1 Thiab tau muaj tias tus Tswv hais lus rau Mauxes, hais tias: Saib seb, kuv qhia tshwm sim rau koj ntsig txog lub ntuj no, thiab lub ntiaj teb no; sau tej lus uas kuv hais cia. Kuv yog Qhov Chiv Keeb thiab Qhov Kawg, tus Vajtswv uas Muaj Hwj Chim Tag Nrho; kuv tau tsim tej yam no los ntawm kuv Tib Leeg Tub; muaj tseeb tiag, thaum chiv keeb kuv tau tsim lub ntuj, thiab lub ntiaj teb uas koj sawv rau saud.

2 Thiab lub ntiaj teb tsis tau muaj dab tsi, thiab nyob do dus; thiab kuv ua kev tsaus ntuj nti los thoob plaws saum nplaim dej hiav txwv; thiab kuv tus Ntsuj Plig yuj mus yuj los saum nplaim dej; vim kuv yog Vajtswv.

3 Thiab kuv, Vajtswv, hais tias: Cia li muaj qhov kaj; ces txawm cia li kaj.

4 Thiab kuv, Vajtswv, pom qhov kaj; thiab qhov kaj ntawd zoo. Thiab kuv, Vajtswv, muab qhov kaj cais tawm ntawm qhov tsaus ntuj.

5 Thiab kuv, Vajtswv, hu qhov kaj ua Nruab Hnub; thiab qhov tsaus ntuj, kuv muab hu ua Hmo Ntuj; thiab kuv ua li no los ntawm kuv txoj lus uas muaj hwj chim, ces txawm muaj raws li kuv hais; thiab caij tsaus ntuj thiab caij kaj ntug yog hnub ib.

6 Thiab ntxiv, kuv, Vajtswv, hais tias: Cia muaj ib lub ntuj ntsuab los quas dej, ces txawm muaj, raws kiag li kuv hais; thiab kuv hais tias: Cia lub ntuj ntsuab muab cov dej cais nyias nyob nyias; ces txawm muaj li ntawd;

7 Thiab kuv, Vajtswv, tau tsim lub ntuj ntsuab thiab muab cov dej cais, muaj tseeb tiag, cov dej nyob hauv qab ntuj ntsuab cais cov dej uas nyob saum qaum ntuj ntsuab, ces txawm muaj raws kiag li kuv hais.

8 Thiab kuv, Vajtswv, hu lub ntuj ntsuab ntawd ua Ntuj; thiab caij tsaus ntuj thiab caij kaj ntug yog hnub ob.

9 Thiab kuv, Vajtswv, hais tias: Cia cov dej uas nyob hauv qab ntuj sib sau los nyob ib qhov chaw ua ke, ces txawm muaj li ntawd; thiab kuv, Vajtswv, hais tias: Cia av qhuav tawm tuaj; ces txawm muaj li ntawd.

10 Thiab kuv, Vajtswv, hu cov av qhuav ua Teb; thiab cov dej uas los sib sau ua ke ntawd, kuv muab hu ua Hiav Txwv; thiab kuv, Vajtswv, pom hais tias txhua yam uas kuv tau tsim yeej zoo.

11 Thiab kuv, Vajtswv, hais tias: Cia lub ntiaj teb tuaj nyom tuaj nqeeb, qoob loo muaj noob, cov txiv ntoo txi txiv, nyias raws nyias hom, thiab cov ntoo txi txiv, nyias cov noob tuaj nyias yam rau hauv lub ntiaj teb, ces txawm muaj raws kiag li kuv hais.

12 Thiab lub ntiaj teb txawm tuaj nyom tuaj nqeeb, txhua yam qoob loo nyias muaj noob raws nyias hom, thiab cov ntoo txi txiv, nyias cov noob tuaj nyias yam, raws nyias hom; thiab kuv, Vajtswv, pom tias txhua yam uas kuv tau tsim yeej zoo;

13 Thiab caij tsaus ntuj thiab caij kaj ntug yog hnub peb.

14 Thiab kuv, Vajtswv, tau hais tias: Cia li muaj tej teeb ci nyob saum lub ntuj ntsuab, los quas nruab hnub thiab hmo ntuj, thiab cia tej ntawd ua tej cim ntuj; thiab quas caij nyoog, thiab hnub, hli thiab xyoo;

15 Thiab cia tej ntawd ua teeb ci saum lub ntuj ntsuab tuaj rau hauv lub ntiaj teb no kom pom kev; ces txawm muaj li ntawd.

16 Thiab kuv, Vajtswv, tau tsim ob lub teeb uas ci heev; qhov uas ci tshaj cia kav nruab hnub, thiab qhov uas ci tsawg cia kav hmo ntuj; thiab lub teeb ci tshaj yog lub hnub, thiab lub teeb ci tsawg yog lub hli; thiab kuj tau tsim tej hnub qub raws li kuv txoj lus thiab.

