Tej uas Xaiv los ntawm
Phau Ntawv Mauxes

1 Vajtswv tej lus, uas nws hais rau Mauxes thaum Vajtswv muab Mauxes coj mus rau puag saum ib lub roob siab siab,

2 Thiab nws pom Vajtswv tim ntsej tim muag, thiab nws hais lus nrog Vajtswv, thiab Vajtswv lub yeeb koob tau los rau Mauxes; yog li ntawd Mauxes thiaj tiv taus nws lub yeeb haum.

3 Thiab Vajtswv hais lus rau Mauxes, hais tias: Saib seb, kuv yog tus Tswv uas yog Vajtswv uas Muaj Hwj Chim Tag Nrho, thiab Tsis Muaj Qhov Kawg yog kuv lub npe; vim kuv yeej tsis muaj hnub pib los yog muaj xyoo kawg; thiab qhov no tsis muaj qhov kawg puas yog?

4 Thiab, saib seb, koj yog kuv tus tub; yog li ntawd cia li ntsia, thiab kuv yuav muab tej uas kuv txhais tes tsim rau koj saib; tiam sis tsis tag, vim tej yam kuv ua yeej tsis muaj qhov kawg, thiab kuv tej lus thiab, vim tej no yeej yuav tsis tsum.

5 Yog li ntawd, tsis muaj neeg muaj peev xwm pom tag nrho tej yam kuv ua, tsuas yog nws pom tag nrho kuv lub yeeb koob xwb; thiab tsis muaj neeg uas pom tau tag nrho kuv lub yeeb koob, thiab tom qab ntawd tseem nyob hauv lub ntiaj teb muaj cev nqaij daim tawv.

6 Thiab kuv muaj ib txoj hauj lwm rau koj ua, kuv tus tub Mauxes; thiab koj muaj yam ntxwv zoo li kuv Tib Leeg Tub; thiab kuv Tib Leeg Tub yog thiab yuav yog tus Cawm Seej, vim nws muaj txoj kev tshav ntuj thiab kev tseeb nplua mias; txawm li ntawd los twb tsis muaj dua lwm tus Vajtswv tsuas muaj kuv xwb, thiab txhua yam no yeej nyob nrog kuv, vim kuv paub tej yam no txhua nrho.

7 Thiab nim no, saib seb, kuv muab qhov no rau koj saib, kuv tus tub Mauxes, vim koj nyob hauv lub ntiaj teb, thiab ziag no kuv muab qhov no rau koj saib.

8 Thiab tau muaj tias Mauxes cia li ntsia, thiab pom lub ntiaj teb uas Mauxes nyob; thiab Mauxes pom lub ntiaj teb thiab qhov kawg ntawm lub ntiaj teb, thiab tag nrho noob neej uas muaj, thiab uas tau tsim; rau tej ntawd nws xav tsis thoob thiab xav tsis tag.

9 Thiab Vajtswv lub yeeb haum ncaim Mauxes mus, ces nws lub yeeb koob tsis nyob ntawm Mauxes; thiab tau tso Mauxes tseg nws nyob nws. Thiab thaum tau tso nws tseg nws nyob nws, nws vau rau hauv av.

10 Thiab tau muaj tias ntau teev tau dhau mus ua ntej Mauxes rov qab muaj nws lub zog li ib txwm muaj zoo li tib neeg; thiab nws hais rau nws tus kheej tias: Nim no, vim yog rau qhov no kuv thiaj paub tias tib neeg twb tsis tseem ceeb, qhov uas kuv yeej tsis tau xav txog li.

11 Tiam sis nim no kuv tus kheej lub qhov muag tau pom Vajtswv lawm; tiam sis tsis yog kuv lub qhov muag sab nqaij daim tawv, tiam sis yog kuv lub qhov muag ntawm sab ntsuj plig, vim kuv lub qhov muag uas ntuj tsim yuav tsis muaj peev xwm pom tau; vim kuv yuav qhuav thiab tuag hauv Vajtswv lub yeeb haum; tiam sis nws lub yeeb koob tau nyob ntawm kuv; thiab kuv pom nws lub ntsej muag, vim kuv tau hloov hlo ntawm nws xub ntiag.

12 Thiab tau muaj tias thaum Mauxes tau hais cov lus no, saib seb, Dab Ntxwg Nyoog los ntxias nws, hais tias: Neeg leej tub Mauxes, teev tiam kuv.

13 Thiab tau muaj tias Mauxes ntsia Dab Ntxwg Nyoog thiab hais tias: Koj yog leej twg? Vim saib seb, kuv yog Vajtswv ib tug tub, uas muaj yam ntxwv zoo li nws Tib Leeg Tub; thiab koj lub yeeb koob nyob qhov twg, es thiaj tsim nyog kuv teev tiam koj?

