Abril 19–25

Doktrina kag mga Kasugtanan 41–44

“Ang Akon Layi nga Magadumala sang Akon Simbahan”

“Kon magpangayo ka,” ginpromisa sang Ginuo, “makabaton ka sang rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61). Ano nga mga pamangkot ang pwede mo ipamangkot para makabaton sang rebelasyon nga imo kinahanglan?

Isulat Ang Imo Mga Panghunahuna

Ang madasig nga pagtubo sang Simbahan sang 1830 kag 1831—labi na gid sa pagsinulod sang bag-o nga mga hinaylo nga nagaalabot sa Kirtland, Ohio—makakulunyag kag nagapapagsik sa mga Santos. Pero naghatag man ini sang pila ka mga kabudlayan. Paano mo isahon ang madasig nga nagadamo nga grupo sang mga tumuluo, labi na gid kon dala nila ang ila doktrina kag mga pangginawi sa daan nila nga mga pagtuluohan? Halimbawa, pag-abot ni Joseph Smith sa Kirtland sang temprano pa sang Pebrero 1831, nakita niya ang bag-o nga mga miyembro nga nagagamit sang komon nga propiyedad sa tunay nga pagtinguha nga sundon ang mga Kristiyano sa Bag-ong Katipan (tan-awa sa Mga Binuhatan 4:32–37). Naghimo ang Ginuo sang pila ka importante nga mga paghusto kag pagklaro sa sini kag sa iban pa nga mga topiko, kalabanan paagi sa rebelasyon nga nasulat sa Doktrina kag mga Kasugtanan 42, nga Iya gintawag “ang akon layi nga magadumala sang akon simbahan” (bersikulo 59). Sa sining rebelasyon, matun-an naton ang mga kamatuoran nga pundasyon sa pagtukod sang Simbahan sang Ginuo sa ulihing mga adlaw, lakip na ang dako nga promisa nga nagaathag nga madamo pirme ang matun-an: “Kon magpangayo ka, makabaton ka sang rebelasyon dugang sa rebelasyon, ihibalo dugang sa ihibalo” (Doktrina kag mga Kasugtanan 42:61).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 41

“Sia nga nagabaton sang akon layi kag nagatuman sini, ang amo man akon disipulo.”

Sang umpisa sang 1831, nagsugod na ang mga Santos nga magtipon sa Ohio, nga nalangkag sa pagbaton sang layi nga ginpromisa sang Dios nga ipahayag didto (tan-awa sa Doktrina kag mga Kasugtanan 38:32). Pero antes sini, ginpakita sang Ginuo kon paano dapat ang Iya mga disipulo mag-handa sa pagbaton sang Iya layi. Ano nga mga prinsipyo ang imo makita sa mga bersikulo 1–5 nga nakabulig kuntani sa mga Santos sa pagbaton sang layi sang Dios? Paano ayhan makabulig ining mga prinsipyo sa imo sa pagbaton sang panulin halin sa Iya?

Doktrina kag mga Kasugtanan 42

Ang mga layi sang Dios nagadumala sa Iya Simbahan kag mahimo nga magdumala sa aton mga kabuhi.

Ginkabig sang mga Santos ang rebelasyon nga makita sa Doktrina kag mga Kasugtanan 42:1–72 nga isa sa pinakaimportante nga nabaton sang Propeta. Upod ini sa mga una nga gin-imprinta, nga ginpagwa sa duha ka peryodiko sa Ohio, kag nakilala lamang ini bilang “ang layi.” Madamo sa mga prinsipyo sa sining seksyon ang ginpahayag na sang Ginuo sadto. Bisan nga wala ginlakip sa sining seksyon ang tanan nga kasuguan nga gusto sang Ginuo nga sundon sang Iya mga Santos, may kapuslanan ang pagbinagbinag kon ngaa importante nga suliton ang mga ini sa bag-o lang ginpanumbalik nga Simbahan.

Basi makabulig sa imo nga basahon ang seksyon 42 sa magagmay nga mga bahin pareho sa masunod kag kilalahon ang mga prinsipyo nga gintudlo sa kada isa. Samtang nagabasa ka, pamensara kon paano ining layi sa paggiya sang Simbahan makabulig sa imo sa paggiya sang imo personal nga kabuhi.

Mga bersikulo 4–9, 11–17, 56–58 

Mga bersikulo 18–29 

Mga bersikulo 30–31 

Mga bersikulo 40–42 

Mga bersikulo 43–52 

Tan-awa man sa 3 Nefi 15:9.

Doktrina kag mga Kasugtanan 42:30–42

Paano sang mga Santos “[ginkonsagrar] ang [ila] mga pagkabutang” para suportahan ang mga imol?

