Suba sang Missouri

Campfire on the Missouri [Dabok sa Kampo sa Missouri], ni Bryan Mark Taylor

Mayo 31–Hunyo 6

Doktrina kag mga Kasugtanan 60–62

“Ang Tanan nga Unod Yara sa Akon Kamot”

Si Pangulong Ezra Taft Benson nagtudlo nga kon magtuon kita sang balaan nga mga kasulatan, “ang mga testimonya magatubo. Ang pangako magabakod. Ang mga pamilya magabaskog. Ang personal nga rebelasyon magatubod” (“The Power of the Word,” Ensign, Mayo 1986, 81).

Isulat Ang Imo Mga Panghunahuna

Sang Hunyo 1831, naghiwat si Joseph Smith sang komperensya upod ang mga elder sa Simbahan sa Kirtland. Didto, gin-organisar sang Ginuo ang pila sang mga elder sa mga pares kag ginpadala sila sa Jackson County, Missouri, upod ang ining responsibilidad: “Magwali sa dalanon” (Doktrina kag mga Kasugtanan 52:10). Madamo sang mga elder ang naghimo sini sing matutom, pero ang iban wala. Gani sang nag-abot na ang oras nga mabalik na sa Kirtland, nagsiling ang Ginuo, “Wala ako nahamuot sa pila [ka mga elder], kay indi nila pagbuksan ang ila mga baba, kundi ginatago nila ang talento nga ginhatag ko sa ila bangod sang kahadlok sa tawo” (Doktrina kag mga Kasugtanan 60:2). Madamo sa aton ang nagabatyag sang simpatiya sa sining mga elder—mahimo nga nagabatyag man kita sang pagpang-alang-alang sa pagbukas sang aton mga baba kag magpaambit sang ebanghelyo. Basi nga kita man ginapunggan sang “kahadlok sa tawo.” Basi nagaduda kita sa aton katakos ukon mga abilidad. Ano man ang aton mga rason, ang Ginuo “nakahibalo sang kaluyahon sang tawo kag kon paano [kita] buligan” (Doktrina kag mga Kasugtanan 62:1). Nagalapta sa sining mga rebelasyon sa nauna nga mga misyonero ang mga pasalig nga makabulig sa aton nga malampuwasan ang aton mga kahadlok sa pagpaambit sang ebanghelyo—ukon iban pa nga mga kahadlok nga aton ginaatubang: “Ako, nga Ginuo, nagahari sa kalangitan sa ibabaw.” “Sarang ko kamo pakabalaanon.” “Ang tanan nga unod yara sa akon kamot.” Kag “magkalipay kamo, magagmay nga kabataan; kay yara ako sa tunga ninyo.” (Doktrina kag mga Kasugtanan 60:4, 7; 61:6, 36.)

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 60; 62

Nagakasadya ang Ginuo kon buksan ko ang akon baba sa pagpaambit sang ebanghelyo.

Tanan kita nakaeksperiyensya nga makapaambit na kuntani sang ebanghelyo sa isa ka tawo, pero sa kon ano nga rason, wala naton nahimo. Samtang imo ginabasa ang mga pulong sang Ginuo sa una nga mga misyonero nga napaslawan nga “buksan ang ila mga baba,” pamensara ang imo kaugalingon nga mga oportunidad sa pagpaambit sang ebanghelyo. Paano makumparar ang imo testimonya sang ebanghelyo sa “talento,” ukon manggad halin sa Dios? Sa ano nga mga paagi nga kon kaisa aton “ginatago ang [aton] talento”? (Doktrina kag mga Kasugtanan 60:2; tan-awa man sa Mateo 25:14–30).

Ginsaway sang Ginuo ining mga misyonero sang una, pero gintinguhaan man Niya nga paisugon sila. Ano nga nagapaisog nga mga mensahe halin sa Iya ang imo makita sa mga seksyon 60 kag 62? Paano ginapabakod sining mga mensahe ang imo kompiyansa sa pagpaambit sang ebanghelyo? Sa palaabuton nga mga inadlaw, magpangita sang mga oportunidad sa pagbukas sang imo baba kag ipaambit ang ginsalig sang Dios sa imo.

Tan-awa man sa Doktrina kag mga Kasugtanan 33:8–10; 103:9–10; Dieter F. Uchtdorf, “Missionary Work: Sharing What Is in Your Heart,” Ensign ukon Liahona, Mayo 2019, 15–18.

mga misyonero sa bus

Gusto sang Dios nga ipaambit ko ang ebanghelyo sa iban.

Doktrina kag mga Kasugtanan 61:5–6, 14–18

Ang tanan bala nga tubig ginsumpa sang Ginuo?

Ang paandam sang Ginuo sa Doktrina kag mga Kasugtanan 61 sa isa ka bahin, paandam sa mahimo atubangon sang Iya katawhan samtang nagabiyahe pakadto sa Sion paagi sa Suba sang Missouri, nga nabantugan sa amo nga tiyempo nga delikado. Ang ining paandam indi dapat paghangpon nga dapat naton likawan ang pagbiyahe sa tubig. Ang Ginuo may “tanan nga gahum,” lakip na ang gahum sa tubig (bersikulo 1).

