“Abril 5–11. Doktrina kag mga Kasugtanan 30–36: ‘Gintawag Ka sa Pagwali sang Akon Ebanghelyo,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)
“Abril 5–11. Doktrina kag mga Kasugtanan 30–36,” Dali, Magsunod sa Akon—Para sa Mga Indibidwal kag Mga Pamilya: 2021
Abril 5–11
Doktrina kag mga Kasugtanan 30–36
“Gintawag Ka sa Pagwali sang Akon Ebanghelyo”
Sa balaan nga mga kasulatan, makakita kita sang mga ideya para sa aton pinasahi nga mga sirkumstansya. Pangayoa sa Ginuo nga buligan ka sa pagpangita sang mensahe nga para gid sa imo sa Doktrina kag mga Kasugtanan 30–36.
Isulat Ang Imo Mga Panghunahuna
Mga isa pa lang ka bulan si Parley P. Pratt nga miyembro sang Simbahan sang gintawag sia sa “kamingawan” sa pagwali sang ebanghelyo (Doktrina kag mga Kasugtanan 32:2). Si Thomas B. Marsh nangin miyembro sa mas manubo pa gid sina nga kalawigon sang sia ginsilingan, “Ang oras sang imo misyon nag-abot na” (Doktrina kag mga Kasugtanan 31:3). Si Orson Pratt, Edward Partridge, kag madamo nga iban pa ang bag-o lang gid mabunyagan sang mag-alabot ang ila mga tawag sa misyon. Siguro ang amo nga kadasigon kinahanglanon na gid—sang tiglagas sang 1830, wala pa gid sang nangin miyembro sang Simbahan nga masobra sa anum ka bulan. Pero may leksyon man para sa aton karon ang ini nga sulundan: kon hustuhan na ang imo ihibalo para batunon ang ginpanumbalik nga ebanghelyo paagi sa bunyag, igo na ang imo nahibal-an para ipaambit ini sa iban. Siyempre gusto gid naton nga madugangan ang aton ihibalo sa ebanghelyo, pero wala gid nagpang-alang-alang ang Dios sa pagtawag sa “wala’y tinun-an” sa pagwali sang Iya ebanghelyo (Doktrina kag mga Kasugtanan 35:13). Ang matuod, ginaimbitar Niya kita tanan, “Buksan mo ang imo baba agud nga ipahayag ang akon ebanghelyo” (Doktrina kag mga Kasugtanan 30:5). Kag pinakamaayo naton ina nga mahimo indi paagi sa aton kaugalingon nga kaalam kag eksperiyensya kundi “paagi sa gahum sang Espiritu” (Doktrina kag mga Kasugtanan 35:13).
Mga Ideya para sa Personal nga Pagtuon sang Balaan nga mga Kasulatan
Doktrina kag mga Kasugtanan 30–36
Gintawag ako sa pagwali sang ebanghelyo ni Jesucristo.
Pormal man ukon indi ang pagtawag sa imo bilang misyonero, gusto sang Ginuo nga imo ipaambit ang Iya ebanghelyo, kag para man sa imo ang madamo sa Iya mga pulong sa nauna nga mga misyonero sa sining dispensasyon. Samtang imo ginatun-an ang Doktrina kag mga Kasugtanan 30–36, isulat ang imo matun-an parte sa tawag nga magwali sang ebanghelyo. Pwede ka man nga maghimo sang listahan sang mga butang nga ginapangayo sang Ginuo sa Iya mga misyonero (halimbawa, tan-awa sa Doktrina kag mga Kasugtanan 30:8) kag sang isa pa ka lista sang mga butang nga ginapromisa sang Ginuo sa ila (halimbawa, tan-awa sa Doktrina kag mga Kasugtanan 30:11).
Paano ayhan makapaisog ining mga bersikulo sa imo kilala nga nagaserbe ukon nagahanda sa pagserbisyo sa misyon sang pagpanghaylo ukon pag-alagad sa Simbahan? Ano ang imo nabasa nga nagainspirar sa imo nga ipaambit ang ebanghelyo?
Tan-awa man sa Doktrina kag mga Kasugtanan 35:13–15
Tanan kita mga misyonero para sa Simbahan ni Jesucristo.
Doktrina kag mga Kasugtanan 31:1–2, 5–6, 9, 13
Mabuligan ako sang Ginuo sa akon mga kaangtanan sa pamilya.
