Daviess County, Missouri

Hunyo 14–20

Doktrina kag mga Kasugtanan 64–66

“Ginapangayo sang Ginuo ang Tagipusuon kag Handa nga Panghunahuna”

Si Pangulong Henry B. Eyring nagsiling: “Masami ako nagakadto sa balaan nga mga kasulatan nga nagapamangkot ‘Ano ang gusto sang Dios nga himuon ko?’ ukon ‘Ano ang gusto Niya nga ipabatyag sa akon?’ Tagsa ka tion makakita ako sang bag-o nga mga ideya kag panghunahuna nga wala ko pa maagyi sadto” (“How God Speaks to Me through the Scriptures,” Peb. 6, 2019, blog.ChurchofJesusChrist.org).

Isulat Ang Imo Mga Panghunahuna

Sa nagatagiti nga init sang Agosto 1831, pila ka mga elder ang nagapanglakaton pabalik sa Kirtland pagkatapos nga usisaon ang duta sang Sion sa Missouri suno sa sugo sang Ginuo. Indi ato nangin manami nga pagpanglakaton. Ang mga nagbiyahe—sanday Joseph Smith, Oliver Cowdery, Sidney Rigdon, Ezra Booth, kag iban pa—ginagin-utan kag kapoy, kag ang pagkairitable madali nga nangin pag-ilinaway. Dawsa ang pagtukod sang Sion, ang siyudad sang gugma, pag-isa, kag paghidaet, magakinahanglan sing malawig nga panahon.

Maayo lang, ang pagtukod sang Sion—sa Missouri sang 1831 ukon sa aton mga tagipusuon kag mga ward sa karon—wala nagapangayo nga mangin perpekto kita. Kundi, “sa inyo ginamando nga [magpatawad],” siling sang Ginuo (Doktrina kag mga Kasugtanan 64:10). Ginapangayo Niya “ang tagipusuon kag handa nga panghunahuna” (bersikulo 34). Kag nagapangayo Sia sing pasensya kag katutom, kay ang Sion ginatukod sa pundasyon sang “magagmay nga mga butang,” kag ginatapos sang mga wala naga-“[luya] sa paghimo sang maayo” (bersikulo 33).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 64:1–11

Ginapangayo sa akon nga magpatawad sa tanan.

Samtang imo ginabasa ang Doktrina kag mga Kasugtanan 64:1–11, pamensara ang tion sang ginpatawad ka sang Ginuo. Pwede mo man pamensaron ang tawo nga kinahanglan mo patawaron. Paano nakaapekto ang kaluoy sang Manluluwas sa imo balatyagon parte sa imo kaugalingon kag parte sa iban? Ngaa sa banta mo nga ginasugo kita sang Ginuo nga “patawaron ang tanan”? (bersikulo 10). Kon ginabudlayan ka sa pagpatawad, pamensara kon ano ang ginatudlo sang masunod nga mga balasahon parte sa kon paano makabulig ang Manluluwas: Jeffrey R. Holland, “The Ministry of Reconciliation,” Ensign ukon Liahona, Nob. 2018, 77–79; Guide to the Scriptures, “Forgive,” scriptures.ChurchofJesusChrist.org.

Doktrina kag mga Kasugtanan 64:31–34

Ginapangayo sang Dios ang akon tagipusuon kag handa nga panghunahuna.

Nakabatyag ka na bala nga “nagaluya” sa tanan nga “paghimo sang maayo” nga gusto mo malab-ot? Pangitaa ang mensahe sang Ginuo para sa imo sa Doktrina kag mga Kasugtanan 64:31–34. Ano ang buot silingon sang ihatag ang imo “tagipusuon kag handa nga panghunahuna” sa Dios? (bersikulo 34).

Doktrina kag mga Kasugtanan 64:41–43

Ang Sion mangin “[hayahay] sa katawhan.”

Ang [hayahay] “isa ka bandera ukon sulundan kon sa diin nagatipon ang mga tawo sa pag-isa sang katuyuan ukon pagkilala (Guide to the Scriptures, “Ensign,” scriptures.ChurchofJesusChrist.org). Paano ang Sion—ukon ang Simbahan sang Ginuo—nangin pareho sang hayahay sa imo? Pamensara ining iban pa nga mga halimbawa sang mga butang nga ginaalsa, pareho sang hayahay, para bugayan ang katawhan: Numeros 21:6–9; Mateo 5:14–16; Alma 46:11–20. Ano ang ginatudlo sining mga bersikulo sa imo parte sa kon paano ka makabulig sa Simbahan nga mangin hayahay sa lugar nga inyo ginapuy-an? Magpangita sang iban pa nga pamaagi nga ginalaragway sang Ginuo ang Sion sa Doktrina kag mga Kasugtanan 64:41–43.

Captain Moroni Bearing the Title of Liberty [Si Kapitan Moroni nga Nagauyat sang Bandera sang Kahilwayan], ni Gary E. Smith

Doktrina kag mga Kasugtanan 65

“Ihanda ninyo ang dalan sang Ginuo.”

