Christ and the Rich Young Ruler [Si Cristo kag ang Manggaranon nga Lamharon nga Manugdumala], ni Heinrich Hofmann

Hulyo 19–25

Doktrina kag mga Kasugtanan 81–83

Kon sa Diin “Madamo ang Ginhatag, Madamo ang Ginapangayo”

Samtang imo ginatun-an ang Doktrina kag mga Kasugtanan 81–83, tandai ang mga prinsipyo nga makabulig sa imo nga maghimo sang maayo sa imo pamilya, sa imo kaabyanan, kag sa iban.

Isulat Ang Imo Mga Panghunahuna

Sang Marso 1832, gintawag sang Ginuo si Jesse Gause nga mangin manuglaygay ni Joseph Smith sa Pangulohan sang Mataas nga Pagkapari (nga karon ginatawag na nga Unang Pangulohan). Ang Doktrina kag mga Kasugtanan 81 rebelasyon kay Brother Gause, nga nagahatag sang instruksyon sa iya sa bag-o niya nga palangakuan kag nagapromisa sa iya sang mga bugay sa pagserbisyo sing matutom. Ugaling wala magserbisyo sing matutom si Jesse Gause. Gani gintawag si Frederick G. Williams para magbulos sa iya, kag ang ngalan ni Brother Gause gin-islan sang ngalan ni Brother Williams sa rebelasyon.

Daw gamay lang ini nga detalye, pero nagakahulugan ini sang importante nga kamatuoran: Kalabanan sa mga rebelasyon sa Doktrina kag mga Kasugtanan nagatumod sa partikular nga mga tawo, pero sarang gid kita nga makapangita sang mga paagi nga magamit ini sa aton kaugalingon (tan-awa sa 1 Nefi 19:23). Ang laygay sang Ginuo kay Frederick G. Williams nga “pabaskoga ang mga tuhod nga maluya” makaliso sang aton mga kaisipan sa mga tawo nga pwede naton pabaskugon (Doktrina kag mga Kasugtanan 81:5). Ang laygay sang Ginuo sa mga miyembro sang United Firm nga “magpromisa kamo paagi sining kasugtanan” para masabat ang temporal nga mga panginahanglan sang Simbahan sarang nga magligso sang aton mga kaisipan sa aton kaugalingon nga mga kasugtanan. Kag ang promisa sang Ginuo nga Sia “mapilitan nga magtuman sang mga promisa kon ginahimo ninyo ang akon ginasiling” makapahanumdom sa aton sang Iya mga promisa sa aton kon nagatuman kita (Doktrina kag mga Kasugtanan 82:10, 15). Amo gid sina dapat, kay ang Ginuo nagsiling man, “Kon ano ang ginahambal ko sa isa ginahambal ko sa tanan” (bersikulo 5).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 81

Sarang ako nga mangin matinuohon sa paghimo sang ginapangayo sang Ginuo sa akon.

Nagapamensar ka bala kon kaisa kon paano mo tumanon ang importante nga mga responsibilidad sa imo kabuhi? Bilang manuglaygay ni Propetang Joseph Smith, sigurado nga madamo si Frederick G. Williams sang importante nga mga responsibilidad. Sa seksyon 81, ginlaygayan sia sang Ginuo kon paano tumanon ang mga ini. Ano ang imo makita sa sining seksyon nga makabulig sa imo nga tumanon ang mga responsibilidad nga ginhatag sa imo sang Ginuo?

Ari ang pila sa mga pamangkot para buligan ka nga binagbinagon ang bersikulo 5:

• Ano ang pila sa mga paagi nga mangin “maluya” ang isa ka tawo? Ano ang buot silingon sang “buligi” ang mga maluya?

• Ano ayhan ang rason nga “magpalamuypoy” ang mga kamot sang tawo? Paano naton “ibayaw” inang mga kamot?

• Ano ayhan ang buot silingon sang “mga tuhod nga maluya”? Paano naton “pabaskugon” inang mga may maluya nga mga tuhod?

Basi ang pagtuon sining bersikulo makapadumdom sa imo sang tawo nga pwede mo “buligan,” “bayawon,” ukon “pabaskugon.” Ano ang imo himuon para magminister sa sina nga tawo?

Ang Unang Pangulohan: Sidney Rigdon, Joseph Smith, Frederick G. Williams

Doktrina kag mga Kasugtanan 82:1–7

Ginaimbitar ako sang Ginuo nga maghinulsol kag sikwayon ang akon mga sala.

Samtang imo ginabasa ang Doktrina kag mga Kasugtanan 82:1–7, pamensara ang paghimo sang duha ka lista sang mga butang nga imo matun-an: mga paandam parte sa sala kag mga kamatuoran parte sa kapatawaran. Paano makabulig sa imo ining mga kamatuoran nga pakigbatuan ang mga tentasyon sang kaaway?

Doktrina kag mga Kasugtanan 82:8–10

Ang mga kasuguan amo ang akon kaluwasan kag proteksyon.

