Independence, Missouri, ni Al Rounds

Mayo 24–30

Doktrina kag mga Kasugtanan 58–59

“Mapisan sa Pagpakigbahin sa Maayo nga Kawsa”

Si Pangulong Dallin H. Oaks nagtudlo, “Ang balaan nga mga kasulatan magabulig sa aton sa pagsabat sang tanan naton nga personal nga mga pamangkot tungod paagi sa pagbasa sang mga ini ginaimbitar kag ginabagay naton ang aton mga kaugalingon sa inspirasyon sang Balaan nga Espiritu, nga magagiya sa aton sa tanan nga kamatuoran” (sa David A. Edwards, “Are My Answers in There?” New Era, Mayo 2016, 42).

Isulat Ang Imo Mga Panghunahuna

Sang una nga makita sang mga elder sa Simbahan ang lugar sang siyudad sang Sion—ang Independence, Missouri—indi ini ang ila ginapaabot. May pila nga nagdumdom nga makakita sila sang mauswagon, masako nga komunidad nga may mabaskog nga grupo sang mga Santos. Sa baylo nakita nila ang malaka sing pamalay nga lugar, nga wala sang kasadya sang sibilisasyon nga ila naandan kag ginapuy-an sang indi pino nga mga pumuluyo imbes nga mga Santos. Ang gwa nga wala sila ginapangabay sang Ginuo nga mag-kadto lang sa Sion—gusto Niya nga tukuron nila ini.

Kon ang aton mga ginapaabot wala nagasanto sa realidad, mahimo naton panumdumon ang ginsiling sang Ginuo sa mga Santos sang 1831: “Sa sini nga tion, indi ninyo makita sa inyo tawhanon nga mga mata ang plano sang Dios … kag ang himaya nga magasunod pagkatapos sing madamo nga pag-antos” (Doktrina kag mga Kasugtanan 58:3). Huo, ang kabuhi puno sing pag-antos, bisan pa sang kalainan, pero sarang kita “magpahanabo sing madamo nga pagkamatarong; kay ang gahum yara sa [aton]” (mga bersikulo 27–28).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 58:1–5, 26–33, 44; 59:23

Ang mga bugay nagaabot suno sa tiyempo sang Dios kag sa aton katutom.

Ginpahamtang sang mga Santos ang pundasyon sang Sion sa Jackson County, Missouri, kon sa diin nagbatas sila sang madamo nga mga pagtilaw. Sigurado nga naghandum sila nga sa tion sang ila mga kabuhi magauswag ining lugar sa isa ka lugar nga sarang magtipon ang tanan nga mga Santos. Ugaling, gintabog ang mga Santos pa-gwa sa Jackson County pagligad sang pila lang ka tuig, kag ginpahayag sang Ginuo nga kinahanglan sang Iya katawhan nga “maghulat sang malip-ot pa nga tion para sa pagtubos sang Sion” (Doktrina kag mga Kasugtanan 105:9).

Samtang imo ginatun-an ang masunod nga mga dinalan, pangitaa ang mga rason nga ang mga bugay mahimo nga indi pa anay mahatag. Makabulig sa imo sa pagbinagbinag ang mga pamangkot sa idalom.

Doktrina kag mga Kasugtanan 58:1–5; 59:23. Ano nga mga mensahe sa sining mga bersikulo ang nagapabakod sang imo ikasarang sa pagbatas sang mga pagtilaw nga mas may pasensya? Ano nga mga bugay ang imo nabaton pagkatapos sang pagtilaw? Ngaa sa banta mo nga ang iban nga mga bugay nagaabot lamang pagkatapos sang mga pagtilaw?

Doktrina kag mga Kasugtanan 58:26–33. Ano ang papel sang pagka-“mapisan sa pagpakigbahin sa maayo nga kawsa” sa katumanan sang mga promisa sang Dios? Ano ang papel sang imo pagkamatinumanon?

Doktrina kag mga Kasugtanan 58:44. Ano ang relasyon sang “pangamuyo sang pagtuo” kag sang pagbuot sang Ginuo para sa aton?

Doktrina kag mga Kasugtanan 59, tig-ulo sang seksyon

Sin-o si Polly Knight?

Si Polly Knight kag ang iya bana, si Joseph Knight Sr., pila sa una nga nagpati sa pagkapropeta ni Joseph Smith. Naghatag sang kinahanglanon nga suporta sanday Polly kag Joseph sa Propeta sa buluhaton sang paglubad sang Libro ni Mormon. Ginbayaan sang pamilya Knight ang Colesville, New York, para magtipon upod sa mga Santos sa Ohio kag sang ulihi ginsugo nga magsaylo sa Jackson County, Missouri. Sang nagabiyahe sila, amat-amat nga nagpigaw ang lawas ni Polly, pero determinado sia nga makita ang Sion antes sia mapatay. Pila pa lang sia ka adlaw sa Missouri sang sia napatay. Ang Doktrina kag mga Kasugtanan 59 nabaton sa adlaw sang iya pagtaliwan, kag ang bersikulo 1 kag 2 daw nagatumod partikular gid sa iya.

