Si Joseph Smith

Marso 15–21

Doktrina kag mga Kasugtanan 27–28

“Ang Tanan nga Butang Dapat Himuon sa Husto nga Paagi”

Si Elder D. Todd Christofferson nagsiling nga sa imo pagtuon sang balaan nga mga kasulatan kag pagsulat sang mga impresyon, “imo pagahatagan sang lugar sa imo tagipusuon ang pulong sang Dios, kag Sia magapakighambal sa imo” (“When Thou Art Converted,” Ensign ukon Liahona, Mayo 2004, 11).

Isulat Ang Imo Mga Panghunahuna

Ang rebelasyon isa ka bag-o nga konsepto sa mga Santos samtang nagapadayon ang Pagpanumbalik. Nakahibalo ang mga miyembro sang Simbahan nga makabaton si Propetang Joseph Smith sang rebelasyon para sa Simbahan, pero pwede bala ang iban? Ang amo sini nga mga pamangkot nangin kritikal sang si Hiram Page, isa sa Walo ka mga Saksi sang bulawan nga mga lamina, nagpati nga nakabaton sia sang mga rebelasyon para sa Simbahan. Madamo sa matinuohon nga mga Santos ang nagpati nga ining mga rebelasyon naghalin sa Dios. Nagsabat ang Ginuo paagi sa pagtudlo nga sa Iya Simbahan “ang tanan nga butang dapat himuon sa husto nga paagi” (Doktrina kag mga Kasugtanan 28:13), nga buot silingon may isa lang nga “pagapilion sa pagbaton sang mga kasugoan kag mga rebelasyon” para sa bilog nga Simbahan (Doktrina kag mga Kasugtanan 28:2). Wala sapayan sini, ang iban pwede man makabaton sang personal nga rebelasyon para sa ila bahin sa buluhaton sang Ginuo. Ang matuod, ang mga pulong sang Ginuo kay Oliver Cowdery isa ka pahanumdom sa aton: “Ihatag sa imo … kon ano ang imo himuon” (Doktrina kag mga Kasugtanan 28:15).

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 27:1–4

Dapat ako mag-ambit sang sakramento nga nagatutok lamang sa himaya sang Dios.

Si Sally Knight kag Emma Smith ginbunyagan sang Hunyo 1830, pero ang ila mga kumpirmasyon gingamo sang masingki nga mga tawo. Duha ka bulan ang nagligad, si Sally kag ang iya bana, nga si Newel nagbisita sa ila ni Emma kag Joseph, kag nadesisyunan nga dapat himuon na dayon ang mga kumpirmasyon kag ang grupo magaambit sang sakramento sing ululupod. Sang nagalakat para magkuha sang alak para sa sakramento ginpunggan si Joseph sang isa ka anghel. Ano ang gintudlo sang anghel sa iya parte sa sakramento? (tan-awa sa Doktrina kag mga Kasugtanan 27:1–4).

Ano ang ginatudlo sining mga bersikulo sa imo parte sa paagi nga gusto sang Manluluwas nga imo trataron ang sakramento? Ano ang ginapabatyag sa imo nga imo himuon bangud sang imo natun-an?

pang-sakramento nga tinapay kag baso.

Ang sakramento nagapadumdom sa aton sang sakripisyo sang Manluluwas.

Doktrina kag mga Kasugtanan 27:15–18

Ang taming sang Dios magabulig sa akon nga pakigbatuan ang malain.

Si Pangulong M. Russell Ballard nagsiling: “Wala sang isa lang ka dako kag dalayawon nga butang nga sarang naton himuon para armasan ang aton kaugalingon sa espirituhanon. Ang matuod-tuod nga espirituhanon nga gahum ara sa madamo nga ginagmay nga mga binuhatan nga ginhabi sa tela sang espirituhanon nga pamakod nga nagaamlig kag nagasagang batok sa tanan nga malain” (“Be Strong in the Lord,” Ensign, Hulyo 2004, 8).

Samtang imo ginabasa ang Doktrina kag mga Kasugtanan 27:15–18, pwede ka maghimo sang tsart pareho sang ara sa idalom. Ano ang imo ginahimo para isul-ob ang isa ka parte sang hinganib sang Dios?

Bahin sang hinganib	Parte sang lawas nga ginaprotektahan	Ano ang mahimo ginarepresentar sinang parte sang lawas
Bahin sang hinganib Taming sang pagkamatarong	Parte sang lawas nga ginaprotektahan Tagipusuon	Ano ang mahimo ginarepresentar sinang parte sang lawas Ang aton mga handum kag mga balatyagon
Bahin sang hinganib Pandong sang kaluwasan	Parte sang lawas nga ginaprotektahan Ulo ukon kaisipan	Ano ang mahimo ginarepresentar sinang parte sang lawas

Tan-awa man sa Mga Taga-Efeso 6:11–18; 2 Nefi 1:23.

