Si Jesus nga nagatindog sa atubang sang nagaluhod nga mga tawo

Ang Tagsa ka Tuhod Magaluhod, ni J. Kirk Richards

Marso 22–28

Doktrina kag mga Kasugtanan 29

Si Jesucristo Magatipon sang Iya Katawhan

Isa sa mga katuyuan sang pagtuon sang balaan nga mga kasulatan amo ang magtuon sang doktrina, ukon mga kamatuoran sang ebanghelyo nga kinahanglanon para sa aton kaluwasan. Samtang imo ginatun-an ang Doktrina kag mga Kasugtanan 29 sini nga semana, magpangita sang paghangop sa doktrina nga makahulugan para sa imo.

Isulat Ang Imo Mga Panghunahuna

Bisan nga gin-organisar ang Simbahan ni Jesucristo sang 1830, madamo sa mga kamatuoran sang ebanghelyo ang wala pa mapahayag, kag pila sa una nga mga miyembro sang Simbahan ang nagapinamangkot. Nakabasa sila sang mga propesiya sa Libro ni Mormon parte sa pagtipon sang Israel kag sang pagpahamtang sang Sion (tan-awa sa 3 Nefi 21). Paano ina matabo? Ang mga rebelasyon nga nabaton kuno ni Hiram Page nagtandog sinang topiko, nga nagpadugang lamang sang pagkamausisa sang mga miyembro (tan-awa sa Doktrina kag mga Kasugtanan 28). Ang iban nga tawo nagpanghunahuna parte sa Pagkahulog sa Sala ni Adan kag ni Eva kag sa espirituhanon nga kamatayon. Gin-abiabi sang Ginuo ining mga pamangkot sang 1830: “Kon ano man ang inyo pangayuon sa pagtuo,” siling Niya sa mga Santos, “nga nagaisa sa pagpangamuyo suno sa akon sugo, pagabatunon ninyo” (Doktrina kag mga Kasugtanan 29:6). Kag ginaabiabi Niya ang aton mga pamangkot sa karon nga panahon; nagahulat lamang Sia sa aton nga magpamangkot sa Iya sa pangamuyo. Sa matuod, pareho sa puno-sing-doktrina nga rebelasyon nga ginapakita sa Doktrina kag mga Kasugtanan 29, kon kaisa nagasabat Sia paagi sa pagpahayag sang kamatuoran kag ihibalo nga sobra pa sa mga pamangkot nga aton ginpamangkot.

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 29

Naghanda ang Amay nga Langitnon sang perpekto nga plano para sa pagpahitaas sa aton.

Ang Doktrina kag mga Kasugtanan 29 nagatudlo sang madamo nga mga kamatuoran parte sa plano sang Dios para sa Iya mga kabataan. Samtang imo ginabasa, pangitaa ang mga kamatuoran nga imo matun-an parte sa tagsa sa masunod nga mga parte sang plano:

• Kabuhi antes sa duta (tan-awa sa mga bersikulo 36–37)

• Pagtuga (tan-awa sa mga bersikulo 31–33)

• Ang Pagkahulog sa Sala ni Adan kag Eva (tan-awa sa mga bersikulo 40–41)

• Mortal nga kabuhi (tan-awa sa mga bersikulo 39, 42–45)

• Ang Pagbayad-Sala ni Jesucristo (tan-awa sa mga bersikulo 1, 42–43, 46–50)

• Ang Pagkabanhaw (tan-awa sa mga bersikulo 13, 26)

• Ang Katapusan nga Paghukom (tan-awa sa mga bersikulo 12–13, 27–30)

Ano nga bag-o nga panan-aw ang imo nabaton? Ano ang mangin kinalain sang imo kabuhi kon wala mo mahibal-i ining mga kamatuoran?

Matun-an mo pa ang parte sa plano sang Amay nga Langitnon sa “The Plan of Salvation” (Preach My Gospel: A Guide to Missionary Service, rev. ed. [2018], ChurchofJesusChrist.org/manual/missionary).

Doktrina kag mga Kasugtanan 29:1–8

Si Jesucristo magatipon sang Iya katawhan antes sang Iya Ika-duha nga Pagkari,

Si Jesucristo nagahambal parte sa pagtipon sang Iya katawhan “pareho sang munga nga nagatipon sang iya mga piso sa idalom sang iya pakpak” (Doktrina kag mga Kasugtanan 29:2). Ano ang ginatudlo sa imo sining imahe parte sa handum sang Manluluwas nga tipunon ka? Samtang imo ginabasa ang Doktrina kag mga Kasugtanan 29:1–8, magpangita sang mga paghangop kon ngaa magatipon kita, sin-o ang magatipon, kag kon paano kita makabulig tipon sang “pinili” (bersikulo 7).

Sa aton panahon, ang pagtipon sang Sion nagakahulugan sang paghiliusa sa mga estaka sang Sion sa bilog nga kalibutan. Paano kita ginabuligan sang pagtililipon bilang mga Santos nga mangin “handa sa tanan nga butang” sa pag-antos nga magaabot antes sang Ika-duha nga Pagkari sang Manluluwas? (bersikulo 8; tan-awa man sa mga bersikulo 14–28).

