“Hulyo 5–11. Doktrina kag mga Kasugtanan 76: ‘Dako ang Mangin Ila Padya kag Wala’y Katapusan ang Mangin Ila Himaya,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)
“Hulyo 5–11. Doktrina kag mga Kasugtanan 76,” Dali, Magsunod sa Akon—Para sa Mga Indibidwal kag Mga Pamilya: 2021
Refuge [Palasilungan], ni Shaelynn Abel
Hulyo 5–11
Doktrina kag mga Kasugtanan 76
“Dako ang Mangin Ila Padya kag Wala’y Katapusan ang Mangin Ila Himaya”
Sa seksyon 76, ginpabutyag sang Ginuo kon daw ano kadako sang Iya luyag nga ipahayag ang kamatuoran sa aton (tan-awa sa mga bersikulo 7–10). Basaha ang balaan nga mga kasulatan nga may pagtuo nga sarang Niya kag Iya ipahayag sa imo “ang mga butang sang Dios” (bersikulo 12) nga kinahanglan mo mahibal-an. Dayon isulat ang mga panghunahuna nga imo mabaton “samtang yara [ka] pa sa Espiritu” (mga bersikulo 28, 80, 113).
Isulat Ang Imo Mga Panghunahuna
“Ano ang matabo sa akon pagkatapos ko nga mapatay?” Halos tagsa ka relihiyon sa kalibutan nagasabat sining pamangkot sa sini ukon sina nga paagi. Sa mga siglo, madamo nga Kristiyano nga mga tradisyon, nga nagasandig sa mga pinanudlo sa Biblia, ang nagtudlo parte sa langit kag impiyerno, sang paraiso para sa matarong kag pag-antos para sa malain. Pero mahimo gid bala ayhan nga tungaon ang bilog nga tawhanon nga pamilya sa maayo kag malain lang gid? Ano gid bala ang kahulugan sang tinaga nga langit? Sang Pebrero 1832, si Joseph Smith kag Sidney Rigdon nagpalibog kon wala na bala sang dapat pa mahibal-an parte sa sining topiko (tan-awa sa Doktrina kag mga Kasugtanan 76, tig-ulo sang seksyon).
May ara pa gid man. Samtang ginabinagbinag ining mga butang, “gintandog [sang Ginuo] ang mga mata sang [ila] mga paghangop kag nabuksan ang mga ini” (bersikulo 19). Si Joseph kag Sidney nakabaton sang rebelasyon nga tama ka makakilibot, tama kasangkad, tama ka sanag, nga gintawag lamang ini sang mga Santos nga “ang Panan-awon.” Ginbuksan sini ang mga bintana sang langit kag ginhatagan ang mga anak sang Dios sang tama kasangkad nga panan-awan sa wala katapusan. Ginpahayag sang panan-awon nga ang langit mas matahum kag mas malapad kag mas nagalakip sangsa ginahunahuna sang kalabanan sang una. Ang Dios mas maluluy-on kag matarong sangsa aton sarang mahangpan. Kag ang mga anak sang Dios may wala katapusan nga kapalaran nga mas mahimayaon sangsa sarang naton mahunahuna.
Mga Ideya para sa Personal nga Pagtuon sang Balaan nga mga Kasulatan
Doktrina kag mga Kasugtanan 76
Ang kaluwasan nagaabot paagi kay Jesucristo, ang Anak sang Dios.
Sang mabasa ni Wilford Woodruff ang panan-awon nga ginlaragway sa seksyon 76, nagsiling sia, “Nakabatyag ako sang mas dako nga pagpalangga sa Ginuo sangsa nahimo ko na sa bilog ko nga kabuhi” (tan-awa sa “Mga Tingug sang Pagpanumbalik” sa katapusan sining outline). Mahimo nga may pareho ka nga mga balatyagon samtang imo ginabasa ang ining rebelasyon. Kon hunahunaon, wala sa mahimayaon nga mga bugay nga ginlaragway sa seksyon 76 ang mangin posible kon wala ang Manluluwas. Basi pwede mo tan-awon ang tagsa ka bersikulo sa seksyon 76 nga nagamitlang sa Ginuong Jesucristo. Ano ang ginatudlo sining mga bersikulo sa imo parte sa Iya kag sa Iya papel sa plano sang Dios? Paano sini ginaimpluwensyahan ang imo balatyagon parte sa Iya? Sa imo pagbasa kag pagbinagbinag, mahimo nga makabaton ka sang mga pagpabatyag kon paano ka “[magbaton] sang testimonya parte kay Jesus” kag mangin mas “maisog” sa sini (mga bersikulo 51, 79).
Doktrina kag mga Kasugtanan 76:39–44, 50–112
Gusto sang Dios nga luwason ang “tanan nga gintuga sang iya mga kamot.”
