Spring Hill, Daviess County, Missouri, ni Garth Robinson Oborn

Hunyo 7–13

Doktrina kag mga Kasugtanan 63

“Sagrado Inang Nagahalin sa Ibabaw”

Ang Ginuo nagsiling, “Mabaton ninyo ang Espiritu paagi sa pangamuyo” (Doktrina kag mga Kasugtanan 63:64). Pamensara ang magpangamuyo para giyahan sang Espiritu ang imo pagtuon.

Isulat Ang Imo Mga Panghunahuna

Ang lugar para sa siyudad sang Sion napili na. Ginbisitahan sang mga lider sang Simbahan ang duog kag gindedikar ini bilang lugar nga tilipunan sang mga Santos. Suno sa kasaysayan ni Joseph Smith, “ang duta sang Sion subong ang labing importante nga dutan-on nga tinutuyo” (Doktrina kag mga Kasugtanan 63, tig-ulo sang seksyon). Pero lain-lain ang mga panan-aw parte sa Sion. Madamo nga Santos ang nalangkag na sa pagsugod tipon sa Missouri. Sa pihak nga bahin, ang mga tawo nga pareho kay Ezra Booth nadismaya sa duta sang Sion kag ginpabutyag nila ang ila panghunahuna. Ang matuod, sang magbalik si Joseph sa Kirtland halin sa Missouri, natukiban niya nga ang pagbinangig kag apostasiya nagsulod na sa Simbahan sang wala sia. Amo sini ang sitwasyon sang ang rebelasyon sa Doktrina kag mga Kasugtanan 63 nabaton. Diri ginsabat sang Ginuo ang pagbakal sang duta kag pagsaylo sang mga Santos sa Missouri. Pero kaupod sa praktikal nga mga butang ang husto sa oras nga pahanumdom: “Ako, nga Ginuo, nagahambal sa akon tingug, kag dapat tumanon ini” (bersikulo 5). Ang Iya tingug, ang Iya pagbuot, ang Iya sugo—tanan ini nga “[nagahalin] sa ibabaw”—indi dapat kabigon nga may pagtamay ukon pasapayan lang. Ini “sagrado, kag kinahanglan ihambal sing may paghalong” (bersikulo 64).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 63:1–6, 32–37

Ang kaakig sang Ginuo nagadabadaba batok sa mga malain kag mga nagarebelde.

Sang mabaton ang ining rebelasyon, nagapangatubang si Joseph Smith sang grabe nga kritisismo halin sa pila ka mga miyembro sang Simbahan nga nagtalikod sa iya (tan-awa sa “Ezra Booth and Isaac Morley,” Revelations in Context, 130–36). Ano nga mga paandam ang ginhatag sang Ginuo sa Doktrina kag mga Kasugtanan 63:1–6, 32–37 parte sa “mga malain kag mga nagarebelde”? Paano nangin ebidensya sang pagpalangga sang Dios ang amo nga mga paandam?

Doktrina kag mga Kasugtanan 63:7–12

Ang mga tanda nagaabot paagi sa pagtuo kag sa pagbuot sang Dios.

Ang mga tanda ukon milagro lamang wala nagapatubo sang nagadugay nga pagtuo. Sang temprano sang 1831 si Ezra Booth, isa ka Methodist nga ministro sa Kirtland, nagdesisyon nga magpabunyag sang makita niya nga milagroso nga napaayo ni Joseph Smith ang braso sang abyan ni Booth nga si Elsa Johnson.

Ugaling, sang pila lang ka bulan, nawad-an si Booth sang pagtuo kag nangin kritiko sang Propeta. Paano ini natabo, pagkatapos niya nga makasaksi sang milagro? Binagbinaga ini samtang imo ginabasa ang Doktrina kag mga Kasugtanan 63:7–12. Mahimo mo man pamensaron kon ngaa may mga tawo nga nagabaton sang mga tanda “para sa kaayohan sang mga tawo para sa himaya sang [Dios]” (bersikulo 12) kag ang iban nagabaton sang mga ini “sa ila … pagkondenar” (bersikulo 11). Base sa imo nabasa, sa banta mo ano ang gusto sang Ginuo nga imo hunahunaon kag batyagon parte sa mga tanda?

Tan-awa man sa Mateo 16:1–4; Juan 12:37; Mormon 9:10–21; Eter 12:12, 18.

Doktrina kag mga Kasugtanan 63:13–23

Ang kaputli nagakahulugan sang pagmentinar sang akon mga panghunahuna kag mga aksyon nga matinlo.

Kalabanan sang mga tawo nagakilala nga ang pagpanglahi sala. Pero sa Doktrina kag mga Kasugtanan 63:13–19, ginklaro sang Manluluwas nga ang pagkaibog sa panghunahuna may seryoso man nga espirituhanon nga mga konsikwensya. “Ngaa nga ang pagkaibog tama ka makamamatay nga sala?” Ginpamangkot ni Elder Jeffrey R. Holland. “Ah, dugang pa sa lubos nga makaguba sang Espiritu nga epekto sini sa aton mga kalag, sa banta ko sala ini tungod ginahigkuan sini ang pinakamataas kag pinakabalaan nga kaangtanan nga ginhatag sang Dios sa aton kabuhi sa duta—ang paghigugma sang lalaki kag babayi sa isa kag isa kag ang handum sinang mag-asawa nga magdala sang kabataan sa pamilya nga gintuyo nga mangin wala katubtuban” (“Place No More for the Enemy of My Soul,” Ensign ukon Liahona, Mayo 2010, 44).

