Gintawag Niya Ako sa Akon Ngalan, ni Michael Malm

Enero 11–17

Doktrina kag mga Kasugtanan 2; Joseph Smith—Kasaysayan 1:27–65

“Ang mga Tagipusuon sang mga Anak Magaliso sa Ila mga Amay”

Ang Balaan nga Espiritu sarang magtudlo sa imo sa tagsa ka tion nga magtuon ka sang balaan nga mga kasulatan—bisan sang balaan nga mga kasulatan nga kapila mo na nabasa. Gani mangin bukas sa bag-o nga mga paghangop kag inspirasyon.

Isulat Ang Imo Mga Panghunahuna

Tatlo na ka tuig sang nagpakita ang Dios nga Amay kag ang Iya Anak, nga si Jesucristo kay Joseph Smith sa kakahuyan, pero wala na nakabaton si Joseph sang dugang nga mga rebelasyon pagkatapos sadto. Nagsugod sia nga magpanumdom parte sa iya estado sa atubang sang Ginuo. Pareho sa aton tanan, may nahimo man sia nga mga kasaypanan, kag pamatyag niya ginkondenar sia tungod sini. Apang may buluhaton pa ang Dios nga ipahimo sa iya. Kag ang buluhaton nga gintawag si Joseph nga iya himuon konektado sa kon ano ang ginapangayo sa aton sang Dios. Ipagwa ni Joseph ang Libro ni Mormon; ano ang ginpangabay sa aton nga himuon diri? Pagabatunon ni Joseph ang mga yabi sang priesthood para lisuon ang mga tagipusuon sang mga anak sa ila mga amay; paano naton ginaliso ang aton mga tagipusuon sa aton mga katigulangan? Ginsugiran si Joseph sang mga propesiya nga matuman sa palaabuton; ano ang aton parte sa pagbulig nga matuman ang mga ini? Kon makigbahin kita sa buluhaton sang Dios, makapaabot kita nga magpangatubang sang oposisyon kag bisan gani sang pagpamigos, pareho sa Propeta. Pero sarang man kita nga mag-angkon sang pagtuo nga himuon kita sang Ginuo nga mga instrumento sa Iya mga kamot, pareho sang Iya ginhimo para kay Joseph.

Mga Ideya para sa Personal nga Pagtuon sang Balaan nga Mga Kasulatan

Joseph Smith—Kasaysayan 1:27–33

Ang Dios may buluhaton nga ipahimo sa akon.

Samtang imo ginabasa ang Joseph Smith—Kasaysayan 1:27–33, pamensara nga ang Dios may buluhaton nga ipahimo sa imo, pareho sang Iya ginhimo kay Joseph Smith. Binagbinaga ining imbitasyon halin kay Pangulong Russell M. Nelson: “Pamangkuta ang imo Amay nga Langitnon, sa ngalan ni Jesucristo, kon ano ang Iya nabatyagan para sa imo kag sa imo misyon diri sa duta. Kon magpamangkot ka nga may tunay nga tinutuyo, sa husto nga tion ang Espiritu magahutik sa imo sang makapabag-o-sang-kabuhi nga kamatuoran. … Ginapangako ko sa inyo nga kon inyo maintiendihan bisan sa gamay nga bahin kon ano ang pagkabig sa inyo sang inyo Amay nga Langitnon kag kon ano ang Iya ginalauman nga inyo himuon para sa Iya, magaliwat ang inyo kabuhi!” (“Becoming True Millennials” [bug-os-kalibutan nga debosyonal para sa hubin nga mga hamtong, Ene. 10, 2016], broadcasts.ChurchofJesusChrist.org).

Kon kaisa mahimo ka makabatyag sang pareho sa nabatyagan ni Joseph sa mga bersikulo 28–29. Ano ang imo matun-an sa ehemplo ni Joseph parte sa kon ano ang himuon kon ang imo mga aksyon wala nagasanto sa ginapabuhat sang Dios sa imo?

Joseph Smith—Kasaysayan 1:34–65

Ang Libro ni Mormon nagaunod sang “kabug-osan sang wala’y katubtuban nga Ebanghelyo.”

Samtang imo ginabasa ang Joseph Smith—Kasaysayan 1:34–65, pamensara kon ano nga mga detalye sa sining mga bersikulo ang magapangibabaw sa imo kon wala ka pa gid nakabati parte sa Libro ni Mormon sadto. Bilang isa ka tumuluo, ngaa nga importante ining panaysayon sa imo testimonya parte sa Libro ni Mormon?

Hunahunaa kon paano gintuman sang Libro ni Mormon ang mga propesiya sa Isaias 29:4, 11–18.

Joseph Smith—Kasaysayan 1:36–41

Ang Pagpanumbalik sang ebanghelyo nagtuman sang dumaan nga mga propesiya.

Ginsambit ni Moroni kay Joseph ang pila ka mga propesiya sa Daan kag Bag-ong Katipan, pareho sang Isaias 11; Mga Binuhatan 3:22–23; kag Joel 2:28–32. Ngaa ayhan nga importante nga mahibal-an ni Joseph ining mga propesiya? Ngaa nga importante nga mahibal-an mo ini?

