“Enero 25–31. Doktrina kag mga Kasugtanan 6–9: ‘Ini ang Espiritu sang Rebelasyon,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Enero 25–31. Doktrina kag mga Kasugtanan 6–9,” Dali, Magsunod sa Akon—Para sa Mga Indibidwal kag Mga Pamilya: 2021

Enero 25–31

Doktrina kag mga Kasugtanan 6–9

“Ini ang Espiritu sang Rebelasyon”

Ang Ginuo nagapahayag sang mga kamatuoran sa aton panghunahuna kag mga tagipusuon (tan-awa sa Doktrina kag mga Kasugtanan 8:2–3). Samtang imo ginabasa ang Doktrina kag mga Kasugtanan 6–9, isulat ang bisan ano nga panghunahuna nga imo mabaton.

Isulat Ang Imo Mga Panghunahuna

Sang tiglagas sang 1828, isa ka hubin nga maestro nga ginhingadlan Oliver Cowdery ang nabaton para magtudlo sa Manchester, New York, kag nag-istar upod sa pamilya nanday Lucy kag Joseph Smith Sr. Nakabati si Oliver parte sa ila anak nga si Joseph, nga sa karon nagaistar na sa Harmony, Pennsylvania, kag si Oliver, nga nagkabig sang iya kaugalingon nga nagapangita sang kamatuoran, gusto nga makahibalo pa gid. Ginlaragway sang mga Smith ang mga pagbisita sang mga anghel, isa ka dumaan nga rekord, kag ang bugay sa paglubad paagi sa gahum sang Dios. Nangin interesado si Oliver. Matuod ayhan ini? Ginhatagan sia nanday Lucy kag Joseph Sr. sang laygay nga magamit man sang bisan sin-o nga nagapangita sang kamatuoran: magpangamuyo kag mamangkot sa Ginuo.

Ginhimo ini ni Oliver, kag ang Ginuo nagsabat, nga nagahambal sang paghidaet kag pagpasalig sa panghunahuna ni Oliver. Ang rebelasyon, sa natukiban ni Oliver, sarang mangin personal—butang nga iya matun-an sing lubos sa maabot nga binulan. Ang rebelasyon indi lamang para sa mga propeta; para ini sa tanan nga nagahandum sini kag nagapangita sini. Wala pa mahibal-i ni Oliver ang tanan, pero hustuhan na ang iya nahibal-an agud himuon ang madason niya nga tikang. May ginahimo ang Ginuo nga importante nga butang paagi kay Joseph Smith, kag gusto ni Oliver nga mangin kabahin sini.

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 6; 8–9

Nagapakighambal ang Amay nga Langitnon sa akon paagi sa “Espiritu sang kamatuoran.”

Sang tigpamulak sang 1829 nagbiyahe si Oliver Cowdery pakadto sa Harmony kag nagboluntaryo nga mangin manunulat ni Joseph Smith samtang iya ginalubad ang Libro ni Mormon. Mas makita na karon ni Oliver sa lapit ang proseso sang paglubad paagi sa rebelasyon. Nasadyahan gid sia sa sini nga eksperiyensya, kag nanumdom sia kon mabugayan man ayhan sia sang bugay sa paglubad. Gintugtan sia sang Ginuo nga magtilaw sa paglubad, pero ang pagbaton sang rebelasyon bag-o para kay Oliver, kag ang iya pagtinguha wala nangin madinalag-on. Madamo pa sia sang kinahanglan matun-an, kag ang Doktrina kag mga Kasugtanan 6, 8, kag 9 nagapakita nga handa ang Ginuo nga magtudlo sa iya.

Samtang imo ginabasa ining mga seksyon, tandai kon ano ang gintudlo sang Ginuo parte sa personal nga rebelasyon. Paano maangot ang Iya mga pulong sa imo mga nangin eksperiyensya—ukon sa mga gusto mo maeksperiyensya?

Halimbawa, ano ang ginapanugyan sa Doktrina kag mga Kasugtanan 6:5–7; 8:1; 9:7–8 parte sa ginapangayo sang Ginuo sa imo antes Niya ipahayag ang Iya pagbuot?

Ano ang imo matun-an sa Doktrina kag mga Kasugtanan 6:14–17, 22–24; 8:2–3; 9:7–9 parte sa lainlain nga mga paagi nga mahimo mag-abot ang rebelasyon?

May iban ka pa bala nga matun-an parte sa rebelasyon sa sining mga seksyon?