Tan-awa man sa Mga Artikulo sang Pagtuo 1:10; Russell M. Nelson and Wendy W. Nelson, “Hope of Israel” (bug-os-kalibutan nga debosyonal para sa mga lamharon, Hunyo 3, 2018, ChurchofJesusChrist.org).

munga kag mga piso

Makapila ka Beses, ni Liz Lemon Swindle

Doktrina kag mga Kasugtanan 29:31–35

“Ang tanan nga butang espirituhanon sa akon.”

Sa ano nga bahin nga ang tanan nga mga kasuguan espirituhanon? Ano ang ginatudlo sa imo sang paghibalo nga ang tanan nga mga kasuguan espirituhanon parte sa katuyuan sang mga kasuguan? Mahimo ka nga maglista sang pila ka mga kasuguan kag pamensaron ang espirituhanon nga mga prinsipyo mahiangot sa kada isa.

Ano ayhan ang magabag-o kon pangitaon mo ang espirituhanon nga kahulugan ukon katuyuan sang imo adlaw-adlaw nga buluhaton, bisan pa inang daw umalagi ukon ordinaryo.

Tan-awa man sa Mga Taga-Roma 8:6; 1 Nefi 15:30–32.

Doktrina kag mga Kasugtanan 29:36–50

Ginatubos kita ni Jesucristo halin sa Pagkahulog sa Sala.

Ang ining rebelasyon nagabukas sa pagpakilala sang Ginuo sang Iya Kaugalingon bilang aton Manunubos, nga “nagbayad sang [aton] mga sala” (bersikulo 1). Ang rebelasyon nagapadayon para ipaathag ang pila sa mga rason kon ngaa kinahanglan naton sang Manunubos. Hunahunaa kon paano mo gamiton ang mga bersikulo 36–50 para ipaathag kon ngaa kinahanglan naton sang pagtubos paagi sa Manluluwas nga si Jesucristo. Sa madamo nga mga tradisyon sang tumuluo, ang Pagkahulog sa Sala ginakabig nga isa ka trahedya; ano ang imo makita sa sining mga bersikulo nga nagatudlo sang positibo nga mga resulta sang Pagkahulog sa Sala? (Tan-awa man sa 1 Mga Taga-Corinto 15:22; 2 Nefi 2:6–8, 15–29; Mosias 3:1–19; Moises 5:9–12.)

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 29.Pwede mo gamiton ang mga imahe sa katapusan sining outline upod ang Doktrina kag mga Kasugtanan 29 para tudloan ang imo pamilya parte sa plano sang kaluwasan. Halimbawa, pwede tun-an sang mga miyembro sang pamilya ang lainlain nga parte sang plano paagi sa pagbasa kag pagtalakay sang mga bersikulo nga ginpanugyan. Pwede sila makakita sang dugang nga mga kamatuoran sa Gospel Topics (topics.ChurchofJesusChrist.org) ukon sa the Guide to the Scriptures (scriptures.ChurchofJesusChrist.org). Isulat ang imo natun-an. Ngaa nagapasalamat kita nga makahibalo parte sa plano sang kaluwasan? Paano nagaimpluwensya ining ihibalo sa aton adlaw-adlaw nga pagpangabuhi?

Doktrina kag mga Kasugtanan 29:2, 7–8.Ano ang buot silingon sang matipon sang Manluluwas? Paano naton Sia buligan nga tipunon ang mga pinili?

Doktrina kag mga Kasugtanan 29:3–5.Ano ang aton matun-an parte sa Manluluwas sa sining mga bersikulo nga nagabulig sa aton nga “ibayaw ang [aton] mga tagipusuon kag magkalipay”? (bersikulo 5).  

Doktrina kag mga Kasugtanan 29:34–35.Ang pagbasa sining mga bersikulo makahatag sa imo pamilya sang oportunidad nga hambalan ang espirituhanon nga mga rason sa likod sang pila ka mga kasuguan ukon laygay sang propeta nga inyo ginatinguhaan nga sundon. Halimbawa, ngaa nga gusto sang Ginuo nga basahon naton ang balaan nga mga kasulatan bilang pamilya? Ano nga espirituhanon nga mga benepisyo ang aton nakita sa pagtuman sang mga kasuguan?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Israel, Israel, God Is Calling,” Hymns, no. 7.

Pagpauswag sang Personal nga Pagtuon

Pangitaa si Jesucristo. Ang balaan nga mga kasulatan nagatudlo sa aton nga ang tanan nga gintuga sang Dios nagapamatuod kay Jesucristo (tan-awa sa Moises 6:62–63), gani pangitaa Sia samtang imo ginabasa ang balaan nga mga kasulatan. Pamensara ang pagtanda ukon pagmarka sang mga bersikulo nga nagatudlo parte sa Iya.