1 Thiab Adas tau mloog Vajtswv lub suab, thiab tau hais kom nws cov tub hloov siab lees txim.

2 Thiab Adas rov qab nrog nws tus poj niam pw, ces nws yug tau ib tug tub, thiab Adas hu nws lub npe ua Xej. Thiab Adas hwm Vajtswv lub npe; vim nws hais tias: Vajtswv tau pub kuv muaj dua ib tug tub, los sawv Anpees chaw, tus uas Kayees muab tua lawm.

3 Thiab Vajtswv ua nws tus kheej tshwm sim los rau Xej, thiab nws tsis ntxeev siab, tiam sis ua ib txoj kev txi uas tsim nyog, zoo li nws tus tij laug Anpees tau ua. Thiab nws kuj yug tau ib tug tub, thiab muab nws lub npe hu ua Enos.

4 Thiab lub sij hawm ntawd cov txiv neej no pib hu txog tus Tswv lub npe, thiab tus Tswv foom koob hmoov rau lawv;

5 Thiab tau ceev ib phau ntawv nco txog, phau uas lawv siv Adas yam lus sau ntawv, vim tau pub rau lawv tag nrho cov uas hu Vajtswv kom sau los ntawm lub txiaj ntsim kev tshoov siab;

6 Thiab lawv tau qhia lawv cov me nyuam nyeem ntawv thiab sau ntawv, vim lawv muaj ib yam lus uas huv thiab tsis qias.

7 Nim no tib lub Pov Thawj Hwj no, uas tau muaj thaum chiv keeb, yuav muaj nyob thaum kawg ntawm lub ntiaj teb thiab.

8 Nim no qhov uas yuav muaj los yav tom ntej no los Adas hais, raws li tus Vaj Ntsuj Plig Dawb Huv tshoov nws, thiab tau ceev ib zaj caj ceg txog Vajtswv cov me nyuam. Thiab phau no yog phau ntawv xeeb ntxwv ntawm Adas, hais tias: Thaum Vajtswv tsim neeg, nws tsim zoo li nws tus yam ntxwv ntag;

9 Raws li tus yam ntxwv ntawm nws lub cev, txiv neej thiab poj niam, nws tau tsim nkawd, thiab foom koob hmoov rau nkawd, thiab hu nkawd npe ua Adas, nyob rau hnub thaum tsim nkawd thiab nkawd los ua neeg muaj txoj sia nyob hauv thaj av rau saum Vajtswv lub rooj tiag taw.

10 Thiab Adas hnub nyoog muaj ib puas thiab peb caug xyoo, thiab muaj dua ib tug tub zoo li nws tus kheej, muaj yam ntxwv zoo li nws, thiab hu nws lub npe ua Xej.

11 Thiab tom qab nws muaj Xej, Adas hnub nyoog muaj yim pua xyoo, thiab nws muaj coob tus tub thiab ntau tus ntxhais;

12 Thiab tag nrho Adas lub hnub nyoog muaj cuaj puas thiab peb caug xyoo, ces nws mam tuag.

13 Thaum Xej hnub nyoog muaj ib puas thiab tsib xyoos, thiab muaj Enos, thiab qhia tej yuav muaj los yav tom ntej tas nws sim neej, thiab qhia Vajtswv tej kev rau nws tus tub Enos; yog li ntawd Enos kuj qhia tej uas yuav muaj los yav tom ntej thiab.

14 Thiab tom qab nws muaj Enos, Xej hnub nyoog muaj yim pua thiab xya xyoo, thiab muaj coob tus tub thiab ntau tus ntxhais.

15 Thiab noob neej coob heev rau hauv txhua thaj av. Thiab nyob rau lub sij hawm ntawd Dab Ntxwg Nyoog muaj zog heev kav tib neeg, thiab lawv tsiv tsaim hauv lawv lub siab; thiab txij ntawd los txawm muaj kev ua rog thiab ntshav nrog; thiab tib neeg nyias tsa nyias tes tawm tsam nyias tus kwv tus tij, ua kom tuag, vim tej hauj lwm ntsiag to, los nrhiav hwj chim.

