libro sang manuskrito sang rebelasyon sa istante

Hunyo 21–27

Doktrina kag mga Kasugtanan 67–70

“Nagabili … sang mga Manggad sang Bilog nga Kalibutan”

Bisan madamo sa mga rebelasyon sa Doktrina kag mga Kasugtanan ang napartiniser sa partikular nga mga tawo sa partikular nga mga sirkumstansya, ini sila “mapuslanon para sa tanan” (“Testimonya sang Dose ka Apostoles sa Kamatuoran sang Libro nga Doktrina kag mga Kasugtanan,” introduksyon sa Doktrina kag mga Kasugtanan). Sa imo pagtuon, pangitaa ang mga kamatuoran kag prinsipyo nga mapuslanon para sa imo.

Isulat Ang Imo Mga Panghunahuna

Halin sang 1828 tubtob 1831, ang Propeta nga si Joseph Smith nagbaton sang madamo nga mga rebelasyon halin sa Ginuo, lakip na ang diosnon nga laygay sa mga indibidwal, mga panulin sa pagdumala sang Simbahan, kag makainspirar nga mga panan-awon sang ulihing mga adlaw. Apang madamo sa mga Santos ang wala makabasa sang mga ini. Ang mga rebelasyon wala pa maimprinta, kag ang pila ka kopya nga ara sinulat sa kamot sa pinanid sang papel nga ginapalibot sa mga miyembro kag ginadala-dala sang mga misyonero.

Dayon, sang Nobyembre 1831, nagtawag si Joseph sang konseho sang mga lider sa Simbahan para hambalan ang pag-imprinta sang mga rebelasyon. Pagkatapos nga pangayuon ang pagbuot sang Ginuo, naghimo ining mga lideres sang plano sa pag-imprinta sang Libro sang mga Kasugoan—ang ginsugdan sang Doktrina kag mga Kasugtanan sa karon. Sa indi madugay ang tanan makabasa na sa ila kaugalingon sang pulong sang Dios nga ginpahayag paagi sa buhi nga propeta, klaro nga ebidensya nga “ang mga yabi sang mga misteryo sang ginharian sang aton Manluluwas sa liwat gintugyan sa tawo.” Sa sini kag madamo nga iban pa nga mga rason, ang mga Santos sadto kag karon nagakabig sining mga rebelasyon nga “nagabili … sang mga manggad sang bilog nga Kalibutan” (Doktrina kag mga Kasugtanan 70, tig-ulo sang seksyon).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 67:1–9; 68:3–6

Ang Dios nagatindog sa tupad sang Iya mga alagad kag sa mga tinaga nga ila ginahambal sa Iya ngalan.

Ang desisyon sa pag-imprinta sang mga rebelasyon nga nabaton ni Joseph Smith daw mahapos lang, pero ang pila sa mga una nga mga lider sang Simbahan indi sigurado kon husto ina nga ideya. Ang isa ka palaligban amo ang indi pagkaperpekto sang lenggwahe nga gingamit ni Joseph Smith sa pagsulat sang mga rebelasyon. Ang rebelasyon sa seksyon 67 nag-abot bilang sabat sinang kabalaka. Ano ang imo matun-an parte sa mga propeta kag rebelasyon sa mga bersikulo 1–9? Ano nga mga panghunahuna ang imo maagom sa 68:3–6?

Doktrina kag mga Kasugtanan 68:1–8

Ang inspirasyon halin sa Balaan nga Espiritu nagapahayag sang pagbuot sang Ginuo.

Ang mga tinaga sa sining mga bersikulo ginsambit samtang si Orson Hyde kag ang iban pa gintawag “nga ibantala ang wala’y katubtuban nga ebanghelyo suno sa Espiritu sang buhi nga Dios, sa tagsa ka katawhan, kag sa tagsa ka duta” (bersikulo 1). Paano ayhan makabulig ang deklarasyon sa bersikulo 4 sa tawo nga ginapadala sa pagwali sang ebanghelyo? Paano magamit ining mga tinaga sa imo? Hunahunaa ang tion sang ikaw “[gintandog] sang Balaan nga Espiritu” (bersikulo 3) sa paghambal ukon paghimo sang isa ka butang. Ano ang imo makita sa sining mga bersikulo nga makahatag sa imo sang kompiyansa nga sundon ang espirituhanon nga mga pagpabatyag?

Doktrina kag mga Kasugtanan 68:25–28

Ang mga ginikanan responsable sa pagtudlo sang ila mga kabataan.

