Mayo 10–16

Doktrina kag mga Kasugtanan 49–50

“Inang Halin sa Dios Kasanag”

“Sia nga nagabaton sang kasanag, kag nagapabilin nga tampad kag matinumanon sa Dios, nagabaton sing dugang nga kasanag; kag ang ina nga kasanag nagasilak nga nagasilak tubtob nga mag-abot ang perpekto nga adlaw” (Doktrina kag mga Kasugtanan 50:24). Binagbinaga kon paano ka nagabaton sang kasanag paagi sa pagpadayon sa Dios.

Isulat Ang Imo Mga Panghunahuna

Ang Manluluwas amo ang aton “maayong manugpahalab” (Doktrina kag mga Kasugtanan 50:44). Nahibal-an Niya nga kon kaisa nagatalang ang mga karnero kag ang kamingawan madamo sang peligro. Gani mapinalanggaon Niya kita nga ginabalik sa kahilwayan sang Iya doktrina, nga malayo sa mga peligro pareho sang “malain nga mga espiritu, nga nagalibot sa duta, nga ginapatalang ang kalibutan” (Doktrina kag mga Kasugtanan 50:2). Ang pagsunod sa Iya masami nga nagakahulugan sang pagbuya sa indi husto nga mga ideya ukon tradisyon. Nangin matuod ini para kay Leman Copley kag sa iban pa sa Ohio nga nagbaton sang ginpanumbalik nga ebanghelyo pero nagsige lang gihapon sa mga pagpati nga indi gid husto. Sa Doktrina kag mga Kasugtanan 49, ginhambal sang Ginuo ang mga kamatuoran nga nagtadlong sang daan na nga ginapatihan ni Leman parte sa mga topiko pareho sang kasal kag sa Ikaduhang Pagkari sang Manluluwas. Kag sang ang mga hinaylo sa Ohio “nagbaton … sang mga espiritu nga indi [nila] mahangpan,” gintudloan sila sang Ginuo kon paano kilalahon ang matuod-tuod nga pagpahayag sang espiritu (Doktrina kag mga Kasugtanan 50:15). Ang Maayong Manugpahalab pasensyoso; nahibal-an Niya nga ang ining unang mga Santos—pareho sa aton tanan—“magagmay nga kabataan” nga “kinahanglan magtubo sa grasya kag sa ihibalo sang kamatuoran” (Doktrina kag mga Kasugtanan 50:40).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 49:5–23

Ang mga kamatuoran sang ebanghelyo makabulig sa akon nga makilala ang indi husto nga mga panudlo.

Antes magsulod sa Simbahan, si Leman Copley nangin bahin sang relihiyoso nga grupo nga ginkilala nga United Society of Believers in Christ’s Second Appearing [Nagaisang Katilingban sang mga Tumuluo sa Ika-duha nga Pagpakita ni Cristo], nga ginkilala man nga Shaker. Pagkatapos sang pahambalanay upod kay Leman, nagpangayo sang pagklaro si Joseph Smith halin sa Ginuo parte sa pila ka mga pinanudlo sa Shaker, kag nagsabat ang Ginuo paagi sa rebelasyon sa seksyon 49.

Makita mo ang pila sa mga ginapatihan sang mga Shaker nga ginmitlang sa tig-ulo sang seksyon 49. Pamensara nga markahan ukon tandaan ang mga kamatuoran sa mga bersikulo 5–23 nga nagatadlong sinang mga pagtuluohan. Pamensara ang iban pa nga indi husto nga pinanudlo ukon mga tradisyon sa kalibutan sa karon. Ano nga mga kamatuoran sang ebanghelyo ang makabulig sa imo nga amligan ang imo kaugalingon batok sa mga ini?

Doktrina kag mga Kasugtanan 49:15–17

Ang pag-asawahay sa tunga sang lalaki kag babayi importante sa plano sang Dios.

Ano nga mga kamatuoran parte sa pag-asawahay ang imo matun-an sa Doktrina kag mga Kasugtanan 49:15–17? Ngaa nga nabatyagan mo nga ang pag-asawahay sa tunga sang lalaki kag babayi importante sa plano sang Amay nga Langitnon? Naghatag si Elder David A. Bednar sang duha ka rason: “Rason 1: Ang kinaugali sang lalaki kag babayi nga mga espiritu nagakompleto kag nagaperpekto sa isa kag isa, kag gani ang mga lalaki kag babayi gintuyo nga magprogreso sing ululupod padulong sa pagkahitaas. … Rason 2: Sa diosnon nga disenyo, ang pareho nga lalaki kag babayi kinahanglanon sa pagdala sang mga anak sa kalibutan kag sa paghatag sang pinakamaayo nga kahimtangan sa pagpadako kag pag-atipan sang kabataan” (“Marriage Is Essential to His Eternal Plan,” Ensign, Hunyo 2006, 83–84).

Tan-awa man sa Genesis 2:20–24; 1 Mga Taga-Corinto 11:11; “Ang Panimalay: Isa ka Proklamasyon sa Kalibutan,” Ensign ukon Liahona, Mayo 2017, 145.

