Abril 26–Mayo 2

Doktrina kag mga Kasugtanan 45

“Ang mga Promisa … Matuman”

Si Pangulong Russell M. Nelson nagtudlo: “Isulat ang mga panghunahuna nga nagaabot sa imo kaisipan. Isulat ang imo mga balatyagon kag updi ini sang mga aksyon nga ginapabatyag sa imo nga imo himuon” (“Revelation for the Church, Revelation for Our Lives,” Ensign ukon Liahona, Mayo 2018, 95).

Isulat Ang Imo Mga Panghunahuna

Nagakabuhi kita sa peligroso nga panahon, kag makatulublag ini. Bisan ang mga disipulo ni Jesus, sang mabatian nila Sia nga nagapropesiya parte sa mga kalamidad nga magaabot sa aton panahon, “nagkabalaka” (Doktrina kag mga Kasugtanan 45:34). Ang una nga mga Santos sa Kirtland, Ohio, nagkabalaka man sa kapeligroso sang panahon nga sila nagakabuhi. Upod sa iban pa nga mga butang, may “madamo nga sayop nga mga balita … kag binuang nga mga sugilanon” nga nagapahuyang sa mensahe sang ebanghelyo (Doktrina kag mga Kasugtanan 45, tig-ulo sang seksyon). Pero ang sabat sang Ginuo, sadto kag sa karon, amo ang “indi magkabalaka” (bersikulo 35). Huo, may ara sang kalainan, pero may ebidensya man nga ang Ginuo nagapadasig sang Iya buluhaton. Huo, may mga peligro nga ginsiling na nga daan nga magauna sa Ikaduhang Pagkari, kag dapat nakahibalo kita sa mga ini. Pero indi lamang ini mga paandam batok sa katalagman; mga tanda man ini nga ang mga promisa sang Dios malapit na nga matuman. Siguro amo ini kon ngaa ang Doktrina kag mga Kasugtanan 45—ang rebelasyon nga nagalaragway sang madamo sining mga tanda sing mas detalyado—ginbaton “sa kalipay sang mga Santos” (tig-ulo sang seksyon).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 45:1–5

Si Jesucristo amo ang aton Mananabang sa Amay.

Nakabatyag ka na bala nga kulabos ukon indi bagay sa atubang sang Dios? Mahimo nga makakita ka sang pagpasalig sa Doktrina kag mga Kasugtanan 45:1–5. Ano ang ginapahangop sa imo sang mga tinaga nga “mananabang” kag “nagapangapin”? Paano nagapanabang ang Manluluwas para sa imo, ukon nagapangapin sang imo kawsa? Ano ang kahulugan sa imo sang paghibalo nga si Cristo ang imo Mananabang?

Ang masunod nga mga pulong ni Pangulong Joseph Fielding Smith makabulig sa imo sa pagbinagbinag sining mga bersikulo: “Si Jesus [amo] ang aton mananabang, nga nagapangapin sa aton bilang aton tagpatunga paagi sa iya pag-alagad kag pagpangabudlay nga makapakig-uli kita, nga madala kita sa pagpakighisugot sa Dios” (sa Conference Report, Okt. 1953, 58).

Tan-awa man sa 2 Nefi 2:8–9; Mosias 15:7–9; Moroni 7:27–28; Doktrina kag mga Kasugtanan 29:5; 62:1.

Doktrina kag mga Kasugtanan 45:9–10

Ang ebanghelyo amo ang pagsulundan sang mga nasyon.

Sang una, ang pagsulundan amo ang hayahay ukon bandera nga ginadala sa giyera. Ginatipon kag ginaisa sini ang mga soldado kag ginabuligan sila sa paghibalo kon diin sila magtipon kag kon ano ang buhaton. Ang pagsulundan isa man ka halimbawa ukon patakaran kon sa diin ginatakos ang iban pa nga mga butang. Samtang imo ginabasa ang Doktrina kag mga Kasugtanan 45:9–10, binagbinaga kon paano nangin pagsulundan sa imo ang mga kasugtanan sa ebanghelyo. Ano ang mangin kinalain sa imo kabuhi kon wala ka sining mga kasugtanan?

Tan-awa man sa Isaias 5:26; 11:10–12; Doktrina kag mga Kasugtanan 115:5–6.

Doktrina kag mga Kasugtanan 45:11–75

Ang mga promisa sang Ginuo matuman.

Ang inaway, kalainan, kag kalaglagan magauna sa Ikaduhang Pagkari sang Manluluwas. Pero “indi magkabalaka,” siling sang Ginuo, “kay kon ining tanan nga butang matabo, mahibaloan ninyo nga ang mga promisa nga ginhimo sa inyo matuman” (Doktrina kag mga Kasugtanan 45:35).

