“Abril 12–18. Doktrina kag mga Kasugtanan 37–40: ‘Kon Indi Kamo Isa Indi Kamo Akon,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)
“Abril 12–18. Doktrina kag mga Kasugtanan 37–40,” Dali, Magsunod sa Akon—Para sa Mga Indibidwal kag Mga Pamilya: 2021
Saints Move to Kirtland [Mga Santos Nagsaylo sa Kirtland], ni Sam Lawlor
Abril 12–18
Doktrina kag mga Kasugtanan 37–40
“Kon Indi Kamo Isa Indi Kamo Akon”
Ang pagsulat sang mga panghunahuna samtang nagatuon isa ka paagi nga masunod mo ang laygay sang Dios nga “[huptan] ang kaalam” (Doctrine and Covenants 38:30).
Isulat Ang Imo Mga Panghunahuna
Para sa nauna nga mga Santos, ang Simbahan masobra pa sa lugar sa pagpamati sang pagpangwali kon Domingo. Sa tanan Niya nga rebelasyon kay Joseph Smith, ginlaragway sang Ginuo ang Simbahan sa mga tinaga nga kawsa, ginharian, Sion, kag, daw masami, buluhaton. Mahimo nga bahin ina sang nag-engganyo sa madamo nga nauna nga mga miyembro sa Simbahan. Bisan pa nga palangga nila ang ginpanumbalik nga doktrina sang Simbahan, madamo ang maluyag man nga may dedikaran sang ila mga kabuhi. Wala sapayan sini, ang sugo sang Ginuo sang 1830 nga magtipon ang mga Santos sa Ohio nangin indi madali para sa iban nga sundon. Para sa mga tawo nga pareho kay Phebe Carter, nagakahulugan ini sang pagbiya sang komportable nga mga puluy-an para sa indi pamilyar nga teritoryo (tan-awa sa “Mga Tingug sang Pagpanumbalik” sa katapusan sining outline). Sa karon maathag naton nga makita kon ano ang makita sang mga Santos gamit lamang ang ila pagtuo: may dalagko nga mga bugay ang Ginuo nga nagahulat sa ila sa Ohio.
Ang kakinahanglan nga magtipon sa Ohio madugay na nga nagligad, pero ang mga Santos sa karon padayon nga nagatipon sa pareho nga kawsa, sa pareho nga buluhaton: sa “pagpahanabo sang Sion” (Doktrina kag mga Kasugtanan 39:13). Pareho sadtong mga nauna nga mga Santos, ginatalikdan naton “ang mga kabalaka sa kalibutanon nga mga butang” (Doktrina kag mga Kasugtanan 40:2) tungod nagasalig kita sa promisa sang Ginuo: “Mabaton [ninyo] … ang pagpakamaayo nga tuman kadako nga wala pa [ninyo] matilawan” (Doktrina kag mga Kasugtanan 39:10).
Mga Ideya para sa Personal nga Pagtuon sang Balaan nga mga Kasulatan
Doktrina kag mga Kasugtanan 37:1
Ano ang ginalubad ni Joseph Smith sang 1830?
Sa sining bersikulo, ginatumod sang Ginuo ang buluhaton ni Joseph Smith sa inspirado nga rebisyon sang Biblia, nga ginatumod bilang “paglubad.” Sang mabaton ni Joseph ang rebelasyon nga nasulat sa seksyon 37, natapos na niya ang pila ka mga kapitulo sa libro sang Genesis kag bag-o lang nagtuon parte kay Enoc kag sa iya siyudad nga Sion (tan-awa sa Genesis 5:18–24; Moises 7). Pila sa mga prinsipyo nga gintudlo sang Ginuo kay Enoc pareho sa Iya ginpahayag sa seksyon 38.
Si Joseph Smith nagtrabaho upod kay Sidney Rigdon sa inspirado nga rebisyon sang Biblia. Ilustrasyon ni Annie Henrie Nader
Doktrina kag mga Kasugtanan 38
Ginatipon kita sang Dios para bugayan kita.
Gintapos sang Ginuo ang Iya sugo nga magtipon sa Ohio sa pagsiling, “Tan-awa, yari ang kaalam” (Doktrina kag mga Kasugtanan 37:4). Pero indi tanan nakakita dayon sang kaalam sa sini. Sa seksyon 38, ginpahayag sang Ginuo ang Iya kaalam sing mas detalyado. Ano ang imo matun-an sa bersikulo 11–33 parte sa mga bugay sang pagtipon? Wala na ginasugo ang mga miyembro sang Simbahan sa karon nga magtipon paagi sa pagsaylo sa isa ka lokasyon; ano ang mga paagi nga nagatipon kita sa karon? Paano magamit ang ining mga bugay sa aton?
