Dear to the Heart of the Shepherd [Malahalon sa Tagipusuon sang Manugpahalab], ni Simon Dewey

Hunyo 28–Hulyo 4

Doktrina kag mga Kasugtanan 71–75

“Wala sang Armas nga Ginhimo batok sa Inyo ang Magmadinalag-on”

Si Elder Quentin L. Cook nagtudlo, “Ang impluwensya sang Balaan nga Espiritu masami nga nagaupod sa indibidwal nga pagtuon sang balaan nga mga kasulatan kag pangamuyo sa balay” (“Deep and Lasting Conversion to Heavenly Father and the Lord Jesus Christ,” Ensign ukon Liahona, Nob. 2018, 10).

Isulat Ang Imo Mga Panghunahuna

Halin sang bata pa sia, nagpangatubang na si Joseph Smith sang mga kritiko—bisan mga kaaway—samtang iya ginatinguhaan nga himuon ang buluhaton sang Dios. Pero sigurado nga nangin pinakamasakit sang manugtapos ang 1831 sang nagsugod si Ezra Booth sa pagpakanubo sang Simbahan, tungod sa sini nga hugada ang kritiko isa ka tumuluo sang una. Nakita ni Ezra si Joseph nga gingamit ang gahum sang Dios para paayuhon ang isa ka babayi. Ginhagad sia nga updan si Joseph sa una nga pag-usisa sa duta sang Sion sa Missouri. Pero sugod sadto nawad-an na sia sing pagtuo, kag para gub-on ang Propeta, nagpagwa sang serye sang mga sulat sa isa ka peryodiko sa Ohio. Kag ang iya mga pagpaninguha daw nagabunga: “ang di-maayo nga mga balatyagon … nagluntad batok sa Simbahan” sa sina nga lugar (Doktrina kag mga Kasugtanan 71, tig-ulo sang seksyon). Ano ang dapat himuon sang mga tumuluo sa amo sina nga sitwasyon? Samtang indi lang isa ang husto nga sabat sa tagsa ka sitwasyon, daw masami—lakip na sa sining kaso sang 1831—bahin sang sabat sang Ginuo amo ang pangapinan ang kamatuoran kag tadlungon ang sala nga impormasyon paagi sa “pagbantala [sang] ebanghelyo” (bersikulo 1). Huo, ang buluhaton sang Ginuo may mga kritiko gid pirme, pero sa ulihi, “wala sang armas nga ginhimo batok [diri] ang magmadinalag-on” (bersikulo 9).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 71

Pahipuson sang Ginuo ang mga kritiko sang Iya buluhaton sa Iya kaugalingon nga tion.

Mahimo nga nagakabalaka kita kon makabati sang mga tawo nga nagapakanubo ukon nagatamay sang Simbahan ukon sa mga lideres sini, ilabi na gid kon nahadlok kita nga ang mga tawo nga kilala naton kag ginapalangga maimpluwensyahan sinang kritisismo. Sang matabo ang pareho sina sa Ohio sang 1831 (tan-awa sa tig-ulo sang seksyon sang Doktrina kag mga Kasugtanan 71), ang mensahe sang Ginuo kay Joseph Smith kag Sidney Rigdon isa ka mensahe sang pagtuo, indi sang kahadlok. Samtang imo ginatun-an ang Doktrina kag mga Kasugtanan 71, ano ang imo nakita nga nagapatubo sang imo pagtuo sa Ginuo kag sa Iya buluhaton? Ano ang nanamian mo sa instruksyon nga ginhatag sang Ginuo sa Iya mga alagad sa sining sitwasyon?

Doktrina kag mga Kasugtanan 72

Ang mga bishop mga tulugyanan sang espirituhanon kag temporal nga mga hilikuton sa ginharian sang Ginuo.

Sang si Newel K. Whitney gintawag nga mag-alagad bilang ikaduha nga bishop sang Simbahan, ang iya mga tulumanon may diutay nga kinalain sa iya sang mga bishop sa karon. Halimbawa, gindumalahan ni Bishop Whitney ang pagkonsagrar sang propiyedad kag ang pahanugot nga magplastar sa Missouri, sa duta sang Sion. Pero samtang imo ginabasa ang parte sa iya palangakuan kag mga tulumanon sa Doktrina kag mga Kasugtanan 72, mahimo nga matalupangdan mo ang pila ka koneksyon sa mga ginahimo sang mga bishop sa karon—bisan man lang sa katuyoan, kon indi gid man sa detalye, sang ila mga tulumanon. Halimbawa, sa ano nga mga paagi ka “nagahatag sang pagsaysay” sa imo bishop? (bersikulo 5). Paano ang bishop “[nagadumala] sang balay-talagoan” kag nagabaton sang mga pagkonsagrar sang mga miyembro sa ward? (tan-awa sa mga bersikulo 10, 12). Paano ka ginbuligan sang bishop?

Gindumalahan ni Newel K. Whitney ang balay-talagoan sang obispo.

