“Marso 8–14. Doktrina kag mga Kasugtanan 23–26: ‘Pabakura ang Simbahan,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Marso 8–14. Doktrina kag mga Kasugtanan 23–26,” Dali, Magsunod sa Akon—Para sa Mga Indibidwal kag Mga Pamilya: 2021

Marso 8–14

Doktrina kag mga Kasugtanan 23–26

“Pabakura ang Simbahan”

Samtang imo ginabasa ang Doktrina kag mga Kasugtanan 23–26, tandai ang mga panghunahuna nga imo mabaton halin sa Balaan nga Espiritu. Paano mo magamit ang laygay sa sining mga rebelasyon nga pabakuron ang imo pagkadisipulo kag subong man ang Simbahan?

Isulat Ang Imo Mga Panghunahuna

Pagkatapos nga maorganisar ang Simbahan, nagpangatubang ang mga Santos sang bag-o nga hangkat—ang pagpalapta sang ebanghelyo kag pagpabakod sang mga nagkig-isa na sa Simbahan, samtang ang pagpamigos nagapadayon sa pagdako. Nasaksihan mismo ni Emma Smith ang oposisyon. Sang Hunyo 1830, gusto ni Emma kag sang mga miyembro sang pamilya Knight nga magpabunyag. Pero gintinguhaan nga tublagon sang mga kaaway sang Simbahan ang kuntani sagrado nga eksperiyensya. Una ginguba nila ang dam nga ginhimo para makatipon sang madalom gawa nga tubig para sa mga pagbunyag. Bisan pa sang makay-o na ang dam, ang mga manugpamigos nagtipon para magsinggitan sang mga pamahog kag yagutaon ang mga ginabunyagan. Dayon, sang hana na nga kumpirmahon ni Joseph ang bag-o nga mga miyembro, gindakop sia sa pagpaakig sa komunidad paagi sa pagwali parte sa Libro ni Mormon. Daw indi yadto manami nga panugod sang bag-o lang ginpanumbalik nga Simbahan sang Ginuo. Pero sa tunga sining wala kasigurohan kag kagamo, ang Ginuo naghatag sang bilidhon nga mga tinaga sang paglaygay kag pagpaisog, nga nagarepresentar sang Iya “tingug sa tanan” (Doktrina kag mga Kasugtanan 25:16).

Tan-awa man sa Saints, 1:89–90, 94–97.

Mga Ideya para sa Personal nga Pagtuon sang Balaan nga Mga Kasulatan

Doktrina kag mga Kasugtanan 23–26

Sarang ko pabakuron ang Simbahan sang Ginuo.

Sa karon, halos 200 ka gatos ka tuig pagkatapos nga gin-organisar ang ginpanumbalik nga Simbahan, ang kakinahanglan nga “pabakuron ang simbahan” nagapadayon (Doktrina kag mga Kasugtanan 23:3–5). Kag ang ining buluhaton indi lamang para kay Joseph Smith, Oliver Cowdery, ukon sang aton mga lider sa Simbahan sa karon—para ini sa aton tanan. Sa bilog mo nga pagtuon sang Doktrina kag mga Kasugtanan 23–26, binagbinaga ang laygay nga ginhatag sang Ginuo sa nauna nga mga miyembro sang Simbahan para buligan sila nga pabakuron ang Simbahan. Ano ang nabatyagan mo nga gusto ipaobra sa imo sang Ginuo sa pagpartisipar sa sini nga buluhaton?

Doktrina kag mga Kasugtanan 24

Sarang ako luwason sang Manluluwas “halin sa [akon] mga pag-antos.”

Ang pagpanguna sang Simbahan sa tion sang grabe nga pagpamigos posible nga nangin mabug-at nga palas-anon para kay Joseph Smith. Pangitaa ang mga pulong sang Ginuo sa pagpaisog sa iya sa Doktrina kag mga Kasugtanan 24.

Ano ang ginapanugyan sa imo sang masunod nga balaan nga mga kasulatan kon paano ka luwason sang Manluluwas halin sa imo mga pag-antos?

Doktrina kag mga Kasugtanan 24:1–3

Doktrina kag mga Kasugtanan 24:8

Doktrina kag mga Kasugtanan 121:7–8

Isaias 40:28–31

Mosias 24:14–15

Paano ka ginluwas ni Jesucristo sa imo mga pag-antos? Ano ang sarang mo himuon para padayon nga pangayuon ang Iya bulig sa tion sang mga kabudlayan?

Si Jesucristo nga nagapang-ayo sang mga tawo — Gin-ayo Niya ang Madamong Masakiton sa Sari-saring Balatian, ni J. Kirk Richards

Doktrina kag mga Kasugtanan 25

Si Emma Smith “isa ka pinili nga babayi.”

