“Septyembre 27–Oktubre 3. Doktrina kag mga Kasugtanan 109–110: ‘Balay Mo Ini, Lugar sang Imo Pagkabalaan,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Septyembre 27–Oktubre 3. Doktrina kag mga Kasugtanan 109–110,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

Templo sang Kirtland

Templo sang Kirtland [Templo sang Kirtland], ni Jon McNaughton

Septyembre 27–Oktubre 3

Doktrina kag mga Kasugtanan 109–110

“Balay Mo Ini, Lugar sang Imo Pagkabalaan”

Nga ginatumod ang Doktrina kag mga Kasugtanan 109:24–28, si Elder David A. Bednar nagsiling, “Ginaagda ko kamo nga liwat-liwat nga tun-an kag binagbinagon sing mainampuon ang mga epekto sining balaan nga mga kasulatan sa inyo kabuhi kag sa inyo pamilya” (“Honorably Hold a Name and Standing,” Ensign ukon Liahona, Mayo 2009, 99). Pamensara ining imbitasyon samtang nagatuon ka.

Isulat Ang Imo Mga Panghunahuna

Ang mga pwertahan sang Templo sang Kirtland indi pa kuntani dapat magbukas tubtob 8:00 sang aga sang Marso 27, 1836. Pero ang mga Santos nga nagalaum nga makatambong sa programa sang pagdedikar nagsugod na nga maglinya aga pa sa alas 7:00. Sang mapuno dayon ang mga bangko kag mga alagyan sang nalangkag nga mga manugsimba, nagpanugyan si Joseph Smith sang lugar para sa indi na makasulod. Sang napuno ato, ginplanuhan ang ikaduha nga sesyon. Kag indi lamang ang mga buhi ang nalangkag nga magtambong. Madamo nga mga saksi ang nagpamatuod nga nakakita sila sang mga anghel, sa sulod sang templo kag bisan sa atop, sa tion sang kag pagkatapos sang dedikasyon. Daw matuod gid nga “ang kasoldaduhan sang langit” nag-abot para “magkanta kag [mag]singgit” upod sa mga Santos sa Ulihing mga Adlaw (“The Spirit of God [Ang Espiritu sang Dios Daw Kalayo],” Mga Himno kag mga Ambahanon sang Kabataan, no. 28–29).

Ngaa kadako gid sang kalangkag—sa duta kag sa langit? Ang promisa nga ang mga Santos “pagahatagan kamo sang gahum halin sa kahitaasan” isa sa pinakarason nga nagtipon sila sa Ohio (Doktrina kag mga Kasugtanan 38:32). Kag mas dalagko nga mga butang ang ginpangako para sa palaabuton. “Ini,” ginsiling sang Ginuo, “ang pagsugod sang bugay nga igabubo sa mga ulo sang akon katawhan” (Doktrina kag mga Kasugtanan 110:10). Ang panahon nga aton ginapuy-an sa karon—upod ang ginpadasig nga mga buluhaton kag mga ordinansa sa templo para sa minilyon nga buhi kag minatay—nagsugod sa Kirtland, sang “ang tabon sang duta [nag]-amat idog” (“The Spirit of God [Ang Espiritu sang Dios Daw Kalayo]”).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 109

Gusto ako bugayan sang Ginuo sa Iya balaan nga balay.

Sa pila ka punto, lain ang Templo sang Kirtland sangsa mga templo nga nahibal-an naton sa karon. Wala sadto sang mga altar kag wala sing tulugmawan, kag ang mga ordinansa pareho sang bunyag sa patay kag pagselyo wala pa napanumbalik. Pero ang mga bugay nga ginlaragway sa seksyon 109, ang pangamuyo sa dedikasyon sang Templo sang Kirtland, amo ang mga bugay nga ginabaton naton sa balay sang Ginuo sa karon. Rebyuha ang masunod nga mga bersikulo agud pangitaon ang pila sining mga bugay. Samtang ginabasa ang parte sa mga ini, binagbinaga kon ngaa importante ang mga ini sa imo kag sa imo pamilya.

Mga bersikulo 5, 12–13 (tan-awa man sa Doktrina kag mga Kasugtanan 110:6–8): Sa templo mapahayag sang Ginuo ang Iya Kaugalingon sa aton kag mabatyagan naton ang Iya gahum.

Mga bersikulo 9, 17–19, 26, 78–79: Sa templo madala naton sa aton kaugalingon ang ngalan sang Ginuo.

Mga bersikulo 22–23: Samtang nagahimo kita kag ginatahod ang aton mga kasugtanan sa templo, ginahatagan kita sang Ginuo sang gahum agud himuon ang Iya buluhaton.

