“Oktubre 25–31. Doktrina kag mga Kasugtanan 124: ‘Isa ka Balay sa Akon Ngalan,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Oktubre 25–31. Doktrina kag mga Kasugtanan 124,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

Nauvoo

Nauvoo the Beautiful [Nauvoo nga Matahum], ni Larry Winborg

Oktubre 25–31

Doktrina kag mga Kasugtanan 124

“Isa ka Balay sa Akon Ngalan”

Samtang imo ginabasa ang Doktrina kag mga Kasugtanan 124, binagbinaga ang mga bugay nga gin-imbitar sang Ginuo nga batunon sang mga Santos sa Nauvoo kag ang mga bugay nga Iya ginatanyag sa imo.

Isulat Ang Imo Mga Panghunahuna

Bisan pa nga nangin mabudlay ang nagligad nga anum ka tuig sa mga Santos, amat-amat nga daw nagamaayo na sang tigpamulak sang 1839: Ang mga bakwit nga mga Santos ginkaluy-an sang mga pumuluyo sang Quincy, Illinois. Ginpasugtan sang mga guwardya ang Propeta nga si Joseph Smith kag ang iban nga mga lider sang Simbahan nga makapalagyo sa prisuhan sang Missouri. Kag ang Simbahan bag-o lang gid nakabakal sang duta sa Illinois kon sa diin magatipon liwat ang mga Santos. Huo, daw punong ini, lamukon nga lugar, pero kon ikumparar sa mga kabudlayan nga gin-atubang sadto sang mga Santos, daw masarangan na ini. Gani ginpahubsan nila ang punong kag naghimo sang konstitusyon para sa bag-o nga siyudad, nga ila ginngalanan Nauvoo. Buot silingon sini “matahum” sa Hebreo, bisan pa nga daw mas pagpahayag ini sang pagtuo sangsa eksakto nga paglaragway, sang primero. Samtang, ginahatagan sang Ginuo ang Iya Propeta sang pamatyagon sang pagdali. Madamo pa Sia sang mga kamatuoran kag mga ordinansa nga ipanumbalik, kag kinahanglan Niya sang balaan nga templo kon diin ini batunon sang mga Santos. Sa madamo nga paagi, ining pareho nga mga balatyagon sang pagtuo kag pagdali importante sa buluhaton sang Ginuo sa karon.

Bisan nga nangin matahum gid man nga siyudad ang Nauvoo nga may matahum nga templo, sang ulihi ginbayaan ini. Pero ang matuod nga matahum nga buluhaton sang Ginuo, sa gihapon, amo ang “koronahan kamo sang dungog, kawala’y kamatayon, kag kabuhi nga wala’y katapusan” (Doktrina kag mga Kasugtanan 124:55), kag ang inang buluhaton wala sing katapusan.

Tan-awa sa Saints, 1:399–427 .

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 124:12–21

Sarang ako mangin disipulo nga masaligan sang Ginuo.

Bisan pa nga nagtalikod sa Simbahan ang pila sa prominente nga lideres sang mga tinuig 1830, ang kadam-an sang mga miyembro nagpabilin nga matinuohon. Lakip sa sining tampad nga mga Santos atong mga nagbatas sang mga pagtilaw sa Missouri kag amo man ang mga bag-o lang nagsulod sa Simbahan. Sa Doktrina kag mga Kasugtanan 124:12–21, mataas ang pagkabig sang Ginuo sa pila sa ila. Ano nga mga ihibalo parte sa pagkadisipulo ang imo makita sa Iya mga pulong? May ara bala sa sining matinuohon nga mga Santos nga nagainspirar sa imo nga mangin pareho sa ila? Pwede mo man nga binagbinagon kon paano ginpahayag sang Ginuo ang Iya pagpalangga sa imo.

Doktrina kag mga Kasugtanan 124:22–24, 60–61

Luyag sang Ginuo nga abiabihon kag batunon ko ang iban.

Kon pamensaron ang gin-antos sang mga Santos sa Missouri, mahimo nga nagakatentar sila nga ilayo ang ila kaugalingon kag indi na magbaton sang mga bisita sa Nauvoo. Tandai ina samtang imo ginabasa ang Doktrina kag mga Kasugtanan 124:22–24, 60–61. Ano ang nanamian mo sa mga instruksyon sang Ginuo nga magpatindog sang “balay nga dalayonan”? (bersikulo 23). Ano ang ginatudlo sang Iya mga pulong sa imo parte sa misyon sang Iya Simbahan? Binagbinaga kon paano ayhan magamit ining mga instruksyon sa imo kag sa imo puluy-an.

Doktrina kag mga Kasugtanan 124:25–45, 55

Ginasugo kita sang Ginuo nga magpatindog sang mga templo agud makabaton kita sang sagrado nga mga ordinansa.

