv lub txim yog kev nyuaj siab; thiab tag nrho lub ceeb tsheej yuav quaj rau lawv, twb yog tag nrho tej kuv txhais tes tau tsim; yog li ntawd tsis tsim nyog rau ceeb tsheej quaj los, thaum pom tias cov neeg no yuav raug txom nyem?

38 Tiam sis saib seb, cov neeg uas koj lub qhov muag pom no yuav piam sij hauv kev dej nyab; thiab saib seb, kuv yuav muab lawv kaw nkaus; kuv tau npaj ib lub tsev kaw rau lawv.

39 Thiab tus uas kuv tau xaiv lawm tau thov nyob ntawm kuv xub ntiag. Yog li ntawd, nws raug mob rau lawv tej kev txhaum; npaum li uas lawv yuav hloov siab lees txim nyob rau hnub uas tus kuv Xaiv yuav rov qab los cuag kuv, thiab ua ntej hnub ntawd lawv yuav raug kev tsim txom;

40 Yog li ntawd, vim qhov no es ceeb tsheej thiaj quaj, muaj tseeb tiag, thiab tag nrho tej kuv txhais tes tau tsim.

41 Thiab tau muaj tias tus Tswv tau hais lus rau Enauj, thiab muab txhua yam noob neej ua qhia rau Enauj; yog li ntawd Enauj twb paub lawm, thiab pom lawv tej kev phem, thiab lawv tej kev nyuaj siab, thiab quaj thiab xyab nws ob txhais npab, thiab mob nws lub siab dav li ib txhiab ib txhis; thiab nws lub siab khuv leej; thiab tag nrho tej Vajtswv tsim deeg daws.

42 Thiab Enauj kuj tau pom Nau-as, thiab nws tsev neeg; hais tias Nau-as cov xeeb leej xeeb ntxwv yuav txais kev cawm dim nrog ib txoj kev cawm seej ntawm sab cev nqaij daim tawv;

43 Yog li ntawd Enauj pom tias Nau-as txua ib lub nkoj loj loj; thiab pom tias Vajtswv zoo siab rau qhov ntawd, thiab tuav qhov ntawd nyob hauv nws tus kheej txhais tes; tiam sis rau cov seem tshuav ntawm cov neeg phem ces dej nyab tau los thiab muab lawv nqos lawm.

44 Thiab thaum Enauj tau pom qhov no, nws muaj kev iab siab, thiab tau quaj rau nws tej kwv tij, thiab tau hais rau ceeb tsheej tias: Kuv yuav tsis kam txais kev nplij siab; tiam sis tus Tswv hais rau Enauj tias: Koj cia li zoo siab, thiab xyiv fab; thiab ntsia saib.

45 Thiab tau muaj tias Enauj ntsia: thiab los ntawm Nau-as, nws tau pom tag nrho cov neeg nyob hauv lub ntiaj teb; thiab nws thov tus Tswv, hais tias: Tus Tswv hnub mam los thaum twg? Thaum twg es tus Ncaj Ncees mam raug ua nqaij ntuag ntshav nrog, kom tag nrho cov uas quaj ntsuag yuav hloov ua dawb huv thiab tau txoj sia nyob mus ib txhis?

46 Thiab tus Tswv tau hais tias: Hnub ntawd yuav los nyob hauv lub caij nyoog nruab nrab, hauv lub caij nyoog uas muaj kev phem thiab kev pauj.

47 Thiab saib seb, Enauj tau pom hnub Neeg Leej Tub los, twb yog thaum muaj cev nqaij daim tawv; thiab nws lub siab xyiv fab, hais tias: Tus Ncaj Ncees raug muab dai, thiab tus Me Nyuam Yaj raug muab tua li tau npaj puag thaum ntuj tsim teb raug los lawm; thiab los ntawm txoj kev ntseeg kuv nyob ntawm Leej Txiv xub ntiag, thiab saib seb Xi-oos nrog kuv.

48 Thiab tau muaj tias Enauj tau ntsia rau hauv lub ntiaj teb; thiab nws tau hnov ib lub suab puag hauv ntiaj teb tuaj, hais tias: Kev txom nyem, kev txom nyem raug kuv, uas yog tib neeg leej niam; kuv mob, kuv nkees, vim yog kuv cov me nyuam tej kev phem. Thaum twg kuv mam so, thiab yuav ntxuav tej kev vuab tsuab uas tau tawm ntawm kuv mus? Thaum twg kuv tus Tsim mam ua rau kuv hloov ua dawb huv, kom kuv tau so, thiab cia kev ncaj ncees nyob ntawm kuv lub ntsej muag ib ntus?