Doktrina kag mga Kasugtanan 73

Sarang ako magpangita sang mga oportunidad sa pagpaambit sang ebanghelyo.

Matapos nga makabalik sanday Joseph Smith kag Sidney Rigdon halin sa ila malip-ot nga misyon sang pagpangwali para kaayuhon ang halit nga gintuga ni Ezra Booth (tan-awa sa Doktrina kag mga Kasugtanan 71), ginsilingan sila sang Ginuo nga magbalik sa buluhaton sang paglubad sang Biblia (tan-awa sa Guide to the Scriptures, “Joseph Smith Translation”). Pero gusto man Niya nga padayunon nila ang pagwali sang ebanghelyo. Samtang imo ginabasa ang Doktrina kag mga Kasugtanan 73, pamensara kon paano mo himuon ang pagpangwali sang ebanghelyo nga nagapadayon, “mahimo” (bersikulo 4)—ukon posible—nga bahin sang imo kabuhi upod sa imo iban pa nga mga responsibilidad.

Doktrina kag mga Kasugtanan 75:1–12

Ginabugayan sang Ginuo ang mga matutom nga nagabantala sang Iya ebanghelyo.

Bilang sabat sa sugo nga “maglakat sa bilog nga kalibutan” sa pagwali sang ebanghelyo (Doktrina kag mga Kasugtanan 68:8), madamo nga matinuohon nga mga elder ang nagpangayo sang dugang nga impormasyon kon sa ano nga paagi gusto sang Ginuo nga tumanon nila ang ining sugo. Ano nga mga tinaga kag mga dinalan ang imo makita sa Doktrina kag mga Kasugtanan 75:1–12 nga nagabulig sa imo nga maintiendihan kon paano iwali ang ebanghelyo sing epektibo? Ano nga mga bugay ang ginapromisa sang Ginuo sa matutom nga mga misyonero? Pamensara kon paano magamit sa imo ining mga panulin kag mga bugay samtang imo ginapaambit ang ebanghelyo.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 71.Ano ang ginsugo nga himuon nanday Joseph Smith kag Sidney Rigdon sang ginapakalain sang iban ang Simbahan kag ang mga lideres sini? Paano naton “ihanda ang alagyan” para sa mga tawo nga magabaton sang mga rebelasyon sang Dios? (Doktrina kag mga Kasugtanan 71:4).

Doktrina kag mga Kasugtanan 72:2.Paano ginbugayan sang mga bishop ang aton pamilya? Ano ang ginapangayo sang aton bishop nga aton himuon, kag paano naton sia sakdagon? Basi pwede maghimo ang imo pamilya sang kard nga nagapasalamat sa inyo bishop sa iya serbisyo.

Doktrina kag mga Kasugtanan 73:3–4.Ano ang makuha sang inyo pamilya sa pagtuon parte sa Paglubad ni Joseph Smith sang Biblia? (tan-awa sa Guide to the Scriptures, “Joseph Smith Translation”). Pwede ninyo nga tun-an ang pila ka mga dinalan nga ginliwat sa Paglubad ni Joseph Smith kag hambalan ang malahalon nga mga kamatuoran nga ginpahayag sang Ginuo paagi sa Propeta.  

Doktrina kag mga Kasugtanan 74:7.Ano ang ginatudlo sa aton sining bersikulo parte kay Jesucristo kag sa magagmay nga kabataan?

Doktrina kag mga Kasugtanan 75:3–5, 13, 16.Mahimo mo nga buligan ang imo pamilya nga maintiendihan kon paano gusto sang Ginuo nga alagaran naton Sia paagi sa paghambalanay parte sa kinalain sang mangin “matamad” kag “magpangabudlay sa [aton] ikasarang.” Basi pwede ka nga magpili sang pila ka mga ulubrahon sa balay kag hagaron ang mga miyembro sang pamilya nga ipakita ang paghimo sining mga ulubrahon sing tinamaran kag dayon sa ila naman tanan nga ikasarang. Paano naton serbisyuhan ang Ginuo sa tanan naton nga ikasarang? Suno sa Doktrina kag mga Kasugtanan 75:3–5, 13, 16, ano ang Iya ginapromisa sa Iya matutom nga mga alagad?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Let Us All Press On [Ang Hilikuton sang Ginuo Buhaton],” Mga Himno kag mga Ambahanon sang Kabataan, no. 10–11.

Pagpauswag sang Personal nga Pagtuon

Magpangita sang nagainspirar nga mga tinaga kag mga dinalan. Sa imo pagbasa, ang Espiritu mahimo nga magdala sa imo atensyon sang pila ka mga dinalan ukon bersikulo. Pamensara ang pagsulat sang mga tinaga ukon dinalan halin sa Doktrina kag mga Kasugtanan 71–75 nga nagainspirar sa imo.

Ilustrasyon sang isa ka pamatan-on kaupod ang lider sa priesthood ni D. Keith Larson