17 Thiab kuv, Vajtswv, muab tej teeb ci ntawd tso rau saum lub ntuj ntsuab kom pom kev tuaj rau hauv ntiaj teb,

18 Thiab muab lub hnub kav nruab hnub, thiab muab lub hli kav hmo ntuj, thiab muab qhov kaj cais tawm ntawm qhov tsaus ntuj; thiab kuv, Vajtswv, pom tias txhua yam uas kuv tau tsim yeej zoo;

19 Thiaj caij tsaus ntuj thiab caij kaj ntug yog hnub plaub.

20 Thiab kuv, Vajtswv, hais tias: Cia cov dej muaj tej tsiaj ntau ntau uas muaj sia, thiab tej noog uas yuav ya saum lub ntiaj teb puag saum lub ntuj ntsuab uas dav dav.

21 Thiab kuv, Vajtswv, tau tsim tej ntses loj loj, thiab txhua yam tsiaj ntau ntau uas muaj sia txav mus txav los, nyob hauv nruab deg, nyias raws nyias hom, thiab txhua yam noog muaj tis nyias raws nyias hom; thiab kuv, Vajtswv, pom tias txhua yam uas kuv tau tsim yeej zoo.

22 Thiab kuv, Vajtswv, foom koob hmoov rau tej tsiaj ntawd, hais tias: Cia li muaj tub muaj ki, thiab huaj vam, thiab puv nkaus cov dej hiav txwv; thiab cia tej noog coob tuaj nyob hauv lub ntiaj teb;

23 Thiab caij tsaus ntuj thiab caij kaj ntug yog hnub tsib.

24 Thiab kuv, Vajtswv, hais tias: Cia li muaj tej tsiaj txhu uas muaj sia nyias muaj raws nyias hom hauv lub ntiaj teb, tej tsiaj nyeg, thiab tej tsiaj uas nkag, thiab tej tsiaj qus nyias raws nyias hom, ces txawm muaj li ntawd.

25 Thiab kuv, Vajtswv, tau tsim tej tsiaj qus nyob hauv lub ntiaj teb nyias raws nyias hom, thiab tej tsiaj nyeg nyias raws nyias hom, thiab txhua yam uas nkag hauv lub ntiaj teb nyias raws nyias hom; thiab kuv, Vajtswv, pom hais tias tag nrho tej yam no yeej zoo.

26 Thiab kuv, Vajtswv, hais rau kuv Tib Leeg Tub, uas nrog kuv ua ke txij thaum chiv keeb los lawm tias: Cia peb tsim tib neeg kom muaj yam ntxwv zoo li peb, kom zoo nkaus li peb; ces txawm muaj li ntawd. Thiab kuv, Vajtswv, hais tias: Cia lawv kav tej ntses hauv dej hiav txwv, thiab kav tej noog saum nruab ntug, thiab kav tej tsiaj txhu, thiab kav lub ntiaj teb, thiab kav txhua yam tsiaj nkag uas nkag hauv lub ntiaj teb.

27 Thiab kuv, Vajtswv, tau tsim neeg muaj tus yam ntxwv zoo li kuv, kom muaj tus yam ntxwv zoo li kuv Tib Leeg Tub kuv thiaj tsim neeg; txiv neej thiab poj niam kuv tsim nkawd.

28 Thiab kuv, Vajtswv, foom koob hmoov rau nkawd, thiab hais rau nkawd tias: Cia li muaj tub muaj ki, thiab huaj vam, mus puv nkaus lub ntiaj teb, thiab tswj lub ntiaj teb, thiab kav tej ntses hauv dej hiav txwv, thiab kav tej noog ya saum nruab ntug, thiab kav txhua yam muaj sia uas mus kev hauv lub ntiaj teb.

29 Thiab kuv, Vajtswv, hais rau tib neeg tias: Saib seb, kuv tau muab txhua yam qoob loo muaj noob rau nej, uas muaj nyob qhov txhia chaw hauv lub ntiaj teb, thiab txhua tsob ntoo uas muaj txiv los ntawm tsob ntoo muaj noob; tej ntawd yog khoom noj rau nej.

30 Thiab rau txhua yam tsiaj qus nyob hauv lub ntiaj teb, thiab rau txhua yam noog ya saum nruab ntug, thiab rau txhua yam tsiaj nkag hauv lub ntiaj teb, uas kuv muab sia rau, yuav muab txhua yam zaub huv ua khoom noj; ces txawm muaj li ntawd, yog raws kiag li kuv hais.

31 Thiab kuv, Vajtswv, pom txhua yam uas kuv tau tsim, thiab, saib seb, txhua yam uas kuv tau tsim yeej zoo heev; thiab caij tsaus ntuj thiab caij kaj ntug yog hnub rau.