pamilya nga nagabasa sang balaan nga mga kasulatan

Disyembre 28–Enero 3

Doktrina kag mga Kasugtanan 1

“Dungga, O Mga Katawhan”

Pamensara ang Doktrina kag mga Kasugtanan 1 bilang ang personal nga introduksyon sang Ginuo sa sining libro sang Iya mga rebelasyon sa ulihing mga adlaw. Ano ang gusto Niya nga imo mahibal-an parte sa Doktrina kag mga Kasugtanan? Binagbinaga ining pamangkot, kag isulat ang bisan ano nga pagpabatyag nga magaabot samtang imo ginabasa ang seksyon 1.

Isulat Ang Imo Mga Panghunahuna

Sang Nobyembre 1831, ang ginpanumbalik nga Simbahan ni Jesucristo isa pa lang ka tuig kag tunga. Bisan pa nga nagadako, isa ini gihapon ka indi kilala nga grupo sang mga tumuluo nga nagaistar sa naligwin nga lugar nga diutay lang ang pumuluyo, nga ginapangunahan sang propeta nga mga bientehon lang ang pangidaron. Pero ginkabig sang Dios ining mga tumuluo nga Iya mga alagad kag Iya mga mensahero, kag gusto Niya nga ang mga rebelasyon nga Iya ginhatag sa ila mapalapnag sa kalibutan.

Ang Doktrina kag mga Kasugtanan seksyon 1 amo ang pauna sang Ginuo sa koleksyon sining mga rebelasyon, kag maathag nga ginapakita sini nga bisan pa nga ang mga miyembro sang Simbahan diutay lang, indi gamay ang mensahe nga gusto sang Dios nga ipaambit sang Iya mga Santos. Isa ini ka “tingug sang pagpaandam” sa tanan nga “mga pumuluyo sang duta,” nga nagatudlo sa ila nga maghinulsol kag tukuron ang “wala’y katubtuban nga kasugtanan” sang Dios (mga bersikulo 4, 8, 22). Ang mga alagad nga nagadala sining mensahe amo ang “mga mahuyang kag mga simple,” pero ang mapainubuson nga mga alagad amo gid ang kinahanglan sang Dios—sadto kag sa karon—agud dalhon ang Iya Simbahan “halin sa kaguom kag halin sa kadulom” (mga bersikulo 23, 30).

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 1

Ang Ginuo nagaimbitar sa akon nga “usisaon ining mga kasuguan.”

Ang pauna nagapakilala sang isa ka libro. Ginapresentar sini ang mga tema kag katuyuan sang libro kag ginabuligan sini ang mga manugbasa nga maghanda sa pagbasa. Samtang imo ginabasa ang seksyon 1—ang “introduksyon” sang Ginuo sa Doktrina kag mga Kasugtanan (bersikulo 6)—pangitaa ang mga tema kag mga katuyuan nga ginhatag sang Ginuo parte sa Iya mga rebelasyon. Ano ang imo matun-an sa seksyon 1 nga magabulig sa imo nga makabenepisyo sing lubos sa imo pagtuon sang Doktrina kag mga Kasugtanan? Halimbawa, pwede mo binagbinagon kon ano ang buot silingon sang “magpamati sa tingug sang Ginuo” sa sining mga rebelasyon (bersikulo 14) ukon sang “usisaa ining mga kasugoan” (bersikulo 37).

Tan-awa man sa introduksyon sa Doktrina kag mga Kasugtanan.

Doktrina kag mga Kasugtanan 1:1–6, 23–24, 37–39

Ang Dios nagahambal paagi sa Iya mga alagad, kag ang Iya mga pulong matuman.

Ang seksyon 1 nagasugod kag nagatapos upod ang deklarasyon sang Dios nga nagahambal Sia paagi sa Iya pinili nga mga alagad (tan-awa sa mga bersikulo 4–6, 23–24, 38). Isulat ang imo natun-an sa sining rebelasyon parte sa Ginuo kag sa Iya tingug. Ano ang imo matun-an parte sa mga alagad sang Ginuo? Sang san-o mo nabatian ang tingug sang Ginuo sa tingug sang Iya mga alagad? (tan-awa sa bersikulo 38).

sesyon sang pangkabilugan nga komperensya

Ang mga propeta kag mga apostoles nagatudlo sa aton sang mga kasuguan sang Dios.

Doktrina kag mga Kasugtanan 1:3, 24–28, 31–33

Kon mapainubuson ako, ang pagsaway sang Ginuo magadala sa akon sa paghinulsol.

