1 Sa pagkamatuod, ini ang siling sang Ginuo: Matabo ini nga ang tagsa ka kalag nga magtalikod sa iya mga sala kag magkari sa akon, kag magtawag sa akon ngalan, kag magpati sa akon tingug, kag magtuman sang akon mga kasugoan makakita sang akon nawong kag makahibalo nga buhi ako;

2 Kag makahibalo nga ako ang matuod nga kasanag nga nagapasanag sa tagsa ka tawo nga nagakari sa kalibutan;

3 Kag makahibalo nga ako yara sa Amay, kag ang Amay yara sa akon, kag ang Amay kag ako isa—

4 Ang Amay bangod ginhatag niya sa akon ang iya kabug-osan, kag ang Anak bangod yara ako sa kalibutan kag ginhimo ang unod nga akon tabernakulo, kag nagpuyo upod sa mga anak sang katawhan.

5 Yara ako sa kalibutan kag nagbaton halin sa akon Amay, kag ang mga buluhaton niya maathag nga ginpahayag.

6 Kag nakita ni Juan kag nagpamatuod parte sa kabug-osan sang akon himaya, kag ang kabug-osan sang kasulatan ni Juan igapahayag pagkatapos sini.

7 Kag nagpamatuod sia nga nagasiling: Nakita ko ang iya himaya nga yara sia humalin sa ginsuguran antes pa ginhimo ang kalibutan;

8 Gani, sa ginsuguran amo ang Pulong, kay sia ang Pulong, bisan pa ang mensahero sang kaluwasan—

9 Ang kasanag kag ang Manunubos sang kalibutan; ang Espiritu sang kamatuoran nga nagkari sa kalibutan bangod ang kalibutan ginhimo niya, kag sa iya ang kabuhi sang katawhan kag ang kasanag sang katawhan.

10 Ang mga kalibutan ginhimo niya; ang mga tawo ginhimo niya; ang tanan nga butang ginhimo niya, kag paagi sa iya, kag halin sa iya.

11 Kag ako, si Juan, nagapamatuod nga nakita ko ang iya himaya, pareho sa himaya sang Bugtong nga Anak sang Amay nga puno sang grasya kag kamatuoran, ang Espiritu sang kamatuoran nga nagkari kag nagpuyo sa unod, kag nagpuyo upod sa amon.

12 Kag ako, si Juan, nakakita nga sa umpisa wala niya nabaton ang kabug-osan apang nagbaton sing grasya sa grasya;

13 Kag sa umpisa wala niya nabaton ang kabug-osan apang padayon nga nagdugang sang grasya sa grasya tubtob nga nabaton niya ang kabug-osan;

14 Kag gani gintawag sia nga Anak sang Dios kay sa umpisa wala niya nabaton ang kabug-osan.

15 Kag ako, si Juan, nagapamatuod, kag yari karon, ang kalangitan nabuksan, kag ang Balaan nga Espiritu nagpanaog sa iya sa dagway sing isa ka pating, kag naghugpa sa iya, kag may isa ka tingug halin sa langit nga nagasiling: Ini ang akon hinigugma nga Anak.

16 Kag ako, si Juan, nagapamatuod nga nabaton niya ang kabug-osan sang himaya sang Amay;

17 Kag nabaton niya ang tanan nga gahum sa langit pati sa duta, kag ang himaya sang Amay yara sa iya kay nagpuyo sia sa iya.

18 Kag matabo ini nga kon tampad kamo mabaton ninyo ang kabug-osan sang kasulatan ni Juan.

19 Ginahatag ko sa inyo ining mga kasugoan agud mahangpan ninyo kag mahibaloan kon paano magsimba, kag mahibaloan kon ano ang inyo ginasimba agud nga makakari kamo sa Amay sa akon ngalan, kag sa nagakaigo nga tion makabaton sang iya kabug-osan.

20 Kay kon tumanon ninyo ang akon mga kasugoan mabaton ninyo ang iya kabug-osan, kag mahimaya sa akon pareho nga nahimaya ako sa Amay; gani, ginasiling ko sa inyo, magabaton kamo sang grasya sa grasya.

21 Kag karon, sa pagkamatuod ginasiling ko sa inyo, ako sa ginsuguran kaupod sa Amay, kag ako ang Panganay;

22 Kag inang tanan nga ginbun-ag paagi sa akon mga umalambit sang himaya sang Panganay, kag simbahan sang Panganay.

23 Kamo man sa ginsuguran kaupod sa Amay; inang Espiritu, nga Espiritu sang kamatuoran;

24 Kag ang kamatuoran amo ang ihibalo sang mga butang subong, kag sadto, kag sa magaabot pa;

25 Kon ano man ang kapin ukon kulang sangsa sini amo ang espiritu sinang isa nga malain nga butigon halin pa sa ginsuguran.

26 Ang Espiritu sang kamatuoran halin sa Dios. Ako ang Espiritu sang kamatuoran, kag nagpamatuod si Juan parte sa akon nga nagasiling: Nagbaton sia sang kabug-osan sang kamatuoran, huo, sang tanan nga kamatuoran;

27 Kag wala sang tawo nga makabaton sang kabug-osan luwas lang kon nagatuman sia sang iya mga kasugoan.

28 Ang nagatuman sang iya mga kasugoan nagabaton sang kamatuoran kag kasanag tubtob nga mahimaya sia sa kamatuoran kag makahibalo sang tanan nga butang.

29 Ang tawo sa ginsuguran kaupod man sa Dios. Ang kaalam ukon ang kasanag sang kamatuoran wala gintuga ukon ginhimo, sa pagkamatuod indi gid ini mahimo.

