“Septyembre 13–19. Doktrina kag mga Kasugtanan 102–105: ‘Pagkatapos sing Madamo nga Pag-antos … Magaabot ang Bugay,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Septyembre 13–19. Doktrina kag mga Kasugtanan 102–105,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

mga tawo nga may mga karo

C.C.A. Christensen (1831–1912), Sion’s Camp [Guban sang Sion], c.1878, tempera sa muslin, 78×114 ka pulgada. Brigham Young University Museum of Art, regalo sang mga apo ni C.C.A. Christensen, 1970

Septyembre 13–19

Doktrina kag mga Kasugtanan 102–105

“Pagkatapos sing Madamo nga Pag-antos … Magaabot ang Bugay”

Ano nga mga prinsipyo sa Doktrina kag mga Kasugtanan 102– 5 ang makahulugan para sa imo? Pamensara nga isulat ang imo mga panghunahuna kag mga ginabatyag parte sa sining mga prinsipyo.

Isulat Ang Imo Mga Panghunahuna

Ang mga Santos sa Kirtland nasubuan gid sang mabatian nga ang ila kauturan sa Jackson County, Missouri, ginpangtabog sa ila mga puluy-an. Ayhan nakapaisog sa ila, sadto, sang gindeklarar sang Ginuo nga ang “kaluwasan sang Sion” magaabot “paagi sa gahum” (Doktrina kag mga Kasugtanan 103:15). Upod ang ina nga promisa sa ila mga tagipusuon, masobra 200 ka mga lalaki, kag mga 25 ka mga babayi kag kabataan, ang nag-entra sa ila ginatawag nga Guban sang Israel, nga sang ulihi nakilala bilang Guban sang Sion. Ang misyon sini amo ang magmartsa pakadto sa Missouri kag tubuson ang Sion.

Para sa mga miyembro sang grupo, ang pagtubos sang Sion nagakahulugan sang pagpabalik sang mga Santos sa ila kadutaan. Pero antes lang gid mag-abot ang grupo sa Jackson County, ginhambalan sang Ginuo si Joseph Smith nga magdulog kag bungkagon ang Guban sang Sion. Ang pila sa mga miyembro sang grupo natingala kag naakig sa sining bag-o nga instruksyon; para sa ila, nagakahulugan ini nga napaslawan ang ila lakat kag wala matuman ang mga pangako sang Ginuo. Ugaling, ang iban, lain ang panglantaw diri. Bisan wala makabalik ang ginpangtabog nga mga Santos sa Jackson County, ining eksperiyensya nagdala sang makabig “kaluwasan” sa Sion, kag matuod nga ini “[nag-]abot paagi sa gahum.” Ang matinuohon nga mga miyembro sang Guban sang Sion, nga madamo ang nangin mga lider sang Simbahan sa ulihi, nagpamatuod nga ang eksperiyensya nagpadalom sang ila pagtuo sa gahum sang Dios, sa diosnon nga tulumanon ni Joseph Smith, kag sa Sion—indi lang sa Sion nga lugar kundi sa Sion nga katawhan sang Dios. Imbes nga dudahan ang balor sining daw imposible nga hilikuton, natun-an nila nga ang matuodtuod nga hilikuton amo nga sundon ang Manluluwas, bisan pa nga wala naton maintiendihi ang tanan. Sa amo sini ang Sion, sa ulihi, pagatubuson.

Ang Guban sang Sion nagtiner sa kilid sang pangpang sang Suba nga Little Fishing, nga ginapakita diri.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 102:12–23

Ano ang katuyuan sang mga panulin sa sining mga bersikulo?

Ang seksyon 102 nagaunod sang mga ginhambalan sa miting sa Kirtland, Ohio, kon diin gin-organisar ang una nga mataas nga konseho sang Simbahan. Ang mga bersikulo 12–23 nagalaragway sang mga proseso nga ginasunod sang mataas nga mga konseho kon maghiwat sang mga konseho sang pagkamiyembro para sa mga nakahimo sang mabug-at nga mga kasaypanan.

