Agosto 16–22

Doktrina kag mga Kasugtanan 89–92

“Isa ka Prinsipyo nga may Upod nga Promisa”

Tun-i sing mainampuon ang Doktrina kag mga Kasugtanan 89–92, kag isulat ang bisan ano nga espirituhanon nga pagpabatyag nga imo mabaton. Magmangin sensitibo sa kon paano “[ginapahayag] sang Espiritu ang kamatuoran” sa imo samtang imo ginatun-an ang (Doktrina kag mga Kasugtanan 91:4).

Isulat Ang Imo Mga Panghunahuna

Sa Eskwelahan sang mga Propeta, gintudloan ni Joseph Smith ang mga tigulang sang Israel parte sa pagpahamtang sang ginharian sang Dios sa duta. Ila ginhambalan ang parte sa espirituhanon nga mga kamatuoran, nagpangamuyo sing ululupod, nagpuasa, kag naghanda sa pagwali sang ebanghelyo. Pero may bagay sa palibot nga daw indi kinaandan sa aton karon, kag daw indi man ini husto para kay Emma Smith. Sa tion sang mga miting, nagapanigarilyo kag nagausap sang tabako ang kalalakin-an, nga indi man bag-o sa amo sadto nga panahon, pero ginamantsahan sini ang kahoy nga salog sang itom kag nagabilin sang maisog nga baho sa palibot. Ginpaambit ni Emma ang iya mga kabalaka kay Joseph, kag ginpamangkot ni Joseph ang Ginuo. Ang resulta amo ang isa ka rebelasyon nga labaw kaayo sangsa aso kag mantsa sang tabako. Ginhatagan sini ang mga Santos, sa mga henerasyon nga maabot, sang “isa ka prinsipyo nga may upod nga promisa”—mga promisa sang ikaayong lawas, “kaalam,” kag “tuman nga manggad sang ihibalo” (Doktrina kag mga Kasugtanan 89:3, 19).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 89

Ang Pulong sang Kaalam “isa ka prinsipyo nga may upod nga promisa.”

Sang primero nga mabatian sang mga tigulang sa Eskwelahan sang mga Propeta si Joseph Smith nga ginbasa ang Pulong sang Kaalam, insigida nila nga “gin-itsa ang ila mga pipa kag mga mama sa kalayo” (Saints, 1:168). Sang amo sadto nga panahon, ang Pulong sang Kaalam ginkabig nga mas paandam sangsa kasuguan, pero gusto nila ipakita ang ila kahanda sa pagsunod. Siguro “naitsa” mo na halin sa imo kabuhi ang mga elemento nga ginapaandam sa Pulong sang Kaalam, pero ano pa ang imo matun-an sa sining rebelasyon? Hunahunaa ining mga ideya:

• Magpangita sang mga dinalan nga mahimo wala mo natalupangdan—ukon ginpamensar gid sing maayo—sadto. Ano ang imo matun-an sa mga ini?

• Ang Doktrina kag mga Kasugtanan 89 nagalakip sang pila ka mga promisa (tan-awa sa mga bersikulo 18–21). Ano sa banta mo ang kahulugan sining mga promisa?

• Ano ang ginatudlo sining rebelasyon sa imo parte sa Ginuo?

• Ano nga mga halimbawa ang imo nakita mahiangot sa “mga kalainan kag mga plano … sa mga tagipusuon sang mga nagahimbon nga mga tawo”? (bersikulo 4).

• Kabiga ang rebelasyon bilang “isa ka prinsipyo nga may upod nga promisa” (bersikulo 3)—nagadugay nga mga kamatuoran nga nagagiya sa paghimo sang desisyon—indi lamang listahan sang [kon ano ang] pwede kag indi pwede. Ano nga mga prinsipyo ang imo makita nga makagiya sa imo mga desisyon?

Ang moderno nga mga propeta nagpaandam man parte sa makahalalit nga mga butang kag mga pamatasan nga masobra pa sangsa ginmitlang sa Pulong sang Kaalam (tan-awa sa “Pisikal kag Emosyunal nga Ikaayong-Lawas,” Para sa Kusog sang mga Lamharon, 25–27). Ano ang ginapabatyag sa imo nga imo himuon para mas maatipan ang imo kaisipan kag lawas?

Tan-awa man sa Daniel 1; 1 Mga Taga-Corinto 6:19–20.

Ang Pulong sang Kaalam nagatudlo sa aton nga atipanon ang aton mga lawas.

Doktrina kag mga Kasugtanan 90:1–17

Ang Unang Pangulohan nagakapot sang “mga yabi sang ginharian.”

Sa seksyon 90, naghatag ang Ginuo sang mga instruksyon parte sa “pag-alagad kag pangulohan” (bersikulo 12) nanday Joseph Smith, Sidney Rigdon, kag Frederick G. Williams—mga miyembro sang aton karon ginatawag nga Unang Pangulohan. Ano ang imo matun-an parte sa Unang Pangulohan sa mga bersikulo 1–17? Rebyuha ang pinakaulihi nga mga mensahe sang mga miyembro sang Unang Pangulohan. Paano “[naga]pahayag sang mga misteryo sang ginharian” ang ila mga pulong sa imo? (bersikulo 14). Paano sini “[gina]pahamtang sa kahusay [ang] tanan nga butang parte sining simbahan kag ginharian”? (bersikulo 16).

