“Pebrero 1–7. Doktrina kag mga Kasugtanan 10–11: ‘Agud nga Mangin Madinalag-on Ka,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Pebrero 1–7. Doktrina kag mga Kasugtanan 10–11,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

manuskrito sang Libro ni Mormon

Replika sang orihinal nga manuskrito sang Libro ni Mormon.

Pebrero 1–7

Doktrina kag mga Kasugtanan 10–11

“Agud nga Mangin Madinalag-on Ka”

Ang pagsulat sang mga panghunahuna samtang nagabasa sang balaan nga mga kasulatan daw pareho sang pagtanom sang mga binhi, bisan ang magagmay nga impresyon magadala sa makahulugan nga personal nga rebelasyon.

Isulat Ang Imo Mga Panghunahuna

Samtang nagapadayon ang paglubad sang Libro ni Mormon, isa ka pamangkot ang natural nga nagtuhaw: Ano ang dapat himuon nanday Joseph Smith kag Oliver Cowdery parte sa linubad na nga mga pahina nga nadula? Ang lohikal nga butang amo nga balikan kag suliton sa paglubad ang amo nga bahin, pero nakita sang Ginuo ang bagay nga indi nila makita—nagaplano ang malaut nga mga tawo nga islan ang mga tinaga sa amo nga mga pahina agud magtuga sang pagduda sa inspirado nga buluhaton ni Joseph. May plano ang Dios para punggan ang pagpaninguha ni Satanas kag buslan ang nadula. Nasugdan na ining plano linibo na ka tuig antes sang gin-inspirar si Nefi nga maghimo sang ikaduha nga rekord nga nagatalakay sang pareho nga panahon. Sang ulihi, gin-inspirar si Mormon nga ilakip ining rekord sa Libro ni Mormon “para sa isa ka maalamon nga katuyuan” nga ang Ginuo ang nakahibalo (tan-awa sa Mga Pulong ni Mormon 1:3–7).

“Ang akon kaalam,” siling sang Ginuo kay Joseph, “mas sobra sangsa katuso sang yawa” (Doktrina kag mga Kasugtanan 10:43). Isa ina ka makaulumpaw nga mensahe sa panahon pareho sang aton karon, kon sa diin ang nagapadayon nga pagpaninguha sang kaaway nga pahuyangon ang pagtuo mas nagabaskog. Pareho kay Joseph, sarang kita nga mangin “tampad kag magapadayon” sa buluhaton nga ginapahimo sa aton sang Dios (bersikulo 3). Dayon matukiban naton nga nagpahamtang na Sia nga daan sang paagi agud nga ang “pwertahan sang impiyerno indi makadaog” batok sa aton (bersikulo 69).

Tan-awa sa Saints, 1:51–61.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 10:1–33

Ginahandum ni Satanas nga gub-on ang buluhaton sang Dios.

Mas gusto ni Satanas nga kalimtan naton nga ara sia—ukon bisan indi na lang naton matalupangdan ang iya pagpaninguha nga impluwensyahan kita (tan-awa sa 2 Nefi 28:22–23). Pero ang pulong sang Ginuo sa Doktrina kag mga Kasugtanan 10 nagapakita nga si Satanas padayon, aktibo nga nagakontra sa buluhaton sang Dios. Samtang imo ginabasa ang mga bersikulo 1–33, hibal-a kon paano gintinguhaan ni Satanas nga gub-on ang buluhaton sang Dios sang tiyempo ni Joseph Smith (tan-awa man sa mga bersikulo 62–63). Ano ang pagpalareho nga makita mo sa mga pamaagi nga nagahikot si Satanas sa karon? Pwede ka mangabay sa Ginuo nga buligan ka nga makita kon paano ka ayhan ginatentar ni Satanas. Ano ang imo matun-an sa seksyon 10 nga makabulig sa imo nga batuan ang mga pagtinguha ni Satanas?

Doktrina kag mga Kasugtanan 10:34–52

Ang “kaalam [sang Ginuo] mas sobra sangsa katuso sang yawa.”

Masobra 2,400 ka tuig antes, naghanda ang Ginuo para buslan ang nadula nga mga pahina sang Libro ni Mormon (tan-awa sa 1 Nefi 9). Ano ang imo matun-an parte sa Ginuo sa Doktrina kag mga Kasugtanan 10:34–52? Ano nga ebidensya sang kaalam kag ihibalo na nga daan sang Dios ang imo nakita sa imo kabuhi?

Ang rekord nga ginhanda sang Dios para ibulos sa nadula nga manuskrito makita karon sa 1 Nefi tubtob sa Omni. Paano ang mga istorya kag mga pinanudlo sa sining sinulatan “[nakahatag] sing mas dako nga mga paghangop [sa] ebanghelyo” sa imo? (Doktrina kag mga Kasugtanan 10:45).

Si Mormon nga Nagapalip-ot sang mga Lamina, ni Tom Lovell

Doktrina kag mga Kasugtanan 11

Kon magpangayo ako sa Dios, makabaton ako.