16 Tag nrho Xej lub hnub nyoog muaj cuaj puas thiab kaum ob xyoos, ces nws mam tuag.

17 Thiab Enos hnub nyoog muaj cuaj caum xyoo, thiab muaj Kenas. Thiab Enos thiab Vajtswv cov neeg uas tshuav tau tawm hauv thaj av uas hu ua Suloos, thiab nyob hauv thaj av uas cog lus cia, uas nws hu raws li nws tus tub, uas nws tis npe hu ua Kenas.

18 Thiab tom qab nws muaj Kenas, Enos hnub nyoog muaj yim pua thiab kaum tsib xyoos, thiab muaj coob tus tub thiab ntau tus ntxhais. Thiab tag nrho Enos lub hnub nyoog muaj cuaj puas thiab tsib xyoos, ces nws mam tuag.

19 Thiab Kenas hnub nyoog muaj xya caum xyoo, thiab muaj Mahalalees; thiab tom qab nws muaj Mahalalees, Kenas hnub nyoog muaj yim pua thiab plaub caug xyoo, thiab muaj tub thiab muaj ntxhais. Thiab tag nrho Kenas lub hnub nyoog muaj cuaj puas thiab kaum xyoo, ces nws mam tuag.

20 Thiab Mahalalees hnub nyoog muaj rau caum tsib xyoos, thiab muaj Yales; thiab tom qab nws muaj Yales, Mahalalees hnub nyoog muaj yim pua thiab peb caug xyoo, thiab muaj tub thiab muaj ntxhais. Thiab tag nrho Mahalalees lub hnub nyoog muaj yim pua thiab cuaj caum tsib xyoos, ces nws mam tuag.

21 Thiab Yales hnub nyoog muaj ib puas thiab rau caum ob xyoo, thiab muaj Enauj; thiab tom qab nws muaj Enauj, Yales hnub nyoog muaj yim pua xyoo, thiab muaj tub thiab muaj ntxhais. Thiab Yales qhia tag nrho Vajtswv tej kev rau Enauj.

22 Thiab qhov no yog tej caj ceg txog Adas cov tub, tus uas yog Vajtswv leej tub, tus uas nrog Vajtswv tus kheej hais lus.

23 Thiab lawv yog cov neeg uas tshaj tawm txoj kev ncaj ncees, thiab hais lus thiab qhia tej uas yuav muaj los yav tom ntej, thiab hais rau neeg sawv daws, txhua qhov chaw, kom hloov siab lees txim, thiab lawv tau qhia txoj kev ntseeg rau noob neej.

24 Thiab tau muaj tias tag nrho Yales lub hnub nyoog muaj cuaj puas thiab rau caum ob xyoos, ces nws mam tuag.

25 Thiab Enauj hnub nyoog muaj rau caum tsib xyoos, thiab muaj Methuxelas.

26 Thiab tau muaj tias Enauj mus ub mus no hauv thaj av, mus xyuas cov neeg; thiab thaum nws mus, Vajtswv tus Ntsuj Plig los saum ntuj ceeb tsheej los, thiab nrog nws nyob.

27 Thiab nws hnov ib lub suab saum ntuj ceeb tsheej tuaj, hais tias: Kuv tus tub Enauj, cia li qhia tej yuav muaj los yav tom ntej rau cov neeg no, thiab hais rau lawv tias—Cia li hloov siab lees txim, vim tus Tswv hais li no: Kuv npau taws rau cov neeg no, thiab kuv txoj kev npau taws heev tau npau tawm tsam lawv; vim lawv lub siab tawv ruaj, thiab lawv pob ntseg twb tsis hnov, thiab lawv qhov muag twb tsis pom kev deb;

28 Thiab rau ntau tiam neeg no, txij puag thaum uas kuv tau tsim lawv los, lawv tau mus yuam kev, thiab tau xyeej kuv, thiab tau mus nrhiav lawv tus kheej tej kev qhuab qhia hauv qhov tsaus ntuj; thiab los ntawm lawv tus kheej tej kev qias lawv tau ntaus tswv yim tua neeg, thiab tsis ua raws li tej lus txib, uas kuv tau muab rau lawv txiv Adas.