Doktrina kag mga Kasugtanan 28

Ang buhi nga propeta amo ang tighambal sang Dios para sa Iya Simbahan.

Hunahunaa kon daw ano ayhan kon ang bisan sin-o pwede magbaton sang mga kasuguan kag rebelasyon para sa bilog nga Simbahan. Sang nagsiling si Hiram Page nga nakabaton sia sang amo nga rebelasyon, nagkinagamo ang mga miyembro sang Simbahan. Sa Doktrina kag mga Kasugtanan 28, nagpahayag ang Ginuo sang paagi para sa rebelasyon sa Iya Simbahan. Ano ang imo matun-an sa sining seksyon parte sa partikular nga papel sang Pangulo sang Simbahan? Ano ang imo matun-an parte sa mga pulong sang Dios kay Oliver Cowdery sa bersikulo 3? Ano ang imo matun-an sa sini nga seksyon kon paano ka sarang giyahan sang Dios?

Doktrina kag mga Kasugtanan 28:8–9

Ngaa importante ang misyon ni Oliver Cowdery sa mga Lamanhon?

Isa sa mga katuyuan sang Libro ni Mormon amo nga “agud mahibaloan sang mga Lamanhon ang parte sa ila mga amay, kag agud mahibaloan nila ang mga promisa sang Ginuo” (Doktrina kag mga Kasugtanan 3:20). Nagasanto ini sa mga promisa nga ginhimo sang Ginuo sa madamo nga mga propeta sa Libro ni Mormon (tan-awa, halimbawa sa, 1 Nefi 13:34–41; Enos 1:11–18; Helaman 15:12–13). Ginkabig sang mga miyembro sang Simbahan sang una ang mga Amerikano nga Indiyan nga mga kaliwat sang mga tawo sa Libro ni Mormon. (Ang opisyal nga panindugan sang Simbahan karon amo nga ang mga Lamanhon “amo ang panguna nga mga katigulangan sang Amerikano nga mga Indiyan” [pauna sa Libro ni of Mormon].)

  45–49 Ano ang ginatudlo sining misyon sa imo parte sa Ginuo kag sa Iya buluhaton?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 27:1–2.Paano naton madumduman sing mas maayo ang sakripisyo sang Manluluwas para sa aton samtang nagaambit kita sang sakramento?

Doktrina kag mga Kasugtanan 27:5–14.Ano ang aton nahibal-an parte sa mga propeta sa sining mga bersikulo? Pwede kamo magpangita sang impormasyon parte sa ila sa Guide to the Scriptures (scriptures.ChurchofJesusChrist.org). Ano nga mga bugay ang nabuksan para sa aton paagi sa mga yabi nga ila ginakaptan? Para sa dugang nga impormasyon parte sa pila sining mga yabi, tan-awa sa Mateo 16:16–19; Doktrina kag mga Kasugtanan 110:11–16.

Doktrina kag mga Kasugtanan 27:15–18.Ayhan masadyahan ang imo pamilya sang paggiyera-giyera nga may dugang nga suluksukon para irepresentar ang hinganib sang Dios, pareho sang mga kalo, mga tsaleko, mga tampi, ukon sapatos. Paano ang hinganib nagabulig protekta sa aton sa giyera? Hambali ang pila sa malain nga mga impluwensya nga ginapangatubang sang inyo pamilya kag ang mga butang nga pwede ninyo himuon para magsul-ob sang espirituhanon nga hinganib.  

Doktrina kag mga Kasugtanan 28:2–7.Ano ang aton matun-an sa sining mga bersikulo parte sa palangakuan sang propeta?  Basi pwede nga rebyuhon sang mga miyembro sang pamilya ang nagliligad nga mga mensahe halin sa aton buhi nga propeta kag ipaambit kon paano nagabulig sa aton ang iya laygay nga sundon si Jesucristo.

Doktrina kag mga Kasugtanan 28:11.Kon gusto naton nga magtanyag sang pagtadlong sa isa ka tawo, ngaa importante nga himuon ini nga “kamo lamang nga duha”?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Salamat, O Dios sa Manalagna [We Thank Thee, O God, For a Prophet,” Mga Himno kag mga Ambahanon sang Kabataan, no. 36.

Pagpauswag sang Personal nga Pagtuon

Tun-i ang mga pulong sang mga propeta kag apostoles sa ulihing-mga-adlaw. Basaha ang mga pinanudlo sang mga propeta kag apostoles sa ulihing mga adlaw parte sa mga prinsipyo nga imo makita sa balaan nga mga kasulatan. Pamensara nga rebyuhon ang index sang mga topiko sa pangkabilugan nga komperensya sa conference.ChurchofJesusChrist.org ukon sa Librarya sang Ebanghelyo [Gospel Library] nga app.

hinganib sang Dios