Pila sa mga miyembro sang pamilya kag kaabyanan ni Joseph Smith ang nagpangabay sa iya nga hibaluon ang pagbuot sang Ginuo para sa ila. Nalipay si Joseph nga himuon ini, pero ang Ginuo handa man maghatag sa ila sang ila personal nga rebelasyon. Sa Doktrina kag mga Kasugtanan 11, isa ka rebelasyon nga nabaton ni Joseph para sa iya magulang nga si Hyrum, nagsiling ang Ginuo, “Hatagan ko ikaw sang akon Espiritu, … kag dayon imo mahibaluan … ang tanan nga butang kon ano man ang ginapangayo mo sa akon” (Doktrina kag mga Kasugtanan 11:13–14).

Nagsiling ang Ginuo nga ang Iya mga pulong para sa “tanan nga may maayo nga mga handum, kag nagduso sang ila garab sa pag-ani” (bersikulo 27). Sa Doktrina kag mga Kasugtanan 11, ano ang gusto ihambal sa imo sang Ginuo parte sa personal nga rebelasyon? parte sa pagpartisipar sa buluhaton sang Dios? Ano ang iban pa Niya nga mga mensahe para sa imo?

Doktrina kag mga Kasugtanan 11:15–26

Kon akon tinguhaan nga “hibaluon ang pulong sang [Dios],” maangkon ko ang Iya Espiritu kag gahum.

Bisan antes pa ginlubad ang Libro ni Mormon, nalangkag na nga daan si Hyrum Smith sa pagwali sang ebanghelyo. Samtang imo ginabasa ang sabat sang Ginuo sa iya mga handum, pamensara kon ano ang buot silingon sa imo sang “hibaluon ang pulong sang [Dios]” (bersikulo 21). Paano makabulig sa imo ang paghibalo sang pulong sang Dios nga magserbisyo sa Simbahan? Paano sini ginadala ang gahum sang Dios sa imo kabuhi?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 10:5.Ano ang aton matun-an sa sining bersikulo parte sa gahum sang pangamuyo? Paano kita “magpangamuyo pirme”? (Para sa pila ka mga ideya, tan-awa sa David A. Bednar, “Pray Always,” Ensign ukon Liahona, Nob. 2008, 41–44.)

Doktrina kag mga Kasugtanan 10:38–46.Para buligan ang imo pamilya nga hambalan kon paano ginbuslan sang Ginuo ang nadula nga mga pahina sang ginlubad nga Libro ni Mormon, basi pwede hambalan sang mga miyembro sang pamilya ang butang nga nadula sa ila sining karon lang. Ano ang ila nabatyagan sang nadiskubrehan nila nga nadula ini? Ano ang ila nabatyagan sang makita ini? Bisan pa nga ang nadula nga mga pahina sang Libro ni Mormon wala na makit-i, paano ini ginbuslan sang Ginuo, suno sa Doktrina kag mga Kasugtanan 10:38–46?

Doktrina kag mga Kasugtanan 10:55–70.Agdaha ang mga miyembro sang pamilya nga pangitaon ukon markahan ang mga dinalan nga nagasiling kon “ano Sia” ukon ang “himuon Niya.” Ano ang aton matun-an sa mga dinalan nga “ano Sia” parte sa kon sin-o si Jesucristo kag kon daw ano Sia? Ano ang aton matun-an sa mga dinalan nga “himuon Niya” parte sa Iya mga ginahimo? Paisoga ang mga miyembro sang pamilya nga iistorya kon paano ginapabakod sining mga kamatuoran ang ila pagtuo kay Jesucristo.

Doktrina kag mga Kasugtanan 11:12–14.Ang pagbasa sining mga bersikulo makabulig sa imo pamilya nga mahibal-an kon san-o ang Espiritu nagapakighambal sa ila. Pwede ka magpasiga sang flashlight sa salog kag hagara ang isa ka miyembro sang pamilya nga mag-isdog kon diin ini nagasanag. Paano ini nangin pareho sa pagsunod sang giya sang Balaan nga Espiritu? Ano nga personal nga mga eksperiyensya ang pwede mo masugid?

Doktrina kag mga Kasugtanan 11:15–30.Pamensara ang paghimo sang listahan sang mga butang nga ginsiling sang Ginuo nga himuon ni Hyrum Smith para mangin handa sia sa pagpaambit sang ebanghelyo. Ano ang dapat naton obrahon bilang pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Gamita ang balaan nga mga kasulatan sa imo kabuhi. Pagkatapos basahon ang isa ka dinalan sa balaan nga mga kasulatan, pangabaya ang mga miyembro sang pamilya nga magpaambit sang mga paagi nga magamit ang mensahe sa ila mga kabuhi. Halimbawa, pwede nila ipaambit kon paano ang Espiritu nag-impluwensya sa ila sa mga paagi nga ginalaragway sa Doktrina kag mga Kasugtanan 11:12–13.