Agosto 2–8

Doktrina kag mga Kasugtanan 85–87

“Magtindog Kamo sa Balaan nga mga Lugar”

Mahimo nga giyahan kamo sang Espiritu agud tun-an ang mga prinsipyo sa mga seksyon 85–87 nga wala matutoki sa sining outline. Sunda ang Iya mga pagpabatyag.

Isulat Ang Imo Mga Panghunahuna

Ang Adlaw sang Paskwa masami tion sa pagbinagbinag sang mga mensahe pareho sang “paghidaet sa duta” kag “[maayong kabubut-on] sa mga tawo” (tan-awa sa Lucas 2:14). Pero sang Disyembre 25, 1832, okupado ang hunahuna ni Joseph Smith sa katalagman sang giyera. Ginkontra sang South Carolina ang gobyerno sang Estados Unidos kag nagahanda sa giyera. Kag ginpahayag sang Ginuo kay Joseph nga panugod pa lamang ini: “Ang giyera,” siling Niya, “igabubo sa tanan nga nasyon” (Doktrina kag mga Kasugtanan 87:2). Dawsa ining propesiya matabo gid sadto sa indi madugay.

Pero wala ini madayon. Sa pila lang ka semana, ang South Carolina kag ang gobyerno sang U.S. nakalab-ot sa pagsugtanay, kag nalikawan ang giyera. Pero ang rebelasyon wala pirme nagakatuman sa tion ukon sa paagi nga aton ginapaabot. Halos 30 ka tuig pagkatapos, malawig na nga tion nga ginpatay si Joseph Smith kag nakasaylo na ang mga Santos sa weste, nagrebelde matuod ang South Carolina kag nagsunod ang inaway sibil. Sugod sadto, ang giyera sa bilog nga kalibutan nagtuga sang “duta [nga] magpangalisud” (Doktrina kag mga Kasugtanan 87:6). Bisan nga sang ulihi natabo gid man ang propesiya, ang balor sining rebelasyon wala sa pagpakot kon san-o matabo ang kalamidad kundi sa pagtudlo kon ano ang himuon kon mag-abot ini. Ang laygay pareho lang sang 1831, 1861, kag 2021: “Magtindog kamo sa balaan nga mga lugar, kag indi maisdog” (bersikulo 8).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 85:1–2

Maayo ang “magtipig sang kasaysayan.”

Ang “kasaysayan” nga ginalaragway sa bersikulo 1 nagalista sang mga ngalan sadtong mga “[nag]baton sang mga panublion sing legal” sa Sion (tan-awa man sa Doktrina kag mga Kasugtanan 72:24–26). Ugaling, ang ining kasaysayan masobra pa sangsa pang-administratibo—malahalon man ini nga rekord sang “pamaagi sang pagpangabuhi, pagtuo, kag mga binuhatan” sang mga Santos (bersikulo 2).

Nagatipig ka bala sang personal nga kasaysayan ukon journal? Ano ang pwede mo isulat parte sa pamaagi sang imo pagpangabuhi, pagtuo, kag mga binuhatan nga mangin bugay sa palaabuton nga mga henerasyon? Paano ayhan ining kasaysayan mangin bugay sa imo?

Doktrina kag mga Kasugtanan 85:6

Ang Espiritu nagahambal sa “mahinay diutay nga tingug.”

Binagbinaga ang mga pulong nga gingamit ni Joseph Smith para ilaragway ang Espiritu sa Doktrina kag mga Kasugtanan 85:6. Sa ano nga punto nangin “mahinay” kag “diutay” ang tingug sang Espiritu? Ano ang pila sa mga butang nga “ginalapos” sini sa imo kabuhi?

Samtang imo ginapanumdom kon paano nagahambal ang Espiritu sa imo, pamensara ining mga paglaragway nga ginhatag paagi kay Joseph Smith: Doktrina kag mga Kasugtanan 6:22–24; 8:2–3; 9:7–9; 11:12–13; 128:1. Base sa imo nabasa, ano sa pamatyag mo ang kinahanglan mo himuon para mas mabatian ang tingug sang Espiritu?

Tan-awa man sa 1 Mga Hari 19:11–12; Helaman 5:30.

Ang pagtuon sang balaan nga mga kasulatan nagabulig sa akon nga mabatian ang Balaan nga Espiritu.

Doktrina kag mga Kasugtanan 86

Ang mga matarong tipunon sa ulihing mga adlaw.