Ano nga mga konsikwensya ang ginmitlang sang Ginuo sa Doktrina kag mga Kasugtanan 63:13–19 nga magaabot sa mga indi maghinulsol sa ila indi matinlo nga mga panghunahuna kag aksyon? Tandai ang mga bugay nga ginpromisa sang Manluluwas sa mga bersikulo 20 kag 23 sa mga tampad. Ano nga mga bugay ang nag-abot sa imo kabuhi tungod sa pagtuman sang layi sang kaputli? Paano ka ginabuligan sang Manluluwas nga magpabilin ukon mangin matinlo?

Tan-awa man sa Doktrina kag mga Kasugtanan 121:45; Linda S. Reeves, “Worthy of Our Promised Blessings,” Ensign ukon Liahona, Nob. 2015, 9–11.

Ginabugayan kita samtang ginamentinar naton nga matinlo ang aton mga panghunahuna kag mga aksyon.

Doktrina kag mga Kasugtanan 63:24–46

Ang Ginuo ang nagapanguna sa espirituhanon kag temporal nga mga hilikuton sang Iya mga Santos.

Matapos nga ginpili sang Ginuo ang lugar kon diin tukuron ang Sion, kinahanglan gihapon sang mga Santos sa Ohio sang direksyon kon san-o magsugod sa pagsaylo kag kon diin kuhaon ang kuwarta nga gamiton sa pagbakal sang duta. Samtang imo ginabasa ang Doktrina kag mga Kasugtanan 63:24–46, pangitaa ang espirituhanon kag temporal nga direksyon nga ginhatag sang Ginuo parte sa Sion. Ano nga espirituhanon kag temporal nga direksyon ang ginahatag sang Ginuo sa imo?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 63:7–12.Ang istorya ni Ezra Booth nga nagbiya sa Simbahan wala sapayan sang pagsaksi sang pag-ayo ni Elsa Johnson (tan-awa ang malip-ot nga mga detalye sa “Mga Ideya para sa Personal nga Pagtuon sang Balaan nga mga Kasulatan” kag sa litrato nga upod sining outline) mahimo nga magbukas sang diskusyon parte sa mga milagro. Basi pwede nga hambalan sang mga miyembro sang inyo pamilya ang mga milagro nga nagpabakod sang ila pagtuo, lakip na ang mga eksperiyensya sang inyo pamilya ukon sa kasaysayan sang inyo pamilya. Paano nila gingamit ang pagtuo nga kinahanglanon para mabaton ining mga milagro? Ano ang ginatudlo sang Doktrina kag mga Kasugtanan 63:7–12 parte sa relasyon sang pagtuo kag mga milagro?

Doktrina kag mga Kasugtanan 63:13–19.Paano naton amligan ang aton kaugalingon batok sa indi bagay nga mga impluwensya, lakip na ang pornograpiya? (Makita ninyo ang madamo sa mapuslanon nga mga balasahon para sa mga pamilya sa AddressingPornography.ChurchofJesusChrist.org.) Ano ang mga bugay sang pagpangabuhi sang layi sang kaputli?

Doktrina kag mga Kasugtanan 63:23.Paano mo buligan ang imo pamilya nga maintiendihan kon paano ang “mga misteryo sang ginharian,” ukon mga kamatuoran sang ebanghelyo, daw pareho sang “tuburan sang buhi nga tubig”? Halimbawa, pwede kamo magkadto sa malapit nga tuburan ukon suba (ukon magpakita sang video ukon litrato sini). Paano ang mga kamatuoran sang ebanghelyo nangin pareho sa tubig?

Doktrina kag mga Kasugtanan 63:58.Ano nga mga paandam ang aton makita sa seksyon 63? Ano ang pila sa mga paandam nga aton mabatian sa aton mga lider sa Simbahan sa karon nga panahon?

Doktrina kag mga Kasugtanan 63:58–64.Ipakita sa imo pamilya ang isa ka malahalon nga manggad sang pamilya. Ano ang kinalain sa aton pagtratar sa sining butang sangsa mga butang nga indi pareho sini kamalahalon? Ano ang ginatudlo sa aton sang Doktrina kag mga Kasugtanan 63:58–64 parte sa pwede naton himuon para tahuron ang sagrado nga mga butang?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Ipangabuhi ang imo natun-an. “Kon imo mabatyagan ang kalipay nga nagaabot halin sa pag-intiendi sang ebanghelyo, gustuhon mo nga ipangabuhi ang imo natun-an. Tinguhai nga magpangabuhi suno sa imo paghangop. Ang paghimo sini makapabakod sang imo pagtuo, ihibalo, kag testimonya” (Preach My Gospel, 19).

Healing of Elsa Johnson’s Shoulder [Pag-ayo sang Abaga ni Elsa Johnson], ni Sam Lawlor