Si Pangulong M.Russell Ballard nagtudlo, “Kon kaisa ang mga miyembro nagapamangkot kon ngaa ang Simbahan nagahiwat sang mga konseho [sang pagkamiyembro]. Tatlo ang katuyuan sini: para luwason ang kalag sang nakasala, para proteksyunan ang wala sing sala, kag para amligan ang katinlo, integridad, kag maayo nga ngalan sang Simbahan” (“A Chance to Start Over: Church Disciplinary Councils and the Restoration of Blessings,” Ensign, Sep. 1990, 15).

Doktrina kag mga Kasugtanan 103:1–12, 36; 105:1–19

Ang Sion sarang lamang matukod sa mga prinsipyo sang pagkamatarong.

Ngaa nadula sa mga Santos ang ila duta nga ginpanaad sa Missouri? Kag ngaa wala gintugtan sang Ginuo nga ibalik sila sang Guban sang Sion sa ila kadutaan? Sigurado gid nga ang masingki nga mga aksyon sang malain nga mga tawo sa Missouri ang rason, kag ang gobernador sang Missouri nangako sang suporta sa mga Santos pero wala ini gintuman. Pero ang Ginuo nagsiling nga “kon indi tungod sa mga paglapas sang akon katawhan,” ang Sion “natubos na kuntani subong” (Doktrina kag mga Kasugtanan 105:2). Sa imo pagbasa sang Doktrina kag mga Kasugtanan 103:1–12, 36; 105:1–19, mahimo nga matalupangdan mo ang pila ka mga butang nga nagpugong sang pagpatukod sang Sion sa Missouri kag mga butang nga nakabulig kuntani. Ano ang imo natun-an nga makabulig sa imo nga tukuron ang Sion sa imo tagipusuon kag puluy-an?

Doktrina kag mga Kasugtanan 103:12–13; 105:1–6, 13–19

Ang mga bugay nagaabot pagkatapos sang mga kasakit kag mga pagtilaw sang pagtuo.

Sa madamo nga paagi, ang pagpasakop sa Guban sang Sion isa ka pagtilaw sang pagtuo. Malawig ang biyahe, mainit ang panahon, kag kon kaisa iwat ang pagkaon kag tubig. Kag pagkatapos sang tanan nila nga ginbatas, wala sa gihapon makabalik ang mga Santos sa ila kadutaan. Pamensara kon paano kuntani nakabulig ang mga prinsipyo sa Doktrina kag mga Kasugtanan 103:12–13 kag 105:1–6, 13–19 sa mga miyembro sang Guban sang Sion nga nagaduda kon bala ang kasugoan nga mag-organisar naghalin gid matuod sa Dios. Paano makabulig sa imo ining mga prinsipyo sa kaugalingon mo nga mga pagtilaw sang pagtuo?

Pwede mo man basahon ang parte sa mga eksperiyensya sang mga miyembro sang Guban sang Sion sa “Mga Tingug sang Pagpanumbalik” sa katapusan sining outline. Ano ang nanamian mo sa ila mga pamatasan? Ano ang imo matun-an sa ila mga ehemplo?

Doktrina kag mga Kasugtanan 104:11–18, 78–83

Isa ako ka “tulugyanan [sang] dutan-on nga mga bugay.”

Dugang pa sa mga pagtilaw sa Missouri, sang 1834 nagpangatubang ang Simbahan sang mga kabudlayan pinansyal, lakip na ang dalagko nga kautangan kag gasto. Sa seksyon 104 naghatag sing laygay ang Ginuo parte sa pinansyal nga sitwasyon sang Simbahan. Paano mo magamit ang mga prinsipyo sa mga bersikulo 11–18 kag 78–83 sa imo kaugalingon nga pinansyal nga mga desisyon?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 103:12, 36; 105:9–13.Ginpangabay na bala sadto ang inyo pamilya (ukon isa sang inyo katigulangan) sa paghimo sang butang nga wala nagresulta sa bagay nga inyo ginapaabot? Ano ang inyo matun-an sa mga reaksyon sang mga miyembro sang Guban sang Sion sang ang ila lakat wala magresulta sa ila ginapaabot (tan-awa sa “Mga Tingug sang Pagpanumbalik” sa katapusan sining outline).

