1 Thiab tau muaj tias tom qab kuv, tus Tswv uas yog Vajtswv, tau ntiab nkawd tawm, ces Adas tau pib mus ncaws teb, thiab mus kav tag nrho tej tsiaj nruab nrag, thiab tau mov noj los ntawm nws hauv pliaj kev tawm hws, ib yam li kuv uas yog tus Tswv tau txib nws. Thiab Evas, uas yog nws tus poj niam, kuj nrog nws khwv.

2 Thiab Adas nrog nws tus poj niam pw, thiab nws tus poj niam yug tej tub thiab tej ntxhais rau nws, thiab lawv pib huaj vam mus puv nkaus lub ntiaj teb.

3 Thiab txij lub sij hawm ntawd mus, Adas tej tub thiab tej ntxhais pib sib faib ob tug thiab ob tug mus nyob hauv thaj av, thiab mus ua liaj ua teb, thiab mus zov tej pab tsiaj txhu, thiab lawv kuj pib muaj tub thiab muaj ntxhais.

4 Thiab Adas thiab Evas, uas yog nws tus poj niam, nkawd hu txog tus Tswv lub npe, thiab nkawd hnov tus Tswv lub suab tuaj tim lub Vaj Edees tuaj, hais lus rau nkawd, thiab nkawd tsis pom nws; vim tau muab nkawd nrug ntawm nws xub ntiag mus lawm.

5 Thiab nws muab tej lus txib rau nkawd, hais tias nkawd yuav tsum teev tiam tus Tswv nkawd tus Vajtswv, thiab yuav tsum muab thawj cov me nyuam tsiaj los txi rau tus Tswv. Thiab Adas tau ua raws li tus Tswv tej lus txib.

6 Thiab ntau hnub tom qab ntawd muaj tus Tswv ib tug tim tswv tshwm sim los rau Adas, hais tias: Vim li cas koj thiaj li ua kev txi rau tus Tswv? Thiab Adas hais rau nws tias: Kuv tsis paub, tus Tswv txib kom kuv ua xwb.

7 Ces tus tim tswv hais lus, hais tias: Qhov no yog ib tug yam ntxwv txog kev txi ntawm Leej Txiv Tib Leeg Tub, tus uas muaj txoj kev tshav ntuj thiab kev tseeb nplua mias.

8 Yog li ntawd, koj yuav tsum ua tag nrho tej yam uas koj ua los ntawm Leej Tub lub npe, thiab koj yuav tsum hloov siab lees txim thiab hu Vajtswv los ntawm Leej Tub lub npe tas mus li.

9 Thiab hnub ntawd tus Vaj Ntsuj Plig Dawb Huv los rau Adas, uas ua tim khawv txog Leej Txiv thiab Leej Tub, hais tias: Kuv yog Leej Txiv Tib Leeg Tub txij puag thaum chiv keeb, txij no mus thiab mus ib txhis li, hais tias vim koj tau poob lawm ces koj yuav txais kev txhiv dim, thiab tag nrho tib neeg, twb yog tag nrho uas xav tau.

10 Thiab lub sij hawm ntawd Adas hwm Vajtswv thiab muaj tus Vaj Ntsuj Plig puv npo, thiab pib qhia tej yuav muaj los yav tom ntej ntsig txog tag nrho ntawm tsev neeg uas nyob hauv lub ntiaj teb, hais tias: Cia li qhuas Vajtswv lub npe, vim yog kuv txoj kev ua txhaum kuv qhov muag thiaj qhib, thiab hauv lub neej no kuv yuav muaj kev xyiv fab, thiab ntawm cev nqaij daim tawv kuv yuav rov qab pom Vajtswv dua.

11 Thiab Evas, uas yog nws tus poj niam, hnov tej no huv si thiab zoo siab, hais tias: Yog hais tias wb tsis tau ua txhaum ces wb twb yuav tsis muaj tub ki, thiab yuav tsis paub qhov zoo thiab qhov phem, thiab txoj kev xyiv fab ntawm wb txoj kev txhiv dim, thiab txoj sia nyob mus ib txhis uas Vajtswv muab rau txhua tus uas mloog lus.

12 Ces Adas thiab Evas nkawd hwm Vajtswv lub npe, thiab nkawd muab txhua yam qhia rau nkawd tej tub thiab tej ntxhais paub.

13 Thiab Dab Ntxwg Nyoog los rau hauv lawv, hais tias: Kuv kuj yog Vajtswv ib tug tub thiab; thiab nws txib lawv, hais tias: Tsis txhob ntseeg tej ntawd, ces lawv tsis ntseeg tej ntawd, thiab lawv hlub Dab Ntxwg Nyoog ntau dua lawv hlub Vajtswv. Thiab txij lub sij hawm ntawd mus neeg pib muaj siab nyiam sab cev nqaij daim tawv, ua raws li cev nqaij daim tawv xav tau, thiab ua li dab phem ua.

