“Enero 18–24. Doktrina kag mga Kasugtanan 3–5: ‘Ang Akon Buluhaton Magapadayon,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)”

“Enero 18–24. Doktrina kag mga Kasugtanan 3–5,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

mga lalaki nga nagatrabaho sa uma

Tion sang Ani sa France, ni James Taylor Harwood

Enero 18–24

Doktrina kag mga Kasugtanan 3–5

“Ang Akon Buluhaton Magapadayon”

Isulat ang imo matun-an kag mabatyagan samtang imo ginatun-an ang balaan nga mga kasulatan. Mabuligan ka sini nga madumduman inang mga panghunahuna kag ipaambit ini sa iban.

Isulat Ang Imo Mga Panghunahuna

Sa tion sang una niya nga tinuig bilang propeta sang Ginuo, wala pa mahibal-i ni Joseph Smith ang tanan parte sa “dalayawon nga buluhaton” nga dapat niya himuon. Pero isa ka bagay nga natun-an niya sa iya una mga mga eksperiyensya amo nga agud mangin kalipikado sa buluhaton sang Dios, ang iya panulok kinahanglan gid nga mangin “tampad sa himaya sang Dios” (Doktrina kag mga Kasugtanan 4:1, 5). Halimbawa, kon ang Ginuo naghatag sa iya sang laygay nga supak sa iya kaugalingon nga mga handum, kinahanglan niya nga sundon ang laygay sang Ginuo. Kag bisan pa nga sia may “madamo nga mga rebelasyon, kag … gahum sa paghimo sang madamo nga gamhanan nga mga buhat,” kon ang iya kaugalingon nga pagbuot ang mangin mas importante sa iya sangsa sa pagbuot sang Dios, sia “kinahanglan nga malaglag” (Doktrina kag mga Kasugtanan 3:4). Pero may lain pa gid nga natun-an si Joseph nga pareho lang kaimportante parte sa paghimo sang buluhaton sang Dios: “ang Dios maluluy-on,” kag kon sinsero si Joseph nga maghinulsol, sia “ginpili sa gihapon” (bersikulo 10). Ang buluhaton sang Dios, kon panumdumon, buluhaton sang pagtubos. Kag ang inang buluhaton “indi sarang mapaslawan” (bersikulo 1).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 3:1–15

Dapat ako magsalig sa Dios sangsa mahadlok sa tawo.

Sa panugod sang pag-alagad ni Joseph Smith, maiwat ang maayo nga mga abyan—labi na ang mga abyan nga pareho kay Martin Harris, isa ka respetado, manggaranon nga tawo, nga ara sa lugar nga makahatag sang kinahanglanon nga suporta. Kag hugot sa buot nga ginsuportahan ni Martin si Joseph, bisan pa nga nangin kabaylo sini ang respeto sang iya mga kaupdanan kag nagakinahanglan sang pinansyal nga pagsakripisyo.

Amo nga maintiendihan mo kon ngaa gusto ni Joseph nga pasugtan ang ayo ni Martin nga dalhon ang una nga bahin sang linubad nga Libro ni Mormon para ipakita sa iya asawa, nga nagaduda sang kamatuoran sang Libro ni Mormon. Padayon nga ginlisensya ni Joseph sa Ginuo ang parte sa sining pangabay, bisan pa nga gindumili Niya ina, tubtob nga sang ulihi, pagkatapos nga gin-ayo ni Joseph sa ikatatlo nga beses, naghuo ang Ginuo. Sa masubo nga palad, ang manuskrito nadula samtang ara sa poder ni Martin, kag sanday Joseph kag Martin ginpinahan sang Ginuo.

Samtang imo ginabasa ang Doktrina kag mga Kasugtanan 3:1–15, binagbinaga kon paano ang mga opinyon sang iban nga tawo nagaimpluwensya sa imo. Mahimo mo man tandaan nga magluwas sa pag-akig kay Joseph Smith, naghambal man ang Ginuo sang mga pulong sang kaluoy. Ano ang imo matun-an sa paagi nga gindisiplina kag ginpaisog sang Ginuo si Joseph? Ano nga laygay ang imo nakita nga makabulig sa imo kon ikaw nagakatentar nga mahadlok sa iban nga tawo sangsa sa Ginuo?

Doktrina kag mga Kasugtanan 4

Ginapangayo sa akon sang Ginuo nga alagaran Sia sa bug-os ko nga tagipusuon.

Ang seksyon 4 masami nga ginagamit sa full-time nga mga misyonero. Ugaling, manami nga tandaan nga ining rebelasyon orihinal nga ginhatag kay Joseph Smith Sr., nga wala gintawag sa misyon pero sa gihapon may “handum sa pag-alagad sa Dios” (bersikulo 3).