Sang ginpamana ni Emma Hale si Joseph Smith, laban-laban nga nakahibalo sia nga magahimo sia sang mga sakripisyo. Ginsupak niya ang gusto sang iya amay kag ginbaylo ang daw komportable nga pangabuhi sa kabuhi nga wala sing kasiguruhan. Siguro ginhunahuna niya kon ano ang ginapaabot sang Ginuo sa iya sa buluhaton sang Pagpanumbalik. Pangitaa ang mga sabat nga ginhatag sang Ginuo sa Doktrina kag mga Kasugtanan 25. Tandai ang mga pulong sang Ginuo sa bersikulo 16—may nakita ka bala sa sining seksyon nga sa pamatyagan mo amo ang Iya “tingug sa [imo]”?

Doktrina kag mga Kasugtanan 26:2

Ano ang pagsugot sang kadam-an?

Sa pagbaton sang mga miyembro sang mga calling ukon ordinasyon sa priesthood sa Simbahan, makaangkon kita sang oportunidad nga pormal nga sakdagon sila paagi sa pag-alsa ang aton mga kamot sa pagpakita sang suporta. Ang prinsipyo sang pagpakita sang suporta kag pag-ugyon sa publiko ginatawag nga pagsugot sang kadam-an. Sa gintudlo ni Pangulong Gordon B. Hinckley, “Ang proseso sang pagsakdag masobra pa sangsa ritwal nga pag-alsa sang kamot. Isa ini ka pangako nga tib-ungon, suportahan, buligan atong mga gintawag” (“This Work Is Concerned with People,” Ensign, Mayo 1995, 51).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 23:6.Ngaa gusto sang Ginuo nga magpangamuyo kita “sa sulod sang [aton] panimalay, kag upod sang [aton] mga abyan, kag sa tanan nga lugar”?

Tan-awa man sa 2 Nefi 32:8–9; 3 Nefi 18:18–23.

Doktrina kag mga Kasugtanan 24:8.Makabulig ayhan sa inyo pamilya nga hambalan kon ano ang buot silingon sang “magpadayon sa pihak sang mga pag-antos”? Kon may magagmay ka nga kabataan, basi mangin masadya nga himuon man ang eksperimento nga ginlaragway ni Pangulong Dieter F. Uchtdorf sa “Continue in Patience” (Ensign ukon Liahona, Mayo 2010, 56; tan-awa man sa video sa ChurchofJesusChrist.org). Ano ang ginatudlo sa aton sang Doktrina kag mga Kasugtanan 24:8 parte sa pagpadayon? Paano kita ginabuligan sang Ginuo nga magpadayon sa pihak sang aton mga pag-antos?

Doktrina kag mga Kasugtanan 25:11–12.Ayhan pwede ninyo kantahon ang paborito nga himno ukon kanta sang tagsa ka miyembro sang pamilya kag hambalan kon ngaa amo ini ang iya “ambahanon sang tagipusuon.” Paano ining mga kanta nangin daw kaangay sang “pangamuyo sa [Dios]”?

Doktrina kag mga Kasugtanan 26:2.Mahimo nga makabulig ang pangitaon ang “Common Consent” sa Guide to the Scriptures (scriptures.ChurchofJesusChrist.org). Paano naton ipakita ang aton suporta sa aton mga lider?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Mga Tingug sang Pagpanumbalik

Emma Hale Smith

Ang mga pulong sang Ginuo kay Emma Smith nga nasulat sa Doktrina kag mga Kasugtanan 25 nagapakita kon ano ang Iya nabatyagan para sa iya kag sa mga kontribusyon nga pwede niya himuon sa Iya buluhaton. Apang daw ano si Emma? Ano ang aton nahibal-an parte sa iya personalidad, sa iya mga relasyon, sa iya mga kusog? Isa ka paagi para makilala ining “pinili nga babayi” (Doktrina kag mga Kasugtanan 25:3) amo ang basahon ang mga tinaga sang mga tawo nga nakakilala sa iya sing personal.

Joseph Smith Jr., iya bana

“Indi ko malaragway ang kalipay, kag napuno ako sang kasadya, sang akon ginkaptan sa kamot, sina nga gab-i, ang akon pinalangga nga si Emma—sia nga akon asawa, ang asawa sang akon pagkapamatan-on; kag ang tawo nga akon ginapakamahal. Madamo ako sang ginapamensar sang ginbinagbinag ko sing makadali ang madamo nga mga eksperiyensya nga kinahanglan namon agyan. Ang mga kakapoy, ang mga pangabudlay, ang mga kasubo, ang mga pag-antos, kag ang mga kalipay kag kaumpawan nga ara sa amon alagyan kag nagbugay sang amon mga kabuhi. Ay! nadumduman ko ang tanan nga malain kag tanan nga maayo sing makadali, Sa gihapon ari sia, sa tunga sang amon mga pagtilaw, ang wala nagaluya, mabakod, kag wala nagaduhaduha, wala nagaliwat, mapinalanggaon nga si Emma.”¹

