Uma ni Martin Harris, ni Al Rounds

Pebrero 22–28

Doktrina kag mga Kasugtanan 18–19

“Dako ang Bili sang mga Kalag”

Ang mga rebelasyon sa Doktrina kag mga Kasugtanan ginhatag bilang sabat sa partikular nga mga sirkumstansya halos 200 katuig na ang nagligad, pero ang mga prinsipyo nga ginatudlo sini wala nagadaan. Pangitaa ining mga prinsipyo samtang imo ginabasa, kag pamensara kon paano ini magamit sa imo.

Isulat Ang Imo Mga Panghunahuna

Sanday Martin kag Lucy Harris isa sa may pinakanami nga mga uma sa Palmyra, New York. Napilahan man ka tuig antes nila ini naangkon, nagtugot sa ila mga magpadako sang ila pamilya, kag naghatag sa ila sang maayo nga estado sa ila komunidad. Pero sang 1829 nangin maathag nga ang Libro ni Mormon mapaimprinta lamang kon iprenda ni Martin ang iya uma para ibayad sa manug-imprinta. May testimonya si Martin parte sa Libro ni Mormon, pero si Lucy wala. Kon dayunon ni Martin ang pagprenda kag indi mabakal ang Libro ni Mormon, butungon ang iya uma kag mabutang sa alang-alang ang ila pag-asawahay. Sa isa ka punto sang aton kabuhi, tanan kita magapangatubang sang pareho nga mga pamangkot nga mahimo ginpangatubang ni Martin: Ano ang bili sang ebanghelyo ni Jesucristo sa akon? Ano ang handa ko isakripisyo para ipahamtang ang ginharian sang Dios? Mahimo nga makabulig sa aton ang panumdumon nga wala sang bisan sin-o nga nagbayad sang mas dako nga bili para bugayan ang mga anak sang Dios sangsa kay Jesucristo, “nga pinakagamhanan sa tanan” (Doktrina kag mga Kasugtanan 19:18).

Nagdesisyon si Martin nga iprenda ang iya uma. Ang iya sakripisyo nagbayad sang pag-imprinta sang una nga 5,000 ka mga kopya sang Libro ni Mormon. Kag karon, masobra 190 milyon ka kopya ang nagligad, minilyon ka mga kalag sa bilog nga kalibutan ang nabugayan.

Para sa dugang nga impormasyon parte sa pag-imprinta sang Libro ni Mormon, tan-awa sa Saints, 1:76–84.

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 18:10–16

Ang Ginuo nagakasadya kon maghinulsol kita.

Pat-ini kon kapila gingamit ang mga tinaga nga maghinulsol kag paghinulsol sa bilog nga Doktrina kag mga Kasugtanan 18 kag 19, kag binagbinaga ang imo matun-an sa sining mga tinaga tagsa nga ginagamit ang mga ini. Pamensara labi na gid ang Doktrina kag mga Kasugtanan 18:10–16; paano ining mga bersikulo nagaapekto sa imo nabatyagan parte sa paghinulsol—sa imo kaugalingon nga paghinulsol kag sa tulumanon nga hagaron ang iban nga maghinulsol?

Tan-awa man sa Alma 36:18–21; Dale G. Renlund, “Repentance: A Joyful Choice,” Ensign ukon Liahona, Nob. 2016, 121–24.

Doktrina kag mga Kasugtanan 18:34–36

Mabatian ko ang tingug sang Ginuo sa Doktrina kag mga Kasugtanan.

Kon may magpamangkot sa imo kon daw ano ang tingug sang Ginuo, ano ang imo ihambal? Pamensara ining pamangkot samtang imo ginabasa ang Doktrina kag mga Kasugtanan 18:34–36. Ano ang imo natun-an parte sa tingug sang Ginuo sa pagbasa sang Doktrina kag mga Kasugtanan? Ano ang sarang mo himuon para mabatian ang Iya tingug sing mas maathag?

Doktrina kag mga Kasugtanan 19:15–20

Nag-antos si Jesucristo agud makahinulsol ako kag makapalapit sa Iya.

Ang Bag-ong Katipan nagalaragway sang pag-antos sang Manluluwas sa Getsemani halin sa perspektibo sang mga nakakita sini. Sa Doktrina kag mga Kasugtanan 19:15–20, ginsaysay ni Jesucristo ang Iya pag-antos sa Iya kaugalingon nga pulong. Samtang imo ginabasa ining sagrado, nga personal nga panaysayon, pangitaa ang mga tinaga kag mga dinalan nga nagalaragway sang pag-antos sang Manluluwas. Pamensara sing maayo ang ginatudlo sang tagsa ka tinaga ukon dinalan sa imo. Ngaa handa ang Manluluwas nga mag-antos? Pamensara nga isulat ang imo mga balatyagon parte kay Jesucristo kag sa Iya sakripisyo para sa imo.

