“Enero 4–10. Joseph Smith—Kasaysayan 1:1–26: ‘Nakakita Ako sang Haligi sang Kasanag,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)
“Enero 4–10. Joseph Smith—Kasaysayan 1:1–26,” Dali, Magsunod sa Akon—Para sa Mga Indibidwal kag Mga Pamilya: 2021
Ang Sagrado nga Kakahuyan, ni Greg K. Olsen
Enero 4–10
Joseph Smith—Kasaysayan 1:1–26
“Nakakita Ako sang Haligi sang Kasanag”
Samtang imo ginabasa ang Joseph Smith—Kasaysayan 1:1–26, ano nga mga mensahe ang imo nakita para sa imo kabuhi? Ano ang may pinakadako nga balor para sa imo kag sa imo pamilya?
Isulat Ang Imo Mga Panghunahuna
Ang Doktrina kag mga Kasugtanan isa ka libro sang mga sabat sa mga pangamuyo: madamo sa sagrado nga mga rebelasyon sa sining libro ang nag-abot bilang sabat sa mga pamangkot. Bangud sini nagakabagay lang nga sugdan ang pagtuon sang Doktrina kag mga Kasugtanan paagi sa pagbinagbinag sang pamangkot nga nagbukas sang pagbubo sang rebelasyon sa ulihing mga adlaw—ang pamangkot nga ginpamangkot ni Joseph Smith sa tunga sang kakahuyan sang 1820. Ang “pagbinaisay sang mga pulong kag kagamo bangod sang lain-lain nga mga opinyon” (Joseph Smith—Kasaysayan 1:10) nagbilin kay Joseph nga naligban parte sa relihiyon kag sa kahimtangan sang iya kalag; siguro nakabatyag ka man sina. Madamo ang nagasumpakilay nga mga ideya kag nagapangkumbinsi nga mga impluwensya sa aton panahon, kag kon gusto naton nga usisaon ining mga mensahe kag pangitaon ang kamatuoran, pwede naton himuon ang ginhimo ni Joseph. Mahimo kita magpamangkot, magtuon sang balaan nga mga kasulatan, magbinagbinag, kag sa ulihi magpamangkot sa Dios. Bilang sabat sa pangamuyo ni Joseph, isa ka haligi sang kasanag ang nagpanaog halin sa langit; ang Dios nga Amay kag si Jesucristo nagpakita kag nagsabat sang iya mga pamangkot. Ang testimonya ni Joseph sinang milagroso nga eksperiyensya maisog nga nagadeklarar nga ang bisan sin-o “nga [nakulangan] sang kaalam sarang magpangayo sa Dios, kag makabaton” (Joseph Smith—Kasaysayan 1:26). Kita tanan pwede makabaton sang rebelasyon, kon indi paagi sa langitnon nga palanan-awon, paagi sa maathag nga pag-intiendi nga may bulig sang langitnon nga impluwensya.
Mga Ideya para sa Personal nga Pagtuon sang Balaan nga Mga Kasulatan
Joseph Smith—Kasaysayan 1:1–26
Si Joseph Smith amo ang Propeta sang Pagpanumbalik.
Ang katuyuan sang kasaysayan ni Joseph Smith amo nga ipahibalo sa aton “ang matuod-tuod nga natabo” tungod ang kamatuoran parte kay Joseph masami nga ginatiko (Joseph Smith—Kasaysayan 1:1). Samtang imo ginabasa ang Joseph Smith—Kasaysayan 1:1–26, ano ang nagapabakod sang imo testimonya parte sa iya diosnon nga buluhaton? Pat-ini ang mga ebidensya nga imo makita nga ginhanda sang Ginuo si Joseph Smith para sa iya misyon bilang propeta. Samtang imo ginabasa, pwede mo man irekord ang imo mga panghunahuna kag balatyagon parte kay Joseph Smith kag sa iya testimonya.
Tan-awa man sa Saints, 1:3–19.
Joseph Smith—Kasaysayan 1:5–20
Kon magpamangkot ako nga may pagtuo, ang Dios magasabat.
Nakaagi ka na bala nga “nakulangan sang kaalam” ukon ginligban parte sa desisyon nga kinahanglan mo himuon? (Joseph Smith—Kasaysayan 1:13). Ano ang imo matun-an sa eksperiyensya ni Joseph Smith sa mga bersikulo 5–20? Pamensara ang imo kaugalingon nga pagkinahanglan sang kaalam kag mas dako nga pag-intiendi, kag binagbinaga kon paano mo pangitaon ang kamatuoran.
Tan-awa man sa 1 Nefi 10:17–19; 15:6–11.
Sarang kita magpamangkot sa Dios sang aton mga pamangkot paagi sa pangamuyo.
Joseph Smith—Kasaysayan 1:15–20
Ngaa may lain-lain nga mga panaysayon sang Unang Panan-awon?
