Restoration [Pagpanumbalik], ni Liz Lemon Swindle

Hulyo 26–Agosto 1

Doktrina kag mga Kasugtanan 84

“Ang Gahum sang Pagkadiosnon”

Samtang imo ginabasa ang Doktrina kag mga Kasugtanan 84, binagbinaga ang laygay nga “magkabuhi sa tagsa ka pulong nga nagagwa sa baba sang Dios” (bersikulo 44). Paano mo ipangabuhi ang mga pulong sa sining rebelasyon?

Isulat Ang Imo Mga Panghunahuna

Halin sang ginpanumbalik ang priesthood sang 1829, ginbugayan na ang mga Santos sa Ulihing mga Adlaw sang sinang sagrado nga gahum. Ginbunyagan sila, ginkumpirma, kag gintawag nga magserbisyo paagi sa awtoridad sang priesthood, pareho sa aton sa karon. Pero ang makagamit sang gahum sang priesthood lain nga bagay sa lubos nga pag-intiendi sini, kag madamo pa ang gusto sang Dios nga maintiendihan sang Iya mga Santos—ilabi na gid ang palaabuton nga pagpanumbalik sang mga ordinansa sang templo. Ang 1832 nga rebelasyon parte sa priesthood, nga karon amo na ang Doktrina kag mga Kasugtanan 84, nagpasangkad sang panan-awon sang mga Santos parte sa kon ano gid bala ang priesthood. Kag mahimo man ini sa aton sa karon. Kon pamensaron gid, kadamo pa sang dapat matun-an parte sa diosnon nga gahum nga nagakapot “sang yabi sang ihibalo parte sa Dios,” nga nagapakita paagi sa “gahum sang pagkadiosnon,” kag nagahanda sa aton nga “makakita sang nawong sang Dios, sa pagkamatuod sang Amay, kag mabuhi” (mga bersikulo 19–22).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 84:1–5, 17–28

Malab-ot ko ang gahum kag mga bugay sang priesthood sang Dios.

Kon hunahunaon mo ang tinaga nga priesthood, ano ang nagasulod sa imo kaisipan? Kada san-o mo ginapamensar ang priesthood kag ang impluwensya sini sa imo adlaw-adlaw nga kabuhi? Pagkatapos mo nga binagbinagon ining mga pamangkot, tun-i ang Doktrina kag mga Kasugtanan 84:1–5, 17–28, kag pamensara kon ano ang gusto sang Ginuo nga mahibal-an mo parte sa Iya gahum sang priesthood. Paano mo magamit ining mga bersikulo para ilaragway ang priesthood sa isa ka tawo kag ipaathag ang mga katuyuan sini?

Pwede mo man binagbinagon ang mga ordinansa sa priesthood nga naentrahan mo na. Paano mo nakita ang “gahum sang pagkadiosnon” (bersikulo 20) sa mga ini? Pamensara kon ano ang gusto sang Ginuo nga imo himuon para makabaton sang dugang pa Niya nga gahum sa imo kabuhi.

Doktrina kag mga Kasugtanan 84:31–42

Kon batunon ko ang Ginuo kag ang Iya mga alagad, mabaton ko ang tanan nga iya sang Amay.

Si Elder Paul B. Pieper nagtudlo: “Talalupangdon nga sa panumpa kag kasugtanan sang pagkapari [Doktrina kag mga Kasugtanan 84:31–42], gingamit sang Ginuo ang mga tinaga nga angkon kag baton. Wala Sia naggamit sang tinaga nga ordin. Sa sulod sang templo nga ang mga lalaki kag mga babayi—ululupod—nga nagaangkon kag nagabaton sang mga bugay kag gahum sang pareho Aaronic kag Melchizedek nga Priesthood” (“Revealed Realities of Mortality,” Ensign, Ene. 2016, 21).

Samtang imo ginatun-an ang Doktrina kag mga Kasugtanan 84:31–42, pangitaa ang mga tinaga nga “angkon” kag “baton.” Binagbinaga kon ano ayhan ang buot silingon sang mga ini sa sining konteksto. Paano mo “[gina]baton” ang Ginuo kag ang Iya mga alagad?

Pwede mo man pat-inan ang mga promisa sa sining mga bersikulo mahiangot sa panumpa kag kasugtanan sang priesthood, nga “indi maguba” sang Dios (bersikulo 40). Ano ang nagainspirar sa imo nga mangin mas matinuohon sa pagbaton sang Amay, sang Iya mga alagad, kag sang gahum sang Iya priesthood?

Doktrina kag mga Kasugtanan 84:43–58

Nagakari ako kay Cristo kon magpamati ako sing maayo sa Iya mga pulong kag magpamati sa Iya Espiritu.