Lucy Mack Smith, ang iya ugangan nga babayi

“Sang hubin pa sia, kag, bangud duna nga may ambisyon, ang bug-os niya nga tagipusuon ara sa buluhaton sang Ginuo, kag wala na sia sing interes sa bisan ano magluwas sa simbahan kag sa kawsa sang kamatuoran. Bisan ano ang iya ginaobra, ginaobra gid niya sing pinakamaayo kag wala nagapamangkot sing maiyaiyahon ‘May makuha bala ako nga sobra pa sangsa makuha sang iban?’ Kon ang mga elder ginapalakat para magwali, una gid sia nga nagaboluntaryo sang iya serbisyo para magbulig nga pabistehan sila para sa ila pagpanglakaton, wala sapayan sang mga pagtilaw nga iya man ginaatubang.”²

“Wala pa ako sing nakilala nga babayi sa akon kabuhi, nga nagabatas sang tagsa ka klase sang kakapoy kag kabudlayan, tagsa ka bulan, kag tagsa ka tuig, nga wala nagabag-o ang kaisog, katutom kag pagpaumod, nga pirme niya ginahimo; kay nahibal-an ko kon ano ang kinahanglan niya batason; nga ginsulay niya ang kawala kasigurohan; nga gin-atubang niya ang unos sang pagpamigos, kag ginlampuwasan ang kaakig sang mga tawo kag mga panulay, tubtob nga nadaog niya ang kabudlay nga [posible] nagpausdang sang bisan sin-o nga babayi`.”³

Joseph Smith Sr., iya ugangan nga lalaki

Ang bendisyon sang patriarka, nga ginsambit ni Joseph Smith Sr., nga nagaserbe nga patriarka sang Simbahan:

“Emma, akon umagad, ginbugayan ka sang Ginuo, bangud sang imo katutom kag katampad: pagabugayan ka upod sa imo bana, kag magakalipay sa himaya nga magaabot sa iya: Nag-antos ang imo kalag tungod sang kalautan sang mga tawo nga nagahandum sang kalaglagan sang imo bana, kag ang bug-os mo nga tagipusuon ginbubo sa pagpangamuyo para sa iya kaluwasan: magkasadya, kay ang Ginuo nga imo Dios nakabati sang imo pag-ampo.

“Nagkalisod ka tungod sang katig-a sang mga tagipusuon sang pamilya sang imo amay, kag ginahandum mo ang ila kaluwasan. Pagatahuron sang Ginuo ang imo mga pag-ampo, kag paagi sa iya paghukom ipakita niya sa pila sa ila ang ila kasal-anan kag magahinulsol sila sang ila mga sala; apang paagi sa pag-antos sila pagaluwason. Magalawig ang imo panahon; huo, luwason ka sang Ginuo tubtob nga malipay ka, kay makita mo ang imo Manunubos. Magakalipay ang imo tagipusuon sa dalayawon nga buluhaton sang Ginuo, kag wala sing magakuha sang imo pagkalipay sa imo.

“Panumdumon mo gid ang dako nga pagpaubos sang imo Dios sa pagtugot sa imo nga updan ang akon anak sang gin-intregar sang anghel ang kasulatan sang mga Nefinhon sa iya pag-atipan. Kadamo sang imo ginbatas nga kalisod bangud ginkuha sang Ginuo sa imo ang tatlo sang imo kabataan: sa sini indi ikaw balasulon, kay nakahibalo sia sang imo matinlo nga handum sa pagpadako sang pamilya, agud nga ang ngalan sang akon anak mapakamaayo. Kag karon, tan-awa, ginasiling ko sa imo, nga amo ini ang ginahambal sang Ginuo, kon ikaw magatuo, pagabugayan ka sa sining butang kag magaangkon ka pa sang mga anak, sa kalipayan kag katumanan sang imo kalag, kag sa kasadya sang imo mga abyan.

“Pagabugayan ka sang paghangop, kag makaangkon sang gahum sa pagtudlo sang iban nga kababayin-an. Tudloi ang imo panimalay sang pagkamatarong, kag ang imo mga anak sang pamaagi sa kabuhi, kag ang balaan nga mga anghel magabantay sa imo: kag ikaw pagaluwason sa ginharian sang Dios; kag subong sina. Amen.”¹

Si Emma Smith upod ang iya kabataan. Tion sa Pagkadlaw, ni Liz Lemon Swindle

Si Emma Smith nga nagasulat — Ang mga Himno ni Emma, ni Liz Lemon Swindle