Sa tion sang iya pagkabuhi, ginsulat ni Joseph Smith ang iya eksperiyensya sa Sagrado nga Kakahuyan sa indi magnubo apat ka beses, sa masami nagagamit sang manunulat. Dugang sini, pila ka indi direkta nga panaysayon ang ginsulat sang mga tawo nga nakabati kay Joseph Smith nga nagaistorya sang iya panan-awon. Bisan pa nga ining mga panaysayon may kinalain sa pila ka mga detalye, base sa tagpalamati kag lugar, nagasantuanay ini. Kag ang tagsa ka panaysayon nagadugang sang mga detalye nga makabulig sa aton nga mas maintiendihan ang eksperiyensya ni Joseph Smith, pareho nga ang apat ka Mga Ebanghelyo nagabulig sa aton nga mas maintiendihan ang pag-alagad sang Manluluwas.
Ano ang imo natun-an sa pagbasa sining tanan nga panaysayon?
Joseph Smith—Kasaysayan 1:15–20
Ang Unang Panan-awon amo ang nagsugod sang Pagpanumbalik sang ebanghelyo ni Jesucristo.
Nagsalig si Joseph Smith nga sabton sang Dios ang iya pangamuyo, pero wala gid niya mapaktan kon paano bag-uhon sinang sabat ang iya kabuhi—kag ang kalibutan. Samtang imo ginabasa ang parte sa eksperiyensya ni Joseph, pamensara kon paano ginbag-o sang Unang Panan-awon ang imo kabuhi. Halimbawa, pwede mo kompletuhon ining dinalan sa lainlain nga mga paagi: “Bangud natabo ang Unang Panan-awon, nakahibalo ako nga …” Paano ka nabugayan tungod sa Unang Panan-awon?
Joseph Smith—Kasaysayan 1:21–26
Sarang ako magpabilin nga tampad sa akon nahibal-an, bisan pa nga sikwayon ako sang iban.
Isa sa mga bugay sang balaan nga mga kasulatan amo nga nagaunod ini sang inspirado nga mga halimbawa sang isganan nga mga lalaki kag babayi nga nag-atubang sang mga hangkat nga may pagtuo kay Jesucristo. Sang nagpangatubang si Joseph Smith sang oposisyon bangud sang iya panan-awon, naintiendihan niya si Apostoles Pablo, nga ginpigos man sa paghambal nga nakakita sia sang panan-awon. Samtang imo ginabasa ang panaysayon ni Joseph, ano ang nagainspirar sa imo nga magpabilin nga tampad sa imo testimonya? Ano ang iban pa nga mga halimbawa—sa balaan nga mga kasulatan ukon sa mga tawo nga imo kilala—nga nagahatag sa imo sang kaisog nga magpabilin nga tampad sa espirituhanon nga mga eksperiyensya nga imo nabaton?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Joseph Smith—Kasaysayan 1:6.Paano naton atubangon ang mga indi-pag-intiendihanay nga wala nagapakigbais pareho sa mga tawo nga ginlaragway sa sining bersikulo?
-
Joseph Smith—Kasaysayan 1:11–13.Ang pagbasa sining mga bersikulo mahimo nga makainspirar sang mga miyembro sang pamilya nga magpaambit sang mga eksperiyensya sang ang isa ka dinalan sa balaan nga kasulatan nagtandog sang ila mga tagipusuon kag nag-inspirar sa ila nga mag-akto.
-
Joseph Smith—Kasaysayan 1:16–20.Samtang ginabasa sang imo pamilya ining mga bersikulo, pamensara nga ipakita ang litrato nga kaupod sining outline ukon lain nga litrato sang Unang Panan-awon (basi masadyahan ang imo pamilya nga drowingon ang ila interpretasyon). Pwede nga maghimo ang tagsa sa inyo sang listahan sang mga kamatuoran nga aton matun-an sa sining panan-awon, dayon ipaambit ang inyo mga listahan sa isa kag isa. Mangin manami ini nga tion para sa mga miyembro sang pamilya nga iistorya kon paano nila nabaton ang ila mga testimonya parte sa Unang Panan-awon ni Joseph Smith.
-
Joseph Smith—Kasaysayan 1:17Sang nagpakita ang Dios kay Joseph Smith, gintawag Niya si Joseph sa iya ngalan. Sang san-o nabatyagan sang mga miyembro sang imo pamilya nga kilala sila sang Amay nga Langitnon sing personal?
-
Joseph Smith—Kasaysayan 1:21–26.Paano bala kita magsabat kon dudahan sang mga tawo ang aton mga testimonya?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Panugyan nga kanta: “Joseph Smith’s First Prayer [Katahum sang Kaagahon],” Mga Himno kag mga Ambahanon sang Kabataan, no. 14.