Mga bersikulo 24–33: Kon magkadto kita sa templo sing takos, makabaton kita sang proteksyon sang Ginuo.

Iban pa nga mga bugay:

Ano ang ginainspirar sang Espiritu nga imo himuon para mabaton ining mga bugay?

Doktrina kag mga Kasugtanan 109

Ang pangamuyo sa dedikasyon sang Templo sang Kirtland makatudlo sa akon parte sa pangamuyo.

Ang seksyon 109 amo ang pangamuyo sa pagdedikar nga ginhatag kay Joseph Smith paagi sa rebelasyon (tan-awa sa tig-ulo sang seksyon). Ano ang imo matun-an parte sa pangamuyo sa sining seksyon? Samtang ginabasa mo ini, pwede mo hunahunaon ang imo kaugalingon nga mga pangamuyo. Ano nga mga pagpabatyag ang imo nabaton nga makabulig sa imo nga pauswagon ang imo komunikasyon sa Amay nga Langitnon? Halimbawa, ano ang ginpangamuyo sang Propeta sa sining pangamuyo?

Doktrina kag mga Kasugtanan 110:1–10

Sarang ipahayag sang Ginuo ang Iya Kaugalingon sa akon sa templo.

Ano ang imo nabatyagan parte sa Manluluwas pagkatapos nga basahon ang Doktrina kag mga Kasugtanan 110:1–10? Paano Niya ginpahayag sa imo ang Iya Kaugalingon sa templo? Sa ano nga pamaagi ka Niya ginabuligan nga mahibal-an nga Iya ginabaton ang imo mga pagpaninguha kag mga sakripisyo?

Ang tagsa ka punta sang Templo sang Kirtland may mga pulpito para sa mga lider sang priesthood.

Doktrina kag mga Kasugtanan 110:11–16

Ang mga yabi sang priesthood nga kinahanglanon agud matuman ang buluhaton sang Dios ara sa Simbahan karon.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 109.Bilang pamilya, magpangita sang pila ka bersikulo sa seksyon 109 nga nagainspirar sa inyo nga maghatag sang mas dako nga tiyempo sa templo (halimbawa, tan-awa sa mga bersikulo nga nalista sa idalom sang “Mga Ideya para sa Personal nga Pagtuon sang Balaan nga mga Kasulatan”). Hambali kon paano ninyo himuon ang ginpanugyan ni Pangulong Russell M. Nelson: “Pangitai sang paagi nga regular nga magtalana sang oras upod sa Ginuo—nga magkadto sa Iya balaan nga balay—dayon tumana inang gintalana nga oras sing eksakto kag may kalipay” (“Becoming Exemplary Latter-day Saints,” Ensign ukon Liahona, Nob. 2018, 114). Kon ikaw ukon ang inyo pamilya wala pa makakadto sa templo, pwede kamo magplano nga maghanda sa paglakat.

Doktrina kag mga Kasugtanan 109:78–80.Ang himno nga “The Spirit of God [Ang Espiritu sang Dios Daw Kalayo]” (Mga Himno kag mga Ambahanon sang Kabataan, no. 28–29) ginsulat para sa dedikasyon sang Templo sang Kirtland—kag ginakanta na ini sa kada dedikasyon sang templo sugod sadto. Pwede ninyo kantahon ining himno sing ululupod kag pangitaon ang mga dinalan nga nagapadugang sang inyo kapasalamatan para sa mga templo sa ulihing adlaw. Paano maangot ining himno sa mensahe sa Doktrina kag mga Kasugtanan 109:78–80?

Doktrina kag mga Kasugtanan 110.Samtang ginabasa sang mga miyembro sang inyo pamilya ang seksyon 110 kag ginatan-aw ang litrato sa katapusan sining outline, hagara sila nga hunahunaon kon ano ayhan ang ila mabatyagan kon ara sila upod kay Joseph Smith kag Oliver Cowdery sa Templo sang Kirtland. Hatagi ang imo pamilya sing oportunidad nga iistorya kon ano ang ila nabatyagan parte sa Manluluwas.

Doktrina kag mga Kasugtanan 110:15.Ano ayhan ang makabulig nga “lisuon ang mga tagipusuon” sang inyo mga anak sa ila mga katigulangan? Pwede ninyo bululigan nga hibaluon [kon sin-o] ang mga katigulangan nga nagakinahanglan sang mga ordinansa sa templo kag planuhan nga hikuton inang mga ordinansa sa templo. Pwede man ninyo hambalan kon paano ang buluhaton nga ginpanumbalik paagi kay Elias (Elijah) sa Templo sang Kirtland nagapadugang sang inyo pagpalangga sa inyo mga katigulangan.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “The Spirit of God [Ang Espiritu sang Dios Daw Kalayo],” Mga Himno kag mga Ambahanon sang Kabataan, no. 28–29.