14 Thiab tus Tswv uas yog Vajtswv tau hu neeg los ntawm tus Vaj Ntsuj Plig Dawb Huv nyob qhov txhia chaw thiab txib lawv kom lawv yuav tsum hloov siab lees txim;

15 Thiab tag nrho cov uas ntseeg Leej Tub, thiab hloov siab lees txim rau lawv tej kev txhaum, ces yuav txais kev cawm dim; thiab tag nrho cov uas tsis ntseeg thiab tsis hloov siab lees txim, yuav raug txim; thiab cov lus uas tawm ntawm Vajtswv lub qhov ncauj yog cov lus tshaj tawm ruaj khov; yog li ntawd yeej yuav tsum muaj raws li tej lus ntawd.

16 Thiab Adas thiab Evas, uas yog nws tus poj niam, nkawd hu Vajtswv tsis tu tsis tseg. Thiab Adas nrog nws tus poj niam Evas pw, ces Evas txawm xeeb tub thiab yug tau Kayees, thiab hais tias: Kuv tau txais ib tug txiv neej los ntawm tus Tswv; yog li ntawd nws yuav tsis xyeej tus Tswv tej lus. Tiam sis saib seb, Kayees twb tsis mloog lus, hais tias: Tus Tswv yog leej twg es kuv thiaj yuav tsum paub nws?

17 Thiab Evas rov qab xeeb tub dua thiab yug tau nws tus kwv Anpees. Thiab Anpees mloog tus Tswv lub suab. Thiab Anpees yog ib tug tub yug yaj, tiam sis Kayees yog ib tug tub ua liaj ua teb.

18 Thiab Kayees hlub Dab Ntxwg Nyoog ntau dua nws hlub Vajtswv. Thiab Dab Ntxwg Nyoog txib nws, hais tias: Muab khoom tiam pub rau tus Tswv.

19 Ces muaj ib hnub tau muaj tias Kayees nqa tej qoob loo ntawm thaj teb tuaj tiam pub rau tus Tswv.

20 Thiab Anpees, nws kuj coj nws thawj cov me nyuam tsiaj, thiab los ntawm cov muaj nqaij zoo. Thiab tus Tswv txaus siab rau Anpees, thiab nws tej khoom tiam pub.

21 Tiam sis rau Kayees, thiab nws tej khoom tiam, Vajtswv tsis txaus siab. Nim no Dab Ntxwg Nyoog paub qhov no, thiab qhov no ua rau nws zoo siab. Thiab Kayees chim heev, thiab nws lub ntsej muag npau taws vog.

22 Ces tus Tswv hais rau Kayees tias: Vim li cas koj yuav chim ua luaj li? Vim li cas koj lub ntsej muag npau taws vog?

23 Yog koj ua qhov zoo, kuv yuav txais yuav koj. Thiab yog koj tsis ua zoo, kev txhaum zov rawv ntawm qhov rooj, thiab Dab Ntxwg Nyoog xav tau koj; thiab yog koj tsis mloog kuv tej lus txib, kuv yuav muab koj cob rau Dab Ntxwg Nyoog, thiab nws yuav ua rau koj raws li nws siab xav. Thiab koj yuav kav nws;

24 Vim txij lub sij hawm no mus koj yuav ua leej txiv ntawm nws tej kev dag; yuav hu koj ua Kev Puas Tsuaj; vim koj kuj xub nyob ua ntej lub ntiaj teb no.

25 Thiab yuav hais rau lub sij hawm yuav los yav tom ntej tias—Tej kev qias no twb muaj txij Kayees los lawm; vim nws tau xyeej tej lus ntuas zoo uas tau los ntawm Vajtswv; thiab qhov no yog kev foom tsis zoo uas kuv yuav foom rau koj, yog koj tsis hloov siab lees txim.

26 Thiab Kayees npau taws, thiab tsis mloog tus Tswv lub suab ntxiv lawm, thiab tsis mloog nws tus kwv Anpees, uas taug kev dawb huv rau tus Tswv.

27 Thiab Adas thiab nws tus poj niam quaj ntsuag rau tus Tswv pom, vim Kayees thiab nws tej kwv tij.

28 Thiab tau muaj tias Kayees coj nws ib tug kwv tij ib tug ntxhais los ua poj niam, thiab nkawd hlub Dab Ntxwg Nyoog ntau dua Vajtswv.