Isa ka importante nga bahin sang layi nga ginpahayag sa seksyon 42 amo ang ginkilala bilang ang layi sang pagkonsagrar kag pagkatulugyanan. Gintudloan sining layi ang mga Santos kon paano nila, pareho sa mga sumulunod ni Cristo sang una, mahimo ang “tanan nga mga butang kabilugan” (Mga Binuhatan 2:44; 4 Nefi 1:3), nga “wala sang imol sa tunga nila” (Moises 7:18). Ginkonsagrar sang mga Santos ang ila propiyedad paagi sa paghatag sini sa Ginuo, paagi sa obispo (tan-awa sa Doktrina kag mga Kasugtanan 42:30–31). Ginabalik sang obispo sa ila ang kinahanglanon nila (tan-awa sa bersikulo 32)—masami kon ano ang ila ginkonsagrar kag masobra pa. Ginadonar sang mga miyembro ang sobra nila para buligan ang imol (tan-awa sa mga bersikulo 33–34). Nangin dako nga bugay ang ining layi sa mga Santos, labi na gid sa mga nagbiya sang tanan para mag-upod sa Ohio. Maalwan ang madamo nga Santos sa ila mga donasyon.

Bisan pa nga lain ang paghimo naton sini sa karon, sa gihapon ang mga Santos sa Ulihing mga Adlaw nagapangabuhi sang layi sang pagkonsagrar. Samtang imo ginabasa ang Doktrina kag mga Kasugtanan 42:30–42, binagbinaga kon paano mo ikonsagrar ang ginhatag sang Dios sa imo sa pagtukod sang Iya ginharian kag sa pagbugay sa mga nagakinahanglan.

Christ and the Rich Young Ruler [Si Cristo kag ang Manggaranon nga Manugdumala nga Pamatan-on], ni Heinrich Hofmann

Doktrina kag mga Kasugtanan 42:61, 65–68; 43:1–16

Ang Dios nagahatag sang rebelasyon para giyahan ang Iya Simbahan.

Pamensara nga nagaistoryahanay kamo sang bag-o nga miyembro sang Simbahan nga nalangkag sa paghibalo nga ang Simbahan ginagiyahan paagi sa rebelasyon. Paano mo gamiton ang Doktrina kag mga Kasugtanan 43:1–16 para ipaathag sa iya ang sulundan sang Ginuo sa paggiya sang Iya Simbahan paagi sa Iya propeta? Paano mo gamiton ang Doktrina kag mga Kasugtanan 42:61, 65–68 sa pagtudlo parte sa pagbaton sang personal nga rebelasyon?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 41:1–5.Ano ang pila sa mga halimbawa sang sibil nga mga layi, kag paano kita mabenepisyohan sinang mga layi? Paano kita ginabugayan sang mga layi ukon kasuguan sang Amay nga Langitnon? Pwede nga drowingon sang mga miyembro sang pamilya ang ila kaugalingon nga nagatuman sang mga layi sang Dios.

Doktrina kag mga Kasugtanan 42:45, 88.Ano ayhan ang makabulig sa inyo pamilya nga “magpangabuhi sing ululupod nga nagapalangganay”? (tan-awa man sa Mosias 4:14–15). Pamensara ang pagsulat ukon paghambal sang positibo nga mga butang parte sa kada isa ukon pagkanta sang himno parte sa paghigugma sa sulod sang pamilya, pareho sang “Gugma sa Balay” (Mga Himno kag mga Ambahanon sang Kabataan no. 44).

Doktrina kag mga Kasugtanan 42:61Basi pwede ninyo basahon ining bersikulo samtang nagaobra sang puzzle sing ululupod. Gamita ining puzzle sa pagtudlo kon paano ginapahayag sang Dios ang Iya mga misteryo—“rebelasyon dugang sa rebelasyon, ihibalo dugang sa ihibalo.” Mahimo nga iistorya sang mga miyembro sang pamilya kon paano ginpahayag sang Dios ang kamatuoran sa ila sing amat-amat.

Doktrina kag mga Kasugtanan 43:25.Basi may pwede gamiton ang inyo pamilya para maghimo sang mga tunog sang daguob bilang paagi sa pagbukas sang diskusyon parte sa bersikulo 25. Sa ano nangin “tingug sang mga daguob” ang tingug sang Ginuo? Ululupod nga pangitaa sa bersikulo ang mga paagi nga mahimo tawgon kita sang Ginuo sa paghinulsol. Paano naton mas mabatian ang tingug sang Ginuo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magpatubo sang mapinalanggaon nga palibot. Ang balatyagon kag pagtratar sang mga miyembro sang pamilya sa kada isa makaimpluwensya sang espiritu sa inyo puluy-an. Buligi ang tanan nga miyembro sang pamilya nga himuon ang ila bahin agud magtukod sang mapinalanggaon, matinahuron nga puluy-an para ang tanan makabatyag nga hilway sa pagpaambit sang mga eksperiyensya, mga pamangkot, kag mga testimonya. (Tan-awa sa Teaching in the Savior’s Way, 15.)

Joseph Smith Preaching in Nauvoo [Si Joseph Smith nga Nagawali sa Nauvoo], ni Sam Lawlor