Kon ikaw—ukon ang isa mo ka kilala—nakapanghunahuna kon ngaa nagahatag ang Ginuo sang damo-damo nga mga kasuguan, mahimo nga ang Doktrina kag mga Kasugtanan 82:8–10 makabulig. Ano nga mga panghunahuna sa sining mga bersikulo ang makabulig sa imo sa pagpaathag sa isa ka tawo kon ngaa ginapili mo nga sundon ang mga kasuguan sang Ginuo? Mahimo mo man pamensaron kon paano ginbag-o sang Iya mga kasuguan ang imo kabuhi. Ano ang imo matun-an parte sa Ginuo samtang imo ginabasa ang bersikulo 10?

Tan-awa man sa Doktrina kag mga Kasugtanan 130:20–21.

Doktrina kag mga Kasugtanan 83

“Dapat suportahan ang mga balo kag mga ilo.”

Sang Abril 1832, suno sa instruksyon sang Ginuo, nagbiyahe si Joseph Smith sing halos 800 ka milya para bisitahan ang mga Santos nga nagtipon sa Missouri (tan-awa sa Doktrina kag mga Kasugtanan 78:9). Ang isa ka komunidad nga iya ginbisitahan nagalakip sang mga balo nga nagasagod sang ila mga kabataan nga sila lang. Upod sa ila amo sanday Phebe Peck kag Anna Rogers, nga kilala sang Propeta sing personal. Sa Missouri sang tinuig sang 1830, ang mga layi sang estado naghatag sa mga balo sang limitado nga kinamatarong sa propiyedad sang ila nagtaliwan nga mga bana. Ano ang imo matun-an sa seksyon 83 sa kon ano ang balatyagon sang Ginuo parte sa mga balo kag mga ilo? May kilala ka bala sa amo sini nga sitwasyon nga makabenepisyo sa imo pagpalangga kag pag-ulikid?

Tan-awa man sa Isaias 1:17; Santiago 1:27.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 81:3.Pwede mo hatagan sang papel nga korte tagipusuon ang mga miyembro sang pamilya kag imbitaron sila nga magdrowing ukon magsulat sang kon ano ang ila gusto pangamuyoan. Hambali kon ano ang kahulugan sang magpangamuyo “pirme, sing mabaskog kag sa imo tagipusuon.”

Doktrina kag mga Kasugtanan 81:5.Para matun-an ang mga prinsipyo sa sining bersikulo, basi pwede nga maghatag sang mga halimbawa ang mga miyembro sang pamilya sang nakabatyag sila nga “maluya” ukon “nagapalamuypoy” kag may tawo nga nagbulig ukon nagpabaskog sa ila.   Hambali kon paano makaserbisyo sing regular ang inyo pamilya sa isa kag isa sa simple nga mga paagi.

Doktrina kag mga Kasugtanan 82:8–10.Basi makabulig ang simple nga hampang para makabatyag ang imo pamilya sang kapasalamatan sa mga kasuguan sang Dios. Isa ka miyembro sang pamilya ang sarang maghatag sang mga instruksyon para buligan ang miyembro sang pamilya nga gintabunan ang mga mata nga magpalaman sa tinapay ukon magsuhot sa mga nagabalabag. Magpamensar sang bagay nga masadya kag bag-o! Dayon hambali kon paano nangin pareho sa mga instruksyon sa hampang ang mga kasuguan sang Dios.

Doktrina kag mga Kasugtanan 82:18–19.Ano ang mahimo sang tagsa ka miyembro sang pamilya para “[pauswagon ang] iya talento” kag “[mag-angkon] sang iban pa nga mga talento”? Basi mangin masadya ang maghiwat sang palagwaon sang mga talento sa pamilya. Magpamensar sang mga paagi para ilakip ang mga talento nga indi dayon makita (pareho sang espirituhanon nga mga bugay; tan-awa sa Doktrina kag mga Kasugtanan 46:11–26). Paano naton gamiton ang aton mga talento kag ipaambit ang mga butang nga ara sa aton para bugayan ang aton pamilya kag mga kasilingan? Ano ang buot silingon sang gamiton ang aton mga talento nga “may mata nga tampad sa himaya sang Dios”?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Did You Think to Pray [Sang Magbiya Ka sa Kwarto]?” Mga Himno kag mga Ambahanon sang Kabataan, no. 48–49; tan-awa man sa “Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan.”

Pagpauswag sang Aton Pagpanudlo

Magpamangkot sang mga nagatulod sa aksyon. Pamensara ang mga pamangkot nga nagatulod sa mga miyembro sang imo pamilya nga binagbinagon kon paano nila ipangabuhi ang ebanghelyo sing mas lubos. “Masami indi ini mga pamangkot sa diskusyon; para ini sa personal nga pagbinagbinag” (Teaching in the Savior’s Way, 31).

Ilustrasyon ni Jesus nga nagaayo sang tawo ni Dan Burr