“Oktubre 18–24. Doktrina kag mga Kasugtanan 121–123: ‘O Dios, Diin Bala Ikaw?’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Oktubre 18–24. Doktrina kag mga Kasugtanan 121–123,” Dali, Magsunod sa Akon—Para sa Mga Indibidwal kag Mga Pamilya: 2021

Liberty Jail Spring [Tigpamulak sa Bilanggoan sang Liberty], ni Al Rounds

Oktubre 18–24

Doktrina kag mga Kasugtanan 121–123

“O Dios, Diin Bala Ikaw?”

Ang imo eksperiyensya sa pagtuon sang balaan nga mga kasulatan mangin mas madalom kon ang imo tuyo amo ang pagdiskubre sang kamatuoran. Magsugod sa pangamuyo, magpamati sa Espiritu, kag isulat ang imo mga panghunahuna.

Isulat Ang Imo Mga Panghunahuna

Ang pinakaidalom nga bahin sang prisuhan sa Liberty, Missouri, nakilal-an bilang bartolina. Madamol ang mga pader, mayami kag mahigko ang salog, ang pagkaon—sa kadutay sini—pan-os, kag ang solo nga kasanag nagahalin sa duha ka makitid, de-rehas nga mga bintana malapit sa kisame. Sa sining bartolina si Joseph Smith kag ang pila sa iya kauturan nagtiner sa kalabanan sang ila pagkabilanggo—apat ka matugnaw nga binulan sang tigtulugnaw sang 1838–39—nga nagahulat sang pagbista sa mga kaso sang pagrebelde batok sa estado sang Missouri. Sa sining panahon, padayon nga nagabaton si Joseph sang balita parte sa pag-antos sang mga Santos. Ang kalinong kag paglaum sang Far West naglawig sing pila lamang ka bulan, kag karon ang mga Santos wala naman sang mga puluy-an, ginpanabog sa kamingawan sa pagpangita liwat sang lain nga lugar nga pagapuy-an—sa sini nga tion nga ang ila Propeta ara sa prisuhan.

Indi katingalahan nga si Joseph Smith nagsinggit, “O Dios, diin bala ikaw?” Ang mga sabat nga iya nabaton, ang “ihibalo halin sa langit” nga “[ginbubo]” sa sinang miserable nga prisuhan, nagapakita nga bisan daw indi naton mabatyagan pirme, ang Dios wala nagapalayo. Wala sang gahum nga “magapugong sang kalangitan,” natun-an sang Propeta. “Makaupod [sang Iya matinuohon nga mga Santos] ang Dios tubtob sa wala’y katapusan.” (Doktrina kag mga Kasugtanan 121:1, 33; 122:9.)

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 121:1–10, 23–33; 122

Ang kabudlayan mangin “para sa [akon] kaayohan.”

Kon kita ukon ang aton mga pinalangga ara sa tunga sang pag-antos, normal lang nga magpamangkot kon bala ang Dios nakatalupangod sa aton. Samtang imo ginabasa ang Doktrina kag mga Kasugtanan 121:1–6, hunahunaa ang tinion nga may mga pagduda ka ukon pamatyagan nga pareho kay Joseph Smith. Ano ang imo makita sa sabat sang Ginuo nga mahimo makabulig sa imo kon may amo ka nga mga pagduda ukon balatyagon? Halimbawa, sa mga bersikulo 7–10, 26–33, pat-ini ang mga butang nga Iya ginapromisa sa mga “[nagabatas sang kasakit] sing maayo.” Samtang imo ginabasa ang seksyon 122, pamensara kon ano ang gusto sang Ginuo nga pagkabig mo sa imo mga kabudlayan.

Doktrina kag mga Kasugtanan 121:34–46

Sarang naton maagom ang “mga gahum sang langit.”

Sa sitwasyon nga daw wala na sing mahimo sa Bilanggoan sang Liberty, ginhatagan si Joseph sang rebelasyon parte sa gahum—indi pang-politika ukon militar nga gahum nga gingamit sa mga Santos kundi sang “mga gahum sang langit.” Samtang imo ginabasa ang Doktrina kag mga Kasugtanan 121:34–46, ano ang imo matun-an parte sa gahum sang Dios? Ano ang kinalain sini sa kalibutanon nga gahum? Halimbawa, pangitaa ang mga tinaga nga gingamit sang Ginuo sa mga bersikulo 41–43 para ilaragway ang “gahum ukon impluwensya.” Ano ang ginatudlo sang mga ini parte sa kon paano ginamentinar sang Dios ang Iya “gahum ukon impluwensya”? Basi mainspirar ka sining mga bersikulo nga binagbinagon ang imo kabuhi kag kon ano ang pwede mo himuon agud mangin impluwensya para sa kaayuhan sa imo nga relasyon sa iban.

Doktrina kag mga Kasugtanan 122

Si Jesucristo nagpanaog sa idalom sang tanan nga butang.