Tan-awa sa Juan 15:13; Mosias 3:7; Alma 7:11–12; Doktrina kag mga Kasugtanan 18:10–13.

Bili sang Kalag, ni Liz Lemon Swindle

Doktrina kag mga Kasugtanan 19:26–27, 34–41

Ang mga bugay sang Dios mas labaw pa sangsa mga manggad sang duta.

Wala maayo mabakal ang Libro ni Mormon sa Palmyra, kag ang nangin resulta, kinahanglan ibaligya ni Martin Harris ang dako nga bahin sang iya uma para mabayran ang utang (tan-awa sa “The Contributions of Martin Harris,” Revelations in Context, 7–8). Binagbinaga ina nga sakripisyo—kag ang mga bugay nga imo nabaton bangud sina—samtang imo ginabasa ining mga bersikulo. Pwede mo man hunahunaon kon ano ang ginapangayo sang Ginuo nga imo isakripisyo. Ano ang imo makita sa sining mga bersikulo nga nagainspirar sa imo nga himuon ining mga sakripisyo nga may “kasadya” kag “kalipay”? (tan-awa man sa mga bersikulo 15–20).

Doktrina kag mga Kasugtanan 19:23

Ang paghidaet nagaabot paagi sa pagtuon parte kay Jesucristo kag pagsunod sa Iya.

Pamensara ang imbitasyon sang Manluluwas nga “Magtuon sa akon.” Ano ang imo matun-an parte kay Jesucristo sa Doktrina kag mga Kasugtanan 19? Isulat ang imo mga panghunahuna, kag binagbinaga kon paano ining mga kamatuoran parte sa Manluluwas makabulig sa imo nga makakita sang paghidaet. Ano para sa imo ang kahulugan sang “maglakat sa kalulo sang [Iya] Espiritu”?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 18:1–5.Ayhan pwede magpaambit ang mga miyembro sang pamilya sang pila sa “madamo nga tinion” (bersikulo 2) nga ginpahayag sang Espiritu sa ila nga ang balaan nga mga kasulatan matuod, pareho sang Iya ginhimo kay Oliver Cowdery. Paano ang imo pamilya “magsalig sa mga butang nga nasulat” (bersikulo 3) sa balaan nga mga kasulatan? Paano mo mapasad ang pundasyon sang imo pamilya sa “bato” (bersikulo 4) sang ebanghelyo?

Doktrina kag mga Kasugtanan 18:10–13; 19:16–19.Pwede basahon sang tagsa ka miyembro sang pamilya ang Doktrina kag mga Kasugtanan 18:10–13 kag buslan sang iya ngalan ang mga tinaga nga “kalag,” “mga kalag,” kag “tanan nga tawo.” Dayon pwede ninyo hambalan kon paano kita mabuligan sining mga bersikulo nga maintiendihan ang aton bili sa Amay kag sa Anak (tan-awa sa Doktrina kag mga Kasugtanan 19:16–19).

Doktrina kag mga Kasugtanan 18:21–25.May espesyal bala nga kahulugan ang mga ngalan sang mga miyembro sang inyo pamilya? Basi pwede ninyo hambalan kon ngaa importante ang mga ngalan kag kon ano ang buot silingon sang dalhon sa aton kaugalingon ang ngalan ni Jesucristo (tan-awa sa Mosias 5:7). Basi maayo ini nga oportunidad para buligan ang mga miyembro sang pamilya nga maghanda sa pagdala sang ngalan ni Cristo sa ila kaugalingon kon sila bunyagan.

Doktrina kag mga Kasugtanan 19:15–20.Para buligan ang imo pamilya nga makaangkon sang makahulugan nga eksperiyensya sa sining mga bersikulo, basi pwede mo sila basahan mientras ginapakita ang litrato ni Jesucristo (nga kaupod sa sining outline). Dayon ang mga miyembro sang pamilya pwede magpaambit sang ila mga nabatyagan parte sa Manluluwas. Ang paborito nga himno parte sa Manluluwas makabulig man imbitar sang Espiritu.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Ako Nahalawhaw Gid [I Stand All Amazed],” Mga Himno kag mga Ambahanon sang Kabataan, no. 22.

Pagpauswag sang Personal nga Pagtuon

Magpamangkot. Ang Doktrina kag mga Kasugtanan isa ka ebidensya nga ang mga pamangkot nagapadulong sa rebelasyon. Samtang imo ginatun-an ang balaan nga mga kasulatan, isulat ang mga pamangkot nga nagaabot sa imo. Dayon binagbinaga kag magpangamuyo sa pagpangita sang mga sabat.

Si Cristo nga Nagapangamuyo sa Hardin sang Getsemani, ni Hermann Clementz