Pebrero 8–14

Doktrina kag mga Kasugtanan 12–13; Joseph Smith—Kasaysayan 1:66–75

“Sa Inyo Kapareho Ko nga mga Alagad”

Nakabaton sanday Joseph Smith kag Oliver Cowdery sang dugang nga ihibalo samtang ginapangamuyo nila ang mga kamatuoran nga ila natun-an sa balaan nga mga kasulatan (tan-awa sa Joseph Smith—Kasaysayan 1:68). Paano mo sundon ang ila ehemplo?

Isulat Ang Imo Mga Panghunahuna

Ayhan kalabanan sa mga tawo sa kalibutan wala makahibalo parte sa lugar nga ginatawag Harmony, Pennsylvania. Pero ang Ginuo masami nagapili sang indi kilala nga mga lugar para sa pinakaimportante nga mga hitabo sa Iya ginharian. Sa masiot nga lugar malapit sa Harmony sang Mayo 15, 1829, si Juan Bautista nagpakita bilang nabanhaw nga persona sa ila ni Joseph Smith kag Oliver Cowdery. Gintungtong niya ang iya mga kamot sa ila mga ulo kag ginhatag ang Pagkapari ni Aaron sa ila, nga ginatawag sila nga “kapareho ko nga mga alagad” (Doktrina kag mga Kasugtanan 13:1).

Ang kabigon nga pareho nga alagad ni Juan Bautista, nga nagbunyag sang Manluluwas kag naghanda sang dalan para sa Iya pag-abot (tan-awa sa Mateo 3:1–6, 13–17), mahimo nga nangin makapaubos, ayhan nangin makahalawhaw sa sining duha ka lamharon nga mga lalaki nga ara sa ila pangidaron nga beintihon. Sang amo nga tion, sanday Joseph kag Oliver halos wala makilal-i, pareho sang Harmony. Pero ang pag-alagad sa buluhaton sang Dios parte sa kon paano kita nagaserbisyo, indi sa kon sin-o ang nakatalupangod. Bisan gamay ukon indi makita ang imo kontribusyon kon kaisa, isa ka man ka kapareho nga alagad sa dako nga buluhaton sang Ginuo.

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 12

Luyag sang Ginuo nga magbulig ako sa pagpasad sang kawsa sang Sion.

Nakilala ni Joseph Knight Sr. kag sang iya asawa, nga si Polly, si Joseph Smith sang, bilang isa ka 20 anyos, nagsugod sia nga mag-obra sa ila uma sa Colesville, New York. Ginlaragway sia ni Joseph Knight bilang ang iya pinakamaayo nga trabahador. Nagpati sia sa testimonya ni Joseph Smith parte sa bulawan nga mga lamina kag gindala si Polly para bisitahan si Joseph Smith samtang ginalubad nila ang Libro ni Mormon sa iya balay sa Harmony, Pennsylvania. Gilayon sia nga nagpati. Sa bilog nila nga kabuhi, sanday Joseph kag Polly nagpabilin nga matinuohon sa ginpanumbalik nga ebanghelyo. Masobra 60 ka mga miyembro sang pamilya Knight ang nag-upod kag nagbulig sa pagpasad sang Simbahan sa New York, Ohio, Missouri, Nauvoo, kag sang ulihi sa Siyudad sang Salt Lake.

Gusto ni Joseph Knight nga mahibal-an kon paano sia makabulig sa buluhaton sang Ginuo. Ang sabat sang Ginuo (nga karon amo ang Doktrina kag mga Kasugtanan 12) magamit sa “tanan nga may handum sa pagpahanabo kag pagpahamtang sining buluhaton” (bersikulo 7)—lakip na sa imo. Ano ang buot silingon sa imo sang “ipahanabo kag sigurohon ang kaayohan sang Sion”? (bersikulo 6). Paano ka mabuligan sang mga prinsipyo kag mga kinaiya sa mga bersikulo 7–9 nga himuon ini?

Tan-awa man sa “The Knight and Whitmer Families,” Revelations in Context, 20–24.

Doktrina kag mga Kasugtanan 13

Ang Pagkapari nga Aaron ginpanumbalik ni Juan Bautista.