Doktrina kag mga Kasugtanan 61–62

Ang Ginuo makagagahum sa tanan kag sarang ako amligan.

Sa pagbalik sa Kirtland, si Joseph Smith kag ang iban pa nga mga lider sa Simbahan nakaeksperiyensya sang peligro-sa-kabuhi sa Suba sang Missouri. Gingamit sang Ginuo ining oportunidad para paandaman kag tulinan ang Iya mga alagad. Ano ang imo makita sa Doktrina kag mga Kasugtanan 61 nga nagapaisog sa imo nga magsalig sa Ginuo samtang imo ginaatubang ang imo kaugalingon nga mga hangkat? Halimbawa, ngaa importante nga mahibal-an nga ang Dios “halin sa wala’y katubtuban tubtob sa wala’y katubtuban”? (bersikulo 1).

May pareho man sini nga panan-awan sa seksyon 62. Ano ang ginatudlo sang Ginuo parte sa Iya Kaugalingon kag sa Iya gahum sa sining rebelasyon?

Binagbinaga ang nagapatubo-sang-pagtuo mo nga mga eksperiyensya sang ginbuligan ka sang Ginuo nga malampuwasan ang espiritwal kag pisikal nga pagtilaw.

Doktrina kag mga Kasugtanan 62

Gusto sang Ginuo nga maghimo ako sang mga desisyon nga “suno sa nagakaigo para sa [akon].”

Kon kaisa nagahatag sa aton ang Ginuo sang partikular nga direksyon, kag ang iban nga mga butang Iya na ginabilin sa aton desisyon. Paano ginapakita ining prinsipyo sa Doktrina kag mga Kasugtanan 62? (tan-awa man sa Doktrina kag mga Kasugtanan 60:5; 61:22). Paano mo nakita ining prinsipyo sa imo kabuhi? Ngaa makapaayo sa aton nga maghimo sang pila ka mga desisyon nga wala sang partikular nga direksyon halin sa Dios?

Tan-awa man sa Eter 2:18–25; Doktrina kag mga Kasugtanan 58:27–28.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 60:2–3.Ngaa nagapang-alang-alang ang pila sa nauna nga mga misyonero sa pagpaambit sang ebanghelyo? Ngaa nagapang-alang-alang kita kon kaisa? Pamensara nga idrama-drama kon paano ipaambit sang mga miyembro sang pamilya ang ebanghelyo sa lainlain nga mga sitwasyon.

Doktrina kag mga Kasugtanan 61:36–39.Ano ang makita naton nga mga rason sa sining mga bersikulo para “magkalipay”? (tan-awa man sa Juan 16:33). Basi pwede nga magsulat ukon magdrowing ang imo pamilya sang mga litrato sang mga butang nga nagahatag sa ila sang kalipay kag tipuna ini sa garapon sang “kalipay”. (Siguroha nga ilakip ang mga litrato sang Manluluwas kag ang mga pahanumdom sang Iya pagpalangga sa aton.) Sa bilog nga semana kon kinahanglan ang mga miyembro sang pamilya sang pahanumdom sang mga rason nga magkalipay, pwede sila magpili sang isa halin sa garapon.

Doktrina kag mga Kasugtanan 61:36.Paano mo buligan ang mga miyembro sang imo pamilya nga panumdumon nga ang Manluluwas “yara sa tunga [naton]”? Pwede kamo magdesisyon sing ululupod kon diin ibutang ang litrato Niya nga makita dayon sa inyo balay. Paano naton imbitahon ang Manluluwas sa aton adlaw-adlaw nga pangabuhi?

Doktrina kag mga Kasugtanan 62:3.Basi pwede kamo nga maghiwat sang miting sang testimonya sa pamilya pagkatapos nga basahon ining bersikulo. Para ipaathag kon ano ang testimonya, pwede mo ipaambit ang mga bahin sang mensahe ni Pangulong M. Russell Ballard “Pure Testimony” (Ensign ukon Liahona, Nob. 2004, 40–43). Ngaa maayo nga irekord ang aton mga testimonya?

Doktrina kag mga Kasugtanan 62:5, 8.Ngaa wala nagahatag ang Ginuo sang mga kasuguan parte sa tagsa ka aspeto sang aton kabuhi? Suno sa bersikulo 8, paano kita dapat maghimo sang mga desisyon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “I Know that My Redeemer Lives [Buhi Gid ang Manunubos Ko],” Mga Himno kag mga Ambahanon sang Kabataan, no. 38–39.

Pagpauswag sang Personal nga Pagtuon

Tugoti ang Espiritu nga giyahan ang imo pagtuon. Tugoti ang Balaan nga Espiritu nga maggiya sa imo. Magmangin sensitibo sa Iya paghutik samtang Iya ka nga ginagiyahan sa mga butang nga kinahanglan mo matun-an kada adlaw, bisan pa nga ang Iya mga hutik nagapanugyan nga basahon mo ukon tun-an ang topiko nga lain sa gusto mo tun-an ukon sa lain nga paagi.

Si Jesus nga nagapas-an sang karnero

Good Shepherd [Maayong Manugpahalab], ni Del Parson