Doktrina kag mga Kasugtanan 90:24.

“Ang tanan nga butang magaresulta sa [akon] kaayohan.”

Binagbinaga ang bisan ano mo nga eksperiyensya nga nagasaksi sa promisa sang Ginuo sa Doktrina kag mga Kasugtanan 90:24. Pamensara nga isulat ang imo mga eksperiyensya kag ipaambit ang mga ini sa isa ka miyembro sang pamilya ukon mahal sa kabuhi—basi isa nga nagakinahanglan sang pagpasalig ukon pagpaisog. Kon may mga bugay ka nga ginahulat-, binagbinaga kon ano ang pwede mo himuon para magpabilin nga tampad samtang ginahulat mo nga makita kon paano “ang tanan nga butang magaresulta sa imo kaayohan.”

Doktrina kag mga Kasugtanan 90:28–31

Sin-o si Vienna Jaques?

Si Vienna Jaques natawo sang Hunyo 10, 1787, sa Massachusetts. Isa ka babayi sang pagtuo nga may sarang-sarang sa pangabuhi, una nga nakilala ni Vienna ang mga misyonero sang 1831. Pagkatapos nga makabaton sang espirituhanon nga saksi nga matuod ang ila mensahe, nagbiyahe sia para makilala ang Propeta sa Kirtland, Ohio, kon sa diin sia ginbunyagan.

Gintuman ni Vienna ang laygay sang Ginuo sa iya sa Doktrina kag mga Kasugtanan 90:28–31. Ang iya pagkonsagrar sa Ginuo, lakip na ang mga donasyon nga iya ginhatag sang primero sa Kirtland, nag-abot sa importante kaayo nga tion para sa Simbahan, sang nagatinguha ang mga lideres nga magbakal sang duta nga pagatindugan sang Templo sa Kirtland. Si Vienna “tampad, kag indi … matamad” sa bilog niya nga kabuhi kag sang ulihi “[nakaplastar] sing matawhay” (bersikulo 31) sa Salt Lake Valley, kon diin sia napatay sa edad nga 96.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 89.Mahimo nga masadyahan ang mga miyembro sang imo pamilya sa pagdrowing ukon pagpangita sang mga litrato sang mga pagkaon ukon iban pa nga mga bagay nga namitlang sa Doktrina kag mga Kasugtanan 89. Dayon pwede kamo maghampang—nga nagabulos-bulos ang mga miyembro sang pamilya sa pagpili sang bisan ano lang nga litrato, nga ginabutang sa basurahan ang mga butang nga indi naton dapat gamiton kag sa pinggan ang mga butang nga dapat naton gamiton. Paano natuman ang mga promisa sa mga bersikulo 18–21 sa aton mga kabuhi?

Ang pagbasa sang “Pisikal kag Emosyunal nga Ikaayong-Lawas” sa Para sa Kusog sang mga Lamharon (25–27) mahimo nga magbukas sang diskusyon parte sa iban pa nga mga pamaagi sa pag-atipan sang aton ikaayong lawas kag sa mga bugay nga ginapromisa sang Dios.

Doktrina kag mga Kasugtanan 90:5.Hambali kon paano ka “nagabaton sang mga orakulo [mga rebelasyon ukon mga propeta] sang Dios.” Paano naton ipakita nga wala naton ini ginakabig nga “di-importante” sa aton?

Doktrina kag mga Kasugtanan 91.Mahimo man ninyo nga hambalan kon paano magamit ang laygay sang Ginuo parte sa Apocripa (tan-awa sa mga bersikulo 1–2) sa media nga masalapoan sang inyo pamilya sa karon. Pwede ka man magpaambit sang personal nga mga eksperiyensya nga tungod “napasanagan sang Espiritu” (bersikulo 5) nakilala mo ang kamatuoran kag ang sayop.

Doktrina kag mga Kasugtanan 92:2.Ano ang buot silingon sang mangin “aktibo nga miyembro” sang Simbahan?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “The Lord Gave Me a Temple [Ang Ginuo Naghatag sang Templo],” Mga Himno kag mga Ambahanon sang Kabataan, 62.

Pagpauswag sang Aton Pagpanudlo

Lainlaina ang pamaagi sa pagtudlo. Magpangita sang lainlain nga mga pamaagi sa paglakip sang imo pamilya sa pang-pamilya nga pagtuon sang balaan nga mga kasulatan. Halimbawa, pwede nga magkanta ang mga miyembro sang pamilya sang mga himno ukon mga kanta sang kabataan nga may koneksyon sa isa ka bersikulo, magdrowing sang mga litrato sang ila mga nabasa, ukon palip-uton ang bersikulo sa ila kaugalingon nga pulong.

“Ang tanan nga santos nga … [naga]himo sining mga pulong, nga nagalakat sa pagtuman sang mga kasugoan magabaton sang kaayohan sa ila pusod kag utok sa ila mga tul-an” (Doktrina kag mga Kasugtanan 89:18).