Agosto 9–15

Doktrina kag mga Kasugtanan 88

“Ipahamtang … ang Balay sang Dios”

Si Pangulong Russell M. Nelson nagsiling, “Ginapromisa ko nga mientras matutom kamo nga nagatrabaho agud kay-uhon ang inyo balay para mangin sentro sang pagtuon sang ebanghelyo , … ang impluwensya sang kaaway sa inyo kabuhi kag sa inyo puluy-an magaiban” (“Becoming Exemplary Latter-day Saints,” Ensign ukon Liahona, Nob. 2018, 113).

Isulat Ang Imo Mga Panghunahuna

Sa masami, ginahatagan kita sang Ginuo sang diutay nga ideya parte sa Iya wala tupong nga “pagkahari kag gahum” (Doktrina kag mga Kasugtanan 88:47) paagi sa pangkabilugan nga mga rebelasyon sa Iya mga propeta. Ang Doktrina kag mga Kasugtanan 88 isa ka halimbawa sinang rebelasyon—parte ini sa kasanag kag himaya kag mga ginharian nga sarang maghimo sang aton dutan-on nga mga kabalaka nga daw witiwiti kon ikumparar. Bisan nga indi pa naton matungkad ang tanan nga mga ginatudlo sang Ginuo sa aton, mabatyagan na naton nga may madamo pa parte sa katubtuban nga sobra sangsa aton karon naintiendihan. Siyempre, wala ginhambal sang Ginuo ining tanan nga makahalawhaw nga misteryo para mahadlok kita ukon makabatyag nga kubos. Ang matuod, nagpromisa Sia, “Magaabot ang adlaw nga mahangpan ninyo sa pagkamatuod ang Dios” (bersikulo 49; italics gindugang). Siguro sa amo sina kaimportante nga katuyuan nga ginpadasig sang Ginuo ang Iya mga Santos sa Kirtland nga magtukod sang Eskwelahan sang mga Propeta. “I-organisar ang inyo mga kaugalingon,” siling Niya. “Ihanda ang tagsa ka kinahanglanon nga butang; kag ipahamtang … ang balay sang Dios” (bersikulo 119). Kay sa sulod sang balaan nga balay sang Dios—kag sa sulod sang aton mga puluy-an—nga sarang Niya, labaw sangsa diin pa man, bayawon ang aton panulukan nga lapaw pa sa dutan-on nga kalibutan, “ipakita ang iya nawong sa [aton],” kag ihanda kita nga “[magbatas] sang selestiyal nga himaya” (mga bersikulo 68, 22).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 88

Nagatanyag ang Ginuo sa aton sang paglaum kag paghidaet.

Pila lang ka adlaw pagkatapos sang paandam nga ang giyera “igabubo sa tanan nga nasyon” (Doktrina kag mga Kasugtanan 87:2), naghatag ang Ginuo sang rebelasyon nga gintawag ni Joseph Smith bilang “‘dahon sang olivo’ … nga ginpuksi halin sa Kahoy sang Paraiso, ang mensahe sang Ginuo sa amon parte sa paghidaet” (Doktrina kag mga Kasugtanan 88, tig-ulo sang seksyon). Paano ining rebelasyon nangin daw pareho sang dahon sang olivo, ang tradisyunal nga simbolo sang paghidaet? (tan-awa man sa Genesis 8:11). Ano nga mga kamatuoran sa sining seksyon ang nagabulig sa imo nga makabatyag sang paglaum kag paghidaet kay Cristo?

Doktrina kag mga Kasugtanan 88:6–67

Ang kasanag kag layi nagahalin kay Jesucristo.

Ang mga tinaga nga kasanag kag layi ginsulit sing madamo nga beses sa seksyon 88. Gingamit ining mga tinaga sa iban pa nga balaan nga mga kasulatan para ilaragway si Jesucristo kag ang Iya ebanghelyo (halimbawa, tan-awa sa Isaias 60:19; Juan 1:1–9; 3 Nefi 15:9). Markahi ukon tandai ang mga bersikulo kon diin mo nakita ining mga tinaga sa Doktrina kag mga Kasugtanan 88:6–67, kag isulat ang imo matun-an parte sa Manluluwas, kasanag, kag layi. Mahimo nga mainspirar ka sining mga bersikulo nga maghimo sang mga pagbag-o sa imo kabuhi para mas matinuohon nga magbaton sang kasanag kag ipangabuhi ang “layi ni Cristo” (bersikulo 21).

Ang balaan nga mga kasulatan nagaunod sang layi ni Cristo.

Doktrina kag mga Kasugtanan 88:62–126

Ihanda ang tagsa ka kinahanglanon nga butang.

