“Pebrero 15–21. Doktrina kag mga Kasugtanan 14–17: ‘Magtindog Bilang Saksi,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)
“Pebrero 15–21. Doktrina kag mga Kasugtanan 14–17,” Dali, Magsunod sa Akon—Para sa Mga Indibidwal kag Mga Pamilya: 2021
Pebrero 15–21
Doktrina kag mga Kasugtanan 14–17
“Magtindog Bilang Saksi”
Ang pamilya kag kaabyanan ni Joseph Smith kon kaisa nagapangabay sa iya nga magpangayo sang rebelasyon parte sa kon ano ang gusto ipahimo sa ila sang Dios. Samtang imo ginabasa ining mga rebelasyon, pamensara kon ano ang direksyon nga ginhanda sang Dios para sa imo.
Isulat Ang Imo Mga Panghunahuna
Bisan pa nga ang paglubad nagapadayon sing maayo, sang Mayo 1829 nagbudlay na gid ang sitwasyon sa Harmony para sa ila ni Joseph, Emma, kag Oliver. Nagadako ang kasingki sang mga kasilingan samtang nagaamat dula ang suporta sang pamilya ni Emma. Bangod nakabatyag nga indi na hilway sa katalagman ang Harmony, nakig-angot si Oliver sa isa ka abyan nga nagpahayag sang interes sa buluhaton ni Joseph: si David Whitmer. Nagaistar si David upod sa iya mga ginikanan kag kauturan sa Fayette, New York, mga 100 ka milya ang kalayuon. Nakilala niya si Oliver isa ka tuig antes, kag nagapadala si Oliver sang pila ka sulat sugod sadto, nga nagaistorya sang iya mga eksperiyensya samtang nagaobra upod sa Propeta. Wala gid sa ila ni David ukon sa iya pamilya ang nakakilala kay Joseph. Pero sang nag-ayo si Oliver kon pwede sila ni Joseph magsaylo sa balay sang pamilya Whitmer para tapuson ang paglubad sang Libro ni Mormon, hugot sa buot nga ginbuksan sang mga Whitmer ang ila puluy-an. Kag nakahibalo ang Ginuo nga madamo pa sang importante nga mga hitabo ang nagahulat sa mga Whitmer magluwas sa pagbaton sa Propeta. May partikular Sia nga instruksyon para sa ila, nga makita sa Doktrina kag mga Kasugtanan 14–17, kag sa husto nga tion mangin isa sila sa pundasyon nga mga pamilya sang Simbahan kag mga saksi sang nagapadayon nga Pagpanumbalik.
Para sa dugang nga ihibalo parte sa pamilya Whitmer, tan-awa sa Saints, 1:68–71.
Mga Ideya para sa Personal nga Pagtuon sang Balaan nga Mga Kasulatan
Doktrina kag mga Kasugtanan 14
Sarang ako magpartisipar sa “dako kag dalayawon nga buluhaton.”
Sang makilala niya si Joseph Smith, si David Whitmer isa ka hubin nga tawo nga dedikado sa iya obra sa uma sang pamilya. Pero may lain nga ipaobra ang Ginuo kay David—bisan pa nga daw may pagkapareho man ini sa panguma. Samtang imo ginabasa ang Doktrina kag mga Kasugtanan 14:1–4, pat-ini kon paano ginkumparar sang Ginuo ang Iya buluhaton sa klase sang trabaho nga pamilyar kay David. Ano ang imo matun-an parte sa buluhaton sang Ginuo sa sini nga pagpaanggid?
Paano mo “iduso ang [imo] garab”? (bersikulo 4). Tandai ang mga ginhatag nga promisa sa bilog nga seksyon sa mga “nagatinguha nga ipahanabo kag siguruhon ang … Sion” (bersikulo 6).
Doktrina kag mga Kasugtanan 14:2
Ang pulong sang Dios “buhi kag gamhanan.”
Ginkumparar sang Ginuo ang Iya pulong sa “espada nga [doble ang sulab]” (Doktrina kag mga Kasugtanan 14:2). Ano ang ginapanugyan sa imo sining pagpaanggid parte sa pulong sang Dios? Halimbawa, paano ang Iya pulong nangin buhi, gamhanan, kag matalom? Paano mo naeksperiyensyahan ang gahum sang pulong sang Dios?
Pamensara ang iban pa nga mga paagi nga ginalaragway sang Dios ang Iya pulong. Halimbawa, ano ang imo matun-an parte sa pulong sang Dios halin sa mga pagpaanggid sa masunod nga mga dinalan?
Ginkumparar sang Ginuo ang Iya pulong sa espada.
Doktrina kag mga Kasugtanan 14:7
Ang kabuhi nga wala katapusan amo ang “pinakadako sa tanan nga bugay sang Dios.”
