puluy-an ni Peter Whitmer

Puluy-an ni Peter Whitmer, ni Al Rounds

Marso 1–7

Doktrina kag mga Kasugtanan 20–22

“Ang Pagsugod sang Simbahan ni Cristo”

Samtang imo ginabasa ang Doktrina kag mga Kasugtanan 20–22, mangin bukas sa mga pagpabatyag sang Balaan nga Espiritu. Pamensara nga isulat ang mga ini agud mabalikan mo ini sa ulihi.

Isulat Ang Imo Mga Panghunahuna

Ang buluhaton ni Propetang Joseph Smith sang paglubad sang Libro ni Mormon kompleto na. Pero ang buluhaton sang Pagpanumbalik nagasugod pa lang. Maathag sa temprano pa nga mga rebelasyon nga dugang sa pagpanumbalik sang doktrina kag awtoridad sang priesthood, gusto sang Ginuo nga ibalik ang isa ka pormal nga organisasyon—Ang Iya Simbahan (tan-awa sa Doktrina kag mga Kasugtanan 10:53; 18:5). Gani sang Abril 6, 1830, masobra 40 ka mga tumuluo ang nagginutok sa balay nga human sa tablon nga kahoy sang pamilya Whitmer sa Fayette, New York, para saksihan ang pagtukod sang Simbahan ni Jesucristo.

Pero, pila ka mga tawo ang nagapanumdom, ngaa kinahanglanon ang organisado nga Simbahan? Ang sabat mahimo nga makit-an, sa isa ka bahin, sa mga rebelasyon nga konektado sa sinang una nga miting sang Simbahan sang 1830. Diri, ginlaragway ang mga bugay nga indi mahanabo kon ang matuod nga Simbahan ni Jesucristo wala “maorganisar kag mapahamtang sing husto” sa ulihing mga adlaw (Doktrina kag mga Kasugtanan 20:1).

Tan-awa man sa Saints, 1:84–86; “Build Up My Church,” Revelations in Context, 29–32.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 20:1–36

Ang Simbahan ni Jesucristo sang mga Santos sa Ulihing mga Adlaw gintukod sa matuod nga doktrina.

Ang seksyon 20 ginpakilala bilang ang “rebelasyon parte sa pag-organisar kag pagdumala sang Simbahan” (pauna sang seksyon). Pero antes ginplastar ang mga polisiya sang Simbahan, mga palangakuan sang priesthood, kag mga proseso sa paghikot sang mga ordinansa, ining rebelasyon nagasugod paagi sa pagtudlo sang tig-una nga doktrina. Samtang imo ginabasa ang una nga 36 ka nga bersikulo sining rebelasyon, pamangkuta ang imo kaugalingon kon ngaa amo sina. Pwede mo man ilista ang mga kamatuoran sang ebanghelyo nga imo makita. Ari ang pila ka mga halimbawa:

• Ang Libro ni Mormon kag ang papel sini sa Pagpanumbalik (mga bersikulo 8–12)

• Ang kinaiya sang Dios (mga bersikulo 17–19)

• Ang Pagbayad-Sala ni Jesucristo (mga bersikulo 20–27)

Ngaa ayhan nga importante nga tutokan ining mga kamatuoran samtang ginapasad ang Simbahan?

Doktrina kag mga Kasugtanan 20:37, 75–79

Ang sagrado nga mga ordinansa importante nga bahin sang ginpanumbalik nga Simbahan.

Sang gin-organisar ang Simbahan, ang Ginuo nagtudlo sa Iya mga Santos parte sa sagrado nga mga ordinansa, lakip na ang bunyag kag ang sakramento. Samtang imo ginabasa ang mga instruksyon “parte sa pamaagi sang bunyag” sa bersikulo 37, panumduma ang imo kaugalingon nga bunyag. May ara ka bala sang mga balatyagon nga nalaragway sa sining bersikulo? Ara pa bala ini sa imo karon? Binagbinaga kon ano ang pwede mo himuon para magpadayon nga mapagsik sang imo “determinasyon sa pag-alagad [kay Jesucristo] tubtob sa katapusan.”

Samtang imo ginabasa ang parte sa sakramento sa Doktrina kag mga Kasugtanan 20:75–79, tilawi nga basahon ining sagrado nga mga pangamuyo sa perspektibo sang tawo nga amo pa lang makabati sini. Ano nga mga panghunahuna ang imo nabaton parte sa sakramento? parte sa imo kaugalingon? Paano ayhan maapektuhan sining mga panghunahuna ang paagi sang imo paghanda sa pag-ambit sang sakramento sini nga semana?

deacono nga nagapasa sang Sakramento

Ang sakramento isa ka sagrado nga ordinansa.

Doktrina kag mga Kasugtanan 20:38–60

Ang priesthood nagabugay sang mga miyembro sang Simbahan kag sang ila mga pamilya.