Para magtuon pa gid parte sa rebelasyon, tan-awa sa Russell M. Nelson, “Revelation for the Church, Revelation for Our Lives,” Ensign ukon Liahona, Mayo 2018, 93–96; Julie B. Beck, “And upon the Handmaids in Those Days Will I Pour Out My Spirit,” Ensign ukon Liahona, Mayo 2010, 10–12. Para sa dugang nga impormasyon parte sa “bugay ni Aaron” nga ginlaragway sa seksyon 8, tan-awa sa “Oliver Cowdery’s Gift,” Revelations in Context, 15–19.

Doktrina kag mga Kasugtanan 6:18–21, 29–37

Magtulok kay Cristo sa tagsa ka panghunahuna.

Bisan pa nga naagyan na ni Joseph ang “mabudlay nga mga sirkumstansya” samtang ginahimo ang buluhaton sang Ginuo (Doktrina kag mga Kasugtanan 6:18), sia kag si Oliver laban gid nga wala sing ideya kon daw mangin ano kabudlay inang mga sirkumstansya sa masunod nga pila ka tuig. Pero nakahibalo ang Ginuo, kag nahibal-an Niya kon ano nga mga pagtilaw ang ara man sa imo palaabuton. Ang Iya laygay kanday Joseph kag Oliver sa Doktrina kag mga Kasugtanan 6:18–21, 29–37 makabulig man sa imo. Ano ayhan ang nabatyagan nanday Joseph kag Oliver pagkatapos nga mabatian ining mga tinaga? Ano ang imo makita sa sining mga bersikulo nga nagabulig sa imo nga magsalig sa Ginuo? Paano ka mas magtulok kay Cristo sa imo kabuhi?

Si Oliver Cowdery — Oliver Cowdery, ni Lewis A. Ramsey

Doktrina kag mga Kasugtanan 6–7; 9:3, 7–14

“Kon ano ang imo ginapangayo sa akon matuman ini sa imo.”

Tandai kon pila ka beses makita ang tinaga nga “ginapangayo” ukon “mga ginahandum” sa mga seksyon 6 kag 7. Ano ang imo matun-an sa sining mga seksyon parte sa importansya nga ginahatag sang Dios sa imo mga handum? Pamangkuta ang imo kaugalingon sang pamangkot sang Ginuo sa Doktrina kag mga Kasugtanan 7:1: “Ano ang ginahandum mo?”

Isa sa matarong nga mga handum ni Oliver Cowdery—ang maglubad pareho ni Joseph—wala natuman. Samtang imo ginabasa ang Doktrina kag mga Kasugtanan 9:3, 7–14, ano nga mga pagpabatyag ang imo nabaton nga makabulig sa imo kon ang imo matarong nga mga handum indi matuman?

Tan-awa man sa Doktrina kag mga Kasugtanan 11:8

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 6:7, 13.Paano mo buligan ang imo pamilya nga maintiendihan nga ang tunay nga “manggad” makita sa kabuhi nga wala’y katapusan? (bersikulo 7). Pwede mo hagaron ang mga miyembro sang pamilya nga maghimo sang kuwarta nga papel kag sulatan ukon drowingan ini sang pila sa madamo nga mga bugay nga nabaton sang inyo pamilya tungod sang ginpanumbalik nga ebanghelyo.

Doktrina kag mga Kasugtanan 6:15, 22–23; 8:2–3; 9:7–9.Ang pagbasa sining mga bersikulo parte sa kon paano ang Dios nagapakighambal sa Iya mga kabataaan mahimo nga mangin maayo nga oportunidad para mag-istorya sa imo pamilya kon paano Sia naghambal sa imo.

Doktrina kag mga Kasugtanan 6:33–37.Pwede magpaambit ang mga miyembro sang pamilya kon paano sila “maghimo sang maayo,” bisan pa nga nahadlok sila. Ano ang kahulugan sang “magtulok [kay Cristo] sa tagsa ka panghunahuna”? (bersikulo 36). Ano ang iban pa nga mga halimbawa sang mga tawo nga nagliso sa Ginuo para malampuwasan ang pagpangduhaduha kag kahadlok? (tan-awa, halimbawa sa, Ester 4; Alma 26:23–31).

Doktrina kag mga Kasugtanan 8:10.Mahimo nga isa ini ka maayo nga oportunidad sa pagpaambit kon paano ang pagtuo kay Jesucristo nagpabakod sa imo kag sa inyo pamilya. Ngaa importante nga kita “magpangayo nga may pagtuo”? Ano nga mga bugay ang inyo nakita sa pagpangita sang mga sabat ukon bulig nga may pagtuo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Magmaisog [Dare to Do Right],” Mga Himno kag mga Ambahanon sang Kabataan, 64.