Litrato

icon sang mga tingug sang pagpanumbalik

Mga Tingug sang Pagpanumbalik

Espirituhanon nga mga Pagpahayag kag ang Templo sang Kirtland

Like a Fire Is Burning [Daw Kalayo nga Nagadabadaba], ni Glen S. Hopkinson

Sa idalom amo ang mga pulong sang mga Santos sa Ulihing mga Adlaw nga ato sa Templo sang Kirtland sang ini gindedikar kag sa iban pa nga mga miting nga nagsunod diri. Madamo ang nagkumparar sang ila mga eksperiyensya sa mga naeksperiyensyahan sang dumaan nga mga Santos sang sila “masukloban sing gahum gikan sa kahitaasan” sang adlaw sang Pentecostes (Lucas 24:49; tan-awa man sa Mga Binuhatan 2:1–4; Doktrina kag mga Kasugtanan 109:36–37).

Eliza R. Snow

“Ang mga seremonya sinang dedikasyon mahimo nga liwat-liwat nga isugid, pero wala sing dutan-on nga lenggwahe nga makalaragway sang langitnon nga mga pagpahayag sadtong indi malimtan nga adlaw. Nagpakita ang mga anghel sa iban, mientras nabatyagan sang tanan nga ara ang diosnon nga presensya, kag ang tagsa ka tagipusuon napuno sang ‘kalipay nga indi mapautwas kag puno sang himaya.’”¹

Sylvia Cutler Webb

“Isa sang pinakauna ko nga mga handurawan amo ang pagdedikar sang Templo. Ginsabak kami ni tatay kag ginhambalan kami kon ngaa makadto kami kag kon ano ang buot silingon sang pagdedikar sang balay sa Dios. Kag bisan nga bata pa katama sang amo nga tion, maathag ko kaayo nga madumduman ang hitabo. Madumduman ko pa sa kalawigon sang panahon kag makita pareho sadto si Joseph nga Propeta, nga nagatindog nga ang iya mga kamot nagaalsa pa-langit, nga malapsi ang iya guya, nga nagatinulo ang luha sa iya guya samtang nagahambal sia sinang indi malimtan nga adlaw. Daw halos ang tanan nagahinibi. Kagutok kaayo sang templo nga ang mga kabataan kalabanan ginasabak sang mga dalagko na; ang akon utod nga babayi ginasabak ni tatay, ako ginasabak ni nanay. Madumduman ko pa gani ang mga bayo nga amon ginsuksok. Tama pa ka hubin sang akon pamensaron sadto nga panahon para maintiendihan ang bilog nga kahulugan sadto tanan, pero samtang nagadugay amat-amat ko ini nga naintiendihan, kag dako ang akon pagpasalamat nga nakaangkon ako sang pribelihiyo nga makakadto didto.”²

Oliver Cowdery

“Sang gab-i nakilala ko ang mga opisyales sang simbahan sa balay sang Ginuo. Ginbubo ang Espiritu—nakita ko ang himaya sang Dios, nga pareho sang panganod, nga nanaog kag nagtiner sa ibabaw sang templo, kag ginpuno ini nga daw pareho sang nagahagunos nga hangin. Nakakita man ako sang mga dila nga daw kalayo nga naghulon sa madamo, … samtang nagahambal sila sa lainlain nga mga lenggwahe kag nagpropesiya.”³

Benjamin Brown

“Madamo nga mga panan-awon [ang] nakita. May isa nga nakakita sang ulunan ukon panganod nga naghulon sa ibabaw sang templo, masanag nga daw pareho sang pagsilak sang adlaw sa panganod nga daw bulawan. May duha pa nga nakakita sang tatlo ka persona nga nagalutaw sa kuwarto nga nagauyat sang masanag nga mga yabi, kag nagauyat man sang masanag nga kadena.”⁴

Orson Pratt

“Ang Dios ato didto, ang iya mga anghel ato didto, ang Balaan nga Espiritu ara sa tunga sang mga tawo … kag napuno sila halin sa punta sang ila mga ulo tubtob sa ila mga dapadapa sang gahum kag inspirasyon sang Balaan nga Espiritu.”⁵

Nancy Naomi Alexander Tracy

“[Sang] matapos kag madedikar ang Templo … amo ato ang duha sa pinakamalipayon nga mga adlaw sang akon kabuhi. Ang nagakabagay gid nga himno nga ginhimo para sa amo nga okasyon amo ang ‘Ang Espiritu sang Dios Daw Kalayo nga Nagadabadaba.’ Matuodtuod gid nga ang Langitnon nga Impluwensya nagpanaog sa sinang templo. … Nabatyagan ko nga amo ato ang langit sa duta.”⁶