Doktrina kag mga Kasugtanan 2

Ano ang ginpanumbalik ni Elias?

Si Pangulong Henry B. Eyring nagsiling: “Importante nga mahibal-an kon ngaa ginpromisa sang Ginuo nga ipadala si Elias. Si Elias isa ka dungganon nga propeta nga may dako nga gahum nga ginhatag sa iya sang Dios. Ginkaptan niya ang pinakadako nga gahum nga ginahatag sang Dios sa Iya mga anak: ginkaptan niya ang gahum sang pagselyo, ang gahum sa paghugpong sa duta kag paghugpong sini sa langit” (“Hearts Bound Together,” Ensign ukon Liahona, Mayo 2005, 78).

Tan-awa man sa Doktrina kag mga Kasugtanan 110:13–16; David A. Bednar, “Let This House Be Built unto My Name,” Ensign ukon Liahona, Mayo 2020, 84–87.

Templo sa Palmyra New York. Ang mga pamilya ginaselyohan sa templo paagi sa gahum nga ginpanumbalik paagi kay Elias.

Doktrina kag mga Kasugtanan 2

Si Elias nagkari agud lisuon ang akon tagipusuon sa akon mga katigulangan.

Ano ang ginatudlo sa inyo sang mga tinaga sa sini nga seksyon pareho sang “itanom,” “mga tagipusuon,” kag “lisuon” parte sa misyon ni Elias kag sang mga bugay sang mga yabi sang priesthood nga iya ginpanumbalik? Paano mo nabatyagan nga nagliso ang imo tagipusuon sa imo mga katigulangan? Magpamensar sang mga paagi nga sarang mo maeksperiyensyahan ang amo nga mga balatyagon sing mas pirme. Ayhan pwede ka magpangabay sang isa ka paryente nga magpaambit sa imo sang istorya parte sa isa sang inyo katigulangan—mas maayo pa gid, irekord mo ini. Basi pwede mo pangitaon ang isa ka napatay na nga katigulangan nga wala gid makabaton sang mga ordinansa sang ebanghelyo kag dayon hikuton ini sa templo.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Joseph Smith—Kasaysayan 1:28–29.Ano ang nabatyagan ni Joseph Smith sa iya mga kasaypanan? Ano ang iya ginhimo bilang sabat sa sinang mga pamatyagan? Ano ang aton matun-an sa iya parte sa kon ano ang buhaton kon makahimo kita sang mga kasaypanan?

Joseph Smith—Kasaysayan 1:33–54.Pwede mo pangabayon ang isa ka miyembro sang pamilya nga basahon sing matunog ang bahin ukon tanan sang mensahe ni Moroni sa Joseph Smith—Kasaysayan 1:33–42 sing apat ka beses (bangud ginsulit ni Moroni ining mensahe sing apat ka beses). Sa tunga-tunga sang tagsa ka pagbasa, pangabaya ang iban nga mga miyembro sang pamilya nga ipaambit kon ano ang ila nadumduman sa iya mensahe, nga wala nagalantaw sa balaan nga mga kasulatan. Ngaa ayhan nga ginasulit sang Ginuo ang importante nga mga mensahe sing pila ka beses? Ano ang iban pa nga mga paagi nga ginatudloan kita sang Ginuo paagi sa pagliwat-liwat?

Doktrina kag mga Kasugtanan 2:2.Para buligan ang imo kabataan nga maintiendihan ang “mga promisa nga ginhimo sa mga amay,” pwede ninyo basahon ang Abraham 2:9–11 sing ululupod. Pangitaa ang mga promisa nga ginhimo sang Dios bilang kabahin sang Iya kasugtanan kay Abraham. Paano naton “itanom” ining mga promisa sa aton mga tagipusuon?

Doktrina kag mga Kasugtanan 2:2–3.Para buligan ang mga miyembro sang pamilya nga maliso ang ila mga tagipusuon sa ila mga amay (ukon katigulangan), pwede mo sila hagaron nga magtuon parte sa isa ka katigulangan kag ipaambit kon ano ang ila natun-an upod sa pamilya. Ngaa nga gusto sang Ginuo nga matun-an naton ang parte sa mga miyembro sang aton pamilya kag hikuton ang mga ordinansa sa templo para sa ila? Paano kita ginabugayan kon magpartisipar kita sa family history kag buluhaton sa templo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Magkanta sang kanta nga may kaangtanan sa topiko sang family history ukon wala katapusan nga mga pamilya.

Pagpauswag sang Personal nga Pagtuon

Maggamit sang mga bulig sa pagtuon sang balaan nga mga kasulatan. Ang mga kasangkapan pareho sang ChurchofJesusChrist.org makabulig sa imo nga mas maintiendihan ang mga tawo, mga hitabo, kag mga dinalan sa balaan nga kasulatan.

Si Joseph nga Nagabaton sang mga Lamina, ni Gary E. Smith