14 Vim saib seb, kuv tsis muaj peev xwm ntsia Vajtswv, tsuas yog nws lub yeeb koob los rau kuv tso, thiab kuv hloov hlo ntawm nws xub ntiag. Tiam sis kuv muaj peev xwm ntsia koj ntawm kuv sab cev nqaij daim tawv. Tsis yog li ntawd tiag tiag los?

15 Cia li qhuas kuv tus Vajtswv lub npe, vim nws tus Ntsuj Plig tsis tau ncaim kuv mus tag nrho, yog tsis li ces koj lub yeeb koob nyob qhov twg, vim yog kev tsaus ntuj rau kuv? Thiab kuv muaj peev xwm paub tau ntawm koj thiab Vajtswv; vim Vajtswv hais rau kuv tias: Teev tiam Vajtswv, vim koj yuav tsum ua hauj lwm rau nws tib leeg xwb.

16 Koj cia li khiav mus, Dab Ntxwg Nyoog; tsis txhob dag ntxias kuv; vim Vajtswv hais rau kuv tias: Koj twb muaj yam ntxwv zoo li kuv Tib Leeg Tub.

17 Thiab nws muab tej lus txib rau kuv thaum nws hu kuv tawm hauv tsob ntoo kub hluav taws tuaj, hais tias: Cia li hu Vajtswv los ntawm kuv Tib Leeg Tub lub npe, thiab teev tiam kuv.

18 Thiab Mauxes tau hais ntxiv tias: Kuv yuav tsis tseg txoj kev hu Vajtswv, kuv muaj lwm yam yuav nug nws: vim nws lub yeeb koob tau los rau kuv, yog li ntawd kuv muaj peev xwm paub qhov txawv ntawm koj thiab ntawm nws. Khiav mus, Dab Ntxwg Nyoog.

19 Thiab nim no, thaum Mauxes tau hais tej lus no, Dab Ntxwg Nyoog qw ib lub suab nrov, thiab tsawm thaj av, thiab txib, hais tias: Kuv yog Tib Leeg Tub, cia li teev tiam kuv.

20 Thiab tau muaj tias Mauxes pib ntshai heev; thiab thaum nws pib ntshai, nws pom ntuj txiag teb tsaus txoj kev iab. Txawm li ntawd los, thaum hu Vajtswv, Mauxes tau txais dag zog, thiab nws txib, hais tias: Khiav ntawm kuv mus, Dab Ntxwg Nyoog, vim yog tib tug Vajtswv no xwb uas kuv yuav teev tiam, yog tus Vajtswv uas muaj yeeb koob.

21 Thiab nim no Dab Ntxwg Nyoog pib tshee hnyo, thiab cov av deeg daws; thiab Mauxes txais dag zog, thiab hu Vajtswv, hais tias: Los ntawm Tib Leeg Tub lub npe, cia li khiav mus, Dab Ntxwg Nyoog.

22 Thiab tau muaj tias Dab Ntxwg Nyoog qw ib lub suab nrov, thiab quaj, thiab nyiav, thiab tom hniav qees; thiab nws khiav qhov ntawd mus, kiag ntawm Mauxes xub ntiag mus, ces nws tsis pom Dab Ntxwg Nyoog lawm.

23 Thiab nim no Mauxes ua pov thawj txog tej yam no; tiam sis vim yog txoj kev phem thiaj tsis tau qhia tej yam no rau noob neej.

24 Thiab tau muaj tias thaum Dab Ntxwg Nyoog tau khiav ntawm Mauxes xub ntiag mus lawm, ces Mauxes tsa muag ntsia mus saum ntuj, vim nws muaj tus Vaj Ntsuj Plig Dawb Huv puv npo, tus uas ua pov thawj rau Leej Txiv thiab Leej Tub;

25 Thiab thaum hu txog Vajtswv lub npe, nws pom Vajtswv lub yeeb koob dua, vim Vajtswv lub yeeb koob tau los rau nws; thiab nws hnov ib lub suab, hais tias: Koj tau koob hmoov, Mauxes, vim kuv, tus uas Muaj Hwj Chim Tag Nrho, tau xaiv koj, thiab yuav ua kom koj muaj zog dua cov dej hiav txwv; vim cov dej yuav ua raws li koj tej lus txib zoo ib yam li koj twb yog Vajtswv.

26 Thiab xyuas seb, kuv twb nyob nrog koj, kom mus kawg koj lub neej; vim koj yuav tso kuv haiv neeg dim ntawm kev ua qhev, uas yog cov neeg Ixayees uas kuv xaiv.