Doktrina kag mga Kasugtanan 104:13–18.Ano ang ginhatag sa aton sang Ginuo? Ano ang Iya ginapaabot nga himuon naton sa sining mga butang?

Doktrina kag mga Kasugtanan 104:23–46.Pwede nga pangitaon sang inyo pamilya sa sining mga bersikulo kon pila ka beses nga ginpromisa sang Ginuo nga “ibubo ang mga bugay” (bersikulo 23) sa mga matinuohon. Basi husto ini nga tion para “isipon ang inyo mga bugay” (“Count Your Blessings [Kon sa Balod sang Kabuhi],” Mga Himno kag mga Ambahanon sang Kabataan, no. 8) kag hambalan kon paano nagabulig sa aton ang paghimo sini sa tion sang kabudlayan. Basi masadyahan ang magagmay nga kabataan sa pagdrowing sang mga litrato sang mga bugay nga ila gid ginapasalamatan.

Doktrina kag mga Kasugtanan 105:38–41.Paano kita “magtanyag sang paghidaet” (bersikulo 40) kon indi maayo ukon indi patas ang pagtratar sang iban sa aton? Ano ang sarang naton himuon para mangin “bandera sang paghidaet” (bersikulo 39) sa aton puluy-an?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Count Your Blessings [Kon sa Balod sang Kabuhi],” Mga Himno kag mga Ambahanon sang Kabataan, no. 8–9.

Litrato

icon sang mga tingug sang pagpanumbalik

Mga Tingug sang Pagpanumbalik

Guban sang Sion

Bangud wala mabalik sang Guban sang Sion ang mga Santos sa ila kadutaan sa Jackson County, madamo ang nakabatyag nga napaslawan ang ila ginhimo. Ugaling, madamo sa mga nag-entra sa Guban sang Sion ang nagpanghunahuna sang ila inagyan kag nakita kon paano gintuman sang Ginuo ang mas mataas nga katuyuan sa ila mga kabuhi kag sa Iya ginharian. Ari ang pila sang ila mga testimonya.

Si Joseph Smith

Litrato

Si Joseph Smith

Masobra 40 ka tuig pagkatapos sang Guban sang Sion, si Joseph Young, nga miyembro sadto sang grupo, nagreport nga si Joseph Smith nagsiling:

“Mga utod, ang iban sa inyo akig sa akon, tungod wala kamo nag-away sa Missouri; pero isiling ko sa inyo, indi gusto sang Dios nga makig-away kamo. Indi Niya maorganisar ang iya ginharian paagi sa dose ka tawo para buksan ang pwertahan sang ebanghelyo sa kapungsuran sang kalibutan, kag paagi sa sitenta ka tawo sa idalom sang ila direksyon nga magsunod sa ila agi, luwas kon kuhaon niya sila sa grupo sang mga tawo nga naghalad sang ila mga kabuhi, kag naghimo sang dako nga sakripisyo pareho kay Abraham.