29 Yog li ntawd, lawv tau dag twv ntuj rau lawv tus kheej, thiab, los ntawm lawv tej kev lav lus, lawv tau coj kev tuag los rau lawv tus kheej; thiab kuv twb tau npaj ib lub ntuj txiag teb tsaus rau lawv, yog hais tias lawv tsis hloov siab lees txim;

30 Thiab nov yog ib zaj lus tshaj tawm, uas kuv tau xa tawm thaum chiv keeb ntawm lub ntiaj teb, los ntawm kuv tus kheej lub qhov ncauj, txij thaum ntuj tsim teb raug los, thiab los ntawm kuv cov tub qhe, nej txiv, lub qhov ncauj, kuv tau tshaj tawm, zoo ib yam li yuav xa zaj lus tshaj tawm ntawd mus thoob plaws rau hauv lub ntiaj teb.

31 Thiab thaum Enauj tau hnov tej lus no, nws txawm txhos caug pe hauv av, rau tus Tswv, thiab hais lus rau tus Tswv, hais tias: Yog vim li cas koj ho pom zoo rau kuv, thiab kuv tsuas yog ib tug tub hluas xwb, thiab tag nrho cov neeg ntxub kuv; vim kuv hais lus taj; ua cas kuv ho yog koj ib tug tub qhe?

32 Thiab tus Tswv hais rau Enauj tias: Cia li mus thiab ua li kuv tau txib koj, thiab yuav tsis muaj neeg nkaug koj. Cia li qhib koj lub qhov ncauj, thiab yuav ua kom muaj puv npo, thiab kuv yuav qhia kom koj paub hais, vim txhua tus neeg twb nyob hauv kuv txhais tes, thiab kuv yuav ua raws li kuv pom zoo.

33 Hais rau cov neeg no tias: Nej cia li xaiv hnub no, los teev tiam tus Tswv uas yog Vajtswv uas tau tsim nej.

34 Saib seb kuv tus Ntsuj Plig twb nrog koj, yog li ntawd kuv yuav txhawb tag nrho koj tej lus; thiab tej roob yuav khiav ntawm koj xub ntiag mus, thiab tej dej yuav lem ntawm txoj kev uas tej dej ntws; thiab koj yuav ua neej nrog kuv, thiab kuv nrog koj; yog li ntawd taug kev nrog kuv mus.

35 Thiab tus Tswv hais lus rau Enauj, thiab hais rau nws tias: Cia li muab av pleev koj qhov muag, thiab muab ntxuav, ces koj yuav pom. Thiab nws ua li ntawd.

36 Thiab nws pom cov ntsuj plig uas Vajtswv tau tsim; thiab nws kuj pom tej yam uas qhov muag ntawm sab nqaij daim tawv tsis txawj pom; Thiab txij lub sij hawm ntawd mus tau muaj lus tawm qhov txhia chaw hauv lub teb chaws tias: Tus Tswv tau tsa muaj ib tug pom tau los rau nws haiv neeg.

37 Thiab tau muaj tias Enauj mus rau hauv tej neeg nyob hauv lub teb chaws, mus sawv saum tej pov roob thiab tej chaw siab, thiab tshaj tawm nrog lub suab nrov nrov, ua tim khawv txog tej yam lawv ua; thiab txhua tus neeg tau npau taws vim yog nws.