29 Thiab Dab Ntxwg Nyoog hais rau Kayees tias: Cog lus rau kuv los ntawm koj caj pas, thiab yog koj qhia kev cog lus no tawm koj yuav tuag; thiab kom koj cov kwv tij cia li cog lus los ntawm lawv lub taub hau, thiab los ntawm tus Vajtswv muaj sia zees nyob, hais tias lawv yuav tsis qhia tawm; yog hais tias lawv qhia, lawv yeej yuav tuag; thiab li no kom koj txiv thiaj yuav tsis paub txog; thiab hnub no kuv yuav coj koj tus kwv Anpees los cob rau koj txhais tes.

30 Thiab Dab Ntxwg Nyoog cog lus rau Kayees tias nws yuav ua raws li nws tej lus txib. Thiab tau ua txhua yam no ntsiag to.

31 Thiab Kayees hais tias: Tseeb tiag kuv yog Mahas, tus kav txoj kev ua ntsiag to tseem ceeb no, kom kuv tua tau neeg thiab muaj nyiaj nplua nuj. Yog li ntawd thiaj hu Kayees ua tus Kav Mahas, thiab nws tau khav rau nws txoj kev phem.

32 Thiab Kayees mus tom teb, thiab Kayees hu nws tus kwv Anpees los. Thiab tau muaj tias thaum nkawd nyob nram teb, Kayees tawm tsam nws tus kwv Anpees, thiab muab nws tua pov tseg.

33 Thiab Kayees khav rau qhov uas nws tau ua, hais tias: Kuv dim lawm; kuv tus kwv tej tsiaj txhu twb poob rau hauv kuv txhais tes.

34 Thiab tus Tswv hais rau Kayees tias: Koj tus kwv Anpees nyob qhov twg? Ces Kayees hais tias: Kuv tsis paub. Kuv yog tus saib xyuas kuv tus kwv los?

35 Ces tus Tswv hais tias: Koj tau ua dab tsi? Koj tus kwv cov ntshav lub suab quaj hauv av tuaj hu kuv.

36 Thiab nim no koj yuav raug foom tsis zoo los ntawm daim av uas tau rua nws lub qhov ncauj txais koj tus kwv cov ntshav los ntawm koj txhais tes.

37 Thaum koj ua liaj ua teb txij no mus daim av yuav tsis zoo rau koj. Koj yuav yog ib tug neeg khiav txim thiab ib tug neeg loj leeb, nyob rau hauv lub ntiaj teb.

38 Thiab Kayees hais rau tus Tswv tias: Dab Ntxwg Nyoog ntxias kuv vim yog kuv tus kwv tej tsiaj txhu. Thiab kuv npau taws thiab; vim koj txaus siab rau nws txoj kev tiam, tiam sis koj tsis txaus siab rau kuv li; kuv lub txim hnyav tshaj qhov kuv ris taus.

39 Saib seb hnub no koj tau ntiab kuv tawm ntawm tus Tswv xub ntiag mus, ces kuv yuav nraim ntawm koj lub ntsej muag; thiab kuv yuav ua ib tug neeg khiav txim thiab ib tug neeg loj leeb nyob rau hauv lub ntiaj teb; thiab yuav muaj tias, tus uas nrhiav tau kuv los yuav tua kuv pov tseg, vim yog kuv tej kev ua phem, vim zais tsis tau tej yam no ntawm tus Tswv.

40 Thiab kuv, tus uas yog tus Tswv, tau hais rau nws tias: Yog tus uas tua koj pov tseg, tus ntawd yuav raug txim pauj xya npaug. Thiab kuv, tus uas yog tus Tswv, tau ntaus cim rau Kayees lub cev, tsam tus uas nrhiav tau Kayees ho tua nws pov tseg.

41 Ces Kayees raug muab nrug ntawm tus Tswv xub ntiag mus lawm, thiab nrog rau nws tus poj niam thiab nws ntau tus kwv tij lawv nyob rau lub teb chaws Nos, nyob sab hnub tuaj ntawm Edees.

42 Thiab Kayees nrog nws tus poj niam pw, thiab nws tus poj niam xeeb tub thiab yug tau Enauj, thiab Kayees kuj muaj ntau tus tub thiab ntxhais. Thiab Kayees rhawv tau ib lub nroog, thiab muab lub nroog ntawd tis npe hu ua Enauj, raws li nws tus tub lub npe.

43 Enauj muaj ib tug tub hu ua Iladis, thiab muaj lwm cov tub thiab lwm cov ntxhais. Thiab Iladis muaj Mahuya-ees, thiab muaj lwm cov tub thiab lwm cov ntxhais. Thiab Mahuya-ees muaj Methusa-ees, thiab muaj lwm cov tub thiab lwm cov ntxhais. Thiab Methusa-ees muaj Lamej.