Matuod nga wala na makibot ang mga Santos sa Ulihing mga Adlaw nga sang nakaplastar na sila sa Nauvoo, ginhatagan sila sang Ginuo sang mga instruksyon parte sa pagpatindog sang templo—pareho sa Ohio kag Missouri. Ano ang imo makita sa Doktrina kag mga Kasugtanan 124:25–45, 55 nga nagabulig sa imo nga maintiendihan kon ngaa nagsiling ang Ginuo, “Ang akon katawhan pirme ginasugo nga magtukod [sang mga templo] para sa akon balaan nga ngalan”? (bersikulo 39).

Sugod sang ginpatindog ang Templo sang Nauvoo, masobra 200 na ka mga templo ang natukod ukon gin-anunsyo. Si Pangulong Russell M. Nelson nagtudlo: “Nakahibalo kita nga ang aton oras sa templo importante kaayo sa aton kaluwasan kag pagkahitaas kag sa iya sang aton mga panimalay. … Ang mga pagpangatake sang kaaway madasig nga nagadugang sa kabaskugon kag klase. Ang aton kakinahanglan nga magkadto sa templo sing regular mas nagdako pa gid karon” (“Becoming Exemplary Latter-day Saints,” Ensign ukon Liahona, Nob. 2018, 114). Paano ka nabuligan sang templo nga mapakigbatuan ang “mga pag-atake sang kaaway”? Ano ang nabatyagan mo nga himuon para sundon ang laygay ni Pangulong Nelson?

Joseph Smith at the Nauvoo Temple [Si Joseph Smith sa Templo sang Nauvoo], ni Gary E. Smith

Doktrina kag mga Kasugtanan 124:84–118

Luyag sang Ginuo nga hatagan ako sang pat-od nga laygay para sa akon kabuhi.

Ang mga bersikulo 84–118 puno sang laygay para sa partikular nga mga indibidwal, kag ang iban sini mahimo nga indi nagakabagay sa imo kabuhi. Pero mahimo ka man makakita sang butang nga kinahanglan mo mabatian. Pamensara nga pamangkuton ang Ginuo kon ano ang Iya mensahe para sa imo sa sining mga bersikulo, kag pangayoa ang giya sang Espiritu para makita ini. Dayon desisyuni kon ano ang imo himuon para aktuhan ini. Halimbawa, paano nagabulig sa imo ang mangin mas mapainubuson nga mabaton ang Espiritu? (tan-awa sa bersikulo 97).

Pwede mo man binagbinagon ang iban pa nga mga laygay nga ginhatag sang Ginuo sa imo. Paano mo ina ginaaskyunan?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 124:2–11.Kon hambalon sang Ginuo ang inyo pamilya “sa paghimo sing matutum nga pagbantala sang akon ebanghelyo” sa “tanan nga hari sang kalibutan” (mga bersikulo 2–3), ano ang isiling sang imo proklamasyon? Pamensara ang paghimo sang proklamasyon sing ululupod, kag agdaha ang mga miyembro sang pamilya nga manumdom sang mga kamatuoran sang ebanghelyo nga gusto nila ilakip.

Doktrina kag mga Kasugtanan 124:15.Ano ang buot silingon sang mag-angkon sang integridad? Ngaa may balor sa Ginuo ang integridad? Ano nga mga halimbawa sang integridad ang nakita sang inyo pamilya? (Tan-awa man sa Para sa Kusog sang mga Lamharon, 19.)

Doktrina kag mga Kasugtanan 124:28–29, 40–41, 55.Ano ang matun-an naton sa sining mga bersikulo parte sa kon ngaa ginasugo kita sang Ginuo nga magpatindog sang mga templo? Basi gusto sang inyo pamilya nga magdrowing sang templo ukon maghimo sang templo gamit ang mga bloke ukon iban pa nga materyales. Samtang ginahimo ninyo ini, pwede ninyo hambalan kon ngaa nagapasalamat kamo nga may mga templo karon kag kon ngaa kinahanglan naton nga magsimba diri sing regular.

Doktrina kag mga Kasugtanan 124:91–92.Ano ang mabenepisyo sang imo pamilya sa paghambalanay parte sa mga bendisyon sang patriarka (patriarchal blessing)? Ang mga miyembro sang pamilya nga nakabaton na sang ila bendisyon sang patriarka pwede mag-istorya kon ano ang ila nabatyagan sang pagbaton nila sini kag kon paano sila sini nabugayan.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Litrato

icon sang mga tingug sang pagpanumbalik

Mga Tingug sang Pagpanumbalik

Ang Relief Society

Sang 1842, pagkatapos nga maorganisar ang Relief Society sa Nauvoo, Illinois, siling sang Propeta nga si Joseph Smith, “Indi perpekto ang pagkaorganisar sang Simbahan kon wala maorganisar ang kababayin-an sing amo sina.”¹ Sa amo man, ang pagtuon sang Pagpanumbalik sang Simbahan sang Ginuo kag sang Iya priesthood (tan-awa sa Doktrina kag mga Kasugtanan 107) indi kompleto kon wala ini nagalakip sang pagtuon sang Relief Society, nga mismo amo ang “pagpanumbalik sang dumaan nga sulundan” sang babayi nga mga disipulo ni Jesucristo.²