Ang mga pamilya sang tinuig 1830 nagpangatubang sang madamo sa palareho nga mga isyu nga ginapangatubang sang mga pamilya sa karon nga panahon. Ano nga giya kag mga promisa ang ginhatag sang Ginuo kay Thomas B. Marsh parte sa iya pamilya? Paano makabulig sa imo ang Iya mga pulong sa imo mga kaangtanan sa pamilya?
Doktrina kag mga Kasugtanan 32; 35
Napaslawan bala ang misyon sa mga Lamanhon?
Sang si Oliver Cowdery, Peter Whitmer Jr., Parley P. Pratt, kag Ziba Peterson naglakat para magwali sa mga Amerikano nga Indiyan sa weste sang Missouri, nagpati sila nga ila ginatuman ang mga propesiya sa Libro ni Mormon parte sa mga Lamanhon nga nagabaton sang ebanghelyo sa ulihing mga adlaw (tan-awa halimbawa, sa 1 Nefi 13:34–41; Enos 1:11–18). Ugaling sa katapusan sang ila misyon, bisan pa nga manami ang ila pagpakig-angot sa pila ka mga grupo, wala sila sa gihapon sang nabunyagan nga bisan isa ka Amerikano nga Indiyan. Pero masobra isa ka gatos ang ila nabunyagan malapit sa Kirtland, Ohio, kon diin sila nagpundo sa dalanon sang Missouri. Lakip sa sinang mga hinaylo amo ang maimpluwensya nga mga lider sang Simbahan sang ulihi, lakip na si Sidney Rigdon, kag ang Kirtland sa ulihi nangin importante nga tilipunan para sa Simbahan. Ano ang ginatudlo sining eksperiyensya sa imo parte sa kon paano ginatuman sang Ginuo ang Iya buluhaton?
Doktrina kag mga Kasugtanan 33:12–18
Kon tukuron ko ang akon kabuhi sa ebanghelyo sang Manluluwas, indi ako matumba.
Ang Doktrina kag mga Kasugtanan 33 ginpatungod kanday Northrop Sweet kag Ezra Thayer, duha ka bag-o nga mga hinaylo. Nagbiya si Northrop sa Simbahan wala madugayi pagkatapos nga ginhatag ining rebelasyon. Si Ezra nagserbisyo sing matutom sing madugay-dugay gawa, pero sang ulihi nagtalikod man sia. Mahimo nga maayo ini nga oportunidad para takson kon ano ka gid kabakod nga natukod “sa bato” (bersikulo 13) sang ebanghelyo. Ano nga mga kamatuoran sa sining mga bersikulo ang makabulig sa imo nga magpabilin nga matinuohon sa Manluluwas?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Doktrina kag mga Kasugtanan 30:2.Kumusta ang inyo pamilya sa inyo pagtutok sa mga butang sang Dios imbes nga “sa mga butang sang kalibutan”?
-
Doktrina kag mga Kasugtanan 31.Samtang inyo ginabasa ang mga promisa sang Ginuo kay Thomas B. Marsh parte sa iya pamilya, pwede ninyo hambalan ang mga bugay nga nag-abot na sa inyo pamilya tungod sang pangmisyonaryo nga buluhaton. Mahimo man kamo nga magkanta sang nagakabagay nga himno, pareho sang “I’ll Go Where You Want Me to Go [Indi sa Kataas sang Bukid]” (Mga Himno kag mga Ambahanon sang Kabataan, no. 46–47). Paano ginbugayan ang inyo pamilya paagi sa pagpaambit sang ebanghelyo sa iban?
-
Doktrina kag mga Kasugtanan 33:7–10.Ano nga imahe ang gingamit sang Ginuo sa sining mga bersikulo para ilaragway ang pagpaambit sang ebangheyo? Ano pa ang iban nga mga imahe ukon pagpaangid nga madumduman sang inyo pamilya? Basi makabulig ining mga imahe sa imo pamilya nga makapamensar sang bag-o nga mga paagi sa pagpaambit sang ebanghelyo. Ang ining diskusyon mahimo nga magpadulong sa pagplano sa pagpaambit sang ebanghelyo. Pamensara ang pagdrama-drama sang posible nga mga sitwasyon.