Samtang imo ginabasa ang nabilin sining seksyon, pangitaa ang mga dinalan nga mahimo nagbulig sa mga Santos nga maangkon ang pagtuo nga ila kinahanglan para sundon ang kasuguan sang Dios nga magtipon sa Ohio. Pamensara man ang mga kasuguan nga Iya ginhatag sa imo kag ang pagtuo nga imo kinahanglan para sundon ang mga ini. Ang masunod nga mga pamangkot mahimo nga makagiya sa imo pagtuon:
-
Ano ang imo makita sa mga bersikulo 1–4 nga nagahatag sa imo sang pagsalig sa Ginuo kag sa Iya mga kasuguan?
-
Paano makabulig sa imo ang bersikulo 39 nga tumanon ang mga kasuguan sang Dios kada adlaw bisan pa nga nagapangayo ini sang sakripisyo?
Ano pa gid ang imo makita?
Doktrina kag mga Kasugtanan 38:11–13, 22–32, 41–42
Kon ako handa, indi ko kinahanglan magkahadlok.
Nagapangatubang na nga daan ang mga Santos sang dako nga oposisyon, kag nakahibalo ang Ginuo nga madamo pa ang magaabot (tan-awa sa Doktrina kag mga Kasugtanan 38:11–13, 28–29). Para buligan sila nga indi mahadlok, ginpahayag Niya ang isa ka malahalon nga prinsipyo: “Kon handa kamo indi kamo mahadlok” (Doktrina kag mga Kasugtanan 38:30). Hatagi sang isa ka minuto para binagbinagon ang mga kabudlayan nga imo ginaatubang. Dayon samtang imo ginatun-an ang seksyon 38, magpamati sa mga pagpabatyag sang Espiritu kon paano ka maghanda para sa mga hangkat agud indi mo kinahanglan nga mahadlok.
Doktrina kag mga Kasugtanan 39–40
Ang mga kabalaka sa kalibutanon nga mga butang indi dapat magtublag sa akon sa pagtuman sang pulong sang Dios.
Basaha ang mga seksyon 39–40, lakip na ang kasaysayan sini sa mga tig-ulo sang seksyon, kag pamensara kon paano ayhan magamit ang eksperiyensya ni James Covel sa imo. Halimbawa, hunahunaa ang tinion sang ang imo “tagipusuon … nangin matarong sa panulok sang [Dios]” (Doktrina kag mga Kasugtanan 40:1). Paano ka ginbugayan tungod sang imo pagkamatinuohon? Hunahunaa man kon ano nga “mga kabalaka sa kalibutanon nga mga butang” ang imo ginaatubang (Doktrina kag mga Kasugtanan 39:9; 40:2). Ano ang imo nakita sa sining mga seksyon nga nakainspirar sa imo nga mas mangin sige-sige nga matinumanon?
Tan-awa man sa Mateo 13:3–23.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Doktrina kag mga Kasugtanan 37:3.Para buligan ang imo pamilya nga maintiendihan ang sakripisyo nga ginhimo sang mga Santos para magtipon sa Ohio, pwede mo gamiton ang mapa nga kaupod sining outline.
-
Doktrina kag mga Kasugtanan 38:22Paano naton himuon si Jesucristo nga “manughatag sang kasugoan” sa aton pamilya? Paano kita ginahimo nga “hilway nga katawhan” sang pagsunod sang Iya mga kasuguan?
-
Doktrina kag mga Kasugtanan 38:24–27.Para tudloan ang mga kabataan kon ano ang buot silingon sang “mangin isa,” pwede mo sila buligan nga isipon ang mga miyembro sang inyo pamilya kag hambalan kon ngaa importante ang kada tawo sa inyo pamilya. Ipatalupangod nga ululupod isa kamo ka pamilya. Pwede mo buligan ang imo kabataan nga magdrowing sang dako nga 1 sa poster kag dekorahan ini sang mga ngalan kag mga drowing ukon mga litrato sang kada miyembro sang pamilya. Pwede man ninyo isulat sa poster ang mga butang nga inyo himuon para mas mangin isa bilang pamilya. Pwede man ninyo basahon ang Moises 7:18.