Samtang imo ginabasa ang Doktrina kag mga Kasugtanan 14:7, binagbinaga kon ngaa ang kabuhi nga wala katapusan amo ang “pinakadako sa tanan nga bugay sang Dios.” Mahimo nga makabulig ining panugdaon halin kay Pangulong Russell M. Nelson: “Sa idalom sang dako nga plano sang kalipayan sang Dios, ang mga pamilya mahimo nga maselyohan sa mga templo kag mahanda sa pagbalik sa pagpuyo sa Iya balaan nga presensya sa katubtuban. Amo ina ang kabuhi nga wala katapusan!” (“Thanks Be to God,” Ensign ukon Liahona, Mayo 2012, 77).
Pamensara ang pagdugang sang mga cross reference sa bersikulo 7 nga makabulig sa imo nga maintiendihan pa gid ang parte sa kabuhi nga wala katapusan (tan-awa sa “Eternal Life” sa Guide to the Scriptures, scriptures.ChurchofJesusChrist.org). Ano ang imo matun-an nga nagainspirar sa imo nga magtinguha para sa kabuhi nga wala katapusan?
Doktrina kag mga Kasugtanan 15–16
Ang pagdala sang mga kalag kay Cristo labing importante.
Gusto nanday John kag Peter Whitmer nga mahibal-an kon ano ang “mangin labing importante” sa ila mga kabuhi (Doktrina kag mga Kasugtanan 15:4; 16:4). Ginapamangkot mo man bala ini sa imo kaugalingon? Samtang imo ginabasa ang Doktrina kag mga Kasugtanan 15–16, binagbinaga kon ngaa ang pagdala sang mga kalag kay Cristo may labi nga importansya. Paano mo agdahon ang mga kalag kay Cristo?
Tan-awa man sa Doktrina kag mga Kasugtanan 18:10–16.
Doktrina kag mga Kasugtanan 17
Nagagamit ang Ginuo sang mga saksi agud ipahamtang ang Iya pulong.
Ano ang saksi? Ngaa nagagamit ang Ginuo sang mga saksi sa Iya buluhaton? (tan-awa sa 2 Mga Taga-Corinto 13:1). Binagbinaga ining mga pamangkot samtang imo ginabasa ang mga pulong sang Dios sa Tatlo ka mga Saksi sa Doktrina kag mga Kasugtanan 17. Mahimo nga makabulig man ang pagrebyu sang “Ang Testimonya sang Tatlo ka mga Saksi” sa Libro ni Mormon. Paano nagabulig ang mga saksi nga mapatuman ang “matarong nga mga katuyuan” sang Dios? (bersikulo 4).
Nakahibalo ka bala nga si Mary Whitmer nakabaton man sang saksi sa bulawan nga mga lamina? Ginpakita ini ni anghel Moroni sa iya bilang pagkilala sang mga sakripisyo nga iya ginhimo samtang si Joseph, Emma, kag Oliver nagatiner sa iya balay (tan-awa sa Saints, 1:70–71). Ano ang imo matun-an sa iya eksperiyensya parte sa pagbaton sang saksi?
Tan-awa man sa Saints, 1:73–75; Ulisses Soares, “The Coming Forth of the Book of Mormon,” Ensign ukon Liahona, Mayo 2020, 32–35.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Doktrina kag mga Kasugtanan 14:1–4.Pamensara nga agdahon ang imo pamilya nga magpangita sang mga dinalan mahiangot sa panguma sa sining mga bersikulo. Ngaa ayhan ginkumparar sang Ginuo ang Iya buluhaton sa ani? Ano ang pwede naton himuon para makabulig sa Iya buluhaton?
-
Doktrina kag mga Kasugtanan 14:2.Ang aktibidades sa sining bersikulo sa “Mga Ideya para sa Personal nga Pagtuon sang Balaan nga Mga Kasulatan” nagalista sang pila ka mga dinalan sa balaan nga kasulatan parte sa pulong sang Dios. Pwede ini basahon sang mga miyembro sang pamilya kag iistorya ang ila matun-an. Paano kita ginainspirar sining mga dinalan sa balaan nga mga kasulatan nga “magpamati” sa pulong sang Dios?
-
Doktrina kag mga Kasugtanan 15:6; 16:6.Ining mga bersikulo mahimo nga makainspirar sang paghinambalanay parte sa mga butang nga may labing importansya sa inyo pamilya (tan-awa man sa Doktrina kag mga Kasugtanan 18:10).
