Nakita ni Esteban ang Dios kag si Jesucristo

I See the Son of Man Standing on the Right Hand of God [Nakita ko ang Anak sang Tawo nga Nagatindog sa Tuo sang Dios], ni Walter Rane

Agosto 23–29

Doktrina kag mga Kasugtanan 93

“Magbaton sang Iya Kabug-osan”

Ang Doktrina kag mga Kasugtanan 93 nagatudlo nga ang “kamatuoran amo ang ihibalo sang mga butang subong, kag sadto, kag sa maabot pa” (bersikulo 24). Samtang imo ginatun-an ang ining seksyon, pangitaa ang kamatuoran kag isulat ang imo matun-an. Ano ang handa mo himuon para mabaton ang kamatuoran? (tan-awa sa mga bersikulo 27–28).

Isulat Ang Imo Mga Panghunahuna

“Kon magsaka ka sa hagdan,” gintudlo ni Joseph Smith, “kinahanglan mo nga magsugod sa idalom, kag magsaka sing amat-amat, tubtob makalab-ot ka sa ibabaw; kag amo man sini sa mga prinsipyo sang ebanghelyo—kinahanglan mo nga magsugod sa puno, kag magpadayon tubtob nga matun-an mo ang tanan nga mga prinsipyo sang pagkahitaas” (Teachings of Presidents of the Church: Joseph Smith [2007], 268).

Kon kaisa ang hagdan sang pagkahitaas daw tama gid kataas, pero natawo kita para magsaka sa ibabaw. Kon ano man ang limitasyon nga makita naton sa aton kaugalingon, nakita sang Amay nga Langitnon kag sang Iya Anak ang butang nga mahimayaon sa aton, butang nga diosnon. Pareho nga si Jesucristo “sa ginsuguran kaupod sa Amay,” gani “kita man” (Doktrina kag mga Kasugtanan 93:21, 23). Pareho sa Iya nga “padayon nga nagdugang sang grasya sa grasya, tubtob nga nabaton niya ang kabug-osan,” gani kamo man “magabaton sang grasya sa grasya” (mga bersikulo 13, 20). Ang ginpanumbalik nga ebanghelyo nagatudlo sa aton parte sa matuod nga kinaiya sang Dios, kag nagatudlo man ini parte sa aton kaugalingon kag kon ano kita sarang nga mangin. Wala sapayan sang mga pagpaninguha sang “isa nga malain” (bersikulo 39)—kag wala sapayan sang pamatyag mo nga kulang sa imo—literal ka nga anak sang Dios nga may potensyal nga “sa nagakaigo nga tion makabaton sang iya kabug-osan” (bersikulo 19).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 93

Ginasimba naton ang Dios nga Amay kag ang Iya Anak, nga si Jesucristo.

Parte sa rebelasyon sa Doktrina kag mga Kasugtanan 93, ginpaathag sang Ginuo, “Ginahatag ko sa inyo ining mga kasugoan agud mahangpan ninyo kag mahibaloan kon paano magsimba, kag mahibaloan kon ano ang inyo ginasimba agud nga makakari kamo sa Amay sa akon ngalan, kag sa nagakaigo nga tion makabaton sang iya kabug-osan” (bersikulo 19). Samtang ginatun-an mo ining rebelasyon, markahi ang mga kamatuoran nga imo makita parte sa mga Persona nga aton ginasimba: ang Dios nga Amay kag Iya Anak, nga si Jesucristo. Ano ang imo matun-an parte sa kon “paano magsimba” sa Ila? sa kon paano “[mag]kari sa Amay”?

Si Propetang Joseph Smith nagtudlo, “Kon indi maintiendihan sang mga tawo ang karakter sang Dios, indi man nila maintiendihan ang ila mga kaugalingon” (Teachings: Joseph Smith, 40). Samtang nagatuon ka parte sa Manluluwas paagi sa pagbasa sang Doktrina kag mga Kasugtanan 93, pangitaa man kon ano ang imo matun-an parte sa imo kaugalingon. Halimbawa, ano ang imo matun-an parte sa Iya sa mga bersikulo 3, 12, 21, kag 26? Ano nga pareho nga mga kamatuoran ang imo makita parte sa imo kaugalingon sa mga bersikulo 20, 23, kag 28–29? (Tan-awa man sa 1 Juan 3:2; 3 Nefi 27:27; Dean M. Davies, “The Blessings of Worship,” Ensign ukon Liahona, Nob. 2016, 93–95.)

Doktrina kag mga Kasugtanan 93:1–39

Ang himaya sang Dios kasanag kag kamatuoran.

Mahimo nga natalupangdan mo nga ang himaya, kasanag, kag kamatuoran masami nga nagagwa sa sining rebelasyon. Samtang imo ginatun-an ilabi na gid ang mga bersikulo 21–39, maghimo sang listahan sang mga kamatuoran nga imo matun-an parte sa himaya, kasanag, kag kamatuoran. Paano ka ginainspirar sining mga kamatuoran nga magpangita sang mas dako nga kasanag kag kamatuoran? Paano ayhan maapektuhan sining mga kamatuoran ang imo pagpangabuhi sa adlaw-adlaw?

kristal nga bintana

Makabaton kita sang kasanag kag kamatuoran kon magtuman kita sa mga kasuguan sang Dios.

