Going Home [Nagapapuli], ni Yongsung Kim

Hulyo 12–18

Doktrina kag mga Kasugtanan 77–80

“Giyahan Ko Kamo”

Ginsiling sang Ginuo kay Joseph Smith nga Sia “magahambal sa [iya] mga dulunggan sang mga pulong sang kaalam” (Doktrina kag mga Kasugtanan 78:2). Ano nga mga pulong sang kaalam ang imo nabaton samtang imo ginatun-an ang Doktrina kag mga Kasugtanan 77–80?

Isulat Ang Imo Mga Panghunahuna

Wala pa magduha ka tuig pagkatapos nga ginpanumbalik ang Simbahan ni Jesucristo, nagdako na ini sa masobra 2,000 ka mga miyembro kag madasig nga nagalapta. Sang Marso 1832 nakigkita si Joseph Smith sa iban pa nga mga lideres sang Simbahan “para hambalan ang mga buluhaton sa Simbahan”: ang kakinahanglan sa pag-imprinta sang mga rebelasyon, pagbakal sang duta nga tilipunan, kag ang pag-atipan sang mga imol (tan-awa sa Doktrina kag mga Kasugtanan 78, tig-ulo sang seksyon). Para masabat ining mga panginahanglan, nagtawag ang Ginuo sang pila lang ka mga lider sa Simbahan para matukod ang United Firm, ang grupo nga magbinuligay para “isulong ang kawsa” sang Ginuo (bersikulo 4) sa sining mga lugar. Pero bisan sa sining administratibo nga mga hilikuton, gintutokan sang Ginuo ang mga butang sa wala katapusan. Sa katapusan, ang katuyuan sang imprintahan ukon balay-talagoan—pareho sang tanan sa ginharian sang Dios—amo nga ihanda ang Iya mga anak sa pagbaton sang “isa ka lugar sa selestiyal nga kalibutan” kag sang “mga manggad sang wala’y katapusan” (mga bersikulo 7, 18). Kag kon ang inang mga bugay mabudlay hangpon sa karon, sa tunga sang kasakuon sang adlaw-adlaw nga kabuhi, ginapasalig Niya kita, “Magkalipay kamo, kay giyahan ko kamo” (bersikulo 18).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 77

Ipahayag sang Dios ang Iya mga misteryo sa mga nagahandum nga mahibal-an ang mga ini.

Dose ka tuig pagkatapos sang Unang Panan-awon, ang imbitasyon sa Santiago 1:5 nga “magpangayo sa Dios” padayon nga naggiya kay Joseph Smith kon kulang sia sa kaalam. Kon may mga pamangkot sia kag si Sidney Rigdon parte sa libro nga Bugna samtang ginaobra nila ang inspirado nga paglubad sang Biblia, natural nga nagapangayo si Joseph sang kaalam halin sa Dios. Samtang imo ginabasa ang Doktrina kag mga Kasugtanan 77, pamensara nga isulat ang imo mga panghunahuna parte sa nagakaigo nga mga kapitulo sa libro nga Bugna.

Dugang pa, binagbinaga kon paano mo sundon ang ehemplo sang Propeta nga si Joseph samtang nagatuon ka sang balaan nga mga kasulatan. Mahimo mo nga pamangkuton ang Amay nga Langitnon, “Ano ang kinahanglan ko nga maintiendihan?”

Translation of the Bible [Paglubad sang Biblia], ni Liz Lemon Swindle

Doktrina kag mga Kasugtanan 78

Ano ang United Firm?

Ang United Firm gintukod para dumalahan ang publikasyon kag mga negosyo sang Simbahan sa Ohio kag Missouri. Nalakip diri sila ni Joseph Smith, Newel K. Whitney, kag ang iban pa nga lideres sang Simbahan nga nagtipon sang ila mga pondo para masabat ang temporal nga mga panginahanglan sang nagadako nga Simbahan. Ang masubo, nalubong sa utang ang United Firm kag gindula sang 1834 sang indi na gid matatapan ang mga utang.

Doktrina kag mga Kasugtanan 78:1–7

Makabulig ako nga “isulong ang kawsa” sang Simbahan.

Siling sang Ginuo kay Joseph Smith kag sa iban pa nga lideres sang Simbahan nga ang pagdumala sang balay-talagoan kag imprintahan makabulig nga “isulong ang kawsa, nga inyo ginatinguhaan” (Doktrina kag mga Kasugtanan 78:4). Ano sa mahambal mo ang “kawsa” sang Simbahan? Binagbinaga ini samtang imo ginabasa ang Doktrina kag mga Kasugtanan 78:1–7. Basi ang pagpanumdom parte sa sining mga bersikulo makaimpluwensya sa paagi nga imo ginatuman ang imo tulumanon sa Simbahan ukon ang imo pagserbisyo sa imo pamilya. Paano ang imo pagserbisyo “[makasulong sang] kawsa” sang Ginuo? Paano sini ginahanda ang “isa ka lugar sa selestiyal nga ginharian” para sa imo? (bersikulo 7).