-
Doctrine and Covenants 17.Basi masadyahan ang imo pamilya sa pagdrowing sang mga litrato sang tagsa ka bagay nga nakita sang Tatlo ka mga Saksi (tan-awa sa bersikulo 1). Samtang inyo ginabasa ang seksyon 17, pangitaa ang mga dinalan nga nagatudlo parte sa importansya sang Libro ni Mormon. Paano kita mangin mga saksi sang Libro ni Mormon.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “Indi sa Kataas sang Bukid [I’ll Go Where You Want Me to Go],” Mga Himno kag mga Ambahanon sang Kabataan, no. 46.
Mga Tingug sang Pagpanumbalik
Si Lucy Mack Smith kag ang Tatlo kag Walo ka mga Saksi
Ginpakita ni anghel Moroni ang bulawan nga mga lamina kay Joseph Smith, Oliver Cowdery, David Whitmer, kag Martin Harris sa kakahuyan malapit sa puluy-an sang mga Whitmer sa Fayette, New York. Ginbisitahan sang mga ginikanan ni Joseph ang pamilya Whitmer sang amo nga tion. Si Lucy Mack Smith, iloy ni Joseph, naglaragway sang epekto sining milagroso nga eksperiyensya sa mga saksi:
“Sa tunga-tunga sang alas tres kag alas kwatro sadto. Ako, si Mrs. Whitmer kag si Mr. Smith nagapungko sa sulod sang kuwarto. Nagapungko ako sa kilid sang katre. Sang magsulod si Joseph, lapyo sia nga nagtupad sa akon. ‘Tay! Nay!’ siling niya. ‘Wala lang kamo kahibalo kon daw ano ako kamalipayon. Gintugtan sang Ginuo nga ipakita ang mga lamina sa tatlo pa ka tawo magluwas sa akon, nga nakakita man sang anghel kag magapamatuod sang kamatuoran sang akon ginsiling. Kay nahibal-an nila sa ila kaugalingon nga wala ako nagalakat kag nagapanginto sang mga tawo. Kag pamatyag ko daw nahaw-asan ako sang tama kadako nga palas-anon, nga mabug-at katama kargahon nga ako lang. Pero karon makigbahin na sila sa palas-anon nga ini, kag malipayon gid ang akon kalag nga wala na ako nagaisahanon sa kalibutan.’ Dayon nagsulod si Martin Harris. Daw halos dag-on sia sang sobra nga kalipay. Dayon nagpamatuod sia sang iya nakita kag nabatian, kag ang iban amo man, sanday Oliver kag David. Ang ila testimonya pareho sa kaundan nga makita sa Libro ni Mormon. …
“Si Martin Harris daw halos makatusngaw para ilaragway ang iya mga nabatyagan sa tinaga. Siling niya, ‘Nakakita na ako sang anghel halin sa Langit nga wala duda nga nagpamatuod sang kamatuoran sang tanan nga akon nabatian parte sa kasulatan, kag nakita sia sang akon mga mata. Gintulok ko man ang mga lamina kag ginkaptan ini sa akon mga kamot kag makapamatuod sang amo man sa bilog nga kalibutan. Pero nakabaton ako sa akon kaugalingon sang saksi nga indi mapahayag sa pulong, nga indi malaragway sang baba, kag ginadayaw ko ang Dios sing hugot sa akon kalag nga maalwan niya nga ginpili nga himuon ako, bisan ako, nga saksi sa kadako sang iya buluhaton kag mga plano para [sa] mga anak sang katawhan.’ Nag-upod man sa iya sanday Oliver kag David sa maligdong nga pagdayaw sa Dios sa iya kaayo kag kaluoy. Nagpauli kami [sa Palmyra, New York,] sang madason nga adlaw nga isa ka masinadyahon, nagakalipay nga diutay nga guban.”1
Mga laragway ni Oliver Cowdery, David Whitmer, kag Martin Harris ni Lewis A. Ramsey
Ara man si Lucy Mack Smith sang ang Walo ka mga Saksi nagbalik halin sa ila eksperiyensya:
“Pagkatapos nga nagbalik ining mga saksi sa balay, ang anghel nagpakita liwat kay Joseph; sa tion nga ginbalik na ni Joseph ang mga lamina sa iya poder. Sina nga gab-i nagmiting kami, kon sa diin ang tanan nga mga saksi nagpaambit sang testimonya sa mga kamatuoran nga nasambit sa ibabaw; kag ang tanan namon nga pamilya, bisan pa asta si Don Carlos [Smith], nga 14 anyos lamang ang pangidaron, nagpamatuod sang kamatuoran sang dispensasyon sa ulihing mga adlaw—nga sang amo nga tion lubos nga nag-umpisa.”2
Eskultura ni Joseph Smith kag sang Walo ka mga Saksi ni Gary Ernest Smith
Si Anghel Moroni nga Nagapakita sang Bulawan nga Lamina kay Joseph Smith, Oliver Cowdery, kag David Whitmer, ni Gary B. Smith