“Marso 29–Abril 4. Pagkabanhaw (Easter): “Ako Sia nga Nagakabuhi, Ako Sia nga Napatay,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Marso 29–Abril 4. Paskwa sang Pagkabanhaw,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

Estatwa nga Christus

Marso 29–Abril 4

Paskwa sang Pagkabanhaw (Easter)

“Ako Sia nga Nagakabuhi, Ako Sia nga Napatay”

Samtang nagahanda ka nga saulugon ang Pagkabanhaw sang Manluluwas sa Domingo sang Paskwa sang Pagkabanhaw, binagbinaga kon paano ginpasangkad sang moderno nga rebelasyon ang imo pagtuo nga si Jesucristo amo ang Bugtong nga Anak sang Dios kag ang Manunubos sang kalibutan.

Isulat Ang Imo Mga Panghunahuna

Ang Abril 3, 1836, Domingo sang Paskwa sang Pagkabanhaw. Pagkatapos nga magbulig sa pagpanagtag sang sakramento sa mga Santos nga nagtililipon sa bag-o lang gid nadedikar nga Templo sa Kirtland, nakakita sanday Joseph Smith kag Oliver Cowdery sang malinong nga lugar sa likod sang belo sang templo kag nagduko sa matinong nga pagpangamuyo. Dayon, sa sining sagrado nga adlaw samtang ginasaulog sang tanan nga Kristiyano sa bisan diin ang Pagkabanhaw ni Jesucristo, nagpakita ang nabanhaw nga Manluluwas Mismo sa Iya templo, nga nagasiling, “Ako sia nga nagakabuhi, ako sia nga napatay” (Doktrina kag mga Kasugtanan 110:4).

Ano ang buot silingon sang si Jesucristo amo “sia nga nagakabuhi”? Wala lamang ini nagakahulugan nga nagbangon Sia sa lulubngan sa ikatatlo nga adlaw kag nagpakita sa Iya mga disipulo sa Galilea. Nagakahulugan ini nga buhi Sia karon. Nagahambal Sia paagi sa mga propeta sa karon. Ginagiyahan Niya ang Iya Simbahan sa karon nga panahon. Ginapaayo Niya ang napilasan nga mga kalag kag nagakasubo nga mga tagipusuon sa karon. Gani mahimo naton suliton ang mga tinaga sa mabaskog nga testimonya ni Joseph Smith: “Pagkatapos sang madamo nga testimonya nga ginhatag parte sa iya, ini ang testimonya … nga ginahatag namon parte sa iya: Nga buhi sia!” (Doktrina kag mga Kasugtanan 76:22). Mabatian naton ang Iya tingug sa sining mga rebelasyon. Masaksihan naton ang Iya paghikot sa aton mga kabuhi. Kag mabatyagan sang kada isa sa aton nga “makalilipay ining pulong: ‘Buhi gid ang Manunubos ko!’” (Mga Himno kag mga Ambahanon sang Kabataan, no. 38).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 29:5; 38:7; 62:1; 76:11–14, 20–24; 110:1–10

Si Jesucristo buhi.

Nakita sang Propeta nga si Joseph Smith ang nabanhaw nga Manluluwas sing pila ka beses, kag duha sining mga eksperiyensya nasulat sa Doktrina kag mga Kasugtanan. Sa imo pagbasa sang mga seksyon 76:11–14, 20–24; 110:1–10, ano ang nanamian mo sa testimonya ni Joseph Smith? Ngaa malahalon para sa imo ang iya testimonya?

Sa bilog nga Doktrina kag mga Kasugtanan, nagsaksi ang Manluluwas sa Iya kaugalingon nga misyon kag pagkadiosnon. Ano ang imo matun-an parte sa buhi nga Cristo sa Iya mga pulong sa Doktrina kag mga Kasugtanan 29:5; 38:7; 62:1? Mahimo mo isulat ang pareho sini nga mga deklarasyon nga imo makita samtang imo ginatun-an ang Doktrina kag mga Kasugtanan.

Tan-awa man sa Joseph Smith—Kasaysayan 1:17.

Doktrina kag mga Kasugtanan 29:26–27; 42:45–46; 63:49; 88:14–17, 27–31; 93:33–34

Tungod kay Jesucristo, mabanhaw ako.

Nahibal-an ni Joseph Smith kon daw ano ang magbatyag sang kalisod sa kamatayon sang mga mahal sa kabuhi. Duha sa iya mga utod nga lalaki, nga sanday Alvin kag Don Carlos, napatay nga mga lamharon pa. Sanday Joseph kag Emma naglubong sang anum ka kabataan, ang kada isa wala pa magduha ka tuig ang pangidaron. Pero sa mga rebelasyon nga iya nabaton, nakabaton si Joseph sang wala katapusan nga paghangop sang kamatayon kag sa wala katapusan nga plano sang Dios. Pamensara ang mga kamatuoran nga ginpahayag sa Doktrina kag mga Kasugtanan 29:26–27; 42:45–46; 63:49; 88:14–17, 27–31; 93:33–34. Ano ang epekto sining mga rebelasyon sa imo panan-aw sa kamatayon? Paano ini magaapekto sa imo pagpangabuhi?