30 Ang tanan nga kamatuoran hilway sa sinang kaharian sa diin ini ginbutang sang Dios nga maghulag para sa iya kaugalingon pareho man sang tanan nga kaalam; indi gani wala sang kabuhi.

31 Tan-awa, sa sini ang kahilwayan sang tawo sa pagpili, kag sa sini ang pagkondenar sang tawo; kay inang halin sa ginsuguran maathag nga ginpahayag sa ila, kag wala nila ginbaton ang kasanag.

32 Ang tagsa ka tawo nga ang iya espiritu indi magbaton sang kasanag pagakondenahon.

33 Kay ang tawo espiritu. Ang mga elemento wala’y katapusan, kag ang espiritu kag elemento nga indi mahimo mahamulag magabaton sang kabug-osan sang kalipay;

34 Kag kon nahamulag, ang tawo indi makabaton sang kabug-osan sang kalipay.

35 Ang mga elemento ang tabernakulo sang Dios; huo, ang tawo ang tabernakulo sang Dios, sila man mga templo sang Dios; kag ang bisan ano nga templo nga mahigkoan, pagagub-on sang Dios ang ina nga templo.

36 Kaalam ang himaya sang Dios, ukon sa iban nga pulong, kasanag kag kamatuoran.

37 Ginatalikdan sang kasanag kag kamatuoran inang isa nga malain.

38 Ang espiritu sang tagsa ka tawo wala sang sala sa ginsuguran; kay gintubos sang Dios ang tawo halin sa pagkahulog, nagbalik ang mga tawo liwat sa ila pagkalapsag nga wala sang sala sa panulok sang Dios.

39 Kag inang isa nga malain nag-abot kag ginkuha ang kasanag kag kamatuoran sa mga anak sang katawhan paagi sa indi nila pagtuman sang mga kasugoan, kag bangod sa tradisyon sang ila mga amay.

40 Apang ginsugo ko kamo nga padakuon ang inyo mga anak sa kasanag kag kamatuoran.

41 Apang sa pagkamatuod ginasiling ko sa imo Frederick G. Williams, alagad ko, nagapadayon ka nga yara sa idalom sining pagkondenar;

42 Wala mo gintudloan ang imo mga anak sang kasanag kag kamatuoran suno sa mga kasugoan; kag inang isa nga malain may gahum gihapon sa imo, kag ini ang kabangdanan sang imo pag-antos.

43 Kag karon isa ka kasugoan ang ginahatag ko sa imo—kon luyag mo nga maluwas ka ipahamtang mo sa kahusay ang imo panimalay kay madamo nga butang ang indi husto sa imo panimalay.

44 Sa pagkamatuod, ginasiling ko sa akon alagad nga si Sidney Rigdon nga sa pila ka mga butang wala niya gintuman ang mga kasugoan parte sa iya mga anak; gani, una anay nga ipahamtang sa kahusay ang imo panimalay.

45 Sa pagkamatuod, ginasiling ko sa akon alagad nga si Joseph Smith Jr., ukon sa iban nga pulong, pagatawgon ko kamo nga mga abyan kay kamo akon mga abyan, kag makabaton kamo sang palanublion kaupod nakon—

46 Gintawag ko kamo nga mga alagad bangod sang kalibutan, kag kamo ila mga alagad para sa akon mga katuyoan—

47 Kag karon, sa pagkamatuod ginasiling ko kay Joseph Smith Jr.—Wala mo gintuman ang mga kasugoan, kag kinahanglan ka sawayon sa panulok sang Ginuo;

48 Ang imo panimalay kinahanglan maghinulsol kag talikdan ang pila ka mga butang, kag magpamati sing maayo sa imo mga panudlo, indi gani pagatabugon sila sa ila nahamtangan.

49 Kon ano ang ginahambal ko sa isa ginahambal ko sa tanan; magpangamuyo pirme agud inang isa nga malain wala sang gahum sa imo, kag indi ka pagtabugon sa imo nahamtangan.

50 Ang akon man alagad nga si Newel K. Whitney, isa ka obispo sang akon simbahan kinahanglan pinahan, kag ipahamtang sa kahusay ang iya panimalay, kag sigurohon nga mas matutum sila kag mapisan sa puluy-an, kag nagapangamuyo pirme indi gani pagatabugon sila sa ila nahamtangan.

51 Karon, ginasiling ko sa inyo mga abyan ko, palakta ang akon alagad nga si Sidney Rigdon, kag padalia, kag ipabantala man ang tuig nga nahamut-an sang Ginuo, kag ang ebanghelyo sang kaluwasan suno sa ihatag ko sa iya nga panghambal; kag sa pagsugot sang kadam-an sa simbahan paagi sa pangamuyo sang pagtuo pagasakdagon ko sia.

52 Kag padalia man ang akon mga alagad nga sanday Joseph Smith Jr. kag Frederick G. Williams, kag igahatag man sa ila sa pagkamatuod suno sa pangamuyo sang pagtuo; kag kon tumanon ninyo ang akon mga kasugoan indi kamo paglaglagon sa sining kalibutan, ukon sa kalibutan nga magaabot.

53 Kag sa pagkamatuod ginasiling ko sa inyo nga pagbuot ko nga dalion ninyo ang paglubad sang akon balaan nga mga kasulatan, kag pag-angkon sang ihibalo parte sa kasaysayan, kag parte sa mga pungsod, kag parte sa mga ginharian sa duta, kag parte sa mga layi sang Dios kag tawo, kag ini tanan para sa kaluwasan sang Sion. Amen.