-
Doktrina kag mga Kasugtanan 34:10.Magpili sang dinalan sa bersikulo 10, kag hagara ang isa ka miyembro sang pamilya nga ihutik ini. Dayon pakton ining dinalan sang iban nga mga miyembro sang pamilya. Dayon pangabaya ang isa ka miyembro sang pamilya nga ihambal sing todo ang dinalan. Paano nakabulig ining aktibidades nga maintiendihan naton kon ngaa ginasugo kita sang Ginuo nga “ibayaw ang imo tingug?”
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Mga Tingug sang Pagpanumbalik
Una nga mga Hinaylo (Converts)
Bisan antes pa nga gin-organisar ang Simbahan, nagsiling ang Ginuo, “Ang uma puti na para anihon” (Doktrina kag mga Kasugtanan 4:4). Napamatud-an ining pahayag sa binulan nga nagsunod, sang madamo sa mga nagapangita sang kamatuoran ang gingiyahan sang Espiritu sang Dios para makita ang ginpanumbalik nga Simbahan ni Jesucristo.
Madamo sining una nga mga hinaylo ang nangin instrumento sa pagpasad sang pundasyon sang Pagpanumbalik, kag ang ila mga istorya sang pagkahaylo malahalon para sa aton sa karon. Ang pagtuo nga ila ginpakita amo man ang pagtuo nga kinahanglan naton para mahaylo sa ebanghelyo ni Jesucristo.
Abigail Calkins Leonard
Sang si Abigail Calkins Leonard ara sa tunga-tunga dapit sang edad nga trayntahon, nakabatyag sia sang handum nga mapatawad sang iya mga sala. Panalagsa nagabasa sia sang Biblia, kag may mga tawo halin sa Kristiyano nga mga simbahan nga nagabisita sa iya, pero nagalibog ang iya ulo kon ano ang kinalain sang isa ka simbahan sa isa. “Isa ka aga,” siling niya, “Ginkuha ko ang akon Biblia kag nagkadto sa kakahuyan, kag nagluhod.” Nangamuyo sia sing hugot sa Ginuo. “Sa gilayon isa ka panan-awon ang nag-abot sa akon panulok,” siling niya, “kag ang lainlain nga mga sekta naglabay sing tag-isa-isa sa akon, kag isa ka tingug ang nagtawag sa akon, nga nagasiling: ‘Ini sila gintukod para sa kita.’ Dayon, sa unhan, may makita ako nga dako nga kasanag, kag may tingug halin sa ibabaw nga naghambal: ‘Magabangon ako sang isa ka katawhan, nga ikalipay ko ang pag-angkon kag pagbugay.’” Wala magdugay, nabatian ni Abigail ang parte sa Libro ni Mormon. Bisan nga wala pa sia sing kopya, ginpangayo niya nga “mahibal-an ang kamatuoran sining libro, paagi sa dulot kag gahum sang Balaan nga Espiritu,” kag iya “gilayon nga nabatyagan ang iya presensya.” Sang ulihi nga iya na nga nabasa ang Libro ni Mormon, sia “handa na sa pagbaton sini.” Sia kag ang iya bana, nga si Lyman, ginbunyagan sang 1831.1
Thomas B. Marsh
Sang si Thomas B. Marsh lamharon pa nga hamtong, gintun-an niya ang Biblia kag nangin miyembro sang isa ka Kristiyano nga simbahan. Pero wala sia makontento, nga sang ulihi nagpalayo sa tanan nga mga simbahan. “May diutay ako nga espiritu sang pagpropesiya,” siling niya, “kag ginhambalan [ang isa ka lider sang relihiyon] nga may ginapaabot ako nga bag-o nga simbahan nga magatuhaw, nga magadala sang kamatuoran nga puro.” Wala magdugay pagkatapos sini, may espirituhanon nga pagpabatyag si Thomas nga bayaan ang iya balay sa Boston, Massachusetts, kag magbiyahe pa-weste. Pagligad sang tatlo ka bulan nga pagtiner sa weste sang New York nga napaslawan nga makita ang iya ginapangita, nagbiyahe sia papuli. Sa dalan, may babayi nga namangkot kay Thomas kon bala nakabati na sia parte sa “Bulawan nga Libro nga nakita sang lamharon nga ang ngalan Joseph Smith.” Nakuha ang iya atensyon sang sining panghunahuna, gilayon si Thomas nga nagbiyahe pakadto sa Palmyra kag nakilala si Martin Harris sa imprintahan, sang ang una nga 16 ka mga pahina sang Libro ni Mormon manuggwa pa lang sa imprintahan. Ginpasugtan si Thomas nga magdala sang kopya sadtong 16 ka mga pahina, kag iya ini gindala pauli sa iya asawa, nga si Elizabeth. “Nalipay sia kaayo” sa libro, siling niya, “nga nagapati nga buhat ini sang Dios.” Si Thomas kag Elizabeth sang ulihi nagsaylo sa New York upod ang ila mga kabataan kag ginbunyagan.2 (Para sa dugang nga impormasyon parte kay Thomas B. Marsh, tan-awa sa Doktrina kag mga Kasugtanan 31.)