Pat-ini nga sa bersikulo 3 kag mga bersikulo 24–28, nagsiling ang Ginuo nga ang mga sala kag sayop sang tawo ibuyagyag. Sa isa ka bahin isa ini ka masakit, masubo nga eksperiyensya, kag sa pihak nga bahin nagatudlo ini. Ngaa nga lainlain ining mga sitwasyon? Pamensara kon ano ang imo mangin reaksyon kon imo mahibal-an ang imo mga sala kag mga kahuyang. Ano nga mga kinaiya ang imo makita sa mga bersikulo 24–28 nga makabulig sa imo nga mag-akto sa husto nga paagi? Ano ang ginatudlo sining mga bersikulo, upod sang mga bersikulo 31–33, parte sa panan-aw sang Ginuo sang imo mga kahuyang kag mga sala?

Tan-awa man sa Mga Hulubaton 3:11–12; Eter 12:27; Moroni 6:8.

Doktrina kag mga Kasugtanan 1:12–30, 35–36

Ginpanumbalik sang Ginuo ang Iya ebanghelyo para buligan ako nga atubangon ang mga hangkat sa ulihing mga adlaw.

Bisan pa nga ang seksyon 1 nagapaandam parte sa mabudlay nga panahon nga magaabot, nagaunod man ini sang nagapasalig nga mensahe: “Ako nga Ginuo, nga nakahibalo sang kalamidad nga magaabot sa mga pumuluyo sang duta, nagtawag sa akon alagad nga si Joseph Smith, Jun., kag naghambal sa iya halin sa langit” (bersikulo 17).

Tandai ang mga kalamidad nga ginpaandam sang Ginuo (tan-awa halimbawa, sa mga bersikulo 13–16, 35). Ano ang iban nga mga kalamidad nga imo natalupangdan sa kalibutan karon—ukon sa imo kaugalingon nga kabuhi? Ang mga bersikulo 17–30 nagapakita kon ano ang ginhimo sang Ginuo para sa imo sa pagpaabot sining mga kalamidad. Pamensara ang maghimo sang listahan sang imo makit-an.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 1:1–6, 37–39Agud sugdan ang paghinambalanay parte sa mga paandam halin sa Ginuo, pwede ninyo hambalan ang mga paandam nga aton mabaton halin sa iban parte sa mga peligro nga indi naton makita—pareho sang madanlog nga salog, mabaskog nga bagyo, ukon nagapalapit nga salakyan. Ano ang ginatudlo sa aton sining mga halimbawa parte sa mga paandam sang Ginuo? Suno sa Doktrina kag mga Kasugtanan 1:1–6, 37–39, paano kita ginapaandaman sang Ginuo? Ano ang ginpaandam Niya sa aton sining karon lang? Ayhan pwede ninyo tan-awon ukon basahon ang mga bahin sang mga mensahe sang nagligad nga pangkabilugan nga komperensya kag pangitaon ang mga halimbawa sang “tingug sang pagpaandam” sang Dios.

Doktrina kag mga Kasugtanan 1:16.Ano ang buot silingon sang “ipahamtang ang pagkamatarong sang [Ginuo]”? Paano naton masiguro nga ginahimo naton ina, imbes nga maglakat “sa [aton] kaugalingon nga dalanon”?

Tan-awa sa Doktrina kag mga Kasugtanan 1:30Ano ang buot silingon sang ang Simbahan “matuod kag buhi”? Para buligan ang imo pamilya nga mamensar parte sa sining pamangkot, ayhan pwede mo sila pakitaan sang mga litrato sang buhi nga mga bagay kag indi buhi nga mga bagay. Pwede man ninyo hambalan kon ano ang pwede ninyo himuon bilang pamilya para makabulig “nga dalhon [ang Simbahan] halin sa kaguom kag halin sa kadulom.”

Doktrina kag mga Kasugtanan 1:37.Pamensara ang pagplano bilang pamilya kon paano ninyo “usisaon ining mga kasugoan” sa Doktrina kag mga Kasugtanan sini nga tuig. Paano ninyo himuon ang pagtuon sang balaan nga mga kasulatan nga regular nga parte sang kabuhi sa pamilya? Ano nga mga ideya sa pagtuon ang makabulig sa inyo nga magtuon halin sa balaan nga mga kasulatan? (Tan-awa sa “Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan” sa umpisa sining manwal.)

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Magkanta sang kanta parte sa topiko nga mga propeta.

Pagpauswag sang Personal nga Pagtuon

Pangitaa si Jesucristo. Ang katuyuan sang balaan nga mga kasulatan amo ang magpamatuod sa Manluluwas kag sa Iya ebanghelyo. Samtang imo ginabasa ang Doktrina kag mga Kasugtanan 1, pamensara ang pagmarka ukon pagtanda sang mga bersikulo nga nagatudlo sa imo sang isa ka butang parte kay Jesucristo.

Libro sang mga Kasugoan

Ang una nga mga rebelasyon sa ginpanumbalik nga Simbahan gintipon bilang Libro sang mga Kasugoan.