Templo sang Kirtland

Kirtland Temple [Templo sang Kirtland], ni Al Rounds

Agosto 30–Septyembre 5

Doktrina kag mga Kasugtanan 94–97

“Para sa Kaluwasan sang Sion”

Ano nga mga prinsipyo kag doktrina ang nagapangibabaw sa imo samtang imo ginatun-an ang Doktrina kag mga Kasugtanan 94–97? Siguroha nga isulat ang imo mga panghunahuna.

Isulat Ang Imo Mga Panghunahuna

Sang ginsugo sang Ginuo si Moises nga magpatindog sang tabernakulo, ginsilingan Niya si Moises nga “himuon [mo] ang tanan nga butang suno sa huwaran nga ginpakita sa [iya] sa bukid” (Mga Hebreo 8:5; tan-awa man sa Exodo 25:8–9). Ang tabernakulo amo ang mangin sentro sang kampo sang Israel sa kamingawan (tan-awa sa Numeros 2:1–2). Sang ulihi, ginsugo sang Dios si Salomon kag ang iya katawhan nga magpatindog sang templo suno sa huwaran nga Iya ginpakita (tan-awa sa 1 Mga Cronica 28:12,19).

Sang ginpanumbalik sang Ginuo ang kabug-osan sang ebanghelyo, ginsugo Niya si Joseph Smith nga magpatindog sang mga templo suno sa ginpahayag nga huwaran. “Ipatukod ang balay indi suno sa pamaagi sang kalibutan,” siling sang Ginuo. “Ipatukod ini suno sa pamaagi nga ipakita ko sa inyo” (Doktrina kag mga Kasugtanan 95:13–14; tan-awa man sa 97:10). Pareho sang tabernakulo sa kamingawan, ang templo gintuyo nga mangin tampok sang Kirtland (tan-awa sa Doktrina kag mga Kasugtanan 94:1).

Sa karon ang mga balay sang Ginuo makita na sa bilog nga kalibutan. Bisan pa nga wala ini sa mga sentro sang aton mga siyudad, mahimo nga mangin sentro ang mga ini sang aton kabuhi. Bisan pa nga lainlain ang hitsura sang tagsa ka templo, sa sulod sang mga ini matun-an naton sa gihapon ang pareho nga diosnon nga huwaran—ang langitnon nga plano nga magadala sa aton pabalik sa presensya sang Dios. Ang sagrado, wala katapusan nga mga ordinansa nagabulig sa aton nga tukuron ang aton mga kabuhi kag pabakuron ang aton mga pamilya “indi suno sa pamaagi sang kalibutan” kundi suno sa huwaran nga ginapakita sa aton sang Dios.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 94; 97:15–17

Ang Ginuo sarang ko nga makaupod sa akon adlaw-adlaw nga pangabuhi.

Ang mga instruksyon sa Doktrina kag mga Kasugtanan 94 kag 97 ginhatag sa pareho nga adlaw—Agosto 2, 1833. Ang seksyon 97 nagatalakay sa isa ka bahin sang templo nga ginaplano para sa Jackson County, Missouri, samtang ang seksyon 94 nagatalakay sang administratibo nga mga bilding sa Kirtland, Ohio. Mahimo nga matalupangdan mo ang pila ka pagpalareho sa ginhambal sang Ginuo sa sining lainlain nga klase sang mga bilding (tan-awa sa Doktrina kag mga Kasugtanan 94:2–12; 97:10–17). Samtang imo ginabinagbinag ining mga instruksyon, pamensara ang pwede mo himuon para maeksperiyensyahan ang himaya kag presensya sang Ginuo pirme, sa sulod sang mga bilding sang Simbahan kag sa imo adlaw-adlaw nga pangabuhi.

Doktrina kag mga Kasugtanan 95

Ginapinahan sang Ginuo ang Iya mga ginapalangga.

Mga lima ka bulan ang nagligad sugod sang Enero 1833, sang ginsugo sang Ginuo ang mga Santos sa Kirtland nga magpatukod sang balay sang Dios kag maghiwat sang balaan nga asembliya (tan-awa sa Doktrina kag mga Kasugtanan 88:117–19). Sang mabaton ang rebelasyon nga nasulat sa seksyon 95 sang Hunyo 1833, wala pa nila maaksyuni ang ina nga kasugoan. Ano ang imo matun-an halin sa pamaagi nga ginpinahan sang Ginuo ang mga Santos sa sining rebelasyon? May mga kasugoan ukon mga laygay bala nga wala mo pa maaksyuni? Ano ang ginapabatyag sa imo nga himuon?

Doktrina kag mga Kasugtanan 95:8, 11–17; 97:10–17

Sa templo ginabugayan sang Dios ang Iya katawhan.

