1 Lub ntuj thiab lub ntiaj teb tsim tiav li no, thiab tag nrho txhua tsav yam.

2 Thiab nyob rau hnub xya kuv, Vajtswv, ua tiav kuv tej hauj lwm, thiab txhua yam uas kuv tau tsim; thiab nyob rau hnub xya kuv so ntawm tag nrho kuv tej hauj lwm, thiab txhua yam uas kuv tau tsim twb tiav lawm, thiab kuv, Vajtswv, pom hais tias txhua yam yeej zoo;

3 Thiab kuv, Vajtswv, foom koob hmoov rau hnub xya, thiab muab hnub xya hloov ua dawb huv; vim hnub ntawd kuv tau so ntawm tag nrho kuv txoj hauj lwm uas kuv, Vajtswv, tau tsim thiab tau ua.

4 Thiab nim no, saib seb, kuv hais rau koj tias, tej no yog tej caij tsim lub ntuj thiab lub ntiaj teb, thaum tsim tau tej ntawd, nyob rau hnub uas kuv, tus Tswv uas yog Vajtswv, tau tsim lub ntuj thiab lub ntiaj teb,

5 Thiab txhua tsob nroj tsuag xyoob ntoo nruab nrag ua ntej muaj hauv lub ntiaj teb, thiab txhua yam qoob loo nruab nrag ua ntej loj tuaj. Vim kuv, tus Tswv uas yog Vajtswv, tau tsim txhua yam, uas kuv tau hais no, ntawm sab ntsuj plig, ua ntej tau tsim txhua yam los nyob hauv lub ntiaj teb. Vim kuv, tus Tswv uas yog Vajtswv, tsis tau ua kom nag los rau hauv lub ntiaj teb. Thiab kuv, tus Tswv uas yog Vajtswv, tau tsim tag nrho noob neej; thiab tseem tsis tau muaj ib tug tib neeg mus ncaws teb; vim kuv tau tsim lawv nyob saum ntuj; thiab tseem tsis tau muaj tej uas muaj cev nqaij daim tawv nyob hauv lub ntiaj teb, los yog hauv dej, los yog saum nruab ntug;

6 Tiam sis kuv, tus Tswv uas yog Vajtswv, hais lus, ces muaj dej cia li txia hauv nruab tiv txwv tuaj, ntxaum daim av ntiaj teb noo zaws thoob plaws.

7 Thiab kuv, tus Tswv uas yog Vajtswv, muab av los puab ib tug txiv neej, thiab tshuab txoj pa ntawm txoj sia rau tus txiv neej ntawd lub qhov ntswg; ces tus txiv neej ntawd txawm muaj txoj sia, thawj tus muaj cev nqaij daim tawv nyob hauv lub ntiaj teb, thiab kuj yog thawj tus txiv neej; txawm li ntawd los, twb xub tsim txhua yam ua ntej lawm; tiam sis kuv tau tsim thiab ua tej ntawd ntawm sab ntsuj plig raws li kuv txoj lus.

8 Thiab kuv, tus Tswv uas yog Vajtswv, tau tsim ib lub vaj nyob rau sab hnub tuaj hauv Edees, thiab kuv txawm muab tus txiv neej uas kuv tau puab tso rau haud.

9 Thiab tawm hauv av tuaj, kuv, tus Tswv uas yog Vajtswv, ua kom txhua hom ntoo hlob tuaj, raws li ntuj tsim, uas zoo nkauj rau neeg pom; thiab neeg pom tau. Thiab txhua hom ntoo kuj hloov los muaj txoj sia. Vim tej ntoo no twb yog ntsuj plig nyob rau hnub uas kuv tsim tej no; vim tej no tseem nyob hauv qhov chaw uas kuv, Vajtswv, ib txwm tau tsim tej no, muaj tseeb tiag, twb yog txhua yam uas kuv tau npaj rau neeg siv; thiab neeg pom tias nws zoo ua khoom noj. Thiab kuv, tus Tswv uas yog Vajtswv, tau cog tsob ntoo uas cawm neeg txoj sia rau hauv plawv vaj, thiab tsob ntoo ntawm kev paub qhov zoo thiab qhov phem.