Tan-awa man sa 1 Mga Taga-Corinto 15.

Doktrina kag mga Kasugtanan 18:10–13; 19:16–19; 45:3–5; 76:69–70

Si Jesucristo naghikot sang “perpekto nga pagbayad-sala.”

Isa ka paagi para tutokan ang Manluluwas sa tion sang Paskwa sang Pagkabanhaw amo ang pagtuon sang mga rebelasyon sa Doktrina kag mga Kasugtanan nga nagatudlo parte sa Iya nagabayad-sala nga halad. Ang pila sini makita sa Doktrina kag mga Kasugtanan 18:10–13; 19:16–19; 45:3–5; 76:69–70. Basi pwede ka maghimo sing listahan sang mga kamatuoran parte sa Pagbayad-Sala sang Manluluwas nga imo makita sa sining mga bersikulo.

Ari ang pila ka mga pamangkot nga mahimo makagiya sa imo pagtuon:

Ngaa nga ginpili ni Jesucristo nga mag-antos?
Ano ang kinahanglan ko himuon para mabaton ang mga bugay sang Iya pagsakripisyo?
Paano ko mahibal-an nga nagaepekto ang Iya Pagbayad-Sala sa akon kabuhi?

Lord of Prayer [Ginuo sang Pangamuyo], ni Yongsung Kim

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Pangkabilogan nga komperensya.Tungod nagadungan ang pangkabilogan nga komperensya sa Domingo sang Paskwa sang Pagkabanhaw sini nga tuig, mahimo mo nga pamensaron kon paano mapasangkad sang mga mensahe sa komperensya (lakip na sang musika) ang testimonya sang imo pamilya parte kay Jesucristo. Halimbawa, mahimo nga magdrowing sang litrato sang Manluluwas ang magagmay nga kabataan, ukon alsahon ang Iya litrato, kon makabati sila sang mensahe ukon kanta parte kay Jesucristo. Ang iban nga mga miyembro sang pamilya pwede maglista sang mga kamatuoran nga ila mabatian parte sa Manluluwas. Pagkatapos, pwede nga iistorya sang mga miyembro sang pamilya ang ila mga drowing ukon mga lista kag ang ila kaugalingon nga mga testimonya parte kay Jesucristo.

Doktrina kag mga Kasugtanan 88:14–17; 138:17, 50.Basi masadyahan ang imo pamilya sa pagpanumdom sang paanggid ukon leksyon nga nagagamit sang bagay para ipaathag kon ano ang kahulugan sang mapatay kag mabanhaw—inang nagapakita sang pagseparar kag pagbalikay sang lawas kag espiritu, pareho sang kamot kag gwantes. Paano ginapasangkad sining mga bersikulo ang aton kapasalamatan sa ginhimo sang Manluluwas para sa aton?

“Ang Buhi nga Cristo: Ang Panaksihon sang mga Apostoles.”Agud paisugon ang paghinambalanay parte sa mga testimonya sang moderno nga mga propeta parte sa Manluluwas, pwede mo tokahan ang tagsa ka miyembro sang pamilya nga basahon ang isa ka bahin sang “Ang Buhi nga Cristo: Ang Panaksihon sang mga Apostoles” (Ensign ukon Liahona, Mayo 2017, sa sulod sang takop sa atubang) kag iistorya ang ila natun-an parte kay Jesucristo. Ano nga mga kamatuoran ang aton makita nga nagainspirar sa aton?

“Buhi Gid ang Manunubos Ko!”Para buligan ang imo pamilya nga pamensaron ang madamo nga pamaagi nga ginabugayan kita karon sang nabanhaw nga Manluluwas, pwede ninyo kantahon sing ululupod ang “I Know That My Redeemer Lives [Buhi Gid ang Manunubos Ko]” (Mga Himno kag mga Ambahanon sang Kabataan, no. 38) kag iangot ang mga kamatuoran nga ginatudlo sining kanta sa mga ginatudlo sa masunod nga balaan nga mga kasulatan: Doktrina kag mga Kasugtanan 6:34; 45:3–5; 84:77; 98:18; 138:23. Mahimo nga masadyahan man ang imo pamilya sa pagsulat sang dugang nga mga berso sa kanta nga nagapahayag kon paano nila nahibal-an nga ang Manunubos buhi.

Para sa video sa Paskwa sang Pagkabanhaw kag iban pa nga mga bulig, tan-awa sa Easter.ComeUntoChrist.org.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magpangita sang mga leksyon sa pang-adlaw-adlaw nga mga butang. Pamensara kon paano ang adlaw-adlaw nga mga eksperiyensya sang mga miyembro sang imo pamilya magadala sang makahulugan nga mga paghinambalanay parte sa isa ka kamatuoran sang ebanghelyo (tan-awa sa Teaching in the Savior’s Way, 4). Halimbawa, ang makusog nga ulan mahimo nga mangin oportunidad para hambalan kon paano ginapaulanan sang Dios sang mga bugay ang Iya mga anak.