Pagkatapos nga mapinahan bangud sang indi pagpatukod sang balay sang Ginuo sa Kirtland, nagpili ang mga lider sang Simbahan sang lugar sa tunga sang talamnan sang trigo kon diin sila magapatindog. Si Hyrum Smith, utod sang Propeta, insigida nga nagdalagan para magkuha sang garab kag ginsugdan ang pagpanghawan sang talamnan. “Nagahanda kami sa pagpatindog sang balay para sa Ginuo,” siling niya, “kag pursigido ako nga mangin una sa buluhaton” (sa Teachings of Presidents of the Church: Joseph Smith [2007], 271,273). Binagbinaga ang kalangkag ni Hyrum samtang imo ginabasa ang Doktrina kag mga Kasugtanan 95:8, 11–17; 97:10–17. Ano ang imo makita nga nagainspirar sang pareho nga determinasyon sa imo sa pagbaton sang mga bugay sang templo?

Si Hyrum Smith nga nagauyat sang hagbas

Hyrum Smith Clearing Land [Si Hyrum Smith nga Nagapanghawan sang Duta], ni Joseph Brickey

Doktrina kag mga Kasugtanan 97:18–28

Ang Sion amo ang “putli sing tagipusuon.”

Ang Propeta nga si Joseph Smith nagtudlo, “Dapat naton kabigon ang pagpatindog sang Sion bilang aton pinakadako nga handum” (Teachings: Joseph Smith, 186). Para sa mga Santos sang tinuig 1830, ang Sion isa ka lugar, ang literal nga “siyudad sang aton Dios” (Doktrina kag mga Kasugtanan 97:19). Pero sa rebelasyon nga nasulat sa seksyon 97, ginpasangkad sang Ginuo ang ina nga panan-awan. Ang Sion nagalaragway man sang katawhan—“ang putli sa tagipusuon” (bersikulo 21). Samtang imo ginabasa ang mga bersikulo 18–28, hunahunaa ang ini nga kahulugan kon imo ginabasa ang tinaga nga “Sion.” Ano ang buot silingon para sa imo sang mangin putli sang tagipusuon? Paano nagabulig ang templo sa paglab-ot sang “kaluwasan sang Sion”? (bersikulo 12).

Tan-awa man sa Moises 7:18.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 95:8.Paano nagdala ang paghimo kag pagtuman sang mga kasugtanan sa templo sang “gahum halin sa kahitaasan” sa aton mga kabuhi? Basi pwede magpaambit ang mga miyembro sang pamilya sang ila nabatyagan parte sa templo ukon iistorya ang mga eksperiyensya sang nabatyagan nila nga ginbugayan sila sang “gahum halin sa kahitaasan” paagi sa pagsimba sa templo.

Para buligan ang mga nagahanda sa pagsulod sa templo, pwede ninyo rebyuhon ang mga video, mga litrato, kag mga instruksyon nga makita sa temples.ChurchofJesusChrist.org.  

Doktrina kag mga Kasugtanan 95:1–11.Ano ang aton matun-an parte sa pagpina sa sining mga bersikulo? Ano ang aton matun-an parte sa Ginuo? Paano nagakaapektuhan sining mga panan-awan ang aton pagbaton sang pina ukon pagpina sa iban?

Doktrina kag mga Kasugtanan 97:8.Suno sa sining bersikulo, paano kita “mabaton sang” Ginuo? Ano ang kinalain sini sa pagbaton sang kalibutan? Ano ang buot silingon sang “magtuman sang [aton] mga kasugtanan paagi sa pagsakripisyo”? Paano naton nahimo ini?

Doktrina kag mga Kasugtanan 97:10–21.Ang Propeta nga si Joseph Smith nagtudlo, “Ang bisan ano nga lugar nga ginatipunan sang mga Santos amo ang Sion, kon diin ang tagsa ka matarong nga lalaki [ukon babayi] magapatindog sang lugar nga pasilungan sang iya mga anak” (Teachings: Joseph Smith, 186). Paano kita magpatindog sang Sion sa aton balay? Ano nga mga prinsipyo ang aton makita sa Doktrina kag mga Kasugtanan 97:10–21? Bilang pamilya, magpili sang prinsipyo nga tutokan sining semana.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Isulat ang imo mga eksperiyensya. Isulat ang mga eksperiyensya mo parte sa mga prinsipyo kag doktrina nga imo ginatun-an. Ining mga eksperiyensya mahimo nga mangin kabahin sang personal nga kasaysayan nga magabugay sa palaabuton nga mga henerasyon.

Pagpatindog sang Templo sang Kirtland

Building the Kirtland Temple [Pagpatindog sang Templo sang Kirtland], ni Walter Rane