C.C.A. Christensen (1831–1912), Saints Driven from Jackson County Missouri [Mga Santos nga Ginapangtabog halin sa Jackson County Missouri], c.1878, tempera sa muslin, 77¼×113 ka pulgada. Brigham Young University Museum of Art, regalo sang mga apo ni C.C.A. Christensen, 1970

Septyembre 6–12

Doktrina kag mga Kasugtanan 98–101

“Magpahimuyong kag Kilalaha nga Ako ang Dios”

Samtang imo ginabasa ang Doktrina kag mga Kasugtanan 98–101, tutoki ang mga panghunahuna kag pagpabatyag nga nagaabot. Paano makabulig sa imo ang pag-akto sa mga ini nga mangin ang tawo nga gusto sang Dios nga mangin ikaw?

Isulat Ang Imo Mga Panghunahuna

Para sa mga Santos sang tinuig 1830, ang Independence, Missouri, amo ang literal nga ginpangako nga duta. Amo ini “ang sentro nga lugar” sang Sion (tan-awa sa Doktrina kag mga Kasugtanan 57:3)—ang siyudad sang Dios sa duta—nga ginasakripisyohan nila sing dako para matukod. Para sa ila, ang pagtipon sang mga Santos didto isa ka masadya kag mahimayaon nga panugod sang Ikaduha nga Pagkari. Pero ang ila mga kasilingan sa lugar lain ang panan-aw sa nagakatabo. Nasaklaw sila sa ginasiling nga ginhatag sang Dios sa mga Santos ang duta, kag indi sila komportable sa konsikwensya sa politika, ekonomiya, kag sosyedad sang madamo kaayo nga mga tawo nga madasig nga nagasinaylo sa ila lugar. Wala madugayi ang kabalaka nahimo nga mga pamahog, kag ang mga pamahog nangin pagpamigos kag pagpamintas. Sang Hulyo 1833, ang imprintahan sang Simbahan ginguba, kag sang Nobyembre ginpwersa ang mga Santos nga bayaan ang ila mga puluy-an sa Jackson County, Missouri.

Si Joseph Smith ato sa masobra 800 ka milya ang kalayuon sa Kirtland, kag sinemana antes naglab-ot sa iya ining balita. Pero nakahibalo ang Ginuo sang nagakalatabo, kag Iya ginpahayag sa Iya Propeta ang mga prinsipyo sang paghidaet kag pagpaisog nga magapaumpaw sa mga Santos—mga prinsipyo nga makabulig man sa aton kon nagapangatubang kita sang pagpamigos, kon ang aton matarong nga mga handum wala nagakatuman, ukon kon kinahanglan naton sang pahanumdom nga ang aton adlaw-adlaw nga mga kasakit sa ulihi, bisan paano, “magaresulta sa [aton] kaayohan” (Doktrina kag mga Kasugtanan 98:3).

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 98:1–3, 11–14; 101:1–16

Ang akon mga pagtilaw sarang magresulta sa akon kaayohan.

Ang pila sang aton mga kasakit sa kabuhi gintuga sang aton kaugalingon nga mga pagpili. Ang iban gintuga sang mga pagpili sang iban. Kag kon kaisa wala sang dapat basulon—nagakatabo lang gid ang malaw-ay nga mga butang. Bisan ano ang ginhalinan, ang pagtilaw makabulig tuman sang diosnon nga mga katuyuan. Samtang imo ginabasa ang ginasiling sang Ginuo parte sa mga kabudlayan sang mga Santos sa Doktrina kag mga Kasugtanan 98:1–3, 11–14 kag 101:1–16, ano ang imo makita nga makabulig sa imo sa imo mga pagtilaw? Paano makaapekto ining mga bersikulo sa imo panan-aw sa mga hangkat nga imo ginaatubang? Binagbinaga kon paano nagresulta ang imo mga pagtilaw sa imo kaayohan kag nagpahanabo sang mga katuyuan sang Dios sa imo kabuhi.

Tan-awa man sa 2 Nefi 2:2; Doktrina kag mga Kasugtanan 90:24.

Doktrina kag mga Kasugtanan 98:23–48

Gusto sang Ginuo nga akon pangitaon ang paghidaet sa Iya paagi.

Bisan indi tanan nga ara sa Doktrina kag mga Kasugtanan 98:23–48 magamit sa imo personal nga mga inter-askyon sa iban, ano nga mga prinsipyo ang imo makita nga makabulig sa imo kon ginahimoan ka sang iban sang malain? Basi makabulig nga markahan ang mga tinaga ukon mga dinalan nga nagalaragway kon ano ang gusto sang Ginuo nga pag-atubang sang kinagamo sa Missouri.

Detalye halin sa Christ and the Rich Young Ruler [Si Cristo kag ang Manggaranon nga Manugdumala nga Pamatan-on], ni Heinrich Hofmann

Doktrina kag mga Kasugtanan 100

Ginaatipan sang Ginuo ang mga nagaalagad sa Iya.