Mga Tingug sang Pagpanumbalik

Paglubad sang Libro ni Mormon

Sang Abril 1829, ang bulan sang nabaton ang mga seksyon 6–9 sang Doktrina kag mga Kasugtanan, ang mayor nga buluhaton ni Joseph Smith amo ang paglubad sang Libro ni Mormon. Sang ginpangabay sang ulihi nga iistorya kon paano ini ginlubad, nagsiling si Joseph “wala gintuyo nga ibuyagyag sa bilog nga kalibutan ang tanan nga mga detalye.”¹ Masami nga simple lang niya nga ginasiling nga ginlubad ini “paagi sa dulot, kag gahum sang Dios.”²

Wala kita makahibalo sang madamo nga mga detalye parte sa proseso sang milagroso nga paglubad, pero nahibal-an naton nga si Joseph Smith isa ka manugpanan-aw (seer), nga ginbuligan sang mga instrumento nga ginhanda sang Dios: duha ka kristal nga bato nga ginatawag nga Urim kag Tumim kag isa pa ka bato nga ginatawag bato sang manugpanan-aw (seer stone).

Ang masunod nga mga pahayag, halin sa mga nakakita pakadto sa proseso sang paglubad, nagasuporta sang saksi ni Joseph.

Ang kahoy nga kahon ni Hyrum Smith nga ginsudlan sang bulawan nga mga lamina — Ginapatihan nga ining kahon, nga ginapanag-iyahan ni Hyrum Smith, gingamit agud temporaryo nga taguon ang bulawan nga mga lamina.

Emma Smith

“Sang ginalubad sang akon bana ang Libro ni Mormon, ginsulat ko ang pila ka bahin sini, samtang iya ginalawag ang tagsa ka dinalan, tinaga sa tinaga, kag naglab-ot sia sa mga ngalan nga indi niya masampotan, ukon malagba nga mga tinaga, ginbato-bato niya ini, kag samtang ginasulat ko ini, kon magsala ako sa tigbato, pauntaton niya ako kag tadlungon ang akon pagbato-bato bisan daw imposible nga iya pa makita kon paano ko ini ginsulat sa amo to nga tion. Bisan ang tinaga nga Sara indi niya masampotan sang primero, kundi kinahanglan niya batu-batuhon, kag akon ini samputon para sa iya.”³

“Ang mga lamina masami nagatungtong lang sa lamisa nga wala man lang ginatabunan, nga naputos sa gamay nga tela nga mantel, nga akon ginhatag sa iya nga pangputos. Isa ka bes ginhikap ko ang mga lamina, samtang nagahumlad ini sa lamisa, nga ginasunod ang hurma sini kag korte. Daw matiko ini pareho sang madamol nga papel, kag nagakalas nga tunog metal kon buksan ang mga kilid sini sang kamalagko, pareho sang pagbukas sang mga kilid sang libro. …

“Ang akon pagpati amo nga ang Libro ni Mormon may diosnon nga kamatuoran—wala ako sing bisan ano nga pagduhaduha sina. Kumbinsido ako nga wala sing bisan sin-o nga makadikta sang mga sinulat sa manuskrito magluwas kon sia inspirado; tungod, samtang nagaakto bilang iya manunulat, nagadikta si [Joseph] sa akon sing inoras; kag pagbalik pagkatapos magkaon, ukon pagkatapos sang mga sablag, magasugod sia gilayon kon diin sia nagpundo, nga wala ginatan-aw ang manuskrito ukon ginapabasa ang isa ka parte sini sa iya. Amo ina sia pirme. Haloson nga mahimo ini sang tawo nga may alam; kag, para sa isa ka tawo nga ignorante kag wala sing tinapusan, imposible gid ini katama.”⁴

Si Emma Smith nga nagabulig sa paglubad — Laragway nanday Emma kag Joseph Smith ni Michael T. Malm

Oliver Cowdery

“Ginsulat ko gamit ang akon kaugalingon nga inugsulat ang bilog nga Libro ni Mormon (magluwas sa pila ka pahina) samtang nagagwa ini sa mga bibig sang propeta, samtang iya ini ginalubad paagi sa dulot kag gahum sang Dios, paagi sa Urim kag Tumim, ukon, suno sa tawag sini sa libro, balaan nga tigpatpat. Nakita ko sa akon mga mata, kag nakaptan sa akon mga kamot, ang bulawan nga mga lamina halin sa diin ini ginlubad. Nakita ko man ang mga manugpatpat.”⁵

Sanday Joseph Smith kag Oliver Cowdery nga nagalubad sang bulawan nga mga lamina — Madamo kaayo sang natun-an sanday Joseph Smith kag Oliver Cowdery paagi sa proseso sang paglubad sang bulawan nga mga lamina.