44 Thiab Lamej yuav ob tug poj niam; ib tug npe hu ua Adahes, thiab ib tug hu ua Xilas.

45 Thiab Adahes yug tau Yanpas; nws yog tus yawg koob ntawm cov neeg uas nyob tsev pheeb suab ntaub, thiab lawv yog neeg yug tsiaj txhu; thiab nws tus kwv lub npe hu ua Yunpas, uas yog yawg koob ntawm cov neeg txawj ntaus nkauj nog ncas thiab tshuab raj.

46 Thiab Xilas kuj yug tau Tunpas Kayees, tus uas txawj ntaus txhua yam cuab yeej muab tooj muab hlau ntaus. Thiab Tunpas Kayees tus muam hu ua Na-amas.

47 Thiab Lamej hais rau nws ob tug poj niam, Adahes thiab Xilas tias: Lamej ob tug poj niam, neb cia li mloog kuv lub suab; vim kuv tau tua ib tug txiv neej thiaj lwj kuv siab, thiab ib tug tub hluas thiaj mob kuv.

48 Yog leej twg tua Kayees nws yuav raug txim ua pauj xya npaug, ces tseeb tiag tus uas tua Lamej ces tus ntawd yuav raug txim pauj xya caum thiab xya npaug;

49 Vim Lamej tau ua ib txoj kev khi lus nrog Dab Ntxwg Nyoog, zoo li Kayees, qhov uas muab nws ua Kav Mahas, tus kav txoj kev ua ntsiag to tseem ceeb uas tau muab rau Kayees los ntawm Dab Ntxwg Nyoog; thiab Enauj tus tub Iladis, tau paub lawv tej kev ntsiag to, txawm pib qhia tej kev ntsiag to ntawd tshwm sim rau Adas cov tub;

50 Yog li ntawd Lamej, vim nws npau taws, muab Iladis tua pov tseg, tsis zoo li Kayees txoj kev tua Anpees, rau txoj kev muaj nyiaj nplua nuj, tiam sis Lamej tua nws vim yog txoj kev lav lus.

51 Vim, txij thaum Kayees ua neej nyob los, tau muaj kev tuav hauv ntsiag to, thiab tej yam lawv ua yog nyob hauv qhov tsaus ntuj, thiab txhua tus neeg paub lawv tej kwv tej tij.

52 Yog li ntawd tus Tswv tau foom tsis zoo rau Lamej, thiab nws tsev neeg, thiab lawv txhua tus uas tau khi lus nrog Dab Ntxwg Nyoog; vim lawv tsis ua raws li Vajtswv tej lus txib, thiab ua rau Vajtswv tsis txaus siab, thiab nws tsis txhawb pab lawv, thiab tej yam lawv ua yog tej kev qias, thiab pib ri mus rau tib neeg cov tub. Thiab tau muaj nyob hauv tib neeg cov tub.

53 Thiab tsis tau hais txog tej yam no nyob hauv tib neeg cov ntxhais, vim tias Lamej tau hais txoj kev ntsiag to rau nws ob tug poj niam, thiab nkawd ntxeev siab tawm tsam nws, thiab tau tshaj tej yam no tawm, thiab tsis muaj kev khuv leej;

54 Yog li ntawd Lamej raug ntxub, thiab raug ntiab tawm, thiab tsis los rau hauv tib neeg cov tub, tsam nws yuav tuag.

55 Thiab tej hauj lwm ntawm txoj kev tsaus ntuj pib ri mus rau tib neeg cov tub.

56 Thiab Vajtswv foom tsis zoo rau lub ntiaj teb nrog kev foom tsis zoo mob heev, thiab npau taws rau cov phem, nrog tag nrho tib neeg cov tub uas nws tau tsim;

57 Vim lawv pheej tsis mloog nws lub suab, thiab tsis ntseeg nws Tib Leeg Tub, tus uas nws tau tshaj tawm tias yuav los rau hauv lub caij nyoog nruab nrab, tus uas tau npaj txij ua ntej thaum ntuj tsim teb raug los.

58 Tau pib tshaj tawm Txoj Moo Zoo li no, txij thaum chiv keeb, uas tau tshaj tawm los ntawm cov tim tswv dawb huv uas xa ntawm Vajtswv xub ntiag los, thiab los ntawm nws tus kheej lub suab, thiab los ntawm lub txiaj ntsim Vaj Ntsuj Plig Dawb Huv.

59 Txhua yam tau muab rau Adas zoo li no, los ntawm txoj kab ke dawb huv, thiab txoj Moo Zoo tshaj tawm, thiab ib co lus tshaj tawm uas muab xa tawm, kom txoj moo zoo yuav nyob hauv lub ntiaj teb no, kom txog thaum kawg; thiab tau muaj li ntawd. Amees.