Ang regular nga pagbasa sang balaan nga mga kasulatan kag sang mga pulong sang mga propeta masobra pa sangsa isa ka butang nga ginamarkahan lamang sa listahan sang pang-espirituhanon-nga-buluhaton. Ano nga mga kamatuoran ang imo makita sa Doktrina kag mga Kasugtanan 84:43–58 nga nagabulig sa imo nga makaintiendi kon ngaa kinahanglan mo nga sige-sigehon ang pagtuon sang pulong sang Dios? Tandai ang kinalain sang kasanag kag kadulom sa sining mga bersikulo; paano nagdala ang imo “pagpamati sing maayo sa mga pulong sang kabuhi nga wala’y katapusan” sang kasanag, kamatuoran, kag sang “Espiritu ni Jesucristo” sa imo kabuhi? (mga bersikulo 43, 45).

Tan-awa man sa 2 Nefi 32:3

Ang pagtuon sang balaan nga mga kasulatan nagabulig sa akon nga mabatyagan ang impluwensya sang Espiritu.

Doktrina kag mga Kasugtanan 84:62–91

Pagaupdan ako sang Ginuo kon ara ako sa pagserbisyo sa Iya.

Samtang imo ginabasa ining mga bersikulo, pwede mo pangitaon ang mga paagi nga ginsiling sang Ginuo nga Iya suportahan ang Iya mga Apostoles kag mga misyonero. Paano ayhan magamit ining mga promisa sa buluhaton nga ginapahimo Niya sa imo? Halimbawa, paano natuman ang mga promisa sa bersikulo 88 sa imo kabuhi?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 84:6–18.Pagkatapos basahon kon paano nabaton ni Moises ang iya awtoridad sa priesthood, pwede nga mag-istorya ang isa ka nagakapot sang priesthood sa inyo pamilya ukon isa ka ministering brother sang iya eksperiyensya sang gin-ordinan sa palangakuan sang priesthood. Kon posible, pwede niya iistorya kag hambalan ang ginhalinan sang iya awtoridad sa priesthood. Ngaa importante nga mausoy naton ang awtoridad sang priesthood sa Simbahan sa karon pabalik sa awtoridad ni Jesucristo? Para makapangayo sang ginhalinan sang awtoridad sa priesthood, mag-email sa [e-mail].

Doktrina kag mga Kasugtanan 84:20–21.Sang san-o naeksperiyensyahan sang inyo pamilya ang “gahum sang pagkadiosnon” nga ginpakita sa ordinansa pareho sang bunyag ukon sakramento? Basi pwede ninyo mahambalan kon paano nagadala ining mga ordinansa sang gahum sang Dios sa inyo mga kabuhi. Pwede ka man mag-display sang litrato sang templo kag hambalan kon paano kita ginahatagan sang dugang nga gahum sang mga ordinansa sa templo nga mangin pareho sa Manluluwas. Basi gusto ninyo magkanta sang kanta parte sa priesthood, pareho sang “Praise to the Man [Dayawon ang Tawo]” (Mga Himno kag mga Ambahanon sang Kabataan, 50–51), kag hambalan kon ano ang ginatudlo sini parte sa priesthood.

Doktrina kag mga Kasugtanan 84:43–44.Pwede kamo nga mahanda sang panyapon ukon kalan-unon nga ululupod kag markahan ang kada sangkap sang tinaga ukon dinalan halin sa bersikulo 44. Ngaa importante nga ilakip naton ang tanan nga sangkap? Ngaa importante nga ipangabuhi ang tagsa ka pulong sang Dios?

Doktrina kag mga Kasugtanan 84:98–102.Ano ang aton matun-an parte kay Jesucristo sa “bag-o nga ambahanon” (bersikulo 98) sa sining mga bersikulo? Ano ang pwede naton himuon sa aton panahon para buligan nga matabo ang mga kondisyon nga ginalaragway sa sining kanta?

Doktrina kag mga Kasugtanan 84:106–10.Paano “mapasanagan ang tanan” paagi sa mga bugay kag pagpaninguha sang “tagsa ka bahin”? (bersikulo 110).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Praise to the Man [Dayawon ang Tawo],” Mga Himno kag mga Ambahanon sang Kabataan, 50–51; tan-awa man sa “Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan.”

Pagpauswag sang Aton Pagpanudlo

Mag-agda kag magpamangkot parte sa mga imbitasyon sa pag-akto. Kon imo agdahon ang imo pamilya nga mag-akto sa ila mga ginatun-an, ginapakita mo sa ila nga ang ebanghelyo butang nga ginapangabuhi, indi lang ginahambalan. Ano ang pwede mo paaktuhan sa ila sa inyo gintun-an sa Doktrina kag mga Kasugtanan 84?

Templo sang Rome Italy