mga tawo nga nagatilipon sa kilid sang linaw

The Camp Meeting [Ang Miting sang Guban], ni Worthington Whittredge

Mayo 3–9

Doktrina kag mga Kasugtanan 46–48

“Tinguhai Ninyo sing Matutum ang Pinakamaayo nga mga Bugay”

Samtang imo ginabasa ang Doktrina kag mga Kasugtanan 46–48, isulat ang mga pagpabatyag nga imo mabaton. Dayon pwede ka magpamangkot, pareho sa ginpanugyan ni Elder Richard G. Scott, “May ara pa bala ako nga dapat mahibal-an?” (“To Acquire Spiritual Guidance,” Ensign ukon Liahona, Nob. 2009, 8).

Isulat Ang Imo Mga Panghunahuna

Sang si Parley P. Pratt, Oliver Cowdery, Ziba Peterson, kag Peter Whitmer Jr. naghalin sa Kirtland kag nagsaylo sa iban pa nga lugar para sa pang-misyonaryo nga buluhaton, ginbayaan nila ang masobra isa ka gatos ka mga hinaylo nga may dako nga kalangkag kag diutay lang nga eksperiyensya ukon paggiya. Wala pa sadto sang gabay nga mga libro, wala sang mga miting sa paghanas sang liderato, wala sing brodkast sang pangkabilogan nga komperensya—ang matuod, kulang gid katama ang mga kopya sang Libro ni Mormon para ipanagtag. Madamo sining bag-o nga mga tumuluo ang naganyat sa ginpanumbalik nga ebanghelyo tungod sang promisa sang makahalawhaw nga mga pagpahayag sang Espiritu, labi na ang ila mga nahibal-an paagi sa pagtuon sang Bag-o nga Katipan (tan-awa halimbawa, sa 1 Mga Taga-Corinto 12:1–11). Wala madugayi, pila ka indi kinaandan nga mga pagpahayag sang pagsimba—lakip na ang pagkatumba ukon paglubid-lubid nga daw man-og—ang ginsugdan sa ila mga miting sa Simbahan. Madamo ang nabudlayan sa pagkilala kon diin nga mga pagpahayag ang iya sang Espiritu kag diin ang indi. Sang makita ang kagamo, nagpangamuyo si Joseph Smith para sa bulig. Ang sabat sang Ginuo pareho ka malahalon sa karon, kon diin masami nga ginasikway sang mga tawo ukon ginabale-wala ang mga butang sang Espiritu. Ginpahayag sang Ginuo nga ang espirituhanon nga mga pagpahayag matuod kag ginklaro kon ano ang mga ini—mga regalo halin sa mapinalanggaon nga Amay nga Langitnon, “nga ginhatag para sa kaayohan sinang nagahigugma sa [Iya] kag nagatuman sang tanan [Niya] nga kasugoan” (Doktrina kag mga Kasugtanan 46:9).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 46:1–6

Ang tanan nga sinsero nga nagapangita ginaabiabi sa pagsimba sa Simbahan sang Ginuo.

Ang mga miting sang Ang Simbahan ni Jesucristo sang mga Santos sa Ulihing mga Adlaw nagakadapat nga malakip sa pinakamainabyanon kag makainspirar nga mga pagtililipon sa kalibutan. Paano kita ginalaygayan sang Ginuo sa Doktrina kag mga Kasugtanan 46:1–6 sa pagbaton sang mga nagakadto sa aton mga miting? Nakabatyag bala ang imo mga abyan kag ang mga tawo sa imo palibot nga ginaabiabi sa inyo mga pagsimba sa ward? Ano ang imo ginahimo para himuon ang inyo nga miting sa Simbahan nga mga lugar nga gusto balikan sang mga tawo? Pamensara kon paano maapektuhan ang imo eksperiyensya sang imo mga pagpaninguha nga sundon ang Balaan nga Espiritu sa mga miting sa Simbahan.

Tan-awa man sa 3 Nefi 18:22–23; Moroni 6:5–9.

Doktrina kag mga Kasugtanan 46:7–33

Ang Dios naghatag sang espirituhanon nga mga bugay para pakamaayuhon ang Iya mga anak.

Ang nauna nga mga Santos nagapati sa espirituhanon nga mga bugay pero nagkinahanglan sang giya parte sa mga katuyuan sini. Samtang imo ginatun-an ang parte sa mga bugay sang Espiritu gamit ang Doktrina kag mga Kasugtanan 46:7–33, binagbinaga kon ngaa importante nga imo “pirme [panumdumon] kon para sa ano nga katuyoan ang mga ini ginahatag” (bersikulo 8). Pamensara kon paano magamit ang ining mga bersikulo sa sining pahayag ni Elder Robert D. Hales: “Ining mga bugay ginahatag sa mga matinuohon kay Cristo. Buligan kita sang mga ini nga mahibal-an kag itudlo ang mga kamatuoran sang ebanghelyo. Buligan kita sang mga ini nga bugayan ang iban. Giyahan kita sang mga ini pabalik sa aton Amay nga Langitnon ” (“Gifts of the Spirit,” Ensign, Peb. 2002, 16). Ano pa ang imo matun-an sa sining mga bersikulo parte sa espirituhanon nga mga pagpahayag? Paano makabulig sa imo ining mga kamatuoran nga “indi mapatalang”? (bersikulo 8).