Si Pangulong Joy D. Jones, Pangkabilogan nga Pangulo sang Primary, nagtudlo, “[Isa ka] yabi agud buligan ang kabataan nga mangin mapag-on batok sa sala amo ang magsugod sa pinakabata nga edad agud mapinalanggaon sila nga tudloan sang pundasyon nga mga doktrina kag prinsipyo sang ebanghelyo—halin sa balaan nga mga kasulatan, sa Mga Artikulo sang Pagtuo, sa Para sa Kusog sang mga Lamharon nga buklet, mga kanta sa Primary, mga himno, kag sa aton kaugalingon nga mga testimonya—nga magadala sang mga kabataan sa Manluluwas” (“A Sin-Resistant Generation,” Ensign ukon Liahona, Mayo 2017, 88).

Suno sa Doktrina kag mga Kasugtanan 68:25–28, ano ang pila sa “pundasyon nga mga doktrina sang ebanghelyo” nga ginmitlang ni Pangulong Jones ang dapat itudlo sang mga ginikanan sa ila mga kabataan? Ngaa ginhatag ining importante nga responsibilidad sa mga ginikanan? Ano ang imo isiling sa ginikanan nga pamatyag niya indi sia kalipikado sa pagtudlo sining mga butang sa iya mga kabataan?

pamilya nga nagatuon

Ang puluy-an amo ang pinakamaayo nga lugar para sa kabataan nga magtuon sang ebanghelyo.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 67:10–14.Paano kita ginapunggan sang kahisa, kahadlok, kag bugal nga mangin mas malapit sa Ginuo? Ngaa nga ang “kinaugali nga tawo” indi makabatas sa presensya sang Ginuo? (bersikulo12; tan-awa man sa Mosias 3:19). Ano ang aton makita sa sining mga bersikulo nga nagainspirar sa aton nga “magpadayon nga may pagpasensya tubtob nga mangin perpekto [kita]”? (bersikulo 13).

Doktrina kag mga Kasugtanan 68:3–4.Pwede ang mga miyembro sang pamilya mag-istorya sang mga eksperiyensya nga nagpabakod sang ila pagtuo nga ang mga pulong sang mga alagad sang Ginuo amo ang “mangin pagbuot sang Ginuo,” “mangin hunahuna sang Ginuo,” kag “mangin gahum sang Dios tubtob sa kaluwasan” (bersikulo 4). Ukon pwede sila magpangita sang pinakabag-o nga mga mensahe sa pangkabilogan nga komperensya nga magamit sa kabudlayan nga mahimo ginaatubang sang inyo pamilya.

Doktrina kag mga Kasugtanan 68:25–35.Ining mga bersikulo nagaunod sang importante nga laygay sa “mga pumuluyo sang Sion” (bersikulo 26). Ano ang ginainspirar sa aton nga pauswagon pagkatapos nga basahon ining mga bersikulo? Basi mangin masadya ang paghimo sang mga drowing nga nagalarawan sang pila sa mga prinsipyo sa sining mga bersikulo kag itago ini sa bilog nga balay. Dayon, sa maabot nga inadlaw kon may makakita sang litrato, pwede ninyo ina gamiton nga oportunidad nga magtudlo sinang prinsipyo. Ngaa ang puluy-an amo ang pinakamaayo nga lugar para sa kabataan nga magtuon sining mga butang?

Doktrina kag mga Kasugtanan 69:1–2.Ginpadala si Oliver Cowdery sa Missouri upod ang sinulat nga mga kopya sang mga rebelasyon sang Propeta nga inug-imprinta, upod ang kuwarta nga ibulig tukod sang Simbahan didto. Ano ang laygay nga ginhatag sang Ginuo sa bersikulo 1 parte sa biyahe ni Oliver? Ngaa importante nga mag-upod sa mga tawo nga “matuod kag masaligan”? (bersikulo 1). Sang san-o kita gin-impluwensyahan sang mga abyan nga maghimo sang maayo ukon malain nga mga desisyon? Paano kita mangin maayo nga impluwensya sa iban?

Doktrina kag mga Kasugtanan 70:1–4.Ginhatagan sang Ginuo ang pila ka mga elder sang responsibilidad para dumalahan ang pag-imprinta sang mga rebelasyon. Bisan nga wala kita sinang partikular nga responsibilidad, sa ano kita makabig nga “mga tulugyanan sang mga rebelasyon kag mga kasugoan”? (bersikulo 3).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan no. 66.

Pagpauswag sang Aton Pagpanudlo

Gamita ang balaan nga mga kasulatan sa aton pagpangabuhi. Matapos nga basahon ang isa ka dinalan sa balaan nga kasulatan, agdaha ang mga miyembro sang pamilya nga gamiton ini sa ila mga kabuhi. Halimbawa, pwede mo sila hagaron nga manumdom sang pareho nga mga sitwasyon nga mahimo nila atubangon nga nagalakip sang pareho nga mga prinsipyo sang ebanghelyo.

imprintahan ni Grandin

Ang Libro sang mga Kasugoan, ang ginsugdan sang Doktrina kag mga Kasugtanan, gin-imprinta sa imprintahan nga pareho sini.