Pila lang ka semana pagkatapos nga mahibal-an ni Joseph ang pagpamigos sa Missouri, ginpangabay sia sang isa ka bag-o nga miyembro nga magbiyahe pa-Canada para ipaambit ang ebanghelyo sa iya mga anak nga lalaki. Nagsugot si Joseph, bisan pa nga nabalaka sia nga bayaan ang iya pamilya, labi na tungod sa pagpamigos kag mga pamahog sa iya pamilya kag sa Simbahan. Sang nagapakadto sa Canada, si Joseph kag ang iya kaupod, nga si Sidney Rigdon, nagpangamuyo para mahim-os, kag ang seksyon 100 amo ang sabat sang Ginuo sa ila. Ano ang imo nakita sa sabat sang Ginuo nga mahimo nakapakalma kag nakabulig sa ila?

Mahimo nga may mga eksperiyensya ka man nga nagapangayo nga balansehon mo ang imo pag-ulikid sa imo mga responsilidad sa Simbahan kag kabalaka para sa imo pamilya. Paano makabulig sa imo ang mga pulong sang Ginuo sa seksyon 100 sa sining mga sitwasyon?

Doktrina kag mga Kasugtanan 101:43–65

Ang pagsunod sa laygay sang Dios nagabulig sa akon nga mangin hilway sa katalagman.

Ang paanggid sa Doktrina kag mga Kasugtanan 101:43–62 ginhatag para ipaathag kon ngaa gintugtan sang Ginuo nga tabugon ang mga Santos pa-gwa sa Sion. Samtang ginabasa mo ining mga bersikulo, may nakita ka bala nga pagpalareho sa imo kaugalingon kag sa mga alagad sa paanggid? Pwede mo pamangkuton ang imo kaugalingon: Ginaduhaduhaan ko bala ang mga kasugoan sang Dios? Paano ayhan ang kakulang sang pagtuo ukon pangako nagatugot “sa kaaway” nga maimpluwensyahan ang akon kabuhi? Paano ko mapakita sa Dios nga “handa [ako] nga magiyahan sa husto kag nagakaigo nga pamaagi para sa [akon] kaluwasan”? (tan-awa sa mga bersikulo 63–65).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 98:16, 39–40.Ano ang ari sa sining mga bersikulo nga makabulig sa aton nga makaagom sang mas dako nga paghidaet sa aton pamilya? Pwede kamo magkanta sang kalantahon parte sa paghidaet ukon kapatawaran. Basi gusto sang magagmay nga kabataan nga mag-role-play nga ginapatawad ang kada isa.

Doktrina kag mga Kasugtanan 99.Sang gintawag si John Murdock para bayaan ang iya puluy-an “agud ibantala [ang] wala’y katubtuban nga ebanghelyo” (bersikulo 1), bag-o lamang sia nagpauli halin sa mabudlay, nga isa-ka-tuig nga misyon sa Missouri. Ano ang aton makita sa seksyon 99 nga mahimo nakabulig ukon nakapaisog kay Brother Murdock? Ano ang mensahe sang Ginuo para sa aton sa sining rebelasyon?

Doktrina kag mga Kasugtanan 100:16; 101:3–5, 18.Pagkatapos basahon ining mga bersikulo, mahimo ninyo hambalan kon ngaa kinahanglan sang mga latero [blacksmith] nga pabagahon ang salsalon para makakas ang mga higko kag dayon pormahon ini paagi sa pagmartilyo sini sing liwat-liwat. Pwede man ninyo tun-an sing ululupod kon paano ginatinloan ang iban nga mga butang, pareho sang tubig ukon asin. Basi pwede ninyo limpyuhon ukon tinloan ang isa ka bagay bilang pamilya. Ngaa gusto naton nga mangin matinlo? Ano ang ginatudlo sa aton sining mga halimbawa parte sa kon paano kita ginabuligan sang mga pagtilaw nga mangin “matinlo nga katawhan”?

Doktrina kag mga Kasugtanan 101:22–36.Paano ayhan nakabulig ining mga bersikulo sa mga Santos nga nagapangatubang sang pagpamigos? Paano ayhan ini makabulig sa mga tawo nga nahadlok sa mga kahimtangan sang aton kalibutan sa karon?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “I Need Thee Every Hour [Sa Tanan nga Tion],” Mga Himno kag mga Ambahanon sang Kabataan, 12.

Pagpauswag sang Personal nga Pagtuon

Magpangita sang mga prinsipyo. Si Elder Richard G. Scott nagtudlo: “Kon magpangita kamo sang espirituhanon nga ihibalo, pangitaa ang mga prinsipyo. … Ang mga prinsipyo puno sing kamatuoran, gintingob para magamit sa madamo nga klase sang mga sirkumstansya” (“Acquiring Spiritual Knowledge,” Ensign, Nob. 1993, 86).

Missouri Burning [Missouri nga Nagakalayo], ni Glen S. Hopkinson