Doktrina kag mga Kasugtanan 59:9–19

Ang pagtipig sang Adlaw nga Inugpahuway nga balaan nagadala sang temporal kag espirituhanon nga mga bugay.

Pagkatapos promisahan nga bendisyunan ang mga Santos sa Sion “sing madamo nga kasugoan,” naghatag ang Ginuo sang espesyal nga pagtalupangod sa isa ka kasugoan: ang sugo nga tahuron ang Iya “balaan nga adlaw” (Doktrina kag mga Kasugtanan 59:4, 9). Samtang imo ginatun-an ang Doktrina kag mga Kasugtanan 59:9–19, binagbinaga kon ngaa mangin importante kaayo sa sining mga Santos nga tahuron ang Adlaw nga Inugpahuway samtang ila ginahandum nga tukuron ang Sion.

Pwede mo man binagbinagon ang mga pamangkot nga pareho sini: Ginagamit ko bala ang Adlaw nga Inugpahuway suno sa gintuyo sang Ginuo? Paano ang pagtipig sang Adlaw nga Inugpahuway nga balaan nagabulig sa akon nga magpabilin nga “wala’y mantsa sa kalibutan”? (bersikulo 9). Ano ang sarang ko himuon para maghatag sang akon “pagdayaw sa Labing Mataas”? (bersikulo 10).

Pagkatapos basahon ang masunod nga mga bersikulo, ano ang ginapabatyag sa imo nga himuon para mas tipigan nga balaan ang Adlaw nga Inugpahuway? Genesis 2:2–3; Exodo 20:8–11; 31:13, 16; Deuteronomio 5:12–15; Isaias 58:13–14; Marcos 2:27; Juan 20:1–19; Mga Binuhatan 20:7.

Ang pag-ambit sang sakramento bahin sang pagtipig sang Adlaw nga Inugpahuway nga balaan.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 58:26–29.Basi pwede nga maghimo ang mga miyembro sang pamilya sang lista sang pila ka mga butang nga “mapisan [sila] sa pagpakigbahin”. Tanan bala nga mga ini “maayo nga [mga] kawsa”? Ngaa nga gusto sang Ginuo nga maghimo kita sang “madamo nga butang paagi sa [aton] kaugalingon nga pagbuot”? Pangabaya ang tagsa ka miyembro sang pamilya nga magpanumdom sang pwede nila himuon sining semana para “magpahanabo sing madamo nga pagkamatarong.” Sa ulihi pwede sila magreport sang ila ginhimo.

Doktrina kag mga Kasugtanan 58:42–43.Ano ang nabatyagan sang mga miyembro sang pamilya sang mabasa nila ining mga bersikulo? Paano makabulig ining mga bersikulo sa tawo nga kinahanglan maghinulsol?

Doktrina kag mga Kasugtanan 59:3–19.Ano ayhan ang buot silingon sang “pagakoronahan … sang mga kasugoan”? (bersikulo 4). Samtang inyo ginabasa ang mga kasugoan sa mga bersikulo 5–19, hambali ang mga bugay nga inyo nabaton paagi sa pagtuman sang tagsa sining mga kasugoan.

Pwede man ninyo nga talupangdon kon paano gingamit ang mga tinaga pareho sang “kalipay,” “pagkasadya,” “masadya,” kag “malipayon” para ilaragway ang kasugoan nga tahuron ang Adlaw nga Inugpahuway. Paano ninyo himuon ang inyo Adlaw nga Inugpahuway nga mas makalilipay? Basi pwede nga maghampang ang inyo pamilya sang parisay-sang-kard nga nagapakita sang mga butang nga pwede ninyo himuon para tipigan nga balaan ang Adlaw nga Inugpahuway.

Doktrina kag mga Kasugtanan 59:18–21.Ano ang pwede naton himuon para “[akuon] … ang kamot [sang Dios] sa tanan nga butang”? (bersikulo 21). Pamensara ang maglakat ukon magtan-aw sang mga litrato, nga ginapat-inan ang mga butang nga “[nagapalipay] sa mata kag … [nagapasadya] sang tagipusuon” (bersikulo 18). Pwede kamo magkuha ukon magdrowing sang mga litrato sang inyo makita kag dayon hambalan kon paano ninyo ipakita ang inyo kapasalamatan sa sining mga butang. Paano naton nakita ang kamot sang Dios sa aton mga kabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Himoa ang Husto [Do What Is Right],” Mga Himno kag mga Ambahanon sang Kabataan, no. 34–35.

Pagpauswag sang Aton Pagpanudlo

Magpaambit sang balaan nga mga kasulatan. Hatagi sang tion ang mga miyembro sang pamilya nga ipaambit ang mga dinalan sa balaan nga mga kasulatan nga ila nakita sa ila personal nga pagtuon nga makahulugan para sa ila.

Ilustrasyon ni Marti Major