Si Eliza R. Snow may importante nga papel sa sinang pagpanumbalik. Ara sia sang gin-organisar ang Relief Society kag, bilang sekretarya sang grupo, nagrekord sang nagkalatabo sa mga miting sini. Nakita niya mismo nga ang Relief Society gin-organisar “suno sa sulundan sang priesthood.”³ Sa idalom amo ang iya mga pulong, nga ginsulat samtang nagaalagad sia nga Pangkabilogan nga Pangulo sang Relief Society, agud buligan ang iya mga kauturan nga babayi nga maintiendihan ang diosnon nga hilikuton nga ginsalig sa mga anak nga babayi sang Dios sa kasugtanan.

Eliza R. Snow

Litrato

Eliza R. Snow, ni Lewis Ramsey

“Bisan pa nga ang ngalan nga [Relief Society] moderno, ang institusyon dumaan ang ginhalinan. Ginhambal ni [Joseph Smith] sa amon, nga ang pareho nga organisasyon nagaluntad na sa simbahan sang una, ang mga paghinambit sini makita sa pila ka mga sulat nga narekord sa Bag-ong Katipan, nga nagagamit sang bansag nga, ‘pinili nga babayi’ [tan-awa sa 2 Juan 1:1; Doktrina kag mga Kasugtanan 25:3].

“Isa ini ka organisasyon nga indi magluntad nga wala ang Priesthood, bangud sang kamatuoran nga nagakuha ini sang tanan sini nga awtoridad kag impluwensya sa sina nga ginhalinan. Sang ang Priesthood ginkuha sa kalibutan, ining institusyon lakip na ang tanan nga mga sanga sang matuod nga paagi sang simbahan ni Jesucristo sa kalibutan, nadula man.…

“Tungod nga ara ako sa pag-organisar sang ‘Relief Society sang mga Babayi sang Nauvoo,’ … kag bangud may igo ako nga eksperiyensya sa sinang asosasyon, ayhan mapabutyag ko ang pila ka mga talandaan nga makabulig sa mga anak nga babayi sang Sion sa pag-entra sa sining importante kaayo nga organisasyon, nga puno sang bag-o kag madamo nga mga responsibilidad. “Kon ang bisan sin-o sa mga anak nga babayi kag mga iloy sa Israel nagabatyag nga medyo limitado sa ila karon nga ikasarang sa pagbuhat, ila na karon masalapuan ang supisyente nga ikasarang para sa tagsa ka gahum kag kapasidad para sa paghimo sang maayo sa diin sila labi gid nga nadulotan.…

Ang Relief Society gin-organisar sa ibabaw nga kuwarto sang Tindahan nga Red Brick.

“Kon may magpamangkot gid man, Ano ang tuyo sang Relief Society sang mga Babayi? Isabat ko—ang paghimo sang maayo—para gamiton ang tanan nga kapasidad nga ara sa aton sa paghimo sang kaayuhan, indi lamang sa pagpaumpaw sang mga imol kundi sa pagluwas sang mga kalag. Ang gintingob nga pagpanikasog makahimo sang sobra katama sangsa malab-ot sang pinakamaayo nga indibidwal nga pagpaninguha.…

“Sa pagbulig sa mga imol, ang Relief Society sang mga Babayi may iban pa nga mga tulumanon nga masobra sangsa pagpaumpaw lang sang pisikal nga mga kinahanglan. Ang kaimulon sang kaisipan kag balatian sang tagipusuon, nagapangayo man sang atensyon; kag sa masami sang malulo nga hambalanon—ang pila ka tinaga sang laygay, ukon bisan pa gani mainit kag mainabyanon nga pagkamusta mas makadulot sang kaayuhan kag mas ginapasalamatan sangsa isa ka putos nga bulawan.…

“Kon ang mga Santos nagatipon halin sa luwas, nga mga estranghero sa kada isa, kag madali mapatalang sang mga nagahulat nga mang-ilad, ang [Relief] Society dapat mangin maabtik sa pag-atipan [sa ila], kag ipakilala sila sa grupo nga magapauswag kag magapasanag, kag labi sa tanan magapabakod sa ila sa pagtuo sa Ebanghelyo, kag sa paghimo sini, mangin instrumento sa pagluwas sang madamo.

“Kinahanglan sang madamo nga libro para ipahayag ang mga tulumanon, pribelihiyo kag mga responsibilidad sa sulod sang Society. … Himoa ini (sa idalom sang direksyon sang inyo bishop) sing matawhay, hungod, mapagsik, tingob kag mapinangamuyuon, kag bugayan sang Dios ang imo mga pagpaninguha sang kadalag-an.”⁴