Doktrina kag mga Kasugtanan 93:40–50

“Ipahamtang mo sa kahusay ang imo panimalay.”

Sang ara na dapit sa bersikulo 40, ang Doktrina kag mga Kasugtanan 93 daw nagsaylo halin sa pagpanudlo parte sa himaya sang Dios kag sa aton diosnon nga potensyal pakadto sa instruksyon parte sa pagkaginikanan kag pagpahamtang sang aton mga panimalay sa kahusay. Paano ka ginabuligan sang mga pinanudlo sang Ginuo parte sa kasanag, kamatuoran, kag himaya sa mga bersikulo 1–39 nga maintiendihan kag sundon ang laygay sa mga bersikulo 40–50?

Tan-awa man sa David A. Bednar, “More Diligent and Concerned at Home,” Ensign ukon Liahona, Nob. 2009, 17–20.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 93:2.Paano si Jesucristo nangin “matuod nga kasanag” sa aton mga kabuhi? Paano naton nakita ang Iya Kasanag sa iban nga tawo sa aton palibot?

Doktrina kag mga Kasugtanan 93:3–29.Para buligan ang imo pamilya nga hambalan ang ila natun-an sa seksyon 93 parte sa Manluluwas kag sa ila mga kaugalingon, pwede kamo maghampang sang parisay. Halimbawa, pwede ka maghanda sang isa ka set sang mga kard nga may mga bersikulo sang seksyon 93 nga nagatudlo sang mga kamatuoran parte sa Manluluwas (tan-awa sa mga bersikulo 3, 12, 21, 26) kag sang isa pa ka set nga nagatudlo sang daw pareho sa aton mga kaugalingon (tan-awa sa mga bersikulo 20, 23, 28–29). Pwede nga magbulos-bulos ang mga miyembro sang pamilya sa pagpili sang kard halin sa kada set, basahon ang mga bersikulo, kag tilawan nga pangitaon ang kaparis nga mga kamatuoran. Paano ginaimpluwensyahan sining mga kamatuoran ang aton nabatyagan parte sa Manluluwas kag sa aton kaugalingon?

Doktrina kag mga Kasugtanan 93:12–13, 20.Ano ang buot silingon sang magbaton sing “grasya sa grasya” kag magpadayon nga “nagadugang sang grasya sa grasya”? (mga bersikulo 12–13). Anong ginapanugyan sining mga bersikulo parte sa paagi nga nagatubo kag nagatuon kita? Paano maapektuhan sang paghibalo sini ang paagi nga ginatrato naton ang iban—kag ang aton mga kaugalingon?

Doktrina kag mga Kasugtanan 93:24.Basaha ang depinisyon sang kamatuoran nga makita sa sining bersikulo, kag hagara ang mga miyembro sang pamilya nga magpaambit sang bisan ano halin sa seksyon 93 nga ila ginakabig malahalon nga kamatuoran. Ano ang iban pa nga depinisyon sang kamatuoran nga makita naton sa Juan 14:6; Jacob 4:13; ukon sa himno parte sa kamatuoran.

Doktrina kag mga Kasugtanan 93:40.Basi samtang imo ginabasa ining bersikulo, pwede magkanta ang imo pamilya sang kanta parte sa pagtuon sa balay, pareho sang “Teach Me to Walk in the Light [Tudloi Ako sang Iya Gugma]” (Mga Himno kag mga Ambahanon sang Kabataan, 66). Basi masadyahan ang magagmay nga kabataan nga maghimo-himo sang mga aksyon nga bagay sa mga tinaga. Ano ang ginainspirar sa imo nga himuon para mag-imbitar pa gid sang dugang nga “kasanag kag kamatuoran” sa inyo puluy-an?

Doktrina kag mga Kasugtanan 93:41–50.Hambali sing ululupod bilang pamilya ang kon ano ang posible nga “indi husto sa inyo panimalay.” Ano ang sarang naton himuon para “ipahamtang sa kahusay ang [aton] panimalay”? (mga bersikulo 43–44).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “I Am a Child of God [Ako Anak sang Dios],” Mga Himno kag mga Ambahanon sang Kabataan, 2–3.

Pagpauswag sang Aton Pagtuon

Magbasa sing sobra kaisa. Pwede mo pilion nga basahon ang Doktrina kag mga Kasugtanan 93 sing masobra isa ka beses sa bilog nga semana. Tagsa nga magbasa ka, mahimo nga matalupangan mo ang lainlain nga mga kamatuoran nga nagakuha sang imo atensyon ukon nagainspirar sa imo sa bag-o nga paagi. Ang pagbasa sing pila ka beses nagahatag man sang mga oportunidad nga mas magbinagbinag ka pa gid.

Jesucristo

Light and Truth [Kasanag kag Kamatuoran], ni Simon Dewey