Ang Doktrina kag mga Kasugtanan 86:1–7 nagaunod sang paathag sang Ginuo parte sa paanggid sang trigo kag gamhon [tares], nga may diutay nga kinalain sa pagtalupangod nga Iya ginhatag sa Mateo 13:24–30, 37–43. Samtang ginakumparar mo ang duha, ano nga mga kinalain ang imo natalupangdan? Pamensara kon ngaa ining paanggid—upod ining mga kinalain—bagay lang suliton “sa ulihing mga adlaw, bisan pa subong” (Doktrina kag mga Kasugtanan 86:4). Ano ang imo matun-an sa sining paanggid kag sa interpretasyon sini sa ulihing-adlaw?

Sa nasulat sa mga bersikulo 8–11, naghambal dayon ang Ginuo parte sa priesthood, pagpanumbalik, kag sang kaluwasan sang Iya katawhan. Ano nga mga koneksyon ang imo makita sa tunga sining mga bersikulo kag sa paanggid sang trigo kag mga gamhon? Paano ka mangin “manluluwas sa katawhan [sang Ginuo]”? (bersikulo 11).

Doktrina kag mga Kasugtanan 87

Ang paghidaet makita sa “balaan nga mga lugar.”

Dugang pa sa pisikal nga katalagman sang “pagpaagay sang dugo … [kag] tiggulutom, kag pamalatian, kag linog” (Doktrina kag mga Kasugtanan 87:6), ang laygay sa sining rebelasyon magamit man sa espirituhanon nga mga peligro nga ginaatubang naton tanan sa ulihing mga adlaw. Ano ang imo “balaan nga mga lugar” (bersikulo 8) kon sa diin makita mo ang paghidaet kag kaluwasan? Ano ang nagahimo sini nga balaan? Dugang pa sa pisikal nga mga lokasyon, basi may balaan nga mga tion, balaan nga pangginawi, ukon balaan nga mga panghunahuna nga makahatag sang paghidaet. Ano ang buot silingon sang “indi maisdog” sa sining mga lugar?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 85:6.Paano mo tudloan ang imo pamilya nga makilala ang mahinay, diutay nga tingug sang Espiritu? Basi pwede kamo maghampang nga ihutik ang importante nga mga instruksyon sa tunga sang disturbo nga pagginahod. Ano ayhan ang nagadisturbo sa aton sa pagpamati sa Balaan nga Espiritu? Basi pwede iistorya sang mga miyembro sang pamilya ang ila ginahimo para mabatian ang tingug sang Espiritu.

Doktrina kag mga Kasugtanan 86.Ang pagdrowing ukon pagtan-aw sang mga litrato makabulig sa inyo pamilya nga maintiendihan ang paanggid sang trigo kag mga gamhon [tares]. Pwede ninyo sugdan sa mga litrato sang mga butang nga ginlaragway sa Mateo 13:24–30. Dayon pwede nga markahan sang inyo pamilya ang mga litrato sang mga paathag halin sa Doktrina kag mga Kasugtanan 86:1–7. Sa ano kita nangin pareho sa trigo? Paano kita mangin pareho sa mga anghel nga nagatipon sang trigo?

Doktrina kag mga Kasugtanan 87:8.Para sugdan ang diskusyon parte sa kon paano himuon ang inyo balay nga mas balaan nga lugar, pwede mo hagaron ang mga miyembro sang pamilya nga magdisenyo sang balay para sa tawo nga nagapalangga sa Manluluwas. Mahimo nga makahatag ini sang mga ideya kon paano “liwaton ang disenyo” sang inyo balay para mahimo ini nga lugar sang paghidaet sa tunga sang espirituhanon nga peligro sa kalibutan. Ang kanta pareho sang “Love at Home [Gugma sa Balay] makahatag sa inyo sang mga ideya.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Gamita ang imo pagkamatugahon (creativity). Kon imo ginatudloan ang imo pamilya halin sa balaan nga mga kasulatan, indi paglimitahi ang imo kaugalingon sa mga pamangkot ukon mga ideya sa aktibidades nga ginapanugyan sa sining outline. Tugoti ining mga ideya nga magbukas sang imo kaugalingon nga pagkamatugahon. Pamensara kon ano ang masadyahan sang imo pamilya kag kon ano ang makabulig sa ila nga makita ang mga koneksyon sang balaan nga mga kasulatan kag sang ila mga kabuhi.

Gingamit sang Ginuo ang paanggid sang trigo kag mga gamhon para ipakita kon paano tipunon ang Iya katawhan sa ulihing mga adlaw.