Isa ka paagi para basahon ang ini nga seksyon amo nga hunahunaon ini bilang tulumanon sang tawo nga gusto mag-obra sang buluhaton sang Ginuo. Ano ang mga kalipikasyon? Ngaa nga kinahanglan ining mga ikasarang ukon kinaiya? Ayhan pwede mo pilion sing mainampuon ang isa ka butang nga pwede mo pauswagon para mas “mapaangay [ang imo kaugalingon] para sa buluhaton” (bersikulo 5).

Doktrina kag mga Kasugtanan 5

Sarang ko mabaton ang akon kaugalingon nga saksi sang Libro ni Mormon.

Kon ipatawag ka nga magpamatuod sa korte parte sa kamatuoran sang Libro ni Mormon, ano nga ebidensya ang imo ipakita? Pareho nga pamangkot ang ara sa hunahuna ni Martin Harris sang ang iya asawa, si Lucy, nagpasaka sang reklamo nga si Joseph Smith nagapanginto sang iban nga tawo paagi sa pagpakuno-kuno nga naglubad sang bulawan nga mga lamina. Gani nangayo si Martin kay Joseph sang dugang pa nga ebidensya nga matuod ang bulawan nga mga lamina. Ang Doktrina kag mga Kasugtanan 5 isa ka rebelasyon nga sabat sa pangabay ni Martin.

Ano ang imo matun-an sa Doktrina kag mga Kasugtanan 5 parte sa masunod:

Ano ang nabatyagan sang Ginuo sa mga wala nagapati sa espirituhanon nga mga kamatuoran magluwas kon may ebidensya sila (tan-awa sa mga bersikulo 5–8; tan-awa man sa Juan 20:24–29).
Ang papel sang mga saksi sa buluhaton sang Ginuo (tan-awa sa mga bersikulo 11–15; tan-awa man sa 2 Mga Taga-Corinto 13:1).
Paano makaangkon sang testimonya parte sa Libro ni Mormon sa imo kaugalingon (tan-awa sa bersikulo 16; tan-awa man sa Moroni 10:3–5).

Doktrina kag mga Kasugtanan 5:1–10

Ang ini nga henerasyon magabaton sang pulong sang Dios paagi kay Joseph Smith.

Ano ang ginatudlo sa imo sang Doktrina kag mga Kasugtanan 5:1–10 parte sa importante nga papel ni Joseph Smith sa aton nga dispensasyon—kag sa imo kabuhi? Binagbinaga kon paano mo nabaton ang pulong sang Dios paagi sa Propeta nga si Joseph Smith. Pamensara nga isulat sa journal ukon ipaambit sa iban ang imo kapasalamatan sa mga kamatuoran nga ginpanumbalik ukon naathagan paagi sa iya.

Tan-awa man sa 2 Nefi 3:6–24.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 3:1–4.Pangabaya ang isa ka miyembro sang pamilya nga maglakat nga “nagaliko-liko” kag dayon sa “tadlong” nga linya. Ano ang kahulugan sa aton pamilya ang hibaluon nga “ang mga banas [sang Dios] matadlong”?

Doktrina kag mga Kasugtanan 3:7–10.Kon may tawo nga magtulod sa aton nga indi pagsundon ang Dios, ano nga mga kamatuoran sa sining mga bersikulo ang makabulig sa aton nga magpabilin nga tampad? Ayhan pwede drama-dramahon sang mga miyembro sang pamilya ang sitwasyon nga ang isa ka tawo nagpabilin nga tampad bisan may nagapamilit nga indi pagsundon ang Dios.

Doktrina kag mga Kasugtanan 4.Samtang ginahambalan sang inyo pamilya kon ano ang buot silingon sang pag-obra sa uma sang Dios, pwede sila mag-obra sa hardin (ukon mag-akto nga kuno abi nagaobra sila sa hardin). Ano nga mga gamit ang kinahanglan sa pag-obra sa hardin? Ano ang ginlaragway sang Dios sa seksyon 4 nga makabig mga galamiton nga kinahanglan para obrahon ang Iya buluhaton? Mahimo nga hambalan sang imo pamilya kon ngaa importante ang tagsa ka galamiton sa paghimo sang buluhaton sang Dios.

Doktrina kag mga Kasugtanan 5:7.Ano ang pila sa mga halimbawa sang mga kamatuoran nga aton ginapatihan pero indi makita? Paano naton sabton ang isa ka abyan nga gusto sang ebidensya nga ang Libro ni Mormon matuod?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Magkanta sang kanta nga may kaangtanan sa topiko parte sa pangmisyonaryo nga buluhaton.

Pagpauswag sang Personal nga Pagtuon

Magsaulo sang isa ka dinalan. “Ang pagsaulo sang isa ka balaan nga kasulatan amo ang paghimo sang bag-o nga pagpakig-abyan. Daw pareho ini sang pagdiskubre sang bag-o nga indibidwal nga makabulig sa tion sang panginahanglan, makahatag sang inspirasyon kag kaumpawan, kag ginhalinan sang kaisog sa kinahanglanon nga pagbag-o” (Richard G. Scott, “The Power of Scripture,” Ensign ukon Liahona, Nob. 2011, 6).