49 Thiab thaum Enauj hnov lub ntiaj teb nyiav, ua rau nws quaj, thiab thov tus Tswv, hais tias: Auj tus Tswv, koj tsis muaj kev khuv leej rau lub ntiaj teb no los? Koj tsis foom koob hmoov rau Nau-as cov me nyuam los?

50 Thiab tau muaj tias Enauj thov ntxiv rau tus Tswv, hais tias: Kuv thov koj, auj tus Tswv, los ntawm koj Tib Leeg Tub lub npe, uas yog Yexus Khetos, kom koj yuav muaj kev hlub tshua rau Nau-as thiab nws cov tub ki, kom lub ntiaj teb yuav tsis raug dej nyab npog ntxiv lawm.

51 Thiab tus Tswv xyeej tsis taus; ces nws khi lus nrog Enauj, thiab cog kev lav lus rau nws tias, nws yuav tsis cia dej nyab ntxiv lawm; hais tias nws yuav hais lus rau Nau-as cov me nyuam;

52 Ces tus Tswv muab ib lo lus tshaj tawm uas hloov tsis tau xa mus, hais tias yuav muaj ib co seem tshuav ntawm Enauj cov tub ki nyob hauv txhua haiv neeg, thaum tseem muaj lub ntiaj teb;

53 Thiab tus Tswv hais tias: Tus uas los ntawm nws cov tub ki tus Mexiyas yuav los tau koob hmoov; vim nws hais tias—Kuv yog Mexiyas, Xi-oos tus Vaj Ntxwv, lub Pob Zeb Saum Ceeb Tsheej, uas dav li ib txhiab ib txhis; tus uas nkag ntawm lub rooj vag los thiab nce mus los ntawm kuv ces tus ntawd yuav tsis poob ib zaug li; yog li ntawd, cov uas kuv tau hais txog no tau koob hmoov, vim lawv yuav tawm los nrog tej zaj nkauj xyiv fab kav ib txhis.

54 Thiab tau muaj tias Enauj tau thov tus Tswv, hais tias: Thaum Neeg Leej Tub los ntawm cev nqaij daim tawv, lub ntiaj teb puas yuav tau so? Kuv thov koj, muab tej yam no ua rau kuv pom.

55 Ces tus Tswv tau hais rau Enauj tias: Ntsia saib, ces nws txawm ntsia thiab pom Neeg Leej Tub raug muab ntsia rau saum tus ntoo khaub lig, raws li kab lis kev cai ntawm neeg;

56 Thiab nws hnov ib lub suab nrov nrov; thiab txoj kev tsaus tau npog lub ntuj; thiab tag nrho tej Vajtswv tau tsim txawm nyiav; thiab lub ntiaj teb nyooj; thiab tej pob zeb tawg; thiab haiv neeg ntseeg sawv los, thiab tau meej mom ntoo ntawm Neeg Leej Tub sab tes xis, nrog tej meej mom muaj yeeb koob;

57 Thiab tag nrho cov ntsuj plig uas raug kaw tau tawm los, thiab sawv ntawm Vajtswv sab tes xis; thiab cov tseem tshuav raug khi saw hlau ntawm txoj kev tsaus ntuj tshwj cia kom txog hnub txiav txim tseem ceeb.

58 Thiab ntxiv Enauj quaj thiab thov tus Tswv, hais tias: Thaum twg lub ntiaj teb mam tau so?

59 Thiab Enauj tau pom Neeg Leej Tub nce mus cuag Leej Txiv; thiab nws thov tus Tswv, hais tias: Koj tsis rov qab los rau hauv ntiaj teb no lawm los? Los ntawm txoj kev xav tias koj twb yog Vajtswv, thiab kuv paub koj, thiab koj tau cog lus rau kuv, thiab tau txib kom kuv yuav tsum thov Vajtswv los ntawm koj Tib Leeg Tub lub npe; koj tau tsim kuv, thiab tau pub kuv muaj txoj cai los tau koj lub rooj theej kiab, thiab tsis yog ntawm kuv tus kheej, tiam sis los ntawm koj tus kheej txoj kev tshav ntuj; yog li ntawd, kuv nug koj saib koj puas yuav tsis rov qab los rau hauv lub ntiaj teb.