Sa pila ka bahin, nagakabuhi kita sa tiyempo nga ginlaragway sang Ginuo nga “ang tanan nga butang magginamo; kag pat-od nga ang mga tagipusuon sang mga tawo magapaslaw sa ila” (Doktrina kag mga Kasugtanan 88:91). Samtang imo ginabasa ang mga bersikulo 62–126, pamensara kon paano makabulig sa imo ang laygay sang Ginuo nga maghanda para sa Ikaduhang Pagkari sang Manluluwas. Ari ang pila ka mga pamangkot nga dapat pamensaron:

Mga bersikulo 62–76.Samtang ginabinagbinag mo ining mga bersikulo, ano ang ginapabatyag sa imo nga himuon para “magpalapit” sa Dios? (bersikulo 63). Pamensara kon ano ang kahulugan sa imo sang sugo sang Ginuo nga “pakabalaana ang inyo mga kaugalingon” (bersikulo 68).

Mga bersikulo 77–80, 118–26.Ngaa ayhan nga “kinahanglanon ninyo mahangpan” ang doktrinal kag temporal nga mga topiko? (bersikulo 78). Kamusta ang imo pagsunod sang laygay nga “magpangita sang kaalam”? (bersikulo 118). Ano sa banta mo ang buot silingon sang maghibalo “paagi sa pagtuon kag paagi man sa pagtuo”?

Mga bersikulo 81–116.Pamensara nga pat-inan ang mga propesiya parte sa Ikaduhang Pagkari sang Manluluwas sa sining mga bersikulo. Ngaa sa banta mo nga gusto sang Ginuo nga mahibal-an mo ang parte sining mga butang?

Mga bersikulo 117–26.Pamensara nga basahon ining mga bersikulo nga ginapanumdom ang templo; ano ang imo makita diri nga makabulig sa imo sa paghanda sa pagsulod sa balay sang Ginuo?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 88:14–33, 95–101.Ano ang aton matun-an parte sa Pagkabanhaw sa sining mga bersikulo? Paano ayhan ining mga kamatuoran makaimpluwensya sa mga pagpili nga aton himuon?

Doctrine and Covenants 88:33.Pwede mo sugdan ang diskusyon sa sining bersikulo paagi sa pagpangabay sa mga miyembro sang pamilya nga mag-istorya parte sa mga regalo nga ginhatag sa ila—ang mga nasadyahan sila sa pagbaton kag subong man ang iban nga wala sila masadyahi. Paano naton ipakita sa Ginuo nga nagakasadya kita sa ginatanyag Niya sa aton nga regalo nga selestiyal nga himaya? Paano kita magkalipay sa “taghatag sang regalo”?

Doktrina kag mga Kasugtanan 88:63, 68.Ang ining mga bersikulo nagaunod sang aksyon nga mga tinaga nga makainspirar sa imo sa pagpamensar sang matugahon (creative) nga mga paagi sa pagtudlo sang mga mensahe sa mga bersikulo sa inyo kabataan. Halimbawa, pwede kamo maghampang sang panaguay para hambalan ang dinalan nga “pangitaa ako sing matutum kag makita ninyo ako” (bersikulo 63; italics gindugang).

Doktrina kag mga Kasugtanan 88:81.Bilang pamilya, itudlo ang pila sa mga tanda sang pagpaandam sa sulod kag sa palibot sang inyo balay, pareho sang paandam sa mga tatak sa bulong ukon pangtrapiko nga karatula sa mga drayber. Paano kita ginabuligan sining mga paandam? Ano ang gusto sang Amay nga Langitnon nga aton “ipaandam sa [aton] isigkatawo”?

Doktrina kag mga Kasugtanan 88:119.Para mainspirar ang inyo pamilya nga himuon ang inyo puluy-an nga pareho sa paglaragway sa bersikulo 119, tilawi ang pareho sini: Isulat ang mga dinalan sa sining bersikulo sa ginunting nga mga papel, kag gamita ini para takpan ang litrato sang templo. Basaha ang Doktrina kag mga Kasugtanan 88:119 sing ululupod, kag tugoti ang mga miyembro sang pamilya nga kakason ang tagsa ka ginunting nga papel kon ila mabatian ang pareho nga dinalan sa bersikulo. Ano ang sarang naton himuon para himuon ang aton balay nga “balay sang Dios”? (bersikulo 119).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Now Let Us Rejoice [Magkalipay Ta],” Mga Himno kag mga Ambahanon sang Kabataan, no. 32–33.

Pagpauswag sang Aton Pagpanudlo

Tugoti ang kabataan nga ipakita ang ila pagkamatugahon. Kon imo hagaron ang imo kabataan nga maghimo sang isa ka butang nga may koneksyon sa isa ka prinsipyo sang ebanghelyo, wala mo lang sila ginabuligan nga mas maintiendihan ang prinsipyo, kundi ginahatagan mo man sila sang pahanumdom sang ila natun-an (tan-awa sa Teaching in the Savior’s Way, 25).

Si Jesucristo nagatanyag sa aton sang paghidaet. Peace I Leave with You [Ang Paghidaet Ginabilin Ko sa Inyo], ni Walter Rane