27 Thiab tau muaj tias, thaum lub suab tseem hais lus, Mauxes ntsia thiab pom lub ntiaj teb, muaj tseeb tiag, tag nrho lub ntiaj teb no; thiab tsis muaj ib qho me me ntawm lub ntiaj teb uas nws tsis pom, thiab nws pom los ntawm Vajtswv tus Ntsuj Plig.

28 Thiab nws kuj pom cov neeg nyob hauv, thiab tsis muaj ib tug neeg uas nws tsis pom; thiab nws pom tau lawv los ntawm Vajtswv tus Ntsuj Plig; thiab lawv muaj coob heev, uas twb suav tsis txheeb li tej xuab zeb nyob tom ntug dej hiav txwv.

29 Thiab nws tau pom thaj av ntau; thiab txhua thaj av hu ua ntiaj teb, thiab muaj neeg nyob rau saud.

30 Thiab tau muaj tias Mauxes thov Vajtswv, hais tias: Kuv thov koj qhia kuv, saib vim li cas thiaj muaj tej no, thiab koj muab dab tsi tsim tej ntawd?

31 Thiab saib seb, tus Tswv lub yeeb koob los rau Mauxes, Mauxes txawm sawv ntawm Vajtswv xub ntiag, thiab hais lus tim ntsej tim muag nrog nws. Thiab tus Tswv uas yog Vajtswv hais rau Mauxes tias: Rau kuv tus kheej lub hom phiaj, kuv thiaj li tsim tej no. Qhov no yog laj lim tswv yim thiab qhov no nyob ntawm kuv.

32 Thiab los ntawm txoj lus uas muaj kuv lub hwj chim, kuv tau tsim tej ntawd, uas yog kuv Tib Leeg Tub, tus uas muaj kev tshav ntuj thiab kev tseeb nplua mias.

33 Thiab kuv tau tsim tej ntiaj teb suav tsis txheeb; thiab kuv kuj tau tsim tej ntawd rau kuv lub hom phiaj; thiab kuv tau tsim tej ntawd los ntawm Leej Tub, uas yog kuv Tib Leeg Tub.

34 Thiab thawj tus tib neeg ntawm txhua tus tib neeg kuv tau muab hu ua Adas, uas txhais tias coob.

35 Tiam sis kuv tsuas muab rau koj ib zaj hais txog lub ntiaj teb no xwb, thiab cov neeg nyob rau haud. Vim saib seb, twb muaj ntau lub ntuj uas tau dhau mus lawm los ntawm kuv txoj lus uas muaj hwj chim. Thiab twb muaj ntau lub ntuj uas ziag no tseem nyob, thiab tej ntawd los tib neeg suav tsis txheeb; tiam sis kuv yeej suav txhua yam, vim tej ntawd yog kuv li thiab kuv paub tej ntawd.

36 Thiab tau muaj tias Mauxes hais lus rau tus Tswv, hais tias: Thov hlub tshua rau koj tus tub qhe, auj Vajtswv, thiab qhia ntsig txog lub ntiaj teb no rau kuv, thiab cov neeg nyob rau haud, thiab saum ntuj, thiab tom qab ntawd koj tus tub qhe yuav txaus siab.

37 Thiab tus Tswv uas yog Vajtswv hais lus rau Mauxes, hais tias: Tej lub ntuj ceeb tsheej, yeej muaj ntau, thiab neeg tsis muaj peev xwm suav tej ntawd tas; tiam sis kuv yeej suav tej ntawd, vim tej ntawd yog kuv li.

38 Thiab thaum ib lub ntiaj teb, thiab tej ntuj saud dhau mus ces twb muaj ib lub ntxiv yuav los; thiab tsis muaj qhov kawg rau kuv tej hauj lwm, thiab rau kuv tej lus.

39 Vim saib seb, qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab kom tau txoj sia nyob mus ib txhis.

40 Thiab nim no, kuv tus tub Mauxes, kuv mam hais lus rau koj ntsig txog lub ntiaj teb no lub uas koj sawv rau saud; thiab koj yuav sau tej yam uas kuv yuav hais.

41 Thiab nyob rau hnub uas noob neej yuav muab kuv tej lus suav tias tsis muaj nqis thiab muab kuv tej lus ntau yam tshem tawm hauv phau ntawv uas koj yuav sau, saib seb, kuv yuav tsa dua ib tug zoo li koj sawv; thiab yuav rov qab muaj dua tej lus ntawd rau noob neej—rau tag nrho cov uas yuav ntseeg.

42 (Tau hais tej lus no rau Mauxes nyob saum lub roob, lub npe roob uas yuav tsis paub nyob hauv noob neej. Thiab nim no muab tej lus hais rau koj. Tsis txhob muab qhia rau leej twg tsuas yog cov uas ntseeg xwb. Twb yog li ntawd. Amees.)