Binagbinaga kon ano ang imo espirituhanon nga mga bugay—kag kon paano mo gamiton ang mga ini “para sa kaayohan sang mga anak sang Dios” (bersikulo 26). Kon may imo ka nga patriarchal blessing, mahimo nga nagasambit man ini sang pila sa ginhatag sa imo nga espirituhanon nga mga bugay.

Doktrina kag mga Kasugtanan 47

Gusto sang Ginuo nga magtipig sang kasaysayan ang Iya Simbahan.

Ang calling ni John Whitmer nga magtipig sang kasaysayan sang Simbahan nagpadayon sang madugay na nga tradisyon sang mga manugtipig sang kasulatan sa katawhan sang Dios (tan-awa sa 2 Nefi 29:11–12; Moises 6:5; Abraham 1:28, 31). Ang matuod, ang posisyon nga Church Historian and Recorder ara sa gihapon sa karon nga panahon. Ngaa sa banta mo nga ang pagtipig sang kasaysayan tama kaimportante sa Ginuo? Binagbinaga ini samtang imo ginabasa ang Iya mga instruksyon kay John Whitmer parte sa sining tulumanon sa seksyon 47. Pamensara man ang personal nga mga eksperiyensya nga kinahanglan mo isulat. Halimbawa, ano ang gintudlo sa imo sang Ginuo nga gusto mo amligan?

Samtang ginabinagbinag mo ining mga pamangkot, pamensara ining pahayag halin kay Elder Marlin K. Jensen sang Kapitoan, nga nagserbisyo bilang Church Historian and Recorder halin sang 2005 tubtob 2012:

“Nagatago kita sang mga kasulatan para buligan kita nga makadumdom. … Gusto naton nga buligan ang mga miyembro sang Simbahan nga makadumdom sang dalagko nga mga butang nga ginhimo sang Dios para sa Iya mga anak. … Ang mga leksyon sang nagliligad nagabulig sa aton nga maatubang ang aton karon kag nagahatag sa aton sang paglaum sa aton palaabuton” (“There Shall Be a Record Kept among You,” Ensign, Dis. 2007, 28, 33).

John Whitmer

Si John Whitmer gintawag para magtipig sang kasaysayan sang Simbahan.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 46:2–6.Ano ang sarang naton himuon bilang pamilya para siguruhon nga makabatyag ang iban nga ginaabiabi sa aton mga miting sa Simbahan? (tan-awa man sa 3 Nefi 18:22–23). Ang litrato nga upod sining outline mahimo nga makadugang sa sining paghinambalanay.

Doktrina kag mga Kasugtanan 46:7–26.Ano nga espirituhanon nga mga bugay ang makita naton sa kada isa? Paano mabendisyunan sinang mga bugay ang aton pamilya?

Doktrina kag mga Kasugtanan 47.Paano mo paisugon ang mga miyembro sang pamilya nga isulat ang ila personal nga mga kasaysayan sa bilog nga semana? Pwede ka magpaambit sang pila ka sinulatan halin sa imo personal nga journal ukon mag-istorya parte sa isa ka katigulangan. Ang pila ka mga pamilya nagapain sang pila ka minutos kada semana para magsulat ang tanan sa ila mga journal. Pwede ka maghatag sang mga bulig sa pagsulat sa journal, pareho sang “Ano ang natabo sining semana nga gusto mo mahibal-an sang imo mga apo?” ukon “Paano mo nakita ang impluwensya sang Ginuo sa imo kabuhi sini nga semana?” Pwede nga magdrowing ang magagmay nga kabataan sang mga litrato sang ila mga eksperiyensya, ukon irekord mo sila nga nagasugid sang ila mga istorya. Ano nga mga bugay ang nagaabot tungod sa pagtipig sang “dalayon nga kasaysayan”? (bersikulo 1).

Doktrina kag mga Kasugtanan 48Ang mga Santos sa Ohio ginsugo nga ipaambit ang ila mga duta sa mga masaylo sa Ohio halin sa nasidlangan sang Estados Unidos. Ano ang pwede naton ihatag para masabat ang mga panginahanglan sang iban?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Sweet Is the Work [Matam-is ang Buluhaton]” Mga Himno kag mga Ambahanon sang Kabataan, no. 13.

Pagpauswag sang Aton Pagpanudlo

Maggamit sang mga istorya kag mga halimbawa. Ang Manluluwas masami nagagamit sang mga istorya kag mga paanggid para itudlo ang mga prinsipyo sang ebanghelyo. Magpamensar sang mga halimbawa kag mga istorya sa imo kaugalingon nga kabuhi nga magabuhi sang isa ka prinsipyo sang ebanghelyo sa inyo pamilya (tan-awa sa Teaching in the Savior’s Way, 22).

mga tawo sa simbahan

Ginahatagan sang Amay nga Langitnon ang Iya mga anak sang espirituhanon nga mga bugay para pakamaayuhon ang mga kabuhi sang iban.