38 Thiab lawv tawm tuaj mloog nws, nyob saum tej chaw siab, tau hais rau cov uas saib xyuas tsev pheeb suab ntaub tias: Nej nyob ntawm no thiab saib xyuas cov tsev pheeb suab ntaub, es peb mus tod mus saib tus pom tau, vim nws qhia tej yuav muaj los yav tom ntej, thiab muaj ib yam txawv heev nyob hauv thaj av; muaj ib tug neeg vwm uas tuaj ntawm peb no.

39 Thiab tau muaj tias thaum lawv hnov nws, tsis muaj ib tug neeg xuas tes ntsiab nthos nws li; vim ua rau lawv txhua tus uas hnov nws ntshai; vim nws mus kev nrog Vajtswv.

40 Thiab tau muaj ib tug txiv neej mus cuag nws, nws lub npe hu ua Mahizas, thiab hais rau nws tias: Qhia rau peb meej meej saib koj yog leej twg, thiab koj tuaj qhov twg tuaj?

41 Thiab nws hais rau lawv tias: Kuv tuaj tim lub teb chaws Kenas tuaj, kuv txiv lawv lub teb chaws, lub teb chaws uas ncaj ncees los txog hnub no. Thiab kuv txiv qhia tag nrho Vajtswv tej kev rau kuv.

42 Thiab tau muaj tias, thaum kuv tuaj tim teb chaws Kenas tuaj, ze ntawm dej hiav txwv sab hnub tuaj, kuv ua yog toog; thiab xyuas seb, kuv pom ntuj ceeb tsheej, thiab tus Tswv hais lus nrog kuv, thiab muab lus txib rau kuv; yog li ntawd, vim qhov no, kuv thiaj hais tej lus no kom ua raws li lo lus txib ntawd.

43 Thiab Enauj hais nws cov lus mus ntxiv, hais tias: Tus Tswv uas hais lus nrog kuv, nws twb yog tus Vajtswv saum ntuj ceeb tsheej, thiab nws yog kuv tus Vajtswv, thiab nej tus Vajtswv, thiab nej twb yog kuv cov kwv tij, thiab vim li cas nej pheej ua raws li nej tus kheej lub tswv yim, thiab pheej xyeej tus Vajtswv saum ntuj ceeb tsheej?

44 Nws tau tsim lub ntuj; lub ntiaj teb yog nws lub rooj tiag taw; thiab lub ntiaj teb lub hauv paus kuj yog nws li. Saib seb, nws tau teeb lub hauv paus no, ib co neeg coob coob los nws tau coj los nyob hauv qhov chaw ntawd.

45 Thiab kev tuag twb los rau peb txiv lawv; txawm li ntawd los peb paub lawv, thiab xyeej tsis tau, thiab thawj tus ntawm sawv daws los peb paub, uas yog Adas.

46 Vim ib phau ntawv nco txog uas peb tau sau cia nrog peb, raws li tus qauv uas Vajtswv tus ntiv tes tau qhia paub; thiab tau siv peb tus kheej yam lus hais qhia peb.

47 Thiab thaum Enauj hais Vajtswv tej lus, cov neeg tshee hnyo, thiab tiv tsis taus nws lub yeeb haum.

48 Thiab nws hais rau lawv tias: Twb yog vim Adas poob, es thiaj muaj peb; thiab los ntawm nws txoj kev poob no thiaj muaj txoj kev tuag; thiab ua rau peb txais kev nyuaj siab thiab kev txom nyem.

49 Saib seb Dab Ntxwg Nyoog tau los nyob hauv noob neej, thiab ntxias lawv kom teev tiam nws; thiab neeg tau hloov los ua neeg muaj siab nyiam sab cev nqaij daim tawv, ua raws li cev nqaij daim tawv xav tau, thiab ua li dab phem ua, thiab raug muab nrug ntawm Vajtswv xub ntiag mus.

