“Septyembre 20–26. Doktrina kag mga Kasugtanan 106–108: ‘Sa Pagbukas sang Kalangitan,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Septyembre 20–26. Doktrina kag mga Kasugtanan 106–108,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

adlaw nga nagasilak sa tunga sang mga panganod

Septyembre 20–26

Doktrina kag mga Kasugtanan 106–108

“Sa Pagbukas sang Kalangitan”

Gintudlo ni Elder Ulisses Soares, “Kinahanglan naton nga magsunod sa [Manluluwas], nga nagapaayaw sa pagtuon sang balaan nga mga kasulatan, nga nagakasadya sa mga ini, nga nagatuon sang Iya doktrina, kag nagatinguha nga magpangabuhi pareho sa Iya” (“How Can I Understand?” Ensign ukon Liahona, Mayo 2019, 7). Samtang imo ginatun-an sing maayo ang Doktrina kag mga Kasugtanan 106–8, isulat ang mga paagi nga matinguhaan mo nga ipangabuhi ang mga kamatuoran nga imo madiskubrehan.

Isulat Ang Imo Mga Panghunahuna

Sa primero nga pagtan-aw, ang Doktrina kag mga Kasugtanan 107 daw parte lamang sa pag-organisar sang mga palangakuan sang priesthood sa istraktura sang liderato sa Simbahan sang Ginuo. Matuod gid, sang tion nga ginbantala ining rebelasyon, ang mga miyembro sa Simbahan sobra na kadamo sangsa masarangan sang pila ka lideres nga napahamtang. Gani sa pagplastar sang mga tulumanon kag responsibilidad sang Unang Pangulohan, makabulig kag kinahanglanon matuod ang Korum sang Dose, ang Kapitoan, mga bishop, kag mga pangulohan sang korum. Pero may labaw pa sangsa diosnon nga panulin kon paano organisahon ang mga palangakuan kag korum sang priesthood sa seksyon 107. Diri ginatudlo sang Ginuo sa aton ang parte sa dumaan nga pamaagi sang priesthood nga “ginpahamtang sang panahon ni Adan” (bersikulo 41). Ang katuyuan sini halin sang primero amo ang patigayunon nga ang mga anak sang Dios—lakip na ikaw—makabaton sang nagaluwas nga mga ordinansa sang ebanghelyo kag magkasadya sa “tanan nga espirituhanon nga mga bugay sang simbahan—sa pag-angkon sang pribilihiyo sa pagbaton sang mga misteryo sang ginharian sang langit, [kag] sa pagbukas sang kalangitan sa ila” (mga bersikulo 18–19).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 106; 108

Ang Ginuo nagatudlo, nagapaisog, kag nagasuporta sang Iya mga ginatawag sa pag-alagad.

Sa Doktrina kag mga Kasugtanan 106 kag 108, ang Ginuo naglaygay kag nagpromisa sa duha ka mga miyembro nga gintawag para magserbisyo sa Simbahan. Ano nga mga dinalan sa sining mga rebelasyon ang nagatanyag sang pagpaisog kag paghangop parte sa imo kaugalingon nga pagserbisyo sa ginharian sang Dios? Ari ang duha nga dapat hunahunaon:

Paano ka nakabaton sang “grasya kag pasalig” nga magpabilin nga “malig-on”? (Doktrina kag mga Kasugtanan 106:8).
Paano ka “mangin mas maid-id sugod subong sa pagtuman sang imo mga panaad,” ukon mga kasugtanan? (Doktrina kag mga Kasugtanan 108:3).

Ano pa nga mga dinalan sa mga seksyon 106 kag 108 ang makahulugan sa imo?

Doktrina kag mga Kasugtanan 107

Ginapangunahan sang Ginuo ang Iya Simbahan paagi sa awtoridad sang priesthood.

Sang imo ginatun-an ang Pagpanumbalik sang ebanghelyo, siguro natalupangdan mo nga masami wala ginapaathag sing lubos sang Ginuo ang isa ka doktrina sa isa ka rebelasyon. Kundi, ginapahayag Niya ang mga butang “dinalan sa dinalan” (Doktrina kag mga Kasugtanan 98:12) kon ginapangayo sang sirkumstansya. Bisan pa nga naghatag na ang Ginuo sang panulin parte sa priesthood sang 1829 (tan-awa, halimbawa sa, mga seksyon 20 kag 84), naghatag Sia sing dugang pa nga panulin sa mga Santos sang 1835 parte sa partikular nga mga palangakuan sang priesthood nga kinahanglanon para dumalahan kag giyahan ang Iya nagadamo nga mga sumulunod.

Samtang imo ginabasa ang masunod nga mga palangakuan sa priesthood, pamensara kon paano mo sakdagon ang mga nagaalagad sa sining mga calling paagi sa imo “pagsalig, pagtuo, kag [mga] pangamuyo” (Doktrina kag mga Kasugtanan 107:22).