10 Thiab kuv, tus Tswv uas yog Vajtswv, ua kom ib tug dej txhawv hauv Edees ntws mus ntxooj lub vaj; thiab nyob ntawd tus dej ncau ua plaub tug dej ntws mus.

11 Thiab kuv, tus Tswv uas yog Vajtswv, tau muab thawj tus dej lub npe hu ua Pixoos, thiab tus dej ntws mus ncig tag nrho lub teb chaws Havilas, qhov chaw uas kuv, tus Tswv uas yog Vajtswv, tau tsim muaj kub ntau;

12 Thiab tej kub hauv lub teb chaws ntawd yeej zoo, thiab muaj tej hlaws thiab tej iav zeb.

13 Thiab tus dej thib ob lub npe hu ua Kihoos; tus dej ntawd ntws mus ncig tag nrho lub teb chaws Ethi-aupias.

14 Thiab tus dej thib peb lub npe hu ua Hitikis; tus uas ntws mus sab hnub tuaj hauv teb chaws Axilias. Thiab tus dej thib plaub yog tus dej Efalates.

15 Thiab kuv, tus Tswv uas yog Vajtswv, coj tus txiv neej mus, thiab muab nws tso rau hauv lub Vaj Edees, kom tu lub vaj, thiab saib xyuas lub vaj.

16 Thiab kuv, tus Tswv uas yog Vajtswv, txib tus txiv neej, hais tias: Ntawm txhua yam txiv ntoo hauv lub vaj koj noj tau tsis txwv hlo li,

17 Tiam sis ntawm tsob ntoo ntawm kev paub qhov zoo thiab qhov phem, koj yuav tsum tsis txhob noj, txawm li ntawd los, koj xaiv tau rau koj tus kheej, vim twb pub txoj kev xaiv rau koj; tiam sis, nco ntsoov hais tias kuv txwv tsis pub ua li ntawd, vim hnub uas koj noj ces koj yeej yuav tuag.

18 Thiab kuv, tus Tswv uas yog Vajtswv, hais rau kuv Tib Leeg Tub tias, tsis zoo uas txiv neej nyob nws ib leeg; yog li ntawd, kuv yuav tsim ib tug pab uas phim nws.

19 Thiab kuv, tus Tswv uas yog Vajtswv, muab av los puab ua txhua yam tsiaj nruab nrag thiab txhua yam noog saum nruab ntug; thiab txib kom lawv los rau Adas, saib nws yuav muab lawv hu li cas; thiab lawv kuj muaj txoj sia; vim kuv, Vajtswv, tshuab txoj pa ntawm txoj sia mus rau lawv, thiab txib hais tias txawm Adas hu txhua tus tsiaj li cas, lawv lub npe yuav yog li ntawd.

20 Ces Adas tis npe rau tag nrho tej tsiaj nyeg, thiab rau tej noog saum nruab ntug, thiab rau txhua tus tsiaj qus nyob nruab nrag; tiam sis rau Adas, twb tsis pom muaj ib tug pab uas phim nws.

21 Ces kuv, tus Tswv uas yog Vajtswv, ua kom Adas tsaug zog heev; thiab thaum nws tsaug zog lawm, kuv thiaj muab nws ib tug tav thiab muab lub qhov nqaij foob nqawm rov zoo li qub;

22 Ces kuv, tus Tswv uas yog Vajtswv, muab tus tav uas kuv muab ntawm tus txiv neej los tsim ua ib tug poj niam, thiab coj tus poj niam mus rau tus txiv neej.

23 Thiab Adas hais tias: Kuv paub lawm hais tias tus no txha yog kuv txha, thiab nqaij yog kuv nqaij; yuav hu nws ua Poj Niam, vim yog rho nws tawm ntawm txiv neej los.

24 Yog li ntawd tus txiv neej thiaj tso nws txiv thiab nws niam tseg, thiab muab siab npuab nws tus poj niam; thiab nkawd yuav koom ib lub cev.

25 Thiab nkawd ob leeg liab qab, tus txiv neej thiab nws tus poj niam, thiab tsis paub txaj muag.