Parley kag Thankful Pratt
Pareho kay Thomas Marsh, sanday Parley kag Thankful Pratt nag-akto sa espirituhanon nga mga pagpabatyag nga bayaan ang ila mauswagon nga uma sa Ohio sa tuyo nga iwali ang ebanghelyo suno sa ila naintiendihan sa Biblia. Sa ginhambal ni Parley sa iya utod nga lalaki, “Ang epekto sining mga butang tama kabaskog sa akon kaisipan sining nagliligad nga indi ako makapahuway.”3 Sang pag-abot nila sa este sang New York, ginpabatyag si Parley nga magtiner anay sa lugar. Si Thankful, nadesisyunan nila, magapadayon nga wala sia. “May kinahanglan ako obrahon sa sining bahin sang pungsod,” siling ni Parley sa iya, “kon ano ini, ukon ano kalawig ini dapat obrahon, wala ako makahibalo; pero mapuli ako kon natapos na ini.”4 Didto ni Parley una nga nabatian ang parte sa Libro ni Mormon. “Nakabatyag ako sang pinasahi nga interes sa libro,” siling niya.5 Nagpangayo sia sang kopya kag nagbasa sa bilog nga gab-i. Pagkaaga, nahibal-an niya nga ang libro matuod, nga ginahatagan ini sing bili nga “labaw pa sangsa tanan nga manggad sa kalibutan.”6 Sa sulod sang pila ka adlaw ginbunyagan si Parley. Dayon nagbalik sia kay Thankful, nga ginbunyagan man. (Para sa dugang nga impormasyon parte kay Parley P. Pratt, tan-awa sa Doktrina kag mga Kasugtanan 32.)
Larawan ni Parley P. Pratt iya ni Jeffrey Hein
Sidney kag Phebe Rigdon
Samtang nagapanglakaton halin sa New York pakadto sa misyon sa Missouri, si Parley Pratt kag ang iya kaupod nga mga manugpangabudlay nagpundo sa Mentor, Ohio, sa balay nanday Sidney kag Phebe Rigdon—madugay na nga mga abyan ni Parley sang ara pa sia sa Ohio. Si Sidney isa ka Kristiyano nga ministro, kag si Parley isa sadto ka miyembro sang iya kongregasyon kag ginkabig sia nga espirituhanon nga manunudlo. Nalangkag nga gin-istorya ni Parley sa iya mga abyan ang parte sa Libro ni Mormon kag ang Pagpanumbalik sang ebanghelyo ni Jesucristo. Si Sidney mismo nagapangita sang pagpanumbalik sang matuod nga Simbahan nga iya natukiban ginlaragway sa Bag-ong Katipan, bisan pa nga nagaduda sia sa Libro ni Mormon sang primero. “Pero basahon ko ang imo nga libro,” siling niya sa iya abyan nga si Parley, “kag tinguhaan ko nga siguraduhon, kon bala rebelasyon ini halin sa Dios ukon indi.”7 Pagkatapos sang duha ka semana sang pagtuon kag pagpangamuyo, sia kag si Phebe pareho nga nakumbinsi nga ang libro matuod. Pero nahibal-an man ni Sidney nga ang pagsulod sa Simbahan mangin daku kaayo nga sakripisyo para sa iya pamilya. Sigurado gid nga mawad-an sia sing trabaho bilang ministro, upod ang iya sosyal nga estado sa ila komunidad. Samtang ginhambalan nila ni Phebe ang ini nga posibilidad, nagsiling si Phebe, “Ginpamensar ko na ang konsikwensya, kag … handum ko nga sundon ang pagbuot sang Dios, sa kabuhi man ukon sa kamatayon.”8
Go into the Wilderness [Maglakat sa Kamingawan], ni Robert T. Barrett