Ang Unang Pangulohan kag Pangulo sang Simbahan (mga bersikulo 9, 21–22, 65–66, 91–92)
Ang Dose ka Apostoles (mga bersikulo 23–24, 33–35, 38, 58)
Ang Sitenta (mga bersikulo 25–26, 34, 93–97)
Mga obispo (mga bersikulo 13–17, 68–76, 87–88)

Doktrina kag mga Kasugtanan 107:1–20

Ang mga ordinansa sang priesthood nagahatag sang espirituhanon kag temporal nga mga bugay sa tanan nga kabataan sang Amay nga Langitnon.

Si Elder Neil L. Andersen nagtudlo: “Ang priesthood amo ang gahum kag awtoridad sang Dios nga ginhatag para sa kaluwasan kag sa pagbugay sa tanan—kalalakin-an, kababayin-an, kag kabataan. … Kon nagapangabuhi kita nga kaangay-angay, ang mga ordinansa sang priesthood magapauswag sang aton mga kabuhi sa duta kag ihanda kita sa matahum nga mga pangako sa kalibutan sa palaabuton” (“Power in the Priesthood,” Ensign ukon Liahona, Nob. 2013, 92). Samtang imo ginabasa ang Doktrina kag mga Kasugtanan 107:1–20 (tan-awa labi na sa mga bersikulo 18–20) kag ang kabilugan sang mensahe ni Elder Andersen, pamensara nga isulat ang mga impresyon nga imo mabaton parte sa kon paano ginapauswag sang gahum sang Dios ang imo kabuhi sa duta kag ginahanda ka para sa wala katapusan. Ano ang imo ginahimo para mabaton sing lubos—kag mabuligan ang iban nga mabaton—ina nga mga bugay?

Tan-awa man sa Doktrina kag mga Kasugtanan 84:19–27.

Doktrina kag mga Kasugtanan 107:41–57

Ang priesthood nagabugay sang mga pamilya.

Gusto ni Adan nga mabugayan ang iya kaliwatan sang priesthood. Ano nga mga promisa ang iya nabaton? (tan-awa sa mga bersikulo 42, 55). Samtang ginabasa mo ang parte sa ginhimo ni Adan, pamensara ang imo kaugalingon nga mga handum para sa imo pamilya nga makabaton sang mga bugay sang priesthood. Ano ang ginainspirar sa imo nga himuon para mabuligan ang imo pamilya nga mabaton ining mga bugay?

Adam Blessing His Posterity [Si Adan nga Ginapakamaayo ang Iya Kaliwatan], ni Clark Kelley Price

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 106:6.Ano ang sarang himuon sang aton pamilya para magresulta sa “nagkalipay [nga] langit”?

Doktrina kag mga Kasugtanan 107:22.Ano ang aton ginahimo para sakdagon ang aton mga lider “paagi sa … pagsalig, pagtuo, kag pangamuyo”?

Doktrina kag mga Kasugtanan 107:27–31, 85.Ang mga prinsipyo nga nagagiya sa mga konseho sang Simbahan makabulig man sa aton nga maghambalanay bilang pamilya. Ano nga mga prinsipyo sa sining mga bersikulo ang magamit naton sa aton mga paghinambalanay sa pamilya?

Doktrina kag mga Kasugtanan 107:99–100.Hatagi ang isa ka miyembro sang pamilya sang sinulat nga instruksyon para sa ulubrahon sa balay, kag hagara sia nga magpili kon paano niya himuon ang ulubrahon: sing matutom, sing tinamaran, ukon wala nagabasa sang mga instruksyon. Pabantayi sia sa bilog nga pamilya samtang ginahimo ang ulubrahon kag ipapakot kon ano nga pamaagi ang ginpili sining miyembro sang pamilya. Dayon pabusla ang iban nga mga miyembro sang pamilya. Ngaa nga kinahanglan sang Ginuo nga matun-an naton ang aton mga tulumanon kag himuon ang mga ini sing matutom?

Doktrina kag mga Kasugtanan 108:7.Paano naton mapabakod ang kada isa sa aton mga ginahambal? sa aton mga pangamuyo? sa aton mga paglaygay, ukon pagpaisog? sa tanan naton nga ginahimo? Pwede kamo magpili sang isa sini agud himuon bilang pamilya.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “We Thank Thee, O God, For a Prophet [Salamat, O Dios sa Manalagna],” Mga Himno kag mga Ambahanon sang Kabataan, no. 36.

Pagpauswag sang Personal nga Pagtuon

Isulat ang mga panghunahuna. Kon may mag-abot nga espirituhanon nga pamensaron ukon ihibalo, isulat ang mga ini. Kon ginahimo mo ini, ginapakita mo sa Ginuo nga ginahatagan mo sing balor ang Iya ginatudlo. (Tan-awa sa Teaching in the Savior’s Way, 12, 30.)