Pila sa mga tawo, dala na ang pila sa nauna nga mga miyembro sang Simbahan, ang nagpamatok sa panan-awon sa seksyon 76 tungod ginatudlo sini nga halos ang tanan maluwas kag makabaton sang isa ka bahin sang himaya. Mahimo nga ang ila pagpamatok bangod, sa isa ka punto, sang kakulang sa paghangop parte sa Dios kag sa Iya relasyon sa aton. Samtang imo ginabasa ining rebelasyon, ano ang imo natun-an parte sa karakter sang Dios kag sa Iya plano para sa Iya mga anak?
Pamensara ang kinalain sang maluwas (sa pisikal kag espirituhanon nga kamatayon; tan-awa sa mga bersikulo 39, 43–44) kag mapahitaas (magpuyo upod sa Dios kag mangin pareho sa Iya; tan-awa sa mga bersikulo 50–70).
Tan-awa man sa Juan 3:16–17; Doktrina kag mga Kasugtanan 132:20–25.
Doktrina kag mga Kasugtanan 76:50–70, 92–95
Gusto sang akon Amay nga Langitnon nga mabaton ko ang kabuhi nga wala katapusan sa selestiyal nga ginharian.
Nagpamangkot ka na bala—ukon nabalaka—kon bala kalipikado ka ukon indi sa selestiyal nga ginharian? Samtang imo ginabasa ang paglaragway sa mga makabaton sining himaya (tan-awa sa mga bersikulo 50–70, 92–95), imbes nga magpangita lamang sang lista sang mga butang nga kinahanglan mo himuon, pangitaa ang nahimo na sang Dios—kag ginahimo pa—para buligan ka nga mangin pareho sa Iya. Ang pagbasa bala sang panan-awon sa sini nga paagi nagaapekto sa imo nabatyagan parte sa imo personal nga mga pagpaninguha?
Mahimo nga ginahunahuna mo man kon daw ano kadako nga bugay ang makahibalo sining mga detalye parte sa selestiyal nga ginharian. Paano ining panan-awon sang selestiyal nga ginharian magaapekto sa imo panan-aw kag sang paagi nga luyag mo ipangabuhi ang imo adlaw-adlaw nga kabuhi?
Nakita ni Joseph Smith ang panan-awon sang mga halintang sang himaya sa sining kuwarto.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Doktrina kag mga Kasugtanan 76:22–24, 50–52, 78–79, 81–82.Ano ang aton matun-an sa sining mga bersikulo parte sa importansya sang aton mga testimonya? Ano ang papel sang aton mga testimonya sa aton wala katapusan nga kapalaran? Mahimo nga makabulig ang magpangita sang mga kahulugan sang maisog para hambalan kon paano mangin “maisog sa testimonya kay Jesus” (bersikulo 79). Pwede man kamo magkanta sang “I Know My Father Lives [Buhi ang Amay Ko]” (Mga Himno kag mga Ambahanon sang Kabataan, 59).
-
Doktrina kag mga Kasugtanan 76:24.Mahimo nga makita sang imo pamilya ang koneksyon sang mga kamatuoran sa seksyon 76 kag sa mga ginatudlo sa “I Am a Child of God [Ako Anak sang Dios]” (Mga Himno kag mga Ambahanon sang Kabataan, 58); isa sining mga kamatuoran makita sa Doktrina kag mga Kasugtanan 76:24. Ano ang mangin kinalain sa kalibutan kon ang tanan nakaintiendi nga kita tanan mga anak sang Dios? Paano impluwensyahan sining kamatuoran ang aton pagtrato sa iban? Basi ang pagtan-aw sang mga litrato sang lainlain nga mga anak sang Dios sa sining kalibutan makabulig sa imo pamilya nga binagbinagon ining pamangkot.
Pamensara nga kantahon ang “I Am a Child of God [Ako Anak sang Dios]” sing ululupod kag pangitaon ang iban pa nga mga koneksyon sa mga prinsipyo sa seksyon 76 (tan-awa halimbawa, sa mga bersikulo 12, 62, 96).
-
Doktrina kag mga Kasugtanan 76:40–41.Kon aton palip-uton ang “maayong balita” (bersikulo 40), sa sining mga bersikulo sa malip-ot nga pangulong dinalan sa peryodiko ukon tweet, ano ang aton isiling? Ano ang iban pa nga maayong balita ang aton makita sa seksyon 76?
-
Doktrina kag mga Kasugtanan 76:50–70.Paano mo mabuligan ang imo pamilya nga magpaabot kag maghanda para sa kabuhi nga wala katapusan sa selestiyal nga ginharian? Pwede kamo magbuligay sa pagpangita sang mga litrato, balaan nga mga kasulatan, kag mga pinanudlo sang propeta nga nagasanto sa mga dinalan sa Doktrina kag mga Kasugtanan 76:50–70. Dayon pwede ninyo tipunon ining mga litrato, balaan nga mga kasulatan, kag mga pinanudlo sa poster nga makapadumdom sa inyo pamilya sang inyo mga tuyo para sa wala katapusan.
