Far West, ni Al Rounds

Oktubre 11–17

Doktrina kag mga Kasugtanan 115–120

“Ang Iya Sakripisyo Mangin Mas Sagrado sa Akon Sangsa Iya mga Kadalag-an”

Gusto sang Ginuo nga maghambal sa imo. Samtang imo ginatun-an ang balaan nga mga kasulatan, magpangamuyo kag pangabaya Sia nga buligan ka sa pagdiskubre sang Iya mga mensahe para sa imo.

Isulat Ang Imo Mga Panghunahuna

May rason nga mangin positibo ang panan-aw sa pinakabag-o nga tilipunan sang mga Santos, sa Far West, Missouri, sang Hulyo 1838. Madasig nga nagadako ang siyudad, ang duta daw bugana man, kag ginpahayag nga sa unhan lang sini pa-norte amo ang Adam-ondi-Ahman, ang lugar nga may dako nga espirituhanon nga importansya (tan-awa sa Doktrina kag mga Kasugtanan 107:53–56; 116). Sa gihapon, nangin mabudlay siguro sa mga Santos nga kalimtan ang nadula sa ila. Ginpangtabog sila pa-gwa sa Independence, ang pinili nga sentro sang Sion, kag ang tsansa nga makabalik sa palaabuton daw tama kagamay. Dugang pa, kinahanglan sang mga Santos nga maghalin sa Kirtland, Ohio, nga ginbayaan ang ila pinalangga nga templo pagkatapos lamang sang duha ka tuig. Kag sa sini nga tion indi lamang mga kaaway sa gwa sang Simbahan ang nagapanggamo—madamo nga prominente nga mga miyembro ang nagrebelde kay Joseph Smith, lakip na ang Tatlo ka mga Saksi sang Libro ni Mormon kag apat ka mga miyembro sang Dose (ka Apostoles). Mahimo nga nagapamangkot ang iban, Nagabakod gid man bala ang ginharian sang Dios, ukon nagaamat luya?

Pero wala gintugtan sang mga matinuohon nga punggan sila sang ina nga mga pagpangduhaduha. Sa baylo, nagsugod sila sa pagpatindog sang bag-o nga balaan nga lugar, sa sining tion sa Far West. Naghimo sila sang mga plano para sa bag-o nga templo. Apat ka bag-o nga Apostoles ang gintawag, lakip na ang duha—sanday John Taylor kag Wilford Woodruff—nga nangin mga Pangulo sang Simbahan sang ulihi (tan-awa sa Doktrina kag mga Kasugtanan 118:6). Natun-an sang mga Santos nga ang paghimo sang buluhaton sang Dios wala nagakahulugan nga indi ka gid matumba; nagakahulugan ini nga “magbangon [ka] liwat.” Kag bisan pa nga buy-an mo ang pila ka butang, inang mga sakripisyo mangin sagrado sa Dios, “mas sagrado … sangsa [imo] mga kadalag-an” (Doktrina kag mga Kasugtanan 117:13).

Tan-awa sa Saints, 1:296–99.

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 115:4–6

Ang ngalan sang Simbahan ginpili sang Ginuo.

Si Pangulong Russell M. Nelson nagsiling nga ang ngalan sang Simbahan “isa ka importante gid nga topiko” (“Ang Husto nga Ngalan sang Simbahan,” Ensign ukon Liahona, Nob. 2018, 87). Panumduma kon ngaa matuod ini samtang imo ginabasa ang Doktrina kag mga Kasugtanan 115:4–6. Ano ang relasyon sang ngalan sang Simbahan sa iya buluhaton kag misyon?

Tan-awa man sa 3 Nefi 27:1–11.

Doktrina kag mga Kasugtanan 115:5–6

Ang Sion kag ang iya mga estaka nagatanyag sang “dalangpan sa unos.”

Wala sapayan sang mga kabudlay nga ginpangatubang sang mga Santos sang 1838, dako sa gihapon ang ginapaabot sang Ginuo sa ila. Magpangita sang mga tinaga sa Doktrina kag mga Kasugtanan 115:5–6 nga nagapatalupangod sang papel nga gusto sang Ginuo nga tumanon sang Iya Simbahan kag sang mga miyembro sini sa kalibutan. Halimbawa, ano sa pamatyag mo ang dapat mo himuon para “magtindog kag magsilak”? (bersikulo 5). Ano nga espirituhanon nga mga unos ang imo natalupangdan sa imo palibot, kag paano kita makakita sang “dalangpan” paagi sa pagtipon? (bersikulo 6).

Tan-awa man sa 3 Nefi 18:24.

Doktrina kag mga Kasugtanan 117

Sagrado sa Ginuo ang akon mga sakpripisyo.