“Karon, nakita na sang Ginuo ang iya Dose kag ang iya Kapitoan, kag may pagatawgon nga iban pa nga mga korum sang Kapitoan, nga magasakripisyo, kag ang mga wala nagsakripisyo kag naghalad sa karon, magahimo sang mga ini sa ulihi.”¹

Brigham Young

Litrato

Brigham Young

“Sang mag-abot kami sa Missouri naghambal ang Ginuo sa iya alagad nga si Joseph kag nagsiling, ‘Ginabaton ko ang inyo halad,’ kag naangkon namon ang pribelihiyo nga magbalik. Sang akon pagbalik madamo nga kaabyanan ang namangkot sa akon kon ano ang pulos sang pagpauntat sang mga tawo sa ila buluhaton para magkadto sa Missouri kag dayon magbalik, nga wala man sing natuman nga bisan ano. ‘Sin-o ang nakapulos sadto?’ pamangkot nila. ‘Kon ginsugo gid man ato sang Ginuo, ano ang iya ginatuyo sa pagpahimo sadto?’ … Ginsiling ko sa sining kauturan nga ginpadyaan ako sing maayo—padya nga may dako kaayo nga interes—sa bagay nga ang akon talaksan nag-awas sa ihibalo nga nabaton ko paagi sa pagpanglakaton upod sa Propeta.”²

Wilford Woodruff

Litrato

Wilford Woodruff

“Ara ako sa Guban sang Sion upod ang Propeta sang Dios. Nakita ko ang mga pagpakig-angot sang Dios sa iya. Nakita ko ang gahum sang Dios upod sa iya. Nakita ko nga isa sia ka Propeta. Ang mga ginpakita sa iya paagi sa gahum sang Dios sa sinang misyon may dako kaayo nga balor sa akon kag sa tanan nga nagbaton sang iya mga panulin.”³

“Sang ginpatawag ang mga miyembro sang Guban sang Sion madamo sa amon ang wala pa makakita sang nawong sang kada isa; indi kami kilalahay kag madamo ang wala pa makakita sa propeta. Ginlapta kami sa lainlain nga lugar, gin-ayag nga daw mais, sa bilog nga nasyon. Mga pamatan-on kami, kag temprano pa kaayo nga ginpatawag agud maglakat kag salbaron ang Sion, kag kon ano ang ginapahimo sa amon dapat namon himuon nga may pagtuo. Nagtipon kami halin sa lainlain nga mga Estado sa Kirtland kag naglakat agud luwason ang Sion, agud matuman ang kasugoan sang Dios sa amon. Ginbaton sang Dios ang amon hinimuan pareho sang Iya pagbaton sang hinimuan ni Abraham. Kadamo sang amon natuman, bisan pa nga ang mga nagtalikod sa kamatuoran kag ang mga wala nagapati pila ka beses nga nagpamangkot ‘ano ang inyo hinimuan?’ Nakaangkon kami sang eksperiyensya nga indi namon maagyan [sa] iban pa nga paagi. Nakaangkon kami sang pribelihiyo nga makita ang nawong sang propeta, kag naangkon namon ang pribelihiyo nga magpanglakaton sing linibo ka milya upod sa iya, kag makita ang mga paghikot sang espiritu sang Dios upod sa iya, kag ang mga rebelasyon ni Jesucristo sa iya kag ang katumanan sinang mga rebelasyon. Kag gintipon niya ang may duha ka gatos ka mga elder halin sa bilog nga nasyon temprano pa sina nga adlaw kag ginpadala kami sa pagbantala sa kalibutan sa pagwali sang ebanghelyo ni Jesucristo. Kon wala ako magsulod sa Guban sang Sion wala kuntani ako diri karon [sa Salt Lake City, nga nagaalagad sa Korum sang Dose]. … Sa paglakat didto gilayon kami nga ginhatagan sing kahigayunan sa pagwali sang ebanghelyo, kag ginbaton sang Ginuo ang amon mga pagpangabudlay. Kag sa tunga sang tanan namon nga pagpangabudlay kag pagpigos sa amon, nga masami nabutang sa alang-alang ang amon mga kabuhi, kinahanglan namon nga magtrabaho kag magpangabuhi nga may pagtuo.”⁴

“Ang inagihan nga [amon] nabaton sa pagpanglakaton sa Guban sang Sion masobra pa sa bulawan ang bili.”⁵