Ginlaragway ni Mateo si Juan Bautista nga ang nagsinggit, “Ihanda ninyo ang dalan sang Ginuo” (Mateo 3:3; tan-awa man sa Isaias 40:3). Sa Doktrina kag mga Kasugtanan 65, naggamit ang Ginuo sang pareho nga lenggwahe para ilaragway ang Iya buluhaton sa ulihing mga adlaw. Ano ang pagpalareho nga imo makita sa ginhimo ni Juan Bautista (tan-awa sa Mateo 3:1–12) kag sa ginapahimo sa aton sang Ginuo sa karon nga panahon? Ano ang imo makita sa sining mga seksyon nga nagainspirar sa imo nga tumanon ang mga propesiya nga unod sini? Pamensara ang mga paagi nga pwede mo “ipahibalo ang dalayawon nga mga buhat sang [Dios]” (bersikulo 4).

Doktrina kag mga Kasugtanan 66

Nahibal-an sang Ginuo ang mga panghunahuna sang akon tagipusuon.

Wala madugay pagkatapos nga magsulod sa Simbahan, ginpangabay ni William E. McLellin si Joseph Smith nga ipahayag ang pagbuot sang Dios para sa iya. Wala makahibalo si Joseph, pero si William may lima ka personal nga mga pamangkot nga iya ginalauman sabton sang Ginuo paagi sa Iya Propeta. Wala kita makahibalo kon ano ang mga pamangkot ni William, pero nahibal-an naton nga ang rebelasyon para sa iya, nga sa karon Doktrina kag mga Kasugtanan 66, nagsabat sang tagsa ka pamangkot sa lubos kag bug-os nga pagkakontento ni William” (“William McLellin’s Five Questions,” Revelations in Context, 138).

Samtang imo ginabasa ang seksyon 66, pamensara kon ano ang nahibal-an sang Ginuo parte sa tagipusuon ni William McLellin kag sa mga kabakala kag tinutuyo sang iya tagipusuon. Paano ginpahayag sang Ginuo nga kilala ka Niya? Kon may bendisyon ka sang patriarka, pamensara nga basahon ini. Samtang ginahimo mo ini, ano ang ginabulig paintiendi sa imo sang Balaan nga Espiritu parte sa pagbuot sang Dios sa imo?

Tan-awa man sa Saints, 1:138–40; Gospel Topics, “Patriarchal Blessings,” topics.ChurchofJesusChrist.org.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 64:8–10.Ang mga kaangtanan sa pamilya nagahatag sang madamo nga mga oportunidad sa pagtuon nga magpatawad. Basi pwede mag-istorya ang mga miyembro sang pamilya kon paano ginbugayan ang inyo pamilya sang pagpatawad sang kada isa. Paano kita ginbuligan sang Manluluwas nga magpatawad sang kada isa? Paano kita “ginapaantos” (bersikulo 8) kon indi kita magpatawad sa iban?

Doktrina kag mga Kasugtanan 64:33.Ano ang gusto sang Amay nga Langitnon nga himuon sang inyo pamilya para ipahanabo ang Iya “dako nga buluhaton”? Basi ini ang pagkadto sa templo, pagpaambit sang ebanghelyo sa kasilingan, ukon paglampuwas sang pagbinaisay. Basi pwede ang tagsa ka miyembro sang pamilya nga magtipon sang magagmay nga mga bagay, pareho sang bato ukon butones ukon parte sang puzzle, kag gamiton ang mga ini bilang simbolo sang “magagmay nga mga butang” nga sarang naton himuon kada adlaw para “[magpasad] sang pundasyon” sa dako nga buluhaton sang Dios. Bilang pamilya, magpili sang isa sining magagmay nga mga butang nga himuon sining semana.

Doktrina kag mga Kasugtanan 66:3Paano mo itudlo ang importansya sang paghinulsol? Pwede ka nga magbutang sang pagkaon sa plato nga wala lubos nga matinloan kag basahon ang mga pulong sang Ginuo kay William McLellin: “Matinlo ka, apang indi lubos.” Dayon pwede mo limpyuhan ang plato kag ipaambit ang pagkaon samtang ginahambalan kon paano ginahimo ni Jesucristo nga posible para sa aton ang mangin matinlo sa espirituhanon.

Doktrina kag mga Kasugtanan 66:10.Paano sundon sang inyo pamilya ang laygay sang Ginuo nga “indi pagpabudlayan ang [inyo] kaugalingon,” ukon pabug-atan sang madamo nga mga hilimuon? Pwede ninyo hambalan ang istorya ni Maria kag Marta (tan-awa sa Lucas 10:38–42), kag hambalan kon paano malikawan sang inyo pamilya nga mabudlayan sang mga butang nga wala sing bili sa wala katapusan.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Mangin yara kag madali palapitan. Ang pila sa pinakamaayo nga tion sa pagtudlo nagasugod bilang mga pamangkot ukon palaligban sa mga tagipusuon sang mga miyembro sang pamilya. Ipahibalo sa mga miyembro sang pamilya paagi sa imo mga pulong kag mga aksyon nga handa ka nga mamati sa ila. (Tan-awa sa Teaching in the Savior’s Way, 16.)

Forgiven [Pinatawad], ni Greg K. Olsen. Gingamit nga may pahanugot. www.GregOlsen.com