Sa isa lang ka dinalan, ginpahayag ni Juan Bautista ang madamo nga mga kamatuoran parte sa Pagkapari ni Aaron. Hunahunaa nga ilista ang tanan nga imo matun-an sa sining seksyon (lakip na ang sa pauna sang seksyon). Mahimo nga makabulig sa imo nga tun-an ang pila sa mga dinalan nga imo makita. Ari ang pila ka mga halimbawa para makasugod ka:

• “Ang mga yabi sa pag-alagad sang mga anghel”: 2 Nefi 32:2–3; Moroni 7:29–32; Jeffrey R. Holland, “The Ministry of Angels,” Ensign ukon Liahona, Nob. 2008, 29–31; Guide to the Scriptures, “Angels,” scriptures.ChurchofJesusChrist.org

• “Ang mga yabi … sang ebanghelyo sang paghinulsol”: 3 Nefi 27:16–22; Doktrina kag mga Kasugtanan 84:26–27; Dale G. Renlund, “The Priesthood and the Savior’s Atoning Power,” Ensign ukon Liahona, Nob. 2017, 64–67

• “Ang mga anak nga lalaki ni Levi”: Numeros 3:5–13; Doktrina kag mga Kasugtanan 84:31–34; Guide to the Scriptures, “Aaronic Priesthood,” “Levi,” scriptures.ChurchofJesusChrist.org

Ano nga mga bugay ang imo nabaton paagi sa mga ordinansa sang Pagkapari ni Aaron?

Ginabunyagan ni Joseph Smith si Oliver Cowdery, ni Del Parson

Joseph Smith—Kasaysayan 1:66–75

Ang mga ordinansa nagaangot sa akon sa gahum sang Dios.

Si Sister Carole M. Stephens, anay manuglaygay sa Pangkabilugan nga Panguluhan sang Relief Society, nagtudlo: “Ang mga ordinansa kag mga kasugtanan sang priesthood nagaangot sa kabug-osan sang mga bugay nga ginpromisa sa aton sang Dios, nga nangin posible bangud sang Pagbayad-Sala sang Manluluwas. Ginaarmasan sini ang mga anak nga lalaki kag babayi sang Dios sang gahum, ang gahum sang Dios, kag ginahatagan kita sang oportunidad nga makabaton sang kabuhi nga wala katapusan” (“Do We Know What We Have?” Ensign ukon Liahona, Nob. 2013, 12).

Samtang imo ginabasa ang Joseph Smith—Kasaysayan 1:66–75, lakip na ang tanda sa punta sang bersikulo 71, pamensara kon ano ang nag-inspirar kanday Joseph kag Oliver nga magpamangkot parte sa bunyag, kag tandai ang mga bugay nga nag-abot sa ila pagkatapos nga magpartisipar sa mga ordinansa sang priesthood. Pamensara ang pagbasa sang mga sinulat mo sa imo journal pagkatapos nga magbaton sang mga ordinansa ukon pagrekord sang imo mga madumduman sa amo nga mga hitabo. Ano nga mga bugay ang imo nabaton paagi sa mga ordinansa sang priesthood?

Tan-awa man sa Doktrina kag mga Kasugtanan 84:20–22; Saints, 1:65–68.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 12:8.Ngaa kinahanglanon ang mga kinaiya nga nalista sa sining bersikulo kon aton ginahimo ang buluhaton sang Ginuo?

Doktrina kag mga Kasugtanan 13.Ano ayhan ang magapatubo sang pagtuo sang imo pamilya sa pagpanumbalik sang Pagkapari ni Aaron? Ang litrato nga kaupod sining outline mahimo nga makabulig sa imo pamilya nga mapanan-aw ang pagpanumbalik sang Pagkapari ni Aaron. Masadyahan ayhan sila nga idrowing ang hitabo, base sa ila mabasa sa Joseph Smith—Kasaysayan 1:68–74? Pwede man nila ipaambit ang ila mga testimonya parte sa gahum sang priesthood sa ila mga kabuhi.

Joseph Smith—Kasaysayan 1:68.Paano naton sundon ang halimbawa nanday Joseph Smith kag Oliver Cowder sa pagpangita sang mga sabat sa aton mga pamangkot? Basi samtang nagabasa kamo sing ululupod, pwede ninyo himuon nga regular nga batasan ang magpundo kag magpamangkot kon may gusto mamangkot parte sa ila ginabasa.

Joseph Smith—Kasaysayan 1:71, tanda.Ano ang nanamian sang mga miyembro sang imo pamilya parte sa ginpanghambal ni Oliver Cowdery? Ano ang pila sa “indi malimtan nga mga adlaw” sang imo pamilya?

Joseph Smith—Kasaysayan 1:73–74.Ano ang nangin epekto sang Balaan nga Espiritu sa ila ni Joseph kag Oliver? Sang san-o ginbuligan sang Espiritu ang inyo pamilya nga maintiendihan ang balaan nga mga kasulatan kag magkasadya sa Ginuo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magtuon sang isa ka topiko. Bilang pamilya, magpili sang topiko nga gusto ninyo tun-an pa sing maid-id. Halimbawa, sini nga semana pwede ninyo gamiton ang Guide to the Scriptures (scriptures.ChurchofJesusChrist.org) para magpangita sang balaan nga mga kasulatan parte sa Pagkapari ni Aaron.

Sa Inyo Kapareho Ko nga mga Alagad, ni Linda Curley Christensen kag Michael T. Malm