Samtang imo ginatun-an ang Doktrina kag mga Kasugtanan 45:11–75, pamensara ang pagtutok indi lang sa makatulublag nga mga hitabo nga ginpropesiya kundi sa mga bugay man nga ginpromisa sang Ginuo (halimbawa, ang mga promisa sa mga bersikulo 54–59 parte sa paghari sang Manluluwas sa milenya). Mahimo mo ini paagi sa paglista ukon pag-ngalan ukon pagmarka sang mga bersikulo. Ano ang imo makita nga nagabulig sa imo nga “indi magkabalaka” parte sa ulihing mga adlaw?

Doktrina kag mga Kasugtanan 45:31–32, 56–57

“[Magtindog] sa balaan nga mga lugar,” kag indi maisdog.

Isa sa mga rason nga ang Manluluwas kag ang Iya mga propeta nagatudlo sa aton parte sa mga tanda sang Ikaduhang Pagkari amo nga buligan kita sa paghanda. Ano ang imo matun-am sa Doktrina kag mga Kasugtanan 45:31–32, 56–57 parte sa paghanda para sa Ikaduhang Pagkari sang Ginuo? Mahimo nga makabulig ang pagrebyu sang paanggid sang pulo ka mga ulay, nga makita sa Mateo 25:1–13. Ginkumparar sang Manluluwas ang lana sa sining paanggid sa kamatuoran kag sa Balaan nga Espiritu (tan-awa sa Doktrina kag mga Kasugtanan 45:57). Ano nga mga panghunahuna ang imo mabaton kon basahon mo ang paanggid sa sini nga paagi?

Parable of the Ten Virgins [Ang Paanggid Nahanungod sa Napulo ka Ulay], ni Dan Burr

Doktrina kag mga Kasugtanan 45:11–15, 66–71

Ang Sion isa ka lugar nga hilway sa katalagman para sa mga Santos sang Dios.

Ang mga Santos sa tiyempo ni Joseph Smith nalangkag sa pagtukod sang Sion, Ang Bag-ong Jerusalem, nga ginlaragway sa Libro ni Mormon (tan-awa sa Eter 13:2–9) kag sa inspirado nga rebisyon ni Joseph Smith sang Biblia (tan-awa sa Moises 7:62–64). Ano ang imo matun-an parte sa Sion—sa daan nga siyudad sang panahon ni Enoc kag sa siyudad sa ulihing adlaw—sa Doktrina kag mga Kasugtanan 45:11–15, 66–71?

Sa karon ang sugo nga itukod ang Sion nagatumod sa pagtukod sang ginharian sang Dios sa bisan diin man kita nagapuyo—kon diin ang mga anak sang Dios nagatipon nga hilway sa Iya “wala’y katapusan nga kasugtanan” (bersikulo 9). Ano ang pwede mo himuon para makabulig sa pagtukod sang Sion kon sa diin ka man?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 45:3–5.Ano ang ginahimo sang mananabang para sa aton? Istoryahi ninyo kon ngaa ginatawag ang Manluluwas nga aton Mananabang.

Doktrina kag mga Kasugtanan 45:9–10.Kon ang inyo pamilya may “pagsulundan,” ukon bandera, nga magarepresentar sang inyo pangako sa ebanghelyo, daw ano ayhan ini tulukon? Mahimo nga mangin masadya ang paghimo sang bandera sang pamilya sing ululupod kag hambalan kon paano ninyo buligan ang iban nga magsunod sa mga sulundan sang ebanghelyo.

Doktrina kag mga Kasugtanan 45:32.Ano ang aton “balaan nga mga lugar”? Ano ang kahulugan sang “indi maisdog”? Paano naton himuon ang aton balay nga balaan nga lugar?

Doktrina kag mga Kasugtanan 45:39–44.Paano mo buligan ang mga miyembro sang imo pamilya nga maintiendihan kon ano ang kahulugan sang magbantay sa Ikaduhang Pagkari sang Manluluwas? Basi pwede ka magpamensar sang hitabo nga inyo ginapaabot kag istoryahan ang mga paagi nga inyo “ginabantayan” ang ina nga hitabo. Ukon pwede kamo nga magluto sang isa ka kalan-unon kag bantayan ang mga palatandaan nga pwede na ini kaunon. Ano ang aton ginahimo para bantayan ang Ikaduhang Pagkari sang Manluluwas?

Doktrina kag mga Kasugtanan 45:55.Ang pagbasa sang 1 Nefi 22:26 kag Bugna 20:1–3 makabulig sa imo pamilya nga maintiendihan kon paano si Satanas “mawad-an sing gahum” sa tion sang Milenya. Paano naton gapuson si Satanas sa aton kabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Redeemer of Israel [Manunubos sang Israel],” Mga Himno kag mga Ambahanon sang Kabataan, 82–83; tan-awa man sa Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan.”

Pagpauswag sang Personal nga Pagtuon

Maggamit sang mga bulig sa pagtuon.  

The Coming of Christ [Ang Pag-abot ni Cristo], ni Jubal Aviles Saenz