-
Doktrina kag mga Kasugtanan 38:29–30.Pwede ninyo hambalan ang mga eksperiyensya sa pamilya ukon sa personal sang sini lang nga nagakinahanglan sang pagpanghanda. Paano naapektuhan sang imo pagpanghanda ang ina nga eksperiyensya? Ano ang gusto sang Ginuo nga aton handaan? Paano ang pagkahanda makabulig sa aton nga indi magkahadlok? Ano ang pwede naton himuon para maghanda?
-
Doktrina kag mga Kasugtanan 40.Ano ang kahulugan sang dinalan nga “mga kabalaka sa kalibutanon nga mga butang” (bersikulo 2) sa aton? May mga kabalaka bala sa kalibutanon nga mga butang nga nagatublag sa aton sa pagbaton sang pulong sang Dios “sing malipayon”? Paano naton ini malampuwasan?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Mga Tingug sang Pagpanumbalik
Pagtipon sa Ohio
Kirtland Village [Baryo sa Kirtland], ni Al Rounds
Phebe Carter
Upod sa madamo nga mga Santos nga nagtipon sa Ohio sang tinuig sang 1830 amo si Phebe Carter. Nagsulod sia sa Simbahan sa naaminhan-nasidlangan nga Estados Unidos sang mga baynte-singko anyos sia, bisan pa nga wala mag-upod ang iya mga ginikanan. Sang ulihi nagsulat sia parte sa iya desisyon nga magsaylo sa Ohio para makig-isa sa mga Santos:
“Nakibot gid ang akon mga abyan sa akon desisyon, pareho man sa akon, pero daw may nagatulod sa akon nga himuon ko ini. Daw indi ko masarangan ang kalisod sang akon iloy sa akon pagbiya sa balay; kag kon indi tungod sa espiritu sa sulod ko nanalaw na kuntani ako kag wala magdayon. Siling sang akon iloy nga mas gustuhon pa niya nga makita ako nga ilubong sangsa maglakat nga nagaisahanon sa wala sing kaluoy nga kalibutan.
“‘[Phebe],’ siling niya, nga nagapang-engganyo, ‘magpuli ka bala sa akon kon matukiban mo nga ang Mormonismo indi matuod?’
“Sabat ko, ‘huo, nanay; mapuli ako.’ … Naghagan-hagan ang iya pamatyag sa akon sabat; pero grabe gid ang amon kasubo sa amon pagbulagay. Sang mag-abot na ang oras nga malakat na ako wala gid ako magtilaw nga magpaalam sa personal; gani ginsulat ko ang akon pagpaalam sa kada isa, kag ginbilin ko lang ini sa lamesa, nagdalagan panaog kag naglumpat sakay sa karosa. Sa amo sini ko ginbayaan ang pinalangga ko nga puluy-an sang akon pagkabata para iangot ang akon kabuhi sa mga santos sang Dios.”1
Sa isa sinang mga mensahe sang pagpaalam, ginsulat ni Phebe:
“Pinalangga kong mga Ginikanan—manuglakat na ako para bayaan sing makadali ang puluy-an nga akon gindak-an … wala ako makahibalo kon ano kalawig—pero puno ang balatyagon ko sang pagpasalamat sa kaayo nga akon nabaton halin sa pagkalapsag tubtob sa karon nga tinion—pero daw mas ginasugo na gid subong sang Makaako sangsa sang una. Itugyan naton ini tanan sa mga kamot sang Makaako kag magpasalamat nga gintugtan kita nga magpuyo sing ululupod sa malawig nga panahon sa maayo nga sirkumstansya nga ara sa aton karon, nga nagapati nga ang tanan nga butang mangin para sa aton kaayohan kon palanggaon naton ang Dios una sa tanan. Panumdumon naton nga sarang kita nga magpangamuyo sa isa ka Dios nga nagapamati sa sinsero nga mga pangamuyo sang tanan niya nga tinuga kag hatagan kita sinang pinakamaayo para sa aton. …
“Nanay, nagapati ako nga pagbuot sang Dios nga makadto ako sa weste kag kumbinsido na ako sa sini sa madugay na nga panahon. Karon posible na ako nga maglakat … ; nagapati ako nga ginhimo ini sang espiritu sang Ginuo nga nagakaigo para sa tanan nga butang. O, indi ka magkabalaka sa imo anak; pasulhayon ako sang Ginuo. Nagapati ako nga atipanon ako sang Ginuo kag hatagan sinang makapaayo gid sa akon. … Malakat ako tungod ginatawag na ako sang akon Agalon—gin-athag na niya sa akon ang akon tulumanon.”2