Kon may mangabay sa imo nga lawagon ang mga tulumanon sang nagakapot sang priesthood, ano ang imo ihambal? Basaha ang Doktrina kag mga Kasugtanan 20:38–60, nga nagalista sang mga tulumanon sang lainlain nga mga palangakuan sang priesthood. May ginbag-o bala ining mga bersikulo sa imo panan-aw sa mga tulumanon sang priesthood kag kon paano ginahimo sang Manluluwas ang Iya buluhaton? Paano ka ginbugayan sang buluhaton nga ginlaragway sa sining mga bersikulo?

Para tun-an kon paano ang kababayin-an nagagamit sang awtoridad sang priesthood sa buluhaton sa Simbahan, tan-awa sa Dallin H. Oaks, “The Keys and Authority of the Priesthood,” Ensign ukon Liahona, Mayo 2014, 49–52.

Doktrina kag mga Kasugtanan 21

Ang Simbahan ni Jesucristo ginapangunahan sang buhi nga propeta.

Ano ang imo matun-an sa Doktrina kag mga Kasugtanan 21:4–9 parte sa mga pulong sang mga propeta sang Ginuo? Pamensara ang mga promisa nga ginlaragway sa bersikulo 6 sa mga magabaton sang mga pulong sang Ginuo paagi sa Iya propeta. Ano ang kahulugan sining mga promisa sa imo?

Paano mo batunon ang pulong sang buhi nga propeta “nga daw pareho lang nga ini halin sa kaugalingon nga baba sang [Dios]”? (bersikulo 5). Ano nga laygay ang ginhatag sang propeta sa karon nga mahimo magdala sang mga bugay nga ginpromisa sa bersikulo 6?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 20.Ano ang aton ihambal kon may mamangkot sa aton kon ngaa kinahanglan naton ang Simbahan? Ano nga mga sabat ang aton makita sa Doktrina kag mga Kasugtanan 20? Tan-awa man sa D. Todd Christofferson, “Why the Church,” Ensign ukon Liahona, Nob. 2015, 108–11.

Doktrina kag mga Kasugtanan 20:69.Ano ang buot silingon sang “[maglakat] sa pagkabalaan sa atubang sang Ginuo”? Mahimo nga masadyahan ang mga miyembro sang pamilya nga drowingon ukon isulat sa mga panid sang papel ang pila ka mga butang nga makabulig sa ila nga maglakat sa pagkabalaan ukon mga butang nga nagapugong sa ila nga himuon ini. Dayon pwede sila maghimo sang alagyan gamit ang mga papel kag tilawan nga maglakat sa alagyan, nga nagalapak lamang sa mga drowing nga magadala sa ila kay Cristo.

Doktrina kag mga Kasugtanan 20:37, 71–74.Kon may ara pa sa inyo pamilya nga wala pa mabunyagi, ang ining mga bersikulo mahimo nga magsugod sang paghinambalanay kon paano magpreparar para sa bunyag (tan-awa sa bersikulo 37) kag kon paano ginahikot ang mga bunyag (tan-awa sa mga bersikulo 71–74). Pwede man magpaambit ang mga miyembro sang pamilya sang mga litrato ukon handumanan sang ila adlaw sang bunyag.

Doktrina kag mga Kasugtanan 20:75–79.Paano gamiton sang inyo pamilya ining mga bersikulo para maghanda sa makahulugan, maligdong nga mga eksperiyensya sa sakramento? Mahimo nga makapanugyan ining mga bersikulo sang mga butang nga pwede ninyo panumdumon sa tion sang sakramento, kag ang mga miyembro sang pamilya pwede magpangita ukon magdrowing sang litrato sinang mga butang. Kon nagakabagay, pwede ninyo dalhon inang mga litrato sa madason ninyo nga miting sa sakramento bilang pahanumdom kon ano ang pamensaron sa tion sang sakramento.

Doktrina kag mga Kasugtanan 21:4–7.Pamensara nga hagaron ang mga miyembro sang pamilya nga magpangita sang mga tinaga kag mga dinalan sa mga bersikulo 4–5 nga nagatudlo sa aton parte sa pagsunod sa propeta sang Ginuo. Ano ang buot silingon sang batunon ang mga pulong sang propeta sa pagpaumod? sa pagtuo? San-o naton nabaton ang mga bugay nga ginpromisa sa bersikulo 6?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “The Church of Jesus Christ,” Children’s Songbook, 77.

Pagpauswag sang Aton Pagpanudlo

Sunda ang kabuhi sang Manluluwas. “Ang gahum sang Manluluwas sa pagtudlo kag pagbulig sang iban nagahalin sa paagi nga Sia nagapangabuhi kag sa klase sang Iya pagkatawo. Kon mas matutom ka nga nagatinguha nga magkabuhi pareho kay Jesucristo, mas magadugang ang imo ikasarang nga magtudlo pareho sa Iya” (Teaching in the Savior’s Way, 13).

Si Oliver Cowdery nga nagaordin kay Joseph Smith

Si Oliver Cowdery nga Naga-ordin kay Joseph Smith, ni Walter Rane