60 Ces tus Tswv hais rau Enauj tias: Ib yam li kuv muaj sia nyob, ces kuv yuav los nyob hauv hnub nyoog kawg, nyob hauv lub caij nyoog uas muaj kev phem thiab kev pauj, kom muaj raws li txoj kev lav lus uas kuv tau lav rau koj lawm ntsig txog Nau-as cov me nyuam;

61 Thiab yuav muaj ib hnub thaum lub ntiaj teb yuav tau so; tiam sis ua ntej hnub ntawd lub ntuj yuav tsaus, thiab ib daim ntaub thaiv uas tsaus ntuj yuav npog lub ntiaj teb; thiab lub ntuj yuav co, thiab lub ntiaj teb thiab; thiab noob neej yuav raug tej kev txom nyem heev, tiam sis kuv yuav tshwj kuv cov neeg tseg cia;

62 Thiab kuv yuav xa kev ncaj ncees saum ntuj ceeb tsheej los; thiab kuv yuav xa kev tseeb tawm hauv lub ntiaj teb mus, mus ua tim khawv txog kuv Tib Leeg Tub; nws txoj kev sawv rov los; muaj tseeb tiag, thiab txhua tus txoj kev sawv rov los; thiab kuv yuav ua kom kev ncaj ncees thiab kev tseeb mus thoob plaws lub ntiaj teb ib yam li dej nyab, mus sau nthwv kuv cov neeg uas tau xaiv tseg lawm tim plaub ceg kaum ntuj, los mus rau ib qho chaw uas kuv yuav npaj, uas yog ib lub Nroog Dawb Huv, kom kuv cov neeg yuav sia lawv tej siv, thiab yuav tos ntsoov rau lub sij hawm kuv los; vim yuav muaj kuv lub tuam tsev, thiab yuav hu lub nroog ntawd ua Xi-oos, uas yog lub nroog Yeluxalees Tshiab.

63 Thiab tus Tswv hais rau Enauj tias: Thaum ntawd ces koj thiab tag nrho koj lub nroog yuav ntsib lawv nyob ntawd, ces peb yuav txais lawv los rau hauv peb xub ntiag, thiab lawv yuav pom peb; thiab peb yuav pheeb rau lawv caj dab thiab lawv yuav pheeb rau peb caj dab, thiab peb yuav sib nwj;

64 Thiab kuv qhov chaw nyob yuav nyob ntawd, thiab lub nroog dawb huv ntawd yog Xi-oos, uas yuav tawm los ntawm tag nrho tej uas kuv tau tsim; thiab lub ntiaj teb yuav tau so ntev li ib txhiab xyoos.

65 Thiab tau muaj tias Enauj pom lub sij hawm Neeg Leej Tub los, nyob hauv hnub nyoog kawg, los nyob hauv lub ntiaj teb nrog kev ncaj ncees ntev li ib txhiab xyoos.

66 Tiam sis ua ntej hnub ntawd nws pom muaj kev txom nyem heev nyob hauv cov neeg phem; thiab nws kuj pom cov dej hiav txwv, hais tias cov dej hiav txwv muaj teeb meem, thiab pom neeg lub siab poob tag, tos ntsoov nrog txoj kev ntshai ntawm tus Vajtswv uas Muaj Hwj Chim Tag Nrho txoj kev txiav txim, uas yuav los rau cov neeg phem.

67 Thiab tus Tswv muab txhua yam ua rau Enauj pom, twb mus txog ntua qhov kawg ntiaj teb; thiab nws pom hnub ntawm cov neeg ncaj ncees, lub sij hawm ntawm lawv txoj kev txhiv dim, thiab txais kev xyiv fab puv npo.

68 Thiab txhua hnub ntawm Xi-oos, thaum Enauj ua neej nyob, muaj peb puas thiab rau caum tsib xyoos.

69 Thiab Enauj thiab tag nrho nws cov neeg mus kev nrog Vajtswv, thiab Vajtswv nyob nrog Xi-oos; thiab tau muaj tias tsis muaj Xi-oos lawm, vim Vajtswv tau txais Xi-oos mus nyob ntawm nws tus kheej xub ntiag lawm; thiab txij ntawd mus txawm muaj lus hais tawm tias, Xi-oos Khiav Mus Lawm.