Si Joseph Smith ginbilanggo nga wala sing hustisya sang masobra apat ka bulan samtang ang iya kaabyanan kag pamilya ginpanabog sa ila mga balay. Ang buluhaton nga iya gindedikaran sang iya kabuhi daw nagakapaslawan. Ano ang imo matun-an parte kay Jesucristo sa Iya mga pulong kay Joseph sa seksyon 122? Ano ang imo matun-an parte kay Joseph? Ano ang imo matun-an parte sa imo kaugalingon?

Tan-awa man sa Alma 7:11–13; 36:3; Doktrina kag mga Kasugtanan 88:6.

Si Jesus sa duta sa Getsemani — Naintiendihan ni Jesus ang aton pag-antos. Not My Will, But Thine [Indi ang Akon Pagbuot, Kundi ang Imo], ni Walter Rane

Doktrina kag mga Kasugtanan 123

“Malipayon naton nga himuon ang tanan nga aton masarangan.”

Sang Marso 1839, daw wala na sing mahimo ang mga Santos para bag-uhon ang ila masubo nga sitwasyon. Pero sa iya nga sulat halin sa Bilanggoan sang Liberty, ginsilingan sila ni Joseph sang pwede nila himuon: “[magtipon] sang ihibalo sang tanan gid nga nagkalatabo” kag “maghulat kita, nga may lubos nga pagsalig nga makita ang kaluwasan sang Dios” (Doktrina kag mga Kasugtanan 123:1, 17). Samtang imo ginapamensar ang pagpangdaya kag “pagpatalang sang mga tawo” sa kalibutan sa karon nga panahon, hunahunaa ang mga butang nga “masarangan [mo]” himuon (mga bersikulo 12, 17). Ngaa importante nga himuon naton ining mga butang nga “malipayon”? (bersikulo 17). Sin-o ang kilala mo nga “wala nakahibalo sang kamatuoran” (bersikulo 12), kag paano mo buligan ining tawo nga makita ini?

Madamo sa mga panaysayon nga ginpangayo ni Joseph sa sining sulat ang ginsumite sa gobyerno kag ginpublikar bilang bahin sang 11-ka-serye sa peryodiko sa Nauvoo, nga Times and Seasons [Tiyempo kag mga Panahon].

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 121:1–10.Ang “bartolina” sa Bilanggoan sang Liberty 14 por 14.5 piyes (4.2 por 4.4 metros) lamang. Paano mo buligan ang imo pamilya nga mapanan-aw kon daw ano ang pamatyagan sang mapriso sa amo sina kadako nga lugar sa sulod sang apat ka matugnaw nga binulan? Makita ninyo ang iban nga mga detalye parte sa kahimtangan sa Bilanggoan sang Liberty sa “Kapitulo 46: Si Joseph Smith sa Bilanggoan sang Liberty” (Mga Sugilanon sa Doktrina kag mga Kasugtanan, 172–74). Sarang man ninyo basahon ang “Mga Tingug sang Pagpanumbalik: Bilanggoan sang Liberty” sa katapusan sang sining outline ukon tan-awon ang video sang paglaragway sang tion ni Joseph sa Bilanggoan sang Liberty sa video nga Joseph Smith: Propeta sang Pagpanumbalik. Paano makaapekto ining impormasyon sa aton nabatyagan parte sa mga prinsipyo sa Doktrina kag mga Kasugtanan 121:1–10?

1:51

69:35

Doktrina kag mga Kasugtanan 121:34–36, 41–45.Basi makabulig ang paanggid sa inyo pamilya nga maintiendihan “ang mga gahum sang langit.” Halimbawa, pwede ninyo ikumparar ang gahum sang Dios sa kuryente; ano ayhan ang makapugong sa de-kuryente nga gamit sa pagbaton sang kuryente? Ano ang ginatudlo sa aton sining paanggid, upod ang mga bersikulo 34–36, 41–45, kon paano naton patubuon ang aton espirituhanon nga gahum? Basi pwede mag-istorya ang mga miyembro sang pamilya sang mga sugilanon halin sa kabuhi sang Manluluwas nga nagapakita sining mga kinaiya.

Doktrina kag mga Kasugtanan 122:7–9.Basi masadyahan ang mga miyembro sang pamilya sa paghimo sang magagmay nga mga karatula nga nagapakita sang mga dinalan halin sa sining mga bersikulo nga nagainspirar sa ila. Pwede nga ipatapik ining mga karatula sa sulod sang inyo balay. Ngaa importante nga hibaluon nga “ang Anak sang Tawo nagpanaog sa idalom” sang tanan nga butang?

Doktrina kag mga Kasugtanan 123:12.Paano naton buligan ang mga tawo nga “[hibaluon] … kon diin pangitaon” ang kamatuoran?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Mga Tingug sang Pagpanumbalik

Bilanggoan sang Liberty

Samtang napriso sa Liberty, Missouri, nagabaton si Joseph Smith sang mga sulat nga nagapahibalo sa iya parte sa delikado nga sitwasyon sang mga Santos sa Ulihing mga Adlaw nga ginapanabog halin sa estado bangud sa sugo sang gobernador. Isa ka emosyunal nga sulat ang naghalin sa iya asawa nga si Emma. Ang iya mga pulong, kag ang sabat nga mga sulat ni Joseph, nagapautwas sang pareho nila nga mga pag-antos kag sang ila pagtuo sa sining mabudlay nga panahon sa kasaysayan sang Simbahan.