50 Tiam sis Vajtswv tau ua rau peb txiv lawv paub hais tias txhua tus neeg yuav tsum hloov siab lees txim.

51 Thiab nws hu peb txiv Adas los ntawm nws tus kheej lub suab, hais tias: Kuv yog Vajtswv; kuv tau tsim lub ntiaj teb, thiab tsim neeg ua ntej lawv muaj cev nqaij daim tawv.

52 Thiab Vajtswv kuj hais rau Adas tias: Yog hais tias koj yuav tig los rau kuv, thiab mloog kuv lub suab, thiab ntseeg, thiab hloov siab lees txim rau tag nrho koj tej kev ua txhaum, thiab ua kev cai raus dej, ua nyob hauv dej tiag, los ntawm kuv Tib Leeg Tub lub npe, tus uas muaj kev tshav ntuj thiab kev tseeb nplua mias, uas yog Yexus Khetos, tib lub npe nyob hauv qab ntuj, los ntawm lub npe no thiaj yuav muaj taus txoj kev cawm seej rau noob neej, ces koj yuav tau txais lub txiaj ntsim Vaj Ntsuj Plig Dawb Huv, thiab thov txhua yam los ntawm nws lub npe, thiab txhua yam uas koj yuav thov, yuav muab yam ntawd rau koj.

53 Ces peb txiv Adas hais rau tus Tswv, thiab hais tias: Yog vim li cas tib neeg thiaj yuav tsum hloov siab lees txim thiab ua kev cai raus dej? Ces tus Tswv hais rau Adas tias: Saib seb kuv tau zam txim rau koj txoj kev ua txhaum nyob hauv lub Vaj Edees.

54 Los ntawm qhov no thiaj muaj lus mus thoob rau cov neeg, hais tias Vajtswv Leej Tub tau theej thawj lub txhoj, yog li ntawd tso tsis tau cov niam cov txiv tej kev txhaum rau saum cov me nyuam taub hau, vim lawv dawb huv txij thaum ntuj tsim teb raug los lawm.

55 Thiab tus Tswv hais rau Adas, hais tias: Rau qhov koj yug koj cov me nyuam los rau hauv lub ntiaj teb uas muaj kev txhaum, yog li ntawd thaum lawv pib hlob tuaj, kev txhaum yug los rau hauv lawv lub siab, thiab lawv saj qhov iab, kom lawv thiaj yuav paub saib qhov zoo rau nqi.

56 Thiab Vajtswv pub rau lawv kom paub qhov zoo thiab qhov phem; yog li ntawd lawv yog cov uas xaiv ywj siab rau lawv tus kheej, thiab kuv tau muab dua ib txoj kev cai thiab lus txib rau nej.

57 Yog li ntawd muab tej no qhia rau nej cov me nyuam, hais tias txhua tus neeg, qhov txhia chaw, yuav tsum hloov siab lees txim, tsis li ces lawv yeej yuav tsis tau Vajtswv lub nceeg vaj ua lawv tug, vim tsis muaj ib yam tsis dawb huv uas nyob taus haud, los yog nyob ntawm nws xub ntiag; vim, ntawm Adas yam lus ces, Neeg Dawb Huv yog nws lub npe, thiab nws Tib Leeg Tub lub npe yog Neeg Leej Tub, uas yog Yexus Khetos, ib tug Txiav Txim ncaj ncees, uas yuav los rau hauv lub caij nyoog nruab nrab.