Mga Tingug sang Pagpanumbalik
Ang Pamilya ni Joseph Smith
Ang tagsa sa aton apektado kaayo sang aton pangabuhi sa pamilya, kag indi lain si Joseph Smith. Ang relihiyoso nga mga pagpati kag pangginawi sang iya mga ginikanan nagtanom sang mga binhi sang pagtuo nga nagtugot sang Pagpanumbalik nga mangin posible. Ang journal ni Joseph nagaunod sining pasidungog: “Ang mga tinaga kag ang lenggwahe [mangin] kabos sa pagpahayag sang kapasalamatan ko sa Dios sa paghatag sa akon sang subong kadungganon nga mga ginikanan.”1
Ang masunod nga mga sinambit sang iya iloy, si Lucy Mack Smith; sang iya utod nga si William Smith; kag sang Propeta mismo nagapakita sa aton sang relihiyoso nga impluwensya sa panimalay nga Smith.
Panimalay ni Joseph Smith, ni Dan Baxter
Lucy Mack Smith
“[Sang mga 1802], nagmasakit ako. … Ginsiling ko sa akon kaugalingon, indi pa ako handa nga mapatay tungod wala ko pa mahibal-i ang mga pamaagi ni Cristo, kag sa pamatyag ko daw may madulom kag masubo nga lang-at sa tunga ko kag ni Cristo nga wala ko gid pagtinguhaan nga tabukon. …
“Nagtulok ako sa Ginuo kag nagpakitluoy sa Ginuo nga iya luwason ang akon kabuhi agud mapadako ko ang akon kabataan kag lugpayan ang tagipusuon sang akon bana; gani naghigda ako bilog nga gab-i. … Nakigsugot ako sa Dios [nga] kon buhion niya ako himulatan ko nga pangitaon inang relihiyon nga magatugot sa akon nga serbisyuhan sia sing husto, kon ari man ini sa Biblia ukon sa bisan diin ini makita, bisan pa kon kinahanglan nga mabaton ini halin sa langit paagi sa pangamuyo kag pagtuo. Sang ulihi isa ka tingug ang naghambal sa akon kag nagsiling, ‘Pangayo, kag kamo hatagan; panuktok, kag kamo pagabuksan. Paumpawi ang imo tagipusuon. Nagatuo ka sa Dios; magtuo man sa akon.’ …
“Sa amo sadto nga tion tayuyon ako nga nakaangkon sang kusog. Indi ako palahambal parte sa relihiyon pero nagpabilin ini sa akon kaisipan, kag ginapamensar ko nga himuon ko ang tanan nga katutom sa tion nga may makilala ako nga relihiyoso nga tawo nga nakahibalo sang mga pamaagi sang Dios para matudloan ako sang mga butang sang Langit.”2
William Smith
“Ang akon iloy, nga relihiyoso kaayo nga babayi kag dako kaayo ang interes sa kaayuhan sang iya mga kabataan, alangay sa diri kag sa madason nga kinabuhi, naggamit sang tanan nga pamaagi nga ginapanugyan sang iya pagpalangga bilang iloy, agud itulod kami sa paghandum sang kaluwasan sang amon mga kalag, ukon (sa pulong sang una) ‘mangin relihiyoso.’ Ginapaisog niya kami nga magtambong sa mga miting, kag ang halos bilog nga pamilya nangin interesado sa relihiyon, kag naghandum sa pagpangita sang kamatuoran.”3
“May mga pang-pamilya kami nga pangamuyo sugod sa akon madumduman. Maathag sa akon panumduman nga ginasulod ni tatay ang iya antipara sa bulsa sang iya tsaleko, … kag kon makita namon nga kabataan nga lalaki nga ginakapkap niya ang iya antipara, nahibal-an namon nga senyales na ini nga maghanda sa pagpangamuyo, kag kon wala namon matalupangdi masiling si nanay nga, ‘William,’ ukon sa sin-o man nga wala nagabantay, ‘maghanda na sa pagpangamuyo.’ Pagkatapos sang pangamuyo makanta kami sang isa ka kanta.”4
Gintudloan nanday Joseph Sr. kag Lucy Smith ang ila pamilya nga magtuon sang balaan nga mga kasulatan.
Si Joseph Smith
“Karon masiling ko, nga [ang akon amay] wala gid naghimo sang malain nga buhat nga makabig nga indi maalwan, sa iya kabuhi, sa akon pagkahibalo. Palangga ko ang akon amay kag ang iya handumanan; kag ang handumanan sang iya dungganon nga mga binuhatan, nagabilin sang dako nga impluwensya sa akon panghunahuna; kag madamo sa iya malulo nga mga pulong kag laygay bilang ginikanan, ang nasulat sa tapi-tapi sang akon tagipusuon. Sagrado sa akon, ang mga handurawan nga akon ginhalungan parte sa kasaysayan sang iya kabuhi, nga nagasulod sa akon panghunahuna kag nagpabilin dira, paagi sa akon kaugalingon nga pagpanilag halin pa sang natawo ako. … Ang akon iloy isa man sa pinakadungganon, kag ang pinakamaayo sa tanan nga mga babayi.”5
Ang Unang Panan-awon sang Pagpanumbalik, ni Michael Bedard