Doktrina kag mga Kasugtanan 78:17–22

Giyahan ako sang Ginuo.

Nagabatyag ka bala nga daw pareho sang bata diutay, ayhan tungod sang isa ka butang nga “indi [mo] pa mahangpan” ukon “indi mabatas”? (Doktrina kag mga Kasugtanan 78:17–18). Magpangita sang laygay sa sining mga bersikulo nga makabulig sa imo nga “magkasadya” (bersikulo 18) sa amo nga mga tinion. Ngaa sa banta mo nga ginatawag kon kaisa sang Ginuo ang Iya mga sumulunod nga “magagmay nga kabataan”? (bersikulo 17). Mahimo mo man binagbinagon kon paano ayhan ang Ginuo “nagagiya sa imo” (bersikulo 18).

Doktrina kag mga Kasugtanan 79–80

Ang tawag nga magserbisyo sa Dios mas makahulugan sangsa kon diin ako nagaserbisyo.

Parte sa Doktrina kag mga Kasugtanan 80, nagtudlo si Elder David A. Bednar, “Ayhan isa sa mga leksyon nga ginatudlo sang Manluluwas sa aton sa sining rebelasyon amo nga ang tulumanon nga magtrabaho sa partikular nga lugar kinahanglanon kag importante pero ikaduha lamang sa tawag nga magtrabaho” (“Called to the Work,” Ensign ukon Liahona, Mayo 2017, 68). Hunahunaa ang imo karon kag nagliligad nga mga tulumanon sa Simbahan. Ano nga mga eksperiyensya ang nagbulig sa imo nga matun-an nga ang mga pulong ni Elder Bednar matuod? Ano nga dugang nga mga leksyon nga imo makita sa Doktrina kag mga Kasugtanan 79–80 ang makabulig sa tawo nga bag-o lamang nakabaton sang bag-o nga calling?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 77:2.Pagkatapos nga basahon ining bersikulo, pwede nga magdrowing ang mga miyembro sang pamilya sang paborito nila nga “kasapatan, … nagakamang nga mga sapat, … [ukon] kapispisan sa kahanginan” nga gintuga sang Dios. Ano ang aton matun-an parte sa mga gintuga sang Dios sa sining bersikulo? (tan-awa man sa Doktrina kag mga Kasugtanan 59:16–20). Pwede man kamo magkanta sang kanta parte sa mga gintuga sang Dios , kag i-display ang larawan nga upod sining outline.

Doktrina kag mga Kasugtanan 77:14.Ginapaathag sining bersikulo nga ginkaon ni Juan ang libro nga nagasimbolo sang iya misyon nga tipunon ang Israel. Ano ang ginapanugyan sang simbolismo sang pagkaon parte sa kon paano naton atubangon ang aton papel sa pagtipon sang Israel ukon sa paghimo sang iban pa nga mga butang nga gusto ipahimo sa aton sang Ginuo? Ari ang pila sa balaan nga mga kasulatan kon sa diin ang pagkaon gingamit sa pagtuon sang espirituhanon nga kamatuoran: Juan 6:48–51; 2 Nefi 32:3; Moroni 4. Basi pwede man kamo magluto sang paborito kaunon sang inyo pamilya para kan-on sing ululupod samtang ginahambalan ninyo ini.

Doktrina kag mga Kasugtanan 78:17–19.Pwede nga drowingon sang mga miyembro sang pamilya ang mga bugay halin sa Dios nga ila ginapasalamatan. Ano ang aton ginahimo para ipabutyag ang aton pagpasalamat sa sining mga bugay? Mahimo man ninyo hambalan kon paano ginasunod sang inyo pamilya ang laygay nga batunon ang “tanan nga butang nga may pagpasalamat” (bersikulo 19). Ano ang ginapromisa sang Ginuo sa mga nagahimo sini?

Doktrina kag mga Kasugtanan 79:1.Ipaambit ang imo testimonya parte sa “gahum” nga imo nabaton sang gin-ordinan ka ukon ginpain sa mga calling sa Simbahan. Ano nga partikular nga mga regalo kag inspirasyon ang ginbugay sang Ginuo sa imo samtang nagaserbisyo ka?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Count Your Blessings [Kon sa Balod sang Kabuhi],” Mga Himno kag mga Ambahanon sang Kabataan, no. 8–9.

Pagpauswag sang Aton Pagpanudlo

Magdrowing sang litrato. Bilang pamilya, pwede kamo nga magbasa sang pila lang ka mga bersikulo kag dayon hatagan sang tiyempo ang mga miyembro sang pamilya nga magdrowing sang butang nga may koneksyon sa ila nabasa. I-display ang mga litrato sa palibot sang inyo balay para padumdumon ang imo pamilya sang mga prinsipyo nga inyo natun-an.

God’s Garden [Ang Hardin sang Dios], ni Sam Lawlor