58 Yog li ntawd kuv muab lus txib rau nej, kom muab tej yam no qhib lug qhia rau nej cov me nyuam, hais li no:

59 Hais tias los ntawm kev ua txhaum ces thiaj muaj txoj kev poob, txoj kev poob uas coj kev tuag los, thiab rau qhov nej yug los rau hauv ntiaj teb los ntawm dej, thiab ntshav, thiab ntawm tus ntsuj plig, uas kuv tau tsim, los rau hauv lub ntiaj teb no, ces thiaj hloov los ua neeg muab av tsim muaj txoj sia, ces ib yam li ntawd nej yuav tsum yug dua tshiab mus rau hauv lub nceeg vaj ceeb tsheej, los ntawm dej, thiab ntawm tus Ntsuj Plig, thiab ntxuav nej huv los ntawm ntshav, uas yog kuv Tib Leeg Tub cov ntshav; kom yuav ua rau nej hloov ua neeg dawb huv ntawm txhua txoj kev txhaum, thiab xyiv fab rau tej lus ntawm txoj sia nyob mus ib txhis nyob hauv lub neej no, thiab txoj sia nyob mus ib txhis nyob hauv lub neej yuav los, uas yog lub yeeb koob tsis txawj tuag.

60 Vim los ntawm dej nej ua raws li lo lus txib ntawd; los ntawm tus Ntsuj Plig nej thiaj tsis muaj txim, thiab los ntawm ntshav nej thiaj hloov ua neeg dawb huv;

61 Yog li ntawd Vajtswv twb pub tej no nyob hauv nej; tus tim khawv saum ntuj ceeb tsheej; tus Nplij Siab; tej yam kaj siab lug ntawm lub yeeb koob uas tsis txawj tuag; qhov tseeb ntawm txhua yam; qhov uas txhawb txhua tus txoj sia, uas ua rau txhua tus ciaj; qhov uas paub txhua yam, thiab muaj hwj chim tag nrho raws li laj lim tswv yim, kev hlub tshua, kev tseeb, kev txim lij, thiab kev txiav txim.

62 Thiab nim no, saib seb, kuv hais rau nej tias: Qhov no yog txoj hau kev cawm seej rau txhua tus neeg, los ntawm kuv Tib Leeg Tub cov ntshav, tus uas yuav los rau hauv lub caij nyoog nruab nrab.

63 Thiab saib seb, txhua yam nyias muaj nyias tus yam txwv, thiab tau tsim thiab tau ua txhua yam los ua pov thawj txog kuv, tag nrho tej yam ntawm sab cev nqaij daim tawv, thiab tej yam ntawm sab ntsuj plig; tej yam uas nyob saum ntuj, thiab tej yam nyob saum lub ntiaj teb, thiab tej yam uas nyob hauv lub ntiaj teb, thiab tej yam uas nyob lub ntiaj teb sab nraud, tag nrho sab saud thiab sab hauv qab tib si: txhua yam ua pov thawj ntsig txog kuv.

64 Thiab tau muaj tias, thaum tus Tswv tau hais lus nrog Adas, uas yog peb txiv, ces Adas thov tus Tswv, thiab tus Tswv tus Ntsuj Plig tau muab nws coj mus lawm, thiab tau coj nws mus rau hauv cov dej, thiab muab nws raus dej, thiab tsa tawm hauv cov dej los.

65 Ces nws tau ua kev cai raus dej li ntawd, thiab Vajtswv tus Ntsuj Plig nqis los rau nws, ces nws tau yug los ntawm tus Ntsuj Plig li ntawd, thiab txhawb nws lub siab lub ntsws.

66 Thiab nws tau hnov ib lub suab saum ntuj tuaj, hais tias: Koj tau ua kev cai raus ntawm hluav taws, thiab ntawm tus Vaj Ntsuj Plig Dawb Huv. Qhov no yog qhov ceev xwm txheej ntawm Leej Txiv, thiab Leej Tub, txij no mus thiab mus ib txhis li;

67 Thiab koj ua raws tus txheej txheem ntawm tus uas tsis muaj hnub pib los yog tsis muaj xyoo kawg, nyob tag nrho ib txhiab mus tag nrho ib txhis.

68 Saib seb, koj yog Vajtswv ib tug tub, uas koom siab nrog kuv; thiab txhua tus muaj peev xwm hloov los ua kuv cov tub li ntawd. Amees.