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “I Know That My Redeemer Lives [Buhi Gid ang Manunubos Ko],” Mga Himno kag mga Ambahanon sang Kabataan, no. 38–39.
Mga Tingug sang Pagpanumbalik
Mga Testimonya parte sa “Panan-awon”
Wilford Woodruff
Nag-entra si Wilford Woodruff sa Simbahan sang Disyembre 1833, halos duha ka tuig matapos nga mabaton nanday Joseph Smith kag Sidney Rigdon ang panan-awon nga nasulat sa Doktrina kag mga Kasugtanan 76. Nagaistar sia sa New York sang amo nga tion kag nakabati parte sa “Panan-awon” sa mga misyonero nga nagaalagad sa amo nga lugar. Tinuig ang nagligad naghambal sia parte sa iya mga panghunahuna parte sa sining rebelasyon:
“Gintudloan ako halin sa pagkabata nga may isa ka Langit kag isa ka Impiyerno, kag ginsilingan nga ang malain may isa lang ka silot kag ang mga matarong isa ka himaya. …
“… Sang mabasa ko ang panan-awon … , ginpasanag sini ang akon kaisipan kag ginhatagan ako sing dako nga kalipay, ginpakita sa akon nga ang Dios nga nagpahayag sinang prinsipyo maalam, matarong kag matuod, nagakapot sang pareho pinakamanami nga mga kinaiya kag maayo nga panghunahuna kag ihibalo, nabatyagan ko nga tayuyon Sia sa gugma, kaluoy, hustisya kag paghukom, kag nabatyagan ko nga mas palangga ko ang Ginuo sa akon kabuhi subong sangsa sang una.”1
“Ang ‘Panan-awon’ [isa] ka rebelasyon nga nagahatag sang mas dako nga kasanag, dugang nga kamatuoran kag mas dako nga prinsipyo sangsa bisan ano pa nga rebelasyon nga nasulat sa bisan ano pa nga libro nga nabasa na naton. Ginaathag sini sa aton paghangop ang aton kondisyon sa karon, kon diin kita naghalin, ngaa ari kita diri, kag kon diin kita makadto. Ang bisan sin-o nga tawo makahibalo paagi sa sinang rebelasyon sang iya mangin papel kag kondisyon.”2
“Antes ko makita si Joseph siling ko wala ako sing labot kon pila ang iya edad, ukon ano sia kahubin; wala ako labot kon ano ang iya hitsura—kon malaba ukon malip-ot ang iya buhok; ang tawo nga nagaduso sinang rebelasyon isa ka propeta sang Dios. Nahibal-an ko ini sa akon kaugalingon.”3
Phebe Crosby Peck
Sang mabatian ni Phebe Peck si Joseph kag Sidney nga nagatudlo sang “Panan-awon,” nagaistar sia sa Missouri kag nagasuporta sang lima ka kabataan bilang solo nga ginikanan. Nagtatak gid kag nag-inspirar sa iya ang panan-awon rason nga iya ginsulat ang masunod para ipaambit ang iya natun-an sa iya mga paryente:
“Ginapahayag sang Ginuo ang mga misteryo sang langitnon nga Ginharian sa iya Kabataan. … Ginbisitahan kami ni Joseph Smith kag Sidney Rigdon sang nagligad nga tigpamulak, kag madamo kami sang masadya nga mga miting samtang ari sila diri, kag madamo kami sang mga misteryo nga nakita, nga naghatag sa amon sing kaumpawan. Makita namon ang pagpaubos sang Dios sa paghanda sang mga mansyon sang paghidaet sa iya mga anak. Kag ang bisan sin-o nga indi magbaton sang kabug-osan sang ebanghelyo kag magtindog bilang maisog nga mga soldado sa kawsa ni Cristo indi makapuyo sa presensya sang Amay kag sang Anak. Pero may lugar nga nahanda para sa tanan nga indi magbaton, pero ini nga lugar mas manubo sing himaya sangsa mag-istar sa Selestiyal nga ginharian. Indi ko na pagdugangan pa ang parte sining mga butang kay ini karon naimprinta na kag ginapagwa sa kalibutan. Kag basi makaangkon man kamo sang oportunidad nga mabasa para sa inyo kaugalingon, kag kon matabo ini, kabay nga basahon ninyo upod ang mahinalungon kag mainampuon nga tagipusuon, kay ang ining mga butang dapat gid hatagan sing atensyon. Kag ang handum ko nga inyo ini tun-an, kay amo ini ang nagahatag sang kalipay sa sining kalibutan kag sa kalibutan nga maabot.”4
Glory by Degrees [Himaya sa ila mga Halintang], ni Annie Henrie Nader