Mahimo nga nangin mabudlay ang pagbiya sa Kirtland para sa mga tawo nga pareho kay Newel K. Whitney, nga nagpasad sang mahamungaya nga pangabuhi para sa iya pamilya didto. Ano ang imo mabasahan sa Doktrina kag mga Kasugtanan 117:1–11 nga mahimo nakabulig sa ila nga himuon ini nga pagsakripisyo? Paano ginbag-o sining mga bersikulo ang imo panan-aw sa kon ano gid ang importante?

Ang sakripisyo nga ginpangayo kay Oliver Granger lain: ginhambalan sia sang Ginuo nga magpabilin sa Kirtland kag solbaron ang kautangan sang Simbahan. Mabug-at ato kaayo nga buluhaton, kag bisan nga gintiglawas niya ang Simbahan nga may integridad, sang ulihi gamay lang ang kuwarta nga iya natipon. Pamensara kon paano magamit ang mga pulong sang Ginuo sa mga bersikulo 12–15 sa mga butang nga ginapangayo sang Ginuo sa imo.

Si Newel K. Whitney ginsugo nga magsaylo sa Adan-ondi-Aman, nga ginapakita diri.

Doktrina kag mga Kasugtanan 119–20

Paagi sa pagbayad sang ika-pulo, nagabulig ako sa pagpatukod kag “[pagpakabalaan sang] duta sang Sion.”

Ang mga instruksyon sa seksyon 119 kag 120 daw pareho sa paagi nga ginapondohan ang buluhaton sang Ginuo sa aton panahon. Sa karon, nagahatag ang mga Santos sang “ika-napulo nga bahin sang tanan nila nga ganansya [nga karon nagakahulugan nga kita] sa kada tuig” (Doktrina kag mga Kasugtanan 119:4), kag ang ining pondo ginadumalahan sang isa ka konseho nga nagalakip sang Unang Pangulohan, Korum sang Dose, kag Nagapamuno nga Obispado. Pamensara ang masunod nga mga pamangkot samtang imo ginatun-an ining mga seksyon:

• Paano ang pagsunod sang layi sang ika-pulo “[nagapakabalaan sang] duta sang Sion”? Paano makabulig ining layi nga himuon ang lugar nga imo ginaistaran nga “mangin duta sang Sion sa inyo”? (Doktrina kag mga Kasugtanan 119:6).

• Ano ang kahulugan sa imo sang dinalan nga “sang akon kaugalingon nga tingug sa ila” sa Doktrina kag mga Kasugtanan 120?

Tan-awa man sa Malaquias 3:8–12.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 115:4–6.Posible ayhan sa inyo pamilya nga basahon ining mga bersikulo samtang nagatan-aw sang pagbutlak sang adlaw? Mahimo nga makabulig sa inyo nga hambalan kon ano ang buot silingon sang “magtindog kag magsilak” (bersikulo 5). Ukon pwede man ninyo hambalan kon daw ano ang magpangita sang palalipdan sa tion sang bagyo. Paano inang eksperiyensya daw pareho sang pagpangita sang “dalangpan” sa Simbahan? (bersikulo 6). Dayon pwede ninyo hambalan ang mga paagi nga makabulig ang inyo pamilya sa iban nga magamit ang dalangpan nga ginahatag sang Simbahan.

Doktrina kag mga Kasugtanan 117:1–11.Pwede nga ikumparar sang inyo pamilya ang “tulo gid lamang” sa butang nga mas “importante” (bersikulo 8), pareho sang isa ka galon nga tubig. Pwede ini magpadulong sa paghambalanay parte sa indi gawa importante nga mga butang sa aton mga kabuhi nga mahimo nagapugong sa aton sa pagbaton sang bugana nga mga bugay sang Dios.

Doktrina kag mga Kasugtanan 119.  Ano ang ginatudlo sang seksyon 119 kon ngaa kinahanglan naton magbayad sang ika-pulo? Ang magagmay nga kabataan makabenepisyo man sa leksyon nga nagagamit sang bagay: pwede mo sila hatagan sang magagmay nga mga bagay, buligan sila nga magsuma sang ika-napulo, kag hambalan sila kon ngaa nagabayad ka sang ika-pulo.  

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Paisoga ang pagsalig-sa-kaugalingon. “Kon [ang mga miyembro sang pamilya] may mga pamangkot, kon kaisa mas maayo pa nga tudloan sila kon paano magpangita sang mga sabat nga sila lang, imbes nga sabton dayon ang ila mga pamangkot” (Teaching in the Savior’s Way, 28).

Ang paghatag sang aton 10 porsyento sa Ginuo bilang ika-pulo nagabulig padayon sang Iya nagapangluwas nga buluhaton.