Sulat ni Emma Smith kay Joseph Smith, Marso 7, 1839

“Pinalangga ko nga Bana

“Kay nakaangkon sang oportunidad nga magpadala paagi sa isa ka abyan, ginatinguhaan ko nga magsulat, pero indi ko na pag-isulat ang tanan ko nga nabatyagan, kay indi ko malaragway ang akon balatyagon, tungod sa imo sitwasyon karon, sa mga pader, mga rehas, kag kandado, sa mga suba, sapa, kabukiran, mga nalupyakan kag wayang nga nagapatunga sa aton, kag sa masakit nga kawala-sing-hustisya nga nagbutang kag nagahunong gihapon sa imo sa prisuhan, upod ang iban pa nga mga kabudlayan.

“Kon indi tungod nga inosente kita, kag kon indi tungod sa bulig sang diosnon nga kaluoy, sigurado ako nga indi ko gid maagwantahan ang pag-antos nga akon ginaagyan…; pero buhi sa gihapon ako kag handa nga mag-antos pa gid kon amo ini ang pagbuot sang Langit nga antuson ko para sa imo.

“Maayo pa kami sa karon, magluwas kay Fredrick nga nagamasakit.

“Ang Diutay nga si Alexander nga akon ginakugos karon isa sa pinakamabuot nga bata nga imo makilala sa kabuhi. Kakusog sa iya nga sa bulig sang bangko nagadalagan sia libot-libot sa bilog nga kuwarto.…

“Ang Dios lang gid ang nakahibalo sang akon mga panghunahuna kag mga balatyagon sang akon tagipusuon sang ginbayaan ko ang aton balay kag puluy-an, kag ang halos tanan naton nga propiyedad magluwas sa aton magagmay nga Kabataan, kag nagbiyahe pa-gwa sa Estado sang Missouri, nga nagbilin sa imo nga nahunong gihapon sa sinang masubo nga prisuhan. Pero ang pagpanumdom nga bayaan ka mas masakit pa sangsa masarangan sang tawo.…

“…Kabay pa nga may malipayon pa nga mga inadlaw nga magaabot sa aton sa palaabuton . … [Ako] nga padayon nga nagapalanga sa imo.

“Emma Smith”¹

Sulat ni Joseph Smith kay Emma Smith, Abril 4, 1839

“Mahal ko—kag mapinalanggaon—nga Asawa.

“Huwebes sang gab-i nagpungko ako sang nagatunod ang adlaw, samtang nagalili kami sa rehas sining masubo nga prisuhan, para magsulat sa imo, agud mahibal-an mo ang akon sitwasyon. Nagapati ako nga lima na ka bulan kag anum ka adlaw² halin sang ara ako sa idalom sang pagbantay sang nagakurisong nga gwardya gab-i kag adlaw, kag sa sulod sang mga pader, rehas, kag nagaigot nga salsalon nga pwertahan sang masubo, madulom, mahigko nga prisuhan. Upod ang mga emosyon nga ang Dios lang ang nakahibalo ginahimo ko ining sulat. Ang mga panghunahuna ko sa sining mga sirkumstansya mabudlay isulat ukon ihambal, ukon para ilaragway sang mga Anghel sa tawo nga wala makaagi sang amon ginaagyan. … Nagasalig kami sa kusog ni Jehova, kag wala na sing iban pa, para sa amon kaluwasan, kag kon indi niya paghimuon, indi ini matabo, makasalig ka, kay may dako nga kauhaw para sa amon dugo sa sining estabo; indi tungod kay may sala kami. … Pinalangga ko nga Emma pirme ko ikaw kag ang aton kabataan ginapanumdom. … Gusto ko makita ang diutay nga si Frederick, si Joseph, Julia, Alexander, Joana, kag ang tigulang nga si major [ang ido sang pamilya]. … Malipayon ako nga maglakat halin diri pakadto dira sa imo nga nagatiniil, kag wala sing tabon ang ulo, kag halos hublas, agud makita ka kag kabigon ko ini nga dako nga kalipayan, kag indi kabudlayan. … Ginaantos ko nga may kabakod ang tanan nga pagpamigos sa akon, amo man ang mga kaupod ko; wala pa sing isa sa amon nga nag-ampo. Gusto ko [nga] indi mo pagtugtan nga malimtan ako [sang aton kabataan]. Silinga sila nga palangga sila ni Tatay sing may perpekto nga gugma, kag ginahimo niya ang tanan agud makapalagyo sa malain nga mga tawo kag magpauli sa ila. … Hambala sila nga siling ni Tatay magpakabuot sila, kag magpamati sa ila nanay.…

“Imo,

“Joseph Smith Jr.”³

Si Joseph Smith sa Prisohan sang Liberty — Samtang nagaantos si Joseph Smith sa Bilanggoan sang Liberty, ginpaumpawan sia sang Ginuo kag ginpahayag ang dalagko nga mga kamatuoran.