Ang kasal sa tunga sang lalaki kag babayi gin-ordin sang Dios.

Doktrina kag mga Kasugtanan 50

Ang mga pinanudlo sang Ginuo makaamlig sa akon batok sa mga pagpang-into ni Satanas.

Ang mga bag-ong hinaylo sa Ohio nalangkag sa pagbaton sang espirituhanon nga mga pagpahayag nga ginpromisa sa balaan nga mga kasulatan, pero si Satanas nalangkag man sa pag-into sa ila. Nagapanghunahuna sila, Kon may nagasinggit ukon nagakalipong, impluwensya bala ini sang Espiritu?

Pamensara nga ginpangabay ka nga buligan ining bag-o nga mga hinaylo nga maintiendihan kon paano kilalahon ang matuod nga mga pagpahayag sang Balaan nga Espiritu kag likawan ang maintuan sang mga imitasyon ni Satanas. Ano nga mga prinsipyo ang imo makita sa Doktrina kag mga Kasugtanan 50 nga pwede mo ipaambit? (tan-awa ilabi na gid sa mga bersikulo 22–25, 29–34, 40–46).

Tan-awa man sa 2 Timoteo 3:13–17.

Doktrina kag mga Kasugtanan 50:13–24

Ang mga manunudlo kag mga nagatuon pareho nga napalig-on sang Espiritu.

Isa ka paagi nga pwede mo tun-an ang Doktrina kag mga Kasugtanan 50:13–24 amo ang pagdrowing sang litrato sang titser kag estudyante kag, sa tupad sang kada isa, maglista sang mga tinaga kag mga dinalan sa sining mga bersikulo nga nagatudlo sa imo parte sa pagtuon kag pagtudlo sang ebanghelyo. Sang san-o ka nakaangkon sang mga eksperiyensya nga nagatudlo sa imo sang importansya sang Espiritu sa pagtudlo kag pagtuon? Pamensara kon ano ang imo himuon para pauswagon ang imo mga pagpaninguha bilang manugtuon kag manunudlo sang ebanghelyo.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 49:2.Ano ang buot silingon sang “luyag mahibaloan ang kamatuoran apang bahin lamang kag indi ang tanan”? Basi pwede ka magpakita sang litrato nga gintabunan ang isa ka parte kag ipapakot ini sa mga miyembro sang pamilya. Ano ang matabo kon batunon naton ang bahin lamang sang kamatuoran? (tan-awa sa 2 Nefi 28:29). Paano nangin bugay sa aton ang kabug-osan sang ebanghelyo?

Doktrina kag mga Kasugtanan 49:26–28.Paano kita ginbugayan sang promisa sang Ginuo nga “Magauna ako sa inyo kag mangin yara sa ulihi ninyo; kag yara ako sa tunga ninyo”? Pwede nga mag-istorya ang mga miyembro sang pamilya sang nabatyagan nila ang Ginuo nga “nagauna sa [ila]” ukon nabatyagan nga Sia “yara sa tunga [nila].”

Doktrina kag mga Kasugtanan 50:23–25.Pwede kamo nga magtipon sa madulom nga kuwarto para basahon ang Doktrina kag mga Kasugtanan 50:23–25 kag amat-amat nga dugangan ang kasanag paagi sa pagsindi sang mga kandila ukon sa pagbukas sang mga suga sing tag-isaisa. Pwede man ninyo basahon ining mga bersikulo samtang nagatan-aw sang pagbutlak sang adlaw sa aga. Ano ang pwede naton himuon agud padayon nga magdako ang aton kasanag sa ebanghelyo? Kon may bag-o nga matun-an ang mga miyembro sang pamilya parte sa ebanghelyo sa sini nga semana, paisoga sila nga ipaambit ini sa pamilya paagi sa pagsulat sini sa papel kag itapik ini sa suga ukon sa iban pa nga kasanag sa balay.

Doktrina kag mga Kasugtanan 50:40–46.Pagkatapos nga basahon ang Doktrina kag mga Kasugtanan 50:40–46, pwede mo ipakita ang litrato sang Manluluwas nga upod sining outline kag magpamangkot pareho sini: Paano ninyo mahibal-an nga palangga sang Manluluwas ang karnero? Paano nangin daw pareho sang manugpahalab ang Manluluwas sa aton? Ano nga mga dinalan sa balaan nga mga kasulatan ang nagapakita sang ideya nga ang Manluluwas manugpahalab kag kita Iya mga karnero?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Makigbagay. Ang pinakamaayo nga tion sa pagtudlo, labi na gid sa balay, masami nagaabot lang kag wala ginapaabot: ang oras sang pagkaon sang pamilya mahimo nga makainspirar sang diskusyon parte sa pagpakabusog sa pulong sang Dios, kag ang ulan mahimo nga mangin tsansa sa pagpamatuod parte sa buhi nga tubig. Kon handa ka sa espirituhanon, ihatag sang Ginuo sa imo “sa mismo nga tion, kon ano ang [imo] ihambal” (Doktrina kag mga Kasugtanan 100:6).

